O PSOE da Estrada urxe o reforzo do mantemento na
estrada A Estrada – Santiago. Luis López Bueno considera que o corte ao
tráfico por causa dun vertido de combustible é un episodio puntual, pero
mantén que “continúa a ser un dos puntos negros da nosa rede viaria”.
López Bueno pretende que o alcalde contacte coa Consellería de
Infraestruturas para que se resolvan os problemas de sinistralidade que se
veñen dando no tramo entre Toedo e O Rollo, porque en palabras do
socialista «a Xunta de Galicia non está a facer o mantemento necesario para
que sexa un tramo seguro”.
O líder socialista apunta a dúas actuacións “urxentes” como son a dotación
de firme antideslizante entre Toedo e O Rollo e a un correcto mantemento
das marxes dese vial, en especial no tramo máis próximo a Toedo. Para o
voceiro existen “problemas manifestos” como que “as marxes non son
capaces de asumir toda a auga que corre cara o val, e polo tanto
prodúcense torrentes de auga que atravesan a calzada”.
A xuízo dos socialistas, ese problema ten unha solución sinxela que pasa
por que a Xunta “cumpra coas súas obrigas”. Recordan que se trata dunha
estrada pola que transitan entre 9.500 e ata 11.000 vehículos diarios e que
segundo os datos de Emerxencias A Estrada, o tramo de Toedo é o de máis
sinistralidade desa estrada.
Tamén valoran poñerlle solución a outros “despropósitos” como o entronque
entre a PO-841 e a PO-182 en dirección a Fafián, “é tan perigosa a entrada
no desvío como o propio cruce”. Para López Bueno a resposta a eses
perigos pasa por “incluír un carril de saída para os vehículos que se desvíen
dende cara San Xulián de Vea e deseñar un paso alternativo cara Fafián,
seguramente por baixo da estrada principal”.
Ademais diso, consideran que “se a autovía chega algún día” e finalmente
remata no Rollo, vai a ser un lugar de paso máis acusado se cabe e non se
pode permitir que a seguridade non estea garantida. López Bueno sostén
que as actuacións que reclama “non teñen un orzamento desorbitado” e
podería entrar no orzamento 2021 da Xunta de Galicia.
O voceiro socialista fai notar que no 2015 a Xunta decidiu dotou de firme
antideslizante un tramo moi reducido da PO-841, “é insuficiente e chegaron
tarde”, porque con anterioridade tratáranse con ese pavimento outros
puntos da mesma estrada.
