A Estrada na Rede

 Serán obra do artista Pablo Loyola e executaranse nunha fachada da
Rúa 56 e no lateral do Teatro Principal.
 O mural da Rapa das Bestas comezará a pintarse xa o vindeiro luns.
 O traballo que lembrará a García Barros elabórase nun 2026 no que se
conmemora o 150 aniversario do nacemento do célebre escritor de
Berres, inmortalizado no teatro no que cada ano se entrega o premio
literario que leva o seu nome.

O alcalde da Estrada, Gonzalo Louzao Dono, desvelou
hoxe que o Concello promoverá a creación de dous grandes murais artísticos en espazos
estratéxicos do casco urbano, co obxectivo de poñer en valor dous importantes
emblemas culturais do municipio a través da arte urbana. A primeira destas obras
comezará a executarse xa o luns e os dous serán traballos asinados polo recoñecido
grafitero, muralista e ilustrador Pablo Loyola.
O primeiro dos murais situarase na Rúa 56, chegando xa á contorna da Praza de Galicia
e unha das vías de acceso ao centro da capital estradense. Estará dedicado á Rapa das
Bestas, Festa de Interese Turístico Internacional e un dos grandes símbolos culturais e
patrimoniais da Estrada. A obra buscará render homenaxe a esta tradición única,
profundamente vencellada á historia e á identidade colectiva do municipio.
“Quero agradecerlle publicamente á comunidade de veciños deste edificio que nos
cedera a fachada (que queda subindo á man esquerda) para facerlle esta homenaxe á
nosa Rapa das Bestas. Será un mural a tamaño completo que representará aos cabalos
no curro cun dos aloitadores”, avanzou.
O segundo dos murais, tamén de gran formato, realizarase nunha das fachadas do
Teatro Principal e estará dedicado ao escritor Manuel García Barros, coincidindo nun
ano no que se conmemora o 150 aniversario do seu nacemento. “Este ilustre estradense
da parroquia de Berres merecía estar representado no lugar no que, dende hai máis de
tres décadas, se entrega o prestixioso galardón literario que leva o seu nome”, sinalou
o alcalde.

Esta segunda creación incluirá tamén diversos emblemas locais que reforzan o vínculo
coa historia e o patrimonio estradense, como a igrexa de San Paio, o Pazo de Oca, a
ponte medieval de Pontevea ou o propio consistorio. Como sinalou o xefe do executivo
local, a intervención artística incorporará a imaxe do autor no propio teatro no que cada
ano se entrega o premio de novela que leva o seu nome.
Gonzalo Louzao explicou tamén que estas dúas obras, que agarda teñan o impacto
desexado para homenaxear estes dous referentes culturais, contan coa implicación
económica da Deputación de Pontevedra, a través do contrato con Turismo Rías Baixas.
Con esta iniciativa, o Concello aposta pola arte urbana como ferramenta de
dinamización cultural, mellora da paisaxe urbana e posta en valor dos que, sen dúbida,
son dous representativos emblemas locais.

 Busca favorecer a conciliación laboral e familiar durante a tempada
estival e está dirixido a nenos e nenas de entre 5 e 15 anos.
 Os participantes poderán solicitar quendas ou quincenas en xullo e
agosto, pechándose o prazo o 31 de maio.
 Custará 40 euros por quincena, con bonificacións para familias
monoparentais e numerosas ou para aquelas nas que haxa varios
irmáns matriculados.
 As solicitudes que incumpran o prazo, por anticipación ou atraso,
quedarán fóra.
 Este campamento está dirixido especificamente a empadroados no
Concello da Estrada.

O Departamento de Deportes do Concello da Estrada
abrirá o luns o Campus Deportivo de Verán, unha actividade que buscará favorecer a
conciliación de vida laboral e familiar dos estradenses durante os meses de xullo e
agosto. O responsable desta área municipal, Ismael Pena, presentou a 17ª edición do
programa, que está dirixido a nenos e nenas de entre 5 e 15 anos (nos dous casos
cumpridos a 1 de xullo de 2026). Compre sinalar tamén que este campamento está
especificamente dirixido a empadroados no Concello da Estrada.
Como vén sendo habitual, a inscrición realizarase por quincenas, cun prezo de 40 euros
por participante e quincena. O Concello reserva bonificacións sobre esta tarifa. Deste
xeito, as familias monoparentais terán un desconto do 20% sobre o prezo (pagarán 32),
ao igual que as familias numerosas, que terán un desconto do 20% en cada membro.
Ademais, as familias con dous irmáns matriculados no Campus Deportivo de Verán terán
unha redución do prezo orixinal do 10% para cada membro (pagarán 36 euros cada un).
Os participantes poderán solicitar as quendas/quincenas que consideren necesarias ata
un máximo de 4, cubrindo na folla de inscrición a orde de prioridade. Poderán entrar
nas quendas non preferenciais sempre e cando existan prazas vacantes.
Todas as actividades do Campus Deportivo están especialmente dirixidas ás idades e
desenvolvemento psíquico-físico das persoas participantes e todas elas desenvolven

tamén, de xeito transversal, valores de disciplina, esforzo, perspectiva de xénero,
integración, hixiene e respecto ás normas en base as idades e características individuais
dos inscritos.
Deste xeito, o programa deportivo que fiará esta convocatoria está orientado a crear
hábitos saudables e activos, priorizando as actividades ao aire libre. Os horarios e a
programación de cada quenda faranse en función das idades. En xeral, a oferta do
Campus inclúe fútbol, baloncesto, atletismo, bádminton, actividades acuáticas, tenis,
atletismo e xogos predeportivos de iniciación para os máis pequenos. A maiores
realizarase unha excursión en cada mes ao parque acuático de Cerceda, nunha data por
determinar.
As quendas deste ano serán as seguintes:
• 1ª QUENDA: do mércores 1 de xullo ao mércores 15 de xullo.
• 2ª QUENDA: do xoves 16 de xullo ao venres 31.
• 3ª QUENDA: do luns 3 de agosto ao venres 14.
• 4ª QUENDA: do luns 17 de agosto ao luns 31.
As solicitudes de inscrición deberán presentarse obrigatoriamente a través da sede
electrónica do Concello da Estrada (https://aestrada.sedeelectronica.gal) ou, en casos
excepcionais, no Rexistro Xeral do Concello da Estrada, en horario de 9.00 a 14.00 horas
de luns a venres. O prazo de inscrición arranca o luns 18 de maio e irá ata o domingo 31
deste mesmo mes. As solicitudes que incumpran o prazo, por anticipación ou atraso,
quedarán automaticamente fóra.
Unha vez confirmada pola organización a participación do neno/a, deberase realizar o
pagamento, de maneira presencial na oficina do Banco Sabadell ou de xeito telemático,
para achegar despois ou enviar o xustificante de pago ao departamento de Deportes (no
4º andar do Concello ou entregarllo o primeiro día da actividade entregarllo ao monitor).
Este é o número de conta para o pago (BANCO SABADELL): ES78 0081 2208
230001012603
No tocante á documentación que é preciso presentar: ficha de inscrición coa foto do
neno/a; DNI do menor; DNI do nai, pai ou titor, tarxeta sanitaria do menor, libro de
familia ou documento que acredite a situación de familia numerosa ou monoparental e
certificado médico no caso de enfermidades crónicas ou outras afeccións.

 Ultiman os detalles nas zonas axardinadas e na fonte que recupera este
emblemático cruce de camiños, xerme urbanístico da Estrada.
 Veciños deste enclave e comerciantes da contorna serán convidados
especiais na apertura despois de varios meses de obras

A Praza de Galicia e a súa contorna quedará este sábado
completamente aberta á cidadanía, que poderá comezar a desfrutar dun espazo no que
o peón fará seu un espazo emblemático que foi xerme urbanístico da capital estradense.
Ás 10.00 horas haberá un pequeno e simbólico acto de inauguración, aberto a toda a
veciñanza, pero no que o goberno que encabeza Gonzalo Louzao quere dar especial
protagonismo aos veciños da Praza de Galicia e aos comerciantes da contorna.
“Poremos de longo o fin destas obras. Tentamos que a actuación fora o menos molesta
posible, pero sabemos que houbo cortes de tráfico e certas molestias ante as que
queremos recoñecer, nova e publicamente, a sensibilidade que amosaron veciños e
comerciantes. A todos eles convidarémolos expresamente, a través dunha carta que
recibirán estes días, a participar nesta inauguración”, explicou hoxe o alcalde
estradense.
“Este espazo público volve a recobrar o seu protagonismo como naceu, como ese cruce
de camiños que propiciou o desenvolvemento da nosa vila e faino tamén como a guinda
dun proceso de peonalización que comezou en rúas como Ulla e Calvo Sotelo. Esta nova
Praza de Galicia é máis dos estradenses que nunca”, destacou o mandatario.
Sobre o terreo están xa ultimándose as obras, concentradas nesta recta final nas zonas
axardinadas e tamén na nova fonte. Neste elemento quíxose exaltar o carácter histórico
deste enclave recuperando elementos da fonte orixinal que naceu nesta praza e que
logo foi trasladada ata a alameda municipal.
Atrás quedan meses de obras, postas en marcha no outono, para reformar e humanizar
a Praza de Galicia e a súa contorna. Os traballos, executados pola firma Taboada y
Ramos, puxeron tamén a peonalización do primeiro tramo da Rúa Don Nicolás,dende o
cruce coa Calvo Sotelo ata a súa intersección con Marqués de la Vega de Armijo.

As obras, cun investimento de máis dun millón de euros, foron financiadas no marco do
convenio asinado entre o Concello da Estrada e a Deputación de Pontevedra, que
aportou 807.000 euros a esta actuación a través do Plan Extra.

Sábado 20 de xuño. É a data para unha nova edición, a
13ª da carreira popular Estranoite, unha proba deportiva de carácter lúdico que o
Concello organiza en colaboración co Atletismo A Estrada. O concelleiro estradense de
Deportes, Ismael Pena, presentou o regulamento dunha proba que ten entre os seus
grandes atractivos o feito de que se desenvolve en horario nocturno, converténdose
nun preludio para as festas patronais de San Paio.
Como vén sendo habitual, a carreira realízase por un circuíto urbano de asfalto de 4
quilómetros, se ben na proba absoluta a distancia que deberán percorrer os
participantes é de 8 (darán dúas voltas). Ademais, tanto a proba absoluta como as
probas escolares celebraranse en circuítos pechados e valados. Os percorridos estarán
debidamente indicados, controlados e sinalizados e proba estará controlada polo
Comité Galego de Xuíces da Federación Galega de Atletismo (FGA).
Ismael Pena sinalou que a inscrición quedará aberta mañá mércores. A única vía para
realizala será a pasarela de pagos incluída na páxina web www.emesports.es. Estará
operativa ata as 23.59 horas do mércores 17 de Xuño de 2026. Para calquera dúbida
relacionada co proceso de inscrición os interesados poderán dirixirse ó teléfono
886.153.589. Asemade, para calquera cuestión relacionada coa organización da proba
poderán dirixirse ao 986 570 030 ou no correo deportes@aestrada.gal.
O concelleiro de Deportes indicou tamén que na XIII Estratoite, tamén coñecida como a
Nocturna Estradense, haberá un límite de 600 inscritos na proba absoluta.
Poderán participar na carreira todas as persoas, federadas ou non, das categorías de
pitufo (atletas nados no ano 2022 e posteriores) ata Master B (nados dende 1979 e
anteriores).
A primeira saída darase ás 21.00 (Pitufos), escalonando saídas para as categorías de
Pitufo a Sub 14 ata as 22.00 horas. A entrega de premios para as categorías inferiores
será ás 22.20. Ás 23.00 sairán xuvenís (sub 18), junior (sub 20) e os atletas da categoría
absoluta (promesa, senior e master), con dúas voltas ao circuíto. A entrega de premios
da carreira absoluta será ás 0.15.

O regulamento descrito hoxe polo concelleiro de Deportes recolle que a carreira se
realizará en todo momento pola vía de tráfico rodado, agás nas zonas peonís sinalizadas
como circuíto. Isto implica que está prohibido usar como zonas de carreira as beirarrúas,
glorietas, áreas axardinadas e todo o que exceda os límites do circuíto sinalizado.
Incumprir esta norma, así como recortar o trazado oficial, pode implicar a
descualificación das persoas infractoras
En canto ao prezo da inscrición, a de adultos (categoría xuvenil e superiores) será de 8
euros. As escolares (de pitufo a cadetes) terá carácter gratuíto.
Todos eles deberán realizar a retirada de dorsais o día da proba, a partires das 19.00
horas. O local habilitado pola organización a estes efectos será a Sala Abanca, punto de
control da proba. Ademais, na proba absoluta (23.00 horas) os participantes estarán
controlados a través dun chip que se entregará a cada participante xunto co dorsal. Estes
dous elementos son persoais e intransferibles.
Premios
Entrando xa no apertado de premios e trofeos, a Estranoite contempla un obsequio
conmemorativo da proba que se entregará no momento de recoller o dorsal. A maiores,
haberá trofeos ás tres persoas que se clasifiquen en primeiro lugar en todas as
categorías (excepto en pitufo e prebenxamín, nas que non haberá trofeos e si medalla
para todos os participantes).
Na proba de 4 quilómetros haberá tamén premios para os tres primeiros clasificados,
con independencia da categoría. A maiores están contemplados premios para os os tres
primeiros estradenses en cruzar a liña de meta na proba absoluta.
As persoas que gañen a carreira absoluta terán como agasallo unha caixa degustación
de sidra da Estrada. Haberá tamén trofeo para o club ou equipo que obteña a menor
puntuación cos seus 6 primeiros participantes que finalicen a proba absoluta Cómpre
indicar que os clubs/equipos non teñen porque ser oficiais e/ou federados, poden ser
grupos de amigos/as que formalicen a inscrición baixo o nome dun equipo.
De igual xeito, a organización reserva un trofeo Master para o participante de maior
idade que finalice a proba.

GALEGAS, QUE SE ANTICIPA AO COINCIDIR COA FESTA DO SALMÓN

 Será ás 11.00 horas diante do monolito a Marcial Valladares.
 A obra “As mil e unha” repasará o xoves a traxectoria da xornalista
Begoña Caamaño.

A comunicadora, actriz e presentadora Neves Rodríguez
foi e escollida este ano para dar lectura ao pregón das Letras Galegas na Estrada, nun 17
de maio que coincide no municipio coa celebración da Festa do Salmón. Será a tamén a
condutora do espazo “É de mañá”, na emisora municipal Radio Estrada, a encargada de
dirixirse a todos os estradenses nun día no que Galicia enteira lembra e homenaxea á
xornalista Begoña Caamaño.
O pregón das Letras Galegas está programado este ano cunha hora de adianto con
respecto ao horario habitual. Deste xeito, no canto das 12.00 horas, o acto co que A
Estrada conmemora cada 17 de maio as Letras Galegas será nesta ocasión ás 11.00. O
que non mudará é o espazo: será diante do monolito que lembra a Marcial Valladares
Núñez, ata o de agora o único estradense ao que lle dedicaron as Letras Galegas (no ano
1970).
O acto estará amenizado, coma de costume, pola Banda de Gaitas de Barbude. Despois
dunha breve presentación, Neves Rodríguez dará lectura ao pregón, seguida da
intervención institucional do alcalde, Gonzalo Louzao, e da realización dunha ofrenda
floral. Será ese o momento máis emotivo da celebración, xusto cando comece a soar o
Himno Galego.
En todo caso, aínda coincidindo co nutrido programa de actos da Festa do Salmón, as
Letras Galegas teñen tamén outros eventos especificamente asociados na programación
cultural destes días. A elas se vencella a aposta municipal por actividades como o Festival
Folclórico do que a agrupación Tequexetéldere é anfitrioa ou o propio concerto de
Mondra, que chega por medio da Deputación de Pontevedra.
Pero, ademais, este xoves a celebración das Letras Galegas terán unha antesala na
Estrada da man do espectáculo “As mil e unha” que, da man das historias e a música,
achegarase un chisco máis ao legado da admirada Begoña Caamaño. Trátase da nova
sesión da narradora oral Vero Rilo na que, acompañada polo músico Luis Iglesias, achega
un espectaculo de narración oral e música para público familiar. A peza chega ao

municipio estradense da man da Secretaría Xeral da Lingua. Será ás 19.00 horas, no
Teatro Principal e con entrada de balde.

 Serán 800 metros cadrados de recito para acoller toda a programación
prevista entre a Festa do Salmón e a Feira da Sidra.
 O Concello canaliza cara a hostalería o primeiro patrocino privado
ofrecido para a Festa do Salmón, por parte da firma Vegalsa-Eroski.

A Praza da Constitución é xa dende esta mañá o
escenario para a montaxe da carpa de gran formato que ao longo das vindeiras semanas
se converterá nun espazo de dinamización sociocultural a pé de rúa, cunha
programación que comezará a debullarse este venres e que terá como eixos principais
a Festa do Salmón e a Feira da Sidra. Será unha carpa que medra con respecto á do
pasado ano e que volve a apostar por programar estas citas tan destacadas do
calendario estradense aos pés da casa consistorial.
A carpa terá unhas dimensións de gran envergadura. Serán 800 metros cadrados (40×20)
destinados a acoller toda a programación prevista, preservando o seu desenvolvemento
das posibles condicións meteorolóxicas adversas. Serán propostas para todos os gustos
e idades por espazo dun mes, que arrancan este venres con Latexo Fest e chegarán ao
13 de xuño.
Por outra banda, o concelleiro de Promoción Económica, Óscar Durán, explicou hoxe
que o empuxe que se lle está dando á Festa do Salmón está calando tamén no sector
privado. Indicou que a firma Vegalsa-Eroski solicitou este ano colaborar, pola vía do
patrocinio, coa principal celebración gastronómica do Concello da Estrada.
Segundo precisou o edil, o Concello quixo que este apoio económico chegue
directamente aos hostaleiros que participarán na degustación popular do domingo.
Cada un deles percibirá un vale de 60 euros para consumir nos establecementos da
citada firma de supermercados.
Durán quixo agradecer o interese amosado por Vegalsa-Eroski e recoñeceu que a
atracción que están esperando algunhas das citas do calendario estradense están tamén
suscitando expectación noutras firmas, con propostas que están agora mesmo en fase
de estudo.

A música de banda soa con forza na Estrada. O vindeiro 17 domingo 24 de maio, a partir das AS 18.00 horas, a Praza da Constitución converterase nun gran escenario para celebrar a segunda edición dun festival que segue medrando dentro da programación cultural e que encherá de vida a gran carpa que nos acompañará entre a Festa do Salmón e a Feira da Sidra.

Participarán:
 Banda de Música Unión de Guláns
 Banda da Escola de Música de Rianxo
 Banda de Música Municipal da Estrada

Un encontro pensado para todos os públicos e idades, que ademais servirá como homenaxe ao músico Rogelio Groba.

#AEstrada #bandasdemúsica