Recupera para esta rede de abastecemento dous pozos que non se
estaban empregando e que poden aportar diariamente máis de 22 metros
cúbicos de auga.
Nun estío extraordinariamente seco e cálido, esta traída está dando
mostras de teren superados os seus históricos problemas, sen cortes nin
necesidade de subministro externo aos depósitos.
Óscar Durán suma ás melloras practicadas polo Concello o consumo
responsable ofrecido pola cidadanía.
O Concello da Estrada reactiva dúas captacións de
agua para a traída de Codeseda, unha rede de abastecemento na que as melloras que se
viñeron practicando nos últimos anos -sumadas a un consumo responsable por parte
dos usuarios- fixeron posible que superase, sen restricións nin incidencias, un verán de
récord, dos máis cálidos e secos que se lembran.
O concelleiro delegado de Servizos Municipais, Óscar Durán, explicou hoxe que o
Concello amplía agora a aposta por mellorar esta rede de abastecemento, feita para
veren superados os históricos problemas desta traída estradense nos momentos de
maior seca. O edil indicou que se decidiu recuperar dous antigos pozos que estaban
abandonados, incrementando a captación que nutre uns puntos de depósitos que
tamén se viron ampliados.
Estes dous pozos xerarán diariamente máis de 22 metros cúbicos de auga, que
incrementan o abastecemento dos dous depósitos existentes en Codeseda, nos que se
almacenan un total de 130 metros cúbicos. Durán calculou que a posta en servizo destas
captacións, xunto con outras melloras practicadas, suporá gañar entre 60 e 70 metros
cúbicos de auga por xornada.
Nestes intres a traída de auga de Codeseda mantense cos pozos de barrena existentes,
sumados a unha captacións nun regato da zona e os mananciais da Grela e Barro. A
reactivación destes dous pozos en desuso supón un investimento próximo aos 4.000
euros.
Óscar Durán sinalou que esta traída rural de auga está a superar un verán
extraordinariamente seco “sen ningún problema”. Remarcou que, a diferenza das
estampas que ofrecía esta rede de abastecemento nalgúns estíos, o deste 2025 non
deixa polo de agora ningún corte de subministro nin restricións, sen que fose necesario
recorrer ao subministro externo dos depósitos.
Axuda dos cidadáns
“O consumo responsable que fixeron os cidadáns axudou moito”, quixo aplaudir o
concelleiro, consciente de que a petición realizada polo Concello ante una situación de
prealerta pola seca atopou pronta resposta na veciñanza. “Todas as actuacións que
poidamos facer para mellorar as redes e as captacións son benvidas, pero resulta
imprescindible atopar a colaboración dos veciños a través dun consumo responsable
dun ben tan importante e básico como é a auga”, sinalou.
