Ao mediodía de onte representantes dos partidos políticos estradenses acompañados de funcionarios e veciños acudiron á concentración silenciosa convocada en todos os concellos polas vítimas do accidente ferroviario de Santiago de Compostela.
Todos os presentes gardaron 5 minutos de silencio na Praza da Constitución, diante da Casa Consistorial coas bandeiras a media hasta, en sinal de duelo polos falecidos.
Previamente o alcalde, Don Xosé López, facía lectura do seguinte comunicado:
Reunidos no Concello da Estrada representantes dos grupos políticos con representación na Corporación Municipal, toman a decisión por unanimidade de sumarse hoxe ás distintas iniciativas que percorren Galicia en relación ao tráxico accidente de tren ocorrido antonte en Santiago de Compostela.
En primeiro lugar queremos trasladar, o noso máis sentido pésame aos familiares das persoas falecidas, e desexarlles aos máis de cen feridos unha pronta recuperación.
Así mesmo, queremos anunciar que como decretou onte o Consello Extraordinario da Xunta de Galicia, a vila gardará sete días de loito oficial durante os que as bandeiras do consistorio ondearán a media hasta.
Esta corporación municipal tamén quere ter unha sentida lembranza para todos os efectivos dos equipos de emerxencia, Protección Civil, bombeiros, corpos e forzas de seguridade do estado, asi coma persoal sanitario; e para todos aqueles veciños e veciñas que con risco das súas propias vidas acudiron a botar unha man aos feridos, e agradecer o bo papel levado a cabo polo servizo de emerxencias e protección civil do noso concello.
Por último, como mostra de dó e en recordo dos falecidos, gardaremos cinco minutos de silencio.
Redacción, Gravación e Fotografía: Iria Eiras
