O BNG pide unha nova ordenanza municipal de venda ambulante que atenda as peticións do sector

O BNG da Estrada vén de rexistrar unha moción na que insta ao goberno municipal a aprobar unha nova ordenanza municipal para regular o comercio de venda ambulante, de gran tradición e importancia socio-económica no noso concello, contando coa participación dos feirantes, que acoden habitualmente á feira dos mércores e dos sábados.

O concello da Estrada conta cun Regulamento sobre a venda ambulante aprobado inicialmente polo Pleno o 13 de abril do 2004; mais posteriormente aprobouse a Lei 13/2010, do 17 de decembro, do comercio interior de Galiza e a súa posterior modificación do 28 de decembro de 2017, sen que estas modificacións das leis teñan a súa traslación á ordenanza municipal. Isto fai que o actual regulamento co que conta o Concello estea obsoleto, polo que se fai imprescindible actualizalo a nova realidade lexislativa e aos cambios que se teñen producido no sector.

Este regulamento non so ten que ter o obxectivo de ofrecer aos clientes un mellor servizo, senón que tamén ten que permitir a autoorganización dos profesionais que traballan nos lugares onde se leva a cabo esta actividade.

A venda ambulante é un sector que non só se constitúe como unha importante actividade económica en si mesma, senón que tamén ten un importante efecto positivo sobre o comercio local do noso concello, que cada mércores acolle a centos de persoas, veciños e veciñas que acoden á vila a facer as súas compras, mais tamén a vender os seu produtos de horta.

As súas especialidades (diversidade de produtos nun mesmo espazo, prezos económicos, etc.) e a necesidade de potenciar alternativas á cultura predominante das grandes superficies comerciais pechadas e impersoais que van en detrimento do comercio local, fai necesario contar cun regulamento que concilie os intereses do comercio ambulante e do pequeno comercio e que facilite e potencie estas dúas modalidades de venda.