A Estrada na Rede

Once empresas presentaron as súas ofertas para optar á mellora desta estrada.

Trátase dunha vía estratéxica que vertebra o Concello de A Estrada, comunicando a N-525 e N-640

A Deputación de Pontevedra adxudicou a mañá do xoves en Xunta de Goberno as obras da estrada provincial EP 7017 no treito comprendido entre Callobre e Balboa, no concello da Estrada.

As obras foron adxudicadas á empresa Construcións, Obras e Viaias (COVSA) por un importe de 1,4 millóns. Tal e como sinalou o presidente da Deputación na rolda de prensa posterior á Xunta de Goberno, foron 11 as empresas que presentaron as súas propostas para a execución das obras, cunha baixa media no orzamento de licitación (que ascendía a 1,7 millóns de euros) de 17,4%.

A obra afectará a un treito de 8,8 quilómetros e terá características similares a unha estrada nacional, dado que se trata dunha vía estratéxica –a máis relevante tras a autoestrada– xa que vertebra todo o Concello de A Estrada e comunica dúas estradas nacionais (n-525 e N-640).

A vía presenta unha elevada intensidade de tráfico e pasa por varias das principais parroquias do concello, como Callobre, Moreira ou Oca.

Redacción: Deputación de Pontevedra / Fotografía: Patricia Figueiras

Xosé Magariños insta ao alcalde a arranxar dunha vez esta tubería de augas fecais, porque estanse a contaminar os nosos ríos e supón un problema de salubridade pública.

O concelleiro do BNG, Xosé Magariños, vén de denunciar que “á altura da discoteca Lennon hai un sumidoiro cunha tubería rebentada que leva meses vertendo augas fecais e todo tipo de desperdicios a un regato, ante a pasividade do alcalde e o seu grupo de goberno, porque nos consta que ten coñecemento desta situación.”

“O verquido”, afirma o concelleiro nacionalista, “é perfectamente visíbel, especialmente por todas as persoas que todos os días circulan pola N-640, andando ou en coche, xa que este verquido desprende un cheiro nauseabundo”.

“Este sumidoiro roto, como xa dixemos, leva preto de seis meses no mesmo estado, vertendo aos ríos, cuxas consecuencias a fin de contas padecémolas todos, xa que de aí van ao Liñares e deste río ao Ulla”, explicou Magariños; “pero quen padece directamente as consecuencias destes verquidos son os veciños e veciñas de Guimarei, cuxas augas contaminadas pasan preto das súas casas, co problema de salubridade pública que iso supón”. Sigue leyendo →