Esta noite ás 20:30 horas o Museo do Moble e da Madeira acollerá á entrega do Premio Honorífico ao Labor das Mulleres da Estrada, que nesta segunda edición recaeu a título póstumo na empresaria estradense María Martínez Otero. O acto contará coa presenza do alcalde da Estrada, José López Campos, e con familiares da distinguida. Asimesmo, haberá varias actuacións musicais a cargo de estudantes do Conservatorio da Estrada.
• O xurado valorou o seu traballo para poñer en marcha unha empresa pioneira, xeneradora de emprego e que leva polo mundo o nome da Estrada mentres educaba aos seus fillos.
A empresaria estradense María Martínez Otero (Callobre, 1905-2000) será distinguida, a título póstumo, co Premio Honorífico ao Labor das Mulleres do Concello da Estrada, segundo decidiu o xurado da segunda edición deste galardón ben entrada a noite do venres. Deste xeito, María Martínez toma o testemuño de María del Carmen Zamar, tamén empresaria, do sector da panadería, que gañou este galardón na súa primeira edición.
O xurado do certame, que pretende consolidarse como un referente para recoñecer o labor fundamental das mulleres no desenvolvemento económico e social do concello estradense, estivo presidido pola concelleira de Benestar Social e Igualdade, Amalia Goldar, e contou coa presenza de representantes de todos os grupos municipais, do Centro de Información á Muller (CIM) e do tecido asociativo do municipio.
Este tribunal decidíu a concesión do premio nesta segunda edición, entre as oito candidatas presentadas, a prol de María Martínez Otero “por poñer os alicerces dunha gran empresa, pioneira, xeneradora de emprego no concello e que traballa no ámbito internacional levando por todo o mundo o nome da Estrada”. O xurado tamén valorou “o esforzo e a dificultade da época” na que esta empresaria estradense “botou a andar unha carpintería modesta en Callobre ao tempo que sacaba adiante e educaba aos seus fillos”. “Todos estabamos de acordo en que María Martínez ten moitos recoñecementos como empresaria, pero lle faltaba unha distinción polo seu bofacer como persoa e como muller», sinalou malia Goldar.
A entrega do premio terá lugar hoxe, ás 20.30 horas, nun acto aberto a toda a cidadanía no Museo do Moble e da Madeira da Estrada (MOME). O evento, que estará conducido pola presentadora estradense da TVG Marga Pazos, contará coa presenza do alcalde da Estrada, José López Campos, de membros da corporación municipal e de familiares de María Martinez, que serán os encargados de recoller o premio no seu nome. Ademais, estudantes do Conservatorio de Música da Estrada, coordenados polo seu director, Xavier Comesaña, serán os encargados de amenizar o acto coas súas interpretacións.
Muller loitadora María Martínez sempre foi unha muller moi loitadora, especialmente dende que enviudou ao pouco de pasar os trinta anos. Deste xeito, e mentres educaba aos seus fillos, puxo en marcha un pequeno taller de carpintería na súa casa natal de Pousada,
na parroquia de Callobre. A modesta empresa foi medrando polo esforzo e a boa calidade e deseño do produto. Xa en 1967, trasladouse a unha nave de 1.800 metros cadrados situada á saída da Estrada cara Pontevedra onde seguiu medrando ata converterse nunha referenza internacional do sector do mobiliario.
