«Unha cousa é estar a favor das enerxías limpas e outra converter o monte galego nun parque eólico xigante», afirma a concelleira do BNG
A concelleira do BNG, Susana Camba, explicou que «no BNG vemos con preocupación a nova política de parques eólicos impulsados pola Xunta e o Goberno central, que están inzando de muíños de vento os nosos montes». «No día de onte coñeciamos que está en marcha o proxecto de parque eólico nos montes de Liripio», engade, «e tamén no monte de Castro Valente entre Barcala e Herbón».
«Isto non é de recibo», afirma a concelleira nacionalista, «a este paso non haberá monte no noso concello sen muíños de vento e iso o goberno municipal non o pode permitir, e instaremos no vindeiro pleno a que o concello presente alegacións contra estes parques eólicos que se proxectan no noso concello».
«Unha cousa é estar a favor das enerxías limpas e outras converter o monte galego nun parque eólico xigante», explica, «que por enriba encherá o peto dunhas poucas empresas e sen que iso teña un retorno económico para os veciños e veciñas».
