A Federación Española de Atletismo deu hoxe luz verde de xeito oficial a
estas instalacións deportivas, que se abren xa á competición nacional.
A súa primeira proba oficial será o Campionato Provincial de Atletismo
en Pista, na categoría de alevín.
O Concello da Estrada recibiu hoxe a homologación
oficial, por parte da Federación Española de Atletismo, das pistas inauguradas o pasado
mes de outubro nas proximidades do estadio municipal e das piscinas climatizadas, un
recinto anexo ao complexo que ocupa a Academia Galega de Seguridade Pública
(Agasp). Esta homologación nacional chega xusto a tempo para que as pistas acollan o
domingo, 18 de maio, a que será o súa primeira competición oficial, o Campionato
Provincial de Atletismo en Pista para a categoría alevín.
A comunicación oficial chegou esta mañá á administración municipal, despois de que
recentemete se trasladase ata estas instalacións estradenses o persoal encargado de
subsanar os dous pequenos erros observados durante o proceso de homologación das
pistas. De seguido, o pasado sábado un técnico da Federación Española de Atletismo fixo
a comprobación pertinente e o informe resultante desta visita chegou hoxe para dar luz
verde a que estas infraestruturas deportivas se abran á competición nacional.
Na que será a súa primeira proba oficial en pista, dentro dunha xornada de Xogade, os
atletas alevíns competirán en carreira sen obstáculos, salto horizontal, salto de altura e
lanzamento.
Adestramentos
Aínda que non sexa ata o domingo cando as pistas de atletismo da Estrada se estreen
como recinto homologado, dende a súa inauguración veñen sendo espazo aplaudido
para acoller os adestramentos dos clubs locais e tamén de deportistas individuais,
ademais de servir de permitir sesións de preparación física para o alumnado da
Academia Galega de Seguridade Pública.
Dende o departamento municipal de Deportes estímase que a media mensual está xa
nos 100 usuarios, cifra que mesmo se duplicou no primeiro mes de funcionamento e á
que hai que engadir os deportistas que proveñen das dous clubs estradenses de
atletismo.
O acceso á instalación estase artellando a través dunha tarxeta dixital. A concesionaria
da piscina climatizada é a que se encarga de regulalo, sendo necesario que os deportistas
pidan con carácter previo o uso das pistas. Despois de seren retirada a tarxeta, este
elemento debe empregarse para entrar e saír das instalacións.
As pistas de atletismo da Estrada contan con 400 metros de corda e oito rúas. Teñen
espazos habilitados para o lanzamento de martelo, peso, disco e xavelina, salto de altura
e salto de pértega, fosos de saltos de lonxitude e triplo salto, bancada e cabina de control
na recta de meta. Esta instalación complementarase proximamente cun módulo
multideporte anexo, que xa está en construción e que ten un orzamento de dous millóns
de euros. Estas instalacións permitirán a realización de adestramentos e competicións a
cuberto.
