BASES PARA A CONVOCATORIA DO III PREMIO DE TEATRO
MOME “VARELA BUXÁN”
O Museo do Moble e da Madeira da Estrada (MOME), comprometido co proceso de creación cultural, convoca o III PREMIO DE TEATRO MOME «VARELA BUXÁN» cos obxectivos de:
-Poñer en valor o MOME como referente na vida cultural estradense e galega.
-Perseverar no cultivo da lingua galega como sinal de identificación e diferenciación de Galicia e principal patrimonio cultural.
-Contribuír á difusión da nova dramaturxia galega e á divulgación da vida e obra do dramaturgo estradense Manuel Daniel Varela Buxán, o patriarca do teatro galego.
BASES
1-Poderán concorrer ao Premio todas as persoas que o desexen, de calquera nacionalidade, con textos inéditos escritos en lingua galega.
2-Os orixinais, que serán presentados por triplicado, terán un eixe temático libre. Xuntarase unha copia do texto nun CD en formato PDF. Deberán ser remitidos ao seguinte enderezo: Fundación Cultural da Estrada. Avda. Benito Vigo, 104. CP 36680. A Estrada (Pontevedra). Indicando no sobre, III Premio MOME de Teatro «Várela Buxán».
3-Con cada orixinal, que deberá ser entregado baixo lema, xuntarase en sobre pechado o nome completo, enderezo, teléfono(s), correo electrónico e currículo do/a autor/a.
4-O prazo de admisión de orixinais pecharase o 23 de agosto do 2013.
5-A dotación económica será de 1.000 euros que se outorgarán indivisiblemente nun único premio. Asemade entregaráselle ao/á gañador/a un diploma acreditativo. No caso de que o xurado o estimase oportuno, o Premio podería quedar deserto.
6-O MOME escollerá un xurado de recoñecido prestixio pertencente ao ámbito teatral galego. O seu ditame será inapelable.
7-Unha vez emitida a resolución do xurado procederase á apertura da plica gañadora no curso dun acto público na data e lugar que se anunciarán oportunamente.
8-Entregarase o Premio o 25 de setembro, coincidindo co vixésimo sétimo aniversario do pasamento de Manuel D. Varela Buxán, no transcurso dun acto público a celebrar no MOME.
9-O MOME resérvase o dereito de publicar a obra premiada, sen apercibimento de dereitos de autor e compensando aos/ás autores/as con 50 exemplares do volume que, no seu día, se puidese editar.
10-Os orixinais non premiados poderán ser retirados polos respectivos autores/as no prazo de trinta días contados a partir da entrega do Premio.
11-A participación nesta convocatoria requirirá a aceptación das normas contidas nas presentes bases.