O Club Natación e Salvamento A Estrada destaca que esta é a primeira
proba da tempada e a única en España que xunta estas dúas disciplinas.
Será o sábado 13 de setembro, con inscricións ata este venres.
A organización agarda superar os 200 deportistas participantes e conta
xa nestes intres con 178 inscritos.
A representación estradense correrá a conta de 50 integrantes do CNS.
Representantes do Club Natación e Salvamento
(CNS) A Estrada acudiron esta mañá ao consistorio para presentar, xunto co alcalde,
Gonzalo Louzao, e o edil de Deportes, Ismael Pena, a cartelaría e os detalles
organizativos da que será a terceira edición do Campionato Open Australianas e
Bandeiras, que arestora ten xa 178 inscritos e que aspira a superar os 200, mantendo o
éxito acadado nas dúas primeiras convocatorias. A inscrición realízase a través da páxina
www.emesports.es e está aberta ata a medianoite deste venres.
Alejandro Trigo, directivo do CNS, e o adestrador Enrique Ramilo puxeron o acento en
que está é a primeira proba da tempada, de xeito que serve para medir o nivel dos
deportistas ao arranque da competición. Incidiron tamén en que non teñen constancia
de que exista no resto de España outra proba na que se fagan coincidir estas dúas
disciplinas.
O campionato celebrarase no recinto das piscinas municipais o vindeiro sábado 13 de
setembro. Empregarase a zona de baño e o seu entorno, onde se habilitará o espazo
para as probas en area. A competición de Australianas será pola mañá, deixando a de
Bandeiras para a xornada vespertina.
Tras a recepción dos participantes, ás 10.00 horas, a competición na primeira destas
dúas disciplinas desenvolverase ata as 13.45, con entrega de premios ás 14.00. Haberá
pausa para o almorzo e os deportistas emprenderán ás 15.00 as probas de Bandeiras,
que chegarán ás 19.00. Ás 20.30, nova entrega de premios.
Este Open Australianas e Bandeiras está concibido para as categorías Absoluta, Sub16 e
Sub 13, de xeito que haberá competidores a partires dos 11 anos de idade. Os
deportistas que xa formalizaron a súa inscrición proceden de moitos lugares da xeografía
galega, caso de Pontevedra, Vilagarcía, Ourense, Carballiño, Ponteareas, Sada, Laracha,
Marín o distintos puntos do Barbanza, entre outros.
Entre os asistentes agárdanse deportistas do Alcarreño de Guadalajara, estimado como
o mellor club de España e dos mellores de Europa. De igual xeito, tamén estarán na
proba participantes de longa e laureada traxectoria, caso de subcampiona de Europa
Antía García ou do campión Iván Romero. O CNS A Estrada estará representado por 50
participantes.
A organización reserva trofeos e agasallos para os participantes e ten preparada moita
ambientación para esta cita deportiva, na que haberá sesión de música con DJ e un
speaker.
