A concelleira de Servizos Sociais e Educación,
Amalia Goldar, trasladouse esta mañá ata as instalacións do CEIP Figueiroa, espazo no
que se celebrou a festa de clausura dos campamentos urbanos programados para este
verán. Foron arredor de 150 cativos os que se deron cita nestas actividades ao longo
desta mañá, dos case 500 que pasaron por estes campamentos na tempada estival.
O inicio das actividades extraordinarias organizadas para este día fixouse nas 10.00,
debullando un amplo cartel. De 10.00 a 12.00 houbo obradoiros de xogos tradicionais e
populares, con aplicación de perspectiva de xénero, guiados polo equipo de Sonoras.
Seguidamente, de 12.00 a 14.00 horas, programouse unha representación teatral a
cargo da compañía Bandullo Azul, titulada “Historias dun mundo grande”, onde a
cadeliña Becki contou historias de colaboración e solidariedade vividas nas súas viaxes
polo mundo, convidando aos asistentes a cantar e bailar para celebrar a fin do verán.
Estes campamentos desenvolvéronse ao longo dos meses de xullo, agosto e esta
primeira semana de setembro nas instalacións dos colexios Figueiroa, Oca, O Foxo,
Codeseda e Vea, cun total de 490 solicitudes. A firma Coesco estruturounos baixo o lema
“Voltao ao mundo nun verán”, guiando aos campistas a través de xogos, dinámicas
grupais e actividades creativas para descubrir outras culturas e países.
