A Estrada na Rede

 Medio Ambiente pecha o procedemento apoiándose nos informes
municipais.
 Os servizos técnicos municipais acreditaron a incompatibilidade do
proxecto co PXOM e cuestionaron que puidese acollerse á excepción
normativa prevista para integrar unha estación de servizo nun
establecemento comercial.
 O procedemento rexistrou 730 alegacións particulares, ademais das
presentadas por diferentes entidades e colectivos.

O Concello da Estrada coñeceu hoxe a resolución do
Servizo de Calidade e Avaliación Ambiental da Consellería de Medio Ambiente pola que se
declara a non procedencia da declaración de incidencia ambiental da actividade de
instalación de distribución polo miúdo de produtos petrolíferos, en réxime desatendido,
entre a Avenida Benito Vigo e a Avenida da Torre. A resposta da Xunta de Galicia ao proxecto
desta gasolineira na contorna da Baiuca pon fin ao procedemento e arquiva as actuacións
desenvolvidas. Contra esta resolución, que pon fin á vía administrativa, cabe recurso.
A devandita resolución de Medio Ambiente chega fundamentada nos informes técnicos
emitidos polo Concello da Estrada. Cómpre lembrar neste senso que os servizos técnicos
municipais sinalaron a incompatibilidade do proxecto co Plan Xeral de Ordenación
Municipal e cuestionaron que este puidese acollerse á excepción prevista no Real Decreto
6/2000, que permite a implantación de estacións de servizo vinculadas a determinados
establecementos comerciais. Nesta liña, estiman os técnicos que non queda acreditada a
integración funcional entre ambas as instalacións (a actividade comercial xa existente e a
pretendida gasolineira).
Esta argumentación queda recollida na resolución da Xunta, que cita expresamente os
informes remitidos polo Concello e sinala que non procede, en consecuencia, formular
declaración de incidencia ambiental, poñendo fin ao procedemento e arquivando as
actuacións.
A resolución resume tamén a importante resposta cidadá xerada por este expediente, xa
que o procedemento rexistrou en pouco tempo 730 alegacións particulares, ademais das
presentadas por diferentes entidades e colectivos.
Desde que tivo coñecemento da presentación do proxecto desta gasolineira ante a
Consellería de Medio Ambiente, o Concello da Estrada realizou un seguimento próximo da
súa tramitación. O goberno local foi consciente da sensibilidade e preocupación que esta
iniciativa espertou entre boa parte da cidadanía, especialmente pola proximidade da
parcela á escola infantil da rede autonómica A Galiña Azul e á zona residencial e de servizos
públicos da Baiuca, onde se atopan equipamentos como o centro de saúde ou os xulgados.
Ao longo deste proceso, o Concello actuou no ámbito das súas competencias, emitindo os
informes correspondentes e deixando que fosen os servizos técnicos municipais os que se
pronunciasen sobre a compatibilidade urbanística do proxecto. O goberno local agradece
agora a celeridade da Consellería na resolución do procedemento.

• O obradoiro conta con 20 participantes, todos na especialidade de Forestal
• Fernandez puxo en valor a importancia deste tipo de iniciativas orientadas á inserción laboral

O delegado territorial da Xunta en Pontevedra, Pablo Fernández, visitou hoxe os traballos que están a desenvolver os participantes no obradoiro dual de emprego ‘A Estrada Emprega Foresta’, na contorna da carballeira da Sagrada, na parroquia de Codeseda.

Durante a visita, puido coñecer de primeira man as actuacións que están a levar a cabo os 20 participantes da especialidade forestal, así como o desenvolvemento desta iniciativa formativa e laboral.

O delegado puxo en valor a importancia dos obradoiros duais de emprego como ferramentas para mellorar a cualificación profesional dos participantes, ao combinar formación teórica e práctica co desenvolvemento de traballos de interese para a contorna.

Así mesmo, destacou o papel destes programas na creación de oportunidades laborais e na mellora e conservación dos espazos naturais, ao tempo que contribúen a favorecer a inserción laboral e a dinamización do territorio.

 O alcalde quixo acompañala neste aniversario tan especial.
 Saludina é natural de Guimarei, pero fixo a súa vida na parroquia de
Cereixo.

María Dolores Saludina Chao Rivadulla naceu un día
como hoxe en Guimarei, aínda que a vida a levou a crear a súa propia familia na parroquia
estradense de Cereixo. O alcalde da Estrada, Gonzalo Louzao Dono, quixo acompañala neste
9 de novembro no que Saludina cumpre un século de vida e de experiencia.
«Cadroulle», di cando se lle pregunta cal é o truco para chegar aos 100 anos. Con todo, se lle
dá unha pensada, non tarda en matizar: «Traballar moito». “E abofé que si. Traballou sen
parar ata ben entrados os 90 anos. Foi unha labrega coma tantas outras que deixou as mans
e as engurras na terra”, explica unha das súas netas, a xornalista Laura Filloy.
Saludina é filla dun emigrante que fundou unha carboeira en Cuba e morreu novo ao outro
lado do Atlántico. “A miña bisavoa sacou adiante cinco fillas con tesón e perseveranza. Miña
avoa debeu herdar ese carácter resiliente que a fai afrontar as dificultades dende a
resignación. As perdas deixan cicatrices no corpo e moitas bágoas, pero agora desfruta coas
súas bisnetas Olivia e Amelia como unha vez o fixo cos seus netos. Non creo que ningún de
nós puidese ter unha avoa mellor”, comenta Filloy con orgullo.
O alcalde non quixo perder hoxe ocasión de visitar a Saludina no seu día, aínda que agora a
vida a levase a residir coa súa filla Teresa na veciña localidade de Pontevea. O rexedor
lembrou os anos nos que os dous foron veciños en Cereixo e entregoulle a esta centenaria
un ramo de flores no nome de todos os estradenses para celebrar as 100 velas que xa coroan
a súa torta.

Saludina foi a cuarta de cinco irmás. Agardou durante anos polo reloxo que lle había traer
un pai que viu por última vez xusto antes de que estalase a Guerra Civil e que endexamais
volveu. A morte convertería a ausencia en loito.
Esta estradense casou con Manuel Filloy Sánchez tamén un día como hoxe, pero de 1957
(hoxe sería o seu 69 aniversario de voda). Tiveron dous fillos, cinco netos e dúas bisnetas. O
domingo houbo unha primeira celebración coa familia e hoxe, o mesmo día do seu
aniversario, Saludina estaba lista para soprar as velas.

Se o traballo é receita para cumprir anos con vitalidade, o chocolate e o fútbol son
ingredientes para a que vida resulte máis estimulante. Saludina é moi futbolera e gran
afeccionada ao Real Madrid.
“Hai uns anos fíxenlle prometer que non podía morrer ata facer os 100 anos”, comenta a
súa neta. “Agora dime que xa pode marchar tranquila. Eu respondo que non, que hai que
renegociar os termos do contrato mentres penso, unha e outra vez: por favor, sé eterna».

 Refórzase o control da rede e mantéñense as medidas de aforro de auga.
 O Concello aposta polo encoro de Pedrouzos, con capacidade para
15.000 metros cúbicos, para poder reducir a captación de auga no río
Umia.

Aínda que as previsións meteorolóxicas fan agardar
a chegada das precipitacións para os vindeiros días, o Concello da Estrada segue moi
pendente de como se comporta o consumo da auga, conservando as prevencións e
restricións de aplicación xeneralizada logo de que se declarara a situación de prealerta por
seca prolongada. Con todo, o dato aportado hoxe polo departamento de Servizos
Municipais apunta unha notable redución no consumo diario: dos 3.400 metros cúbicos dos
meses de verán baixouse ata os actuais 2.500 metros cúbicos por xornada.
O concelleiro Óscar Durán sinalou hoxe que o Concello continúa mantendo unha redución
de regos en parques e xardíns, unha redución do consumo de agua nas instalacións
municipais e unha diminución dos baldeos, ademais de volver insistir na petición de que a
veciñanza realice un consumo responsable de auga.
Neste senso, o titular de Servizos Municipais quixo subliñar tamén a importancia de que o
consumo diario se teña reducido sensiblemente. O edil achacou esta situación ás propias
medidas de contención adoptadas, ás que sumou as tarefas continuadas de rastrexo e
control de fugas; os traballos de limpeza e mantemento dos mananciais que abastecen a
traída municipal ou o feito de que o Concello apostase por empregar o encoro de Pedrouzos
(cunha capacidade de 15.000 metros cúbicos). Esta última decisión tomouse para reducir a
captación no curso do río Umia.
Neste senso, cómpre lembrar que as últimas batidas nocturnas realizadas na rede de
abastecemento permitiron detectar ata oito pequenas roturas na rede, recuperando máis
de 400 metros cúbicos de auga.
Por outra banda, Óscar Durán informou tamén de que nos últimos días o Concello tivo que
subministrar auga ao colexio do Foxo, onde á escaseza no pozo derivou nun problema co
motor que bombea a auga. A situación está xa camiño de resolverse.

O Obradoiro de Emprego “A Estrada Emprega
Foresta” emprendeu esta semana unha completa intervención de mellora nas beirarrúas do
polígono industrial de Toedo, o maior parque empresarial do municipio estradense. Os
alumnos-traballadores dos dous módulos deste programa están implicados nunha obra que
terá continuidade pola contorna da central de Emerxencias A Estrada.
Os traballos que se están realizando combinan medios mecánicos e manuais. Ademais
dunha roza intensiva nesta zona, o Obradoiro está procedendo a unha limpeza manual para
extraer dende a raíz plantas arbustivas, empregando de seguido cepillos para eliminar toda
a terra que queda na superficie das beirarrúas. De igual xeito, o alumnado está facendo uso
de pantallas durante a limpeza mecánica para evitar que algún material que salte durante a
roza poida afectar a vehículos.
A actuación esténdese tamén ás rotondas do polígono. Unha vez completada a mellora, o
Obradoiro de Emprego ten programado actuar en toda contorna de Emerxencias A Estrada,
con labor de limpeza vexetal e roza.

O conselleiro de Educación, Ciencia, Universidades e FP, Román Rodríguez, visitou hoxe as dúas aulas de Educación Especial que a Asociación de Pais de Persoas con Trastorno do Espectro Autista (Aspanaes) vai habilitar na Estrada nun local que ten previsto cederlle o Concello. Na súa visita, na que tamén participaron o alcalde, Gonzalo Louzao, e o director xeral de Centros e Recursos Humanos, Jesús Álvarez, o titular do departamento educativo da Xunta abordou co presidente da entidade, Ignacio Labella, as vías de colaboración para que estas aulas de atención á diversidade estean a disposición do alumnado que o precise, se así o elixen as familias.

Román Rodríguez explicou que se trata dun proxecto piloto que vai permitir a descentralización de servizos de atención á diversidade, co obxectivo “de achegalos ás familias, facilitando a conciliación”, sinalou. A previsión é que as dúas aulas, que poderían escolarizar arredor de 10 alumnos, entren en funcionamento o vindeiro curso 2027/28, para o que Aspanaes está agora a realizar as tarefas de acondicionamento das instalacións, sitas nos antigos xulgados, para posteriormente acometer o equipamento das mesmas.

O conselleiro explicou que a Consellería xa colabora coas diferentes instalacións educativas especializadas das que dispón Aspanaes en diferentes puntos de Galicia. O obxectivo é ofrecer ás familias diferentes opcións educativas axustadas ás necesidades dos seus fillos, ben sexa a través de escolarización en centros ordinarios, na que Galicia é referente a nivel estatal co 94,2% do alumnado con necesidades educativas especiais escolarizado; ben mediante recursos de escolarización combinada, como as Aulas Senda, ou ben a través de centros de Educación Especial.

Neste sentido, Román Rodríguez, destacou o traballo de Aspanaes nos últimos anos, “fundamental para favorecer a inclusión do alumnado”, e agradeceu ao Concello da Estrada a súa boa disposición a colaborar para facer realidade esta iniciativa.

Aínda que as previsións meteorolóxicas fan agardar
a chegada das precipitacións para os vindeiros días, o Concello da Estrada segue moi
pendente de como se comporta o consumo da auga, conservando as prevencións e
restricións de aplicación xeneralizada logo de que se declarara a situación de prealerta por
seca prolongada. Con todo, o dato aportado hoxe polo departamento de Servizos
Municipais apunta unha notable redución no consumo diario: dos 3.400 metros cúbicos dos
meses de verán baixouse ata os actuais 2.500 metros cúbicos por xornada.
O concelleiro Óscar Durán sinalou hoxe que o Concello continúa mantendo unha redución
de regos en parques e xardíns, unha redución do consumo de agua nas instalacións
municipais e unha diminución dos baldeos, ademais de volver insistir na petición de que a
veciñanza realice un consumo responsable de auga.
Neste senso, o titular de Servizos Municipais quixo subliñar tamén a importancia de que o
consumo diario se teña reducido sensiblemente. O edil achacou esta situación ás propias
medidas de contención adoptadas, ás que sumou as tarefas continuadas de rastrexo e
control de fugas; os traballos de limpeza e mantemento dos mananciais que abastecen a
traída municipal ou o feito de que o Concello apostase por empregar o encoro de Pedrouzos
(cunha capacidade de 15.000 metros cúbicos). Esta última decisión tomouse para reducir a
captación no curso do río Umia.
Neste senso, cómpre lembrar que as últimas batidas nocturnas realizadas na rede de
abastecemento permitiron detectar ata oito pequenas roturas na rede, recuperando máis
de 400 metros cúbicos de auga.
Por outra banda, Óscar Durán informou tamén de que nos últimos días o Concello tivo que
subministrar auga ao colexio do Foxo, onde á escaseza no pozo derivou nun problema co
motor que bombea a auga. A situación está xa camiño de resolverse.