O alcalde da Estrada, Gonzalo Louzao, e a concelleira de Cultura, Lucía Seoane, presentaron este mediodía a programación cultural EstradaEscena, que se irá debullando para este outono.
Son unha trintena de propostas que se sucederán entre os meses de outubro e xaneiro, pensadas para público de todas as idades.
Teatro, música, danza e humor fían un programa que ve incrementando o investimento este ano, ao incorporarse máis fondos da Deputación de Pontevedra a través do +Provincia. Fronte aos 100.000 euros de 2024, no 2025 chégase aos 152.000.
Esta é unha programación que se sostén sobre tres eixos: a participación de agrupacións e artistas locais, a contratación de artistas foráneos de calidade e a presenza das mellores compañías e artistas galegos a través dos convenios subscritos coa Xunta de Galicia (a través da programación da Rede Autonómica de Teatros e Auditorios) e coa @deputacionpontevedra (a través do Plan +Provincia).
Yllana, Xosé Touriñán, Dayna Kurtz, Oswaldo Digón, Rhumorosas, Xacarandaina, homenaxe a Juan Pardo, Spasmo Teatro ou Matriohska Teatro son algúns dos nomes propios desta programación cultural, que xa se pode consultar na páxina web do Concello da Estrada.
