A crise económica provocada polo Covid19 terá importantes repercusións en múltiples sectores do noso concello. A hostalaría e as casas de turismo rural serán sen dúbidas un dos grandes damnificados por esta crise, que mantén pechadas as súas portas en vésperas dos meses máis importantes para estes sectores no noso concello, maio, xuño e xullo, meses nos que se celebran a Festa do Salmón, as festas patronais e a Rapa das Bestas.
A día de hoxe a celebración a celebración da Festa do Salmón xa está cancelada polo concello, e falta por ver que pasa cos outros dous importantes eventos festivos e culturais do noso concello, que supoñían seguramente os ingresos máis importantes do ano para a hostalaría e as casas de turismo rural.
Por este motivo desde o BNG suxerimos ao goberno municipal do PP que, de acordo coa asociación de hostalaría, poña en marcha un plan de incentivos e de axudas directas a este sector, con cargo ao orzamento previsto para a Festa do Salmón e as festas patronais.
A crise sanitaria pasará, non tardaremos moitas semanas en superala, e desde o goberno municipal ten que ir trazando un plan para axudar aos distintos sectores económicos do noso concello. Desde o BNG xa trasladamos desde o principio de esta crise a nosa vontade de colaborar e axudar a superar esta crise, é por isto que a nosa concelleira, Susana Camba, trasladará esta proposta na vindeira reunión virtual co grupo de goberno municipal.
