O PSOE da Estrada valora positivamente a adhesión do
Concello ao plan de rescate da Xunta de Galicia. López Bueno considera que
A Estrada “xa vai moi tarde” no apoio ao tecido comercial e hostaleiro, pero
entende como positiva a medida.
Tamén remarca que dentro das medidas económicas propostas polos
socialistas ao inicio da pandemia xa existía unha liña de financiamento para
comerciantes e hostaleiros. Recoñece que “non podía ser moi ampla” pola
escasa capacidade de xestión do goberno local, pero apunta que se propuxo
en termos semellantes á que “con un ano de retraso” dará o goberno local.
Nese sentido, o líder socialista insta ao goberno municipal a dotar a liña de
axudas por riba do mínimo de 1.000 euros, xa que “hai negocios que
precisan moito máis”.
López Bueno aféalle a López Campos que continúe “dando volantazos” nas
súas posicións políticas. O voceiro asegura que os bandazos do alcalde
reflexan que o goberno local non ten criterio, non ten plan e non ten
habilidade para apoiar aos negocios dende o Concello. Afirma que a
adhesión á plataforma da Xunta para o Plan de Rescate intenta tapar o
escaso apoio que lle brindou a comerciantes e hostaleiros durante a
pandemia.
E é que durante os últimos 12 meses o alcalde amosou moitas caras, pero
en ningunha delas se comprometeu co comercio nin cos hostaleiros. O líder
socialista opina que “só fixo declaracións, non puxo en marcha ningunha
medida”.
Primeiro consideraba innecesario que o Concello apoiara economicamente, e
negouse a tomar en consideración as propostas socialistas para auxiliar a
delicada situación que atravesaban os negocios locais.
Co paso dos meses o alcalde cambiou de postura declarando que “era
necesario favorecer a actividade dos comercios”. En cambio, López Campos
negouse a activar a proposta dos vales de compra para o comercio local na
que o PSOE da estrada foi pioneiro. Esa mesma medida colleitou éxitos
rotundos en concellos como O Barco de Valdeorras ou Vilagarcía de Arousa.
Mentres tanto, na Estrada ese apoio aos negocios “rematou cando se
pecharon as edicións dos periódicos”.
Agora o alcalde dá un novo “volantazo” e accede a outorgar axudas
directas. López Bueno recalca a necesidade desta medida para “aliviar” a
delicada situación de comerciantes e hostaleiros. Remarca que os datos que
ofreceu ACOE durante estes meses son indiscutibles e manifestan
claramente a necesidade de apoio económico.
López Bueno teme o peche de negocios porque “o comercio e a industria da
Estrada son unha engranaxe” e explica que “cando un negocio pecha, o
resto tamén o notan”.
