Están a piques de comezar os labores de mantemento na N-640 ao seu paso pola Estrada, segundo informou o alcalde da localidade, José López Campos, despois de terse reunido esta mañá cos responsables da empresa Extraco Misturas, encargada do mantemento da calzada.
López sinalou que o tramo de actuación abarcará 1,2 quilómetros e irá dende A Baiuca ata a curva onde se enclava a empresa Martínez Otero, e indicou que era unha actuación que levaban tempo solicitando dende o Concello porque estaba “bastante deteriorado”.
Estas obras de mellora do firme vanse iniciar de urxencia e consistirán en traballos de fresado, aglomerado e posterior pintado nos dous carrís da estrada, polo que se xerarán cortes intermitentes nun ou noutro sentido da marcha, o que dará lugar a dificultades á hora de circular.
Non obstante, a previsión, advertiu López, é rematar os traballos de fresado e aglomerado entre o luns e o martes da semana que ven.
