O BNG insta ao goberno do sr. López a que en lugar de soltar globos sonda sobre proxectos que agora mesmo non son prioritarios con respecto á rúa principal da vila, convén que se preocupe máis do mantemento necesario das infraestruturas existentes, que independentemente da súa suficiencia ou precariedade en canto ao seu volume, si que moitas delas se atopan nun estado pouco menos que de abandono.
Tócalle neste caso ao alumeado da rúa Calvo Sotelo.
Susana Camba, voceira nacionalista denuncia que o cambio a alumeado led que se levou a cabo nesta céntrica rúa, deixou sen arranxar precisamente as farolas avariadas. Ademais, o concello tampouco repuxo as farolas rotas ao longo dos últimos anos en distintos incidentes.
Hai dinámicas que o BNG considera inexplicables e que só se entenden desde un traballo municipal sen planificación nin identificación dos problemas.
Desde o BNG instamos por enésima vez ao goberno do Sr. López para que se tome en serio xa dunha vez o mantemento das infraestruturas e servizos a que teñen dereito os veciños e veciñas, mantemento ao que as responsabilidades contraídas nas urnas obrigan ao Sr. López e o seu goberno.
