Convocan ás asociacións interesadas a unha reunión, mañá ás 19.00
horas no Salón de Plenos, para coñecer as bases deste ano.
Este ano non será preciso que a festa teña unha antigüidade
determinada, como se pedía en 2026, se ben este si será un criterio que
puntúe nos criterios de valoración.
A Xunta de Goberno Local da Estrada aprobou na súa
última sesión as bases reguladoras para a concesión de subvencións para eventos e
actividades culturais mediante libre concorrencia competitiva. Estas axudas vén
incrementada este ano a partida orzamentaria coa que naceron en 2025, de xeito que
se destinarán a este fin 120.000 euros (20.000 euros máis). Outro dos cambios deste
2026 será o importe máximo que poderá percibir unha mesma entidade. Fronte aos
3.000 euros de 2025, nesta convocatoria a axuda municipal pode acadar os 5.000.
Estas subvencións teñen como finalidade contribuír á promoción e impulso de eventos
e actividades culturais nas parroquias da A Estrada, axudando a que acaden obxectivos
que lle son propios, caso da participación da cidadanía. Para explicar as bases deste ano,
que se publicarán nos vindeiros días no Boletín Oficial da Provincia de Pontevedra, está
convocada unha reunión coas asociacións interesadas. Será mañá xoves, ás 19.00 horas,
no Salón de Plenos.
Unha das novidades desta convocatoria é que as solicitudes terán que seren
presentadas obrigatoriamente por vía electrónica a través do procedemento habilitado
na sede electrónica municipal. Teñen que ser cursadas pola persoa que presida (ou
representante acreditado) asociacións de veciños, asociacións de mulleres rurais ou
comisións de festas debidamente constituídas. Só se pode presentar unha solicitude por
parroquia, aínda cando esta pode incluír varios eventos.
Como queda indicado, este ano a cantidade máxima que pode percibir cada solicitante
é de 5.000 euros, destinados á realización de eventos e actividades culturais que se
realicen neste 2026. Enténdese por evento todo tipo de actuación artística ou cultural
aberta a toda a poboación, incluíndo as festas de carácter gastronómico de interese para
o concello. Non se inclúen neste tipo as xuntanzas veciñais ou dos asociados.
Este ano non será preciso que a festa teña unha antigüidade determinada, como se
pedía en 2026, se ben este si será un criterio que puntúe nos criterios de valoración.
Como gastos que se poden sufragar con cargo a esta liña de subvencións municipais, as
bases aluden a gastos de cachés de grupos ou artistas; gastos de seguros para a
realización de actividades; gastos de publicidade; alugueiro de megafonía, iluminación
e infraestruturas; alugueiro de palcos, tarimas ou similares e gastos de organización.
Non se poderán costear con estas axudas gastos de comida ou bebida; gastos correntes
de actividade social, deportiva ou de tempo libre; actividades formativas non ligadas a
contidos artísticos, patrimoniais, culturais ou etnográficos ou bens de investimento.
Na valoración teranse en conta criterios como o número de días de festa na parroquia;
sesións e verbenas anuais, contratación de grupos locais, animación infantil de balde,
asistencia de público, antigüidade da festa, repercusión cultural do evento ou o número
de espectáculos que inclúe ou se inclúe punto violeta de atención contra o acoso e
agresións sexuais no campo da festa.
No tocante ao pago, as axudas terán un carácter prepagable no 75%, que se aboará
nunha primeira fase. Unha vez xustificada a totalidade da subvención no prazo
establecido procederase ao pagamento do importe restante. A primeira parte terá que
estar xustificada no prazo de 3 meses e a seguinte sempre antes do 1 de decembro.
