A conexión coa AP-53 no Alto da Rocha é unha selva abandonada pola Xunta

“A Xunta do PP non só abandona o noso concello nos Orzamentos, tamén nas infraestruturas que son da súa titularidade”, denuncia o concelleiro do BNG, Xosé Magariños logo de que veciños e veciñas que utilizan a diario a PO-505 entre o Alto da Rocha e entrada da AP-53, e que tamén dá servizo á parroquia de Orazo, puxeran en coñecemento do BNG o mal estado desta estrada.

Xosé Magariños explicou que “a estrada PO-505 é unha selva, está practicamente tomada polos toxos e todo tipo de especies arbustivas”. “Hai moitos meses que esa estrada non ve unha desbrozadora da Xunta nin en pintura”, afirma o concelleiro do BNG, “tal é a altura que teñen os arbustos que tapan por completo case todas os sinais de tráfico, por moi grandes que estas sexan”. “É como meterse nun túnel”, indicou Magariños.

“Cústanos crer que non lle chegaran ao alcalde queixas o estado lamentábel desta estrada”, afirmou Magariños, “unha estrada da Xunta non pode estar nestas condicións, e menos cando é a entrada dunha autoestrada, a parte de dar servizo aos veciños e veciñas de Orazo”. “Por iso”, engadiu o concelleiro nacionalista, “desde o BNG instamos ao alcalde a levantar o teléfono e chamar á Xunta para que pasen unha desbrozadora antes de que remate o mes, porque isto é unha vergonza, non se poden ter as estradas neste estado polo perigo que conleva para os condutores, non se ven nin os sinais de tráfico”.

“Por outra parte”, explicou Magariños, “insistimos unha vez máis na necesidade de cambiar o acceso á PO-505 no Alto da Rocha”. “Tal e como está é infranqueábel para os camións pesados que queiran acceder á autoestrada Santiago-Ourense”, afirmou o concelleiro do BNG.

—