O Recinto Feiral da Estrada estreará a 38ª edición da Feira do Moble de Galicia o vindeiro 17
de setembro, ás 11.00 horas. Este encontro sectorial contará con medio centenar de firmas
expositoras que mostrarán as últimas novidades do mercado mobiliario doméstico, así como de
menaxe, descanso, tapicería, comercio, complementos e antigüidades.
A Feira do Moble reafírmase como unha plataforma de referencia para descubrir as últimas
tendencias do sector, cunha ampla representación de firmas procedentes de distintos puntos do
territorio peninsular, como Asturias, Madrid, León, Toledo, Barcelona, Biscaia ou Cidade Real.
O groso dos expositores, con todo, procede de Galicia.
Precisamente, nesta edición, preto do 20% das empresas participantes son estradenses. Entre
elas atópanse Artest, Irmáns Picaño, a Asociación Cultural Bonsai A Estrada, Micar, La Tribu,
Varela Motor, o anticuario Juan C. Rodríguez Seijo ou a Pulpería Porta, que permitirá aos
visitantes completar a súa experiencia coa oferta gastronómica.
Entrada de balde o xoves 17 e venres 18
Ao longo das catro xornadas, do xoves 17 ao domingo 20 de setembro, en horario
ininterrompido de 11.00 a 20.00 horas, os visitantes poderán descubrir unha ampla oferta
de produtos e propostas para o fogar, con pezas que combinan funcionalidade, estética e
comodidade. Así mesmo, o xoves e venres a entrada á feira será gratuíta.
A programación completarase con propostas para todos os públicos, incluíndo espazos
dedicados ao descanso, a decoración, a menaxe, a tapicería, as antigüidades, os complementos
e o comercio. Ademais, haberá sorteos diarios e un gran sorteo dunha viaxe, así como
espectáculos de maxia para os máis pequenos.
Coa vista posta nesta nova edición, a Feira do Moble de Galicia consolídase un ano máis como
escaparate do sector na comarca e como punto de encontro entre empresas, profesionais e
público, apostando pola calidade, o deseño e a proxección do moble galego.
