A pasada semana tivo lugar a apertura da plica correspondente á novela gañadora do «Premio Novela Manuel García Barros (Ken Keirades)» na súa XXV Edición.
Neste ano foron presentadas 21 obras orixinais cualificadas por un xurado composto por:
Dª Inma Otero Varela,
D. Armando Requeixo Cuba
D. Luis Alonso Girgado,
D. Carlos González de Lema Malvar
Don Carlos Loureiro Rodríguez, (secretario)
A apertura da plica elixida polo xurado, levouse a cabo en acto público no Salón de Plenos do Concello da Estrada, presidido polo Tenente Alcalde do Concello da Estrada D. Juan Constenla Carbón acompañado dos membros do xurado.
A novela gañadora foi “A lúa da colleita”, obra presentada baixo o lema “Neve de abril sobre o río Anakawa”, que aberta a plica resultou ser da autoría de Dna María dos Anxos Sumay García, que recibirá un premio de 9.000 euros e a publicación da obra por parte da Editorial Galaxia.
En opinión do xurado, é unha novela na que destaca o elaborado traballo de caracterización dos personaxes, nunha historia onde o cuestionamento da identidade e a alteridade se vencella coa memoria e o pasar do tempo. A trama propón fortes doses de intriga, simbolismo e unha arquitectura perfecta, de linguaxe moi visual, que arrastra os personaxes a finais inesperados, pero de implacable lóxica. Todo este mundo, moi cambiante, e recreado a través dunha prosa límpida, da depuración extrema que flúe limpa
e imparablemente.
Redacción e Fotografía: Departamento de Cultura do Concello de A Estrada
