O Concello adxudica en 60.149 euros a substitución
das carpintarías exteriores do pavillón Coto Ferreiro

A Xunta de Goberno Local vén de aprobar a adxudicación
das obras de substitución de carpintarías exteriores no pavillón Manuel Coto Ferreiro á
empresa Proyectos y Contratas Covelo S.L. por un importe de 60.149,10 euros, que será
financiado a través do Plan Concellos da Deputación de Pontevedra.
O proxecto foi elixido entre un total de cinco empresas que presentaron cadansúa
proposta para acometer estes traballos, que inclúen a renovación das oito portas e da
totalidade das fiestras do pavillón. Estas actuacións deberán estar rematadas no prazo de
dous meses, facilitando que este espazo volva ser empregado cando os clubes retomen
os seus adestramentos.