A deputada do BNG rexistrou unha batería de preguntas ao Ministerio para saber as datas concretas de inicio da execución dunha infraestrutura viaria necesaria e que leva anos en espera.
A deputada do BNG no Congreso, Olaia Fernández Davila, presentou unha iniciativa parlamentar na Cámara para preguntarlle ao Ministerio de Fomento en que data se vai licitar a variante da N-640, a variante de A Estrada, e se garantiza que se vai licitar neste ano esta esperada infraestrutura viaria.
A deputada do BNG explica que o proxecto de construción da variante de A Estrada leva anos no “limbo do inmaterial sen que se avance nin un ápice na súa realización”. Lembra que o BNG presentou numerosas iniciativas ao longo destes anos pero Fomento nunca pasou dos anuncios electorais.
Unha historia plagada de incumprimentos
Neste sentido, Davila teme que en pleno ano electoral “e a poucos meses da celebración das eleccións municipais de maio, anúnciase de novo a licitación das obras desa variante para o segundo semestre do ano. Outro anuncio máis na liña dos acostumados anuncios do Ministerio de Fomento, especialmente activo en período pre electoral e que agardamos que desta volta teña proxección futura”.
Así, sinala Olaia Fernández Davila que o Secretario Xeral de Infraestruturas mantivo unha xunta recentemente con membros da corporación local de A Estrada na que indicou que o Ministerio prevé licitar as obra no segundo semestre”. Máis as diversas vicisitudes polas que tivo que pasar este proxecto, provocaron que se teña que repetir o trámite da información pública da avaliación ambiental porque o que se fixo en 2009 superou a súa
vixencia de catro anos e debe adaptarse á nova normativa”.
A deputada do BNG pon de manifesto que nos Orzamentos para este ano, contémplase unha partida de 2,3 millóns. Unha das preguntas que formula a Fomento é se asegura a execución desta partida porque “a historia deste proxecto é unha historia plagada de boas palabras e caracterizada polos continuos incumprimentos. Por iso permanece sen executar a pesar do paso dos anos”.
Nesa liña, lembra que se trata dunha infraestrutura xestada hai xa 25 anos e que “resucitarse” cada vez que hai convocatorias electorais.
Razón pola que dirixe unha batería de preguntas ao Ministerio: “Vai Fomento a licitar as obras da variante de A Estrada neste ano? En que data e concreto? Garante o Ministerio que desta vez vai cumprir con total seguridade o anunciado e se van licitar as obras?”.
“Podemos confiar en que non se trate dun anuncio electoral que despois vai ser incumprido como sucedeu en reiteradas ocasións no pasado?”, inquire a deputada do BNG.
Redacción: BNG de A Estrada
