Desenvolverase ao longo de toda a xornada nas modalidades de bailes
estándar, latinos, danza coreográfica e bailes caribeños.
A Estrada acolle este domingo unha nova edición, a
número 21, do afamado Trofeo SondoDance de baile deportivo, unha competición na
que está prevista a participación de preto de 400 bailaríns dende primeira hora da mañá.
O certame, organizado pola escola SondoDance coa colaboración do Concello da
Estrada, desenvolverase no pavillón Manuel Coto Ferreiro, dende as 10.00 horas.
A proba é puntuable para campionato organizado pola Federación Galega de Baile
Deportivo e tamén para o estatal. Coincide na súa convocatoria dominical coa Festa do
Salmón, sumando un atractivo máis á Estrada nesta fin de semana, xa que o Trofeo
SondoDance remata todos os anos por se converter nunha espectacular cita deportiva
que fai gozar como espectadores mesmo a aquelas persoas alleas a esta disciplina.
Os bailaríns competirán nas modalidades de bailes estándar (vals, quickstep, tango,
foxtrot e vals vienés) e latinos ( cha-cha-chá, rumba, samba, jive e pasodoble), aos que se
sumarán a danza coreográfica e tamén os bailes caribeños (salsa, bachata e merengue).
Tanto a danza coreográfica como os ritmos caribeños veñen incorporándose nas últimas
convocatorias, incrementando o espectáculo e a vistosidade.
A participación estradense chegará da man das parellas que neste momento ten a escola
SondoDance en fase de competición, máis de media ducia. En coreográfica debutará un
dúo.
Arrancando ás 10.00 horas, está previsto que a competición, na que participarán
bailaríns de distintos puntos do país, se prolonguen ata última hora da tarde no Coto
Ferreiro.
