A Estrada na Rede

Sábado 20 de xuño. É a data para unha nova edición, a
13ª da carreira popular Estranoite, unha proba deportiva de carácter lúdico que o
Concello organiza en colaboración co Atletismo A Estrada. O concelleiro estradense de
Deportes, Ismael Pena, presentou o regulamento dunha proba que ten entre os seus
grandes atractivos o feito de que se desenvolve en horario nocturno, converténdose
nun preludio para as festas patronais de San Paio.
Como vén sendo habitual, a carreira realízase por un circuíto urbano de asfalto de 4
quilómetros, se ben na proba absoluta a distancia que deberán percorrer os
participantes é de 8 (darán dúas voltas). Ademais, tanto a proba absoluta como as
probas escolares celebraranse en circuítos pechados e valados. Os percorridos estarán
debidamente indicados, controlados e sinalizados e proba estará controlada polo
Comité Galego de Xuíces da Federación Galega de Atletismo (FGA).
Ismael Pena sinalou que a inscrición quedará aberta mañá mércores. A única vía para
realizala será a pasarela de pagos incluída na páxina web www.emesports.es. Estará
operativa ata as 23.59 horas do mércores 17 de Xuño de 2026. Para calquera dúbida
relacionada co proceso de inscrición os interesados poderán dirixirse ó teléfono
886.153.589. Asemade, para calquera cuestión relacionada coa organización da proba
poderán dirixirse ao 986 570 030 ou no correo deportes@aestrada.gal.
O concelleiro de Deportes indicou tamén que na XIII Estratoite, tamén coñecida como a
Nocturna Estradense, haberá un límite de 600 inscritos na proba absoluta.
Poderán participar na carreira todas as persoas, federadas ou non, das categorías de
pitufo (atletas nados no ano 2022 e posteriores) ata Master B (nados dende 1979 e
anteriores).
A primeira saída darase ás 21.00 (Pitufos), escalonando saídas para as categorías de
Pitufo a Sub 14 ata as 22.00 horas. A entrega de premios para as categorías inferiores
será ás 22.20. Ás 23.00 sairán xuvenís (sub 18), junior (sub 20) e os atletas da categoría
absoluta (promesa, senior e master), con dúas voltas ao circuíto. A entrega de premios
da carreira absoluta será ás 0.15.

O regulamento descrito hoxe polo concelleiro de Deportes recolle que a carreira se
realizará en todo momento pola vía de tráfico rodado, agás nas zonas peonís sinalizadas
como circuíto. Isto implica que está prohibido usar como zonas de carreira as beirarrúas,
glorietas, áreas axardinadas e todo o que exceda os límites do circuíto sinalizado.
Incumprir esta norma, así como recortar o trazado oficial, pode implicar a
descualificación das persoas infractoras
En canto ao prezo da inscrición, a de adultos (categoría xuvenil e superiores) será de 8
euros. As escolares (de pitufo a cadetes) terá carácter gratuíto.
Todos eles deberán realizar a retirada de dorsais o día da proba, a partires das 19.00
horas. O local habilitado pola organización a estes efectos será a Sala Abanca, punto de
control da proba. Ademais, na proba absoluta (23.00 horas) os participantes estarán
controlados a través dun chip que se entregará a cada participante xunto co dorsal. Estes
dous elementos son persoais e intransferibles.
Premios
Entrando xa no apertado de premios e trofeos, a Estranoite contempla un obsequio
conmemorativo da proba que se entregará no momento de recoller o dorsal. A maiores,
haberá trofeos ás tres persoas que se clasifiquen en primeiro lugar en todas as
categorías (excepto en pitufo e prebenxamín, nas que non haberá trofeos e si medalla
para todos os participantes).
Na proba de 4 quilómetros haberá tamén premios para os tres primeiros clasificados,
con independencia da categoría. A maiores están contemplados premios para os os tres
primeiros estradenses en cruzar a liña de meta na proba absoluta.
As persoas que gañen a carreira absoluta terán como agasallo unha caixa degustación
de sidra da Estrada. Haberá tamén trofeo para o club ou equipo que obteña a menor
puntuación cos seus 6 primeiros participantes que finalicen a proba absoluta Cómpre
indicar que os clubs/equipos non teñen porque ser oficiais e/ou federados, poden ser
grupos de amigos/as que formalicen a inscrición baixo o nome dun equipo.
De igual xeito, a organización reserva un trofeo Master para o participante de maior
idade que finalice a proba.

GALEGAS, QUE SE ANTICIPA AO COINCIDIR COA FESTA DO SALMÓN

 Será ás 11.00 horas diante do monolito a Marcial Valladares.
 A obra “As mil e unha” repasará o xoves a traxectoria da xornalista
Begoña Caamaño.

A comunicadora, actriz e presentadora Neves Rodríguez
foi e escollida este ano para dar lectura ao pregón das Letras Galegas na Estrada, nun 17
de maio que coincide no municipio coa celebración da Festa do Salmón. Será a tamén a
condutora do espazo “É de mañá”, na emisora municipal Radio Estrada, a encargada de
dirixirse a todos os estradenses nun día no que Galicia enteira lembra e homenaxea á
xornalista Begoña Caamaño.
O pregón das Letras Galegas está programado este ano cunha hora de adianto con
respecto ao horario habitual. Deste xeito, no canto das 12.00 horas, o acto co que A
Estrada conmemora cada 17 de maio as Letras Galegas será nesta ocasión ás 11.00. O
que non mudará é o espazo: será diante do monolito que lembra a Marcial Valladares
Núñez, ata o de agora o único estradense ao que lle dedicaron as Letras Galegas (no ano
1970).
O acto estará amenizado, coma de costume, pola Banda de Gaitas de Barbude. Despois
dunha breve presentación, Neves Rodríguez dará lectura ao pregón, seguida da
intervención institucional do alcalde, Gonzalo Louzao, e da realización dunha ofrenda
floral. Será ese o momento máis emotivo da celebración, xusto cando comece a soar o
Himno Galego.
En todo caso, aínda coincidindo co nutrido programa de actos da Festa do Salmón, as
Letras Galegas teñen tamén outros eventos especificamente asociados na programación
cultural destes días. A elas se vencella a aposta municipal por actividades como o Festival
Folclórico do que a agrupación Tequexetéldere é anfitrioa ou o propio concerto de
Mondra, que chega por medio da Deputación de Pontevedra.
Pero, ademais, este xoves a celebración das Letras Galegas terán unha antesala na
Estrada da man do espectáculo “As mil e unha” que, da man das historias e a música,
achegarase un chisco máis ao legado da admirada Begoña Caamaño. Trátase da nova
sesión da narradora oral Vero Rilo na que, acompañada polo músico Luis Iglesias, achega
un espectaculo de narración oral e música para público familiar. A peza chega ao

municipio estradense da man da Secretaría Xeral da Lingua. Será ás 19.00 horas, no
Teatro Principal e con entrada de balde.

 Serán 800 metros cadrados de recito para acoller toda a programación
prevista entre a Festa do Salmón e a Feira da Sidra.
 O Concello canaliza cara a hostalería o primeiro patrocino privado
ofrecido para a Festa do Salmón, por parte da firma Vegalsa-Eroski.

A Praza da Constitución é xa dende esta mañá o
escenario para a montaxe da carpa de gran formato que ao longo das vindeiras semanas
se converterá nun espazo de dinamización sociocultural a pé de rúa, cunha
programación que comezará a debullarse este venres e que terá como eixos principais
a Festa do Salmón e a Feira da Sidra. Será unha carpa que medra con respecto á do
pasado ano e que volve a apostar por programar estas citas tan destacadas do
calendario estradense aos pés da casa consistorial.
A carpa terá unhas dimensións de gran envergadura. Serán 800 metros cadrados (40×20)
destinados a acoller toda a programación prevista, preservando o seu desenvolvemento
das posibles condicións meteorolóxicas adversas. Serán propostas para todos os gustos
e idades por espazo dun mes, que arrancan este venres con Latexo Fest e chegarán ao
13 de xuño.
Por outra banda, o concelleiro de Promoción Económica, Óscar Durán, explicou hoxe
que o empuxe que se lle está dando á Festa do Salmón está calando tamén no sector
privado. Indicou que a firma Vegalsa-Eroski solicitou este ano colaborar, pola vía do
patrocinio, coa principal celebración gastronómica do Concello da Estrada.
Segundo precisou o edil, o Concello quixo que este apoio económico chegue
directamente aos hostaleiros que participarán na degustación popular do domingo.
Cada un deles percibirá un vale de 60 euros para consumir nos establecementos da
citada firma de supermercados.
Durán quixo agradecer o interese amosado por Vegalsa-Eroski e recoñeceu que a
atracción que están esperando algunhas das citas do calendario estradense están tamén
suscitando expectación noutras firmas, con propostas que están agora mesmo en fase
de estudo.

A música de banda soa con forza na Estrada. O vindeiro 17 domingo 24 de maio, a partir das AS 18.00 horas, a Praza da Constitución converterase nun gran escenario para celebrar a segunda edición dun festival que segue medrando dentro da programación cultural e que encherá de vida a gran carpa que nos acompañará entre a Festa do Salmón e a Feira da Sidra.

Participarán:
 Banda de Música Unión de Guláns
 Banda da Escola de Música de Rianxo
 Banda de Música Municipal da Estrada

Un encontro pensado para todos os públicos e idades, que ademais servirá como homenaxe ao músico Rogelio Groba.

#AEstrada #bandasdemúsica

O consistorio estradense acolleu esta mañá a presentación dunha nova acción de promoción turística que situará A Estrada no mapa turístico internacional: o FAM Trip “Os camiños por dentro”, que se celebrará do 19 ao 21 de maio neste municipio.

Un dato clave: participarán 16 touroperadores, que visitarán o noso territorio para coñecer de primeira man os recursos turísticos e convertelos en futuras experiencias para visitantes.

Durante tres días descubrirán:
 A Ruta da Sidra e as sidrerías locais.
 O patrimonio natural e cultural da contorna.
 Tradicións únicas como a visita ao curro de Sabucedo e a Rapa das Bestas.
 Espazos emblemáticos como o Pazo de Oca.
 Un workshop con produtores e axentes turísticos da comarca.

Esta iniciativa, impulsada da man da @deputacionpontevedra, busca que profesionais do sector veñan, vexan e conten e,  sobre todo, que vendan A Estrada como destino turístico.

No acto de presentación participaron a directora de Turismo da Deputación de Pontevedra, Romina Fernández, o alcalde estradense, @gonzalolouzaodono, o concelleiro de Turismo, Óscar Rancaño, o organizador do FAM Trip, Juan Rivadulla (@simplytravel.aestrada) e unha representación do sector sidreiro estradense.

#AEstrada #Turismo #Viaxes #aestradaturismo #turismoriasbaixas

O alcalde da Estrada, Gonzalo Louzao Dono, ofreceu este
mediodía unha recepción a un grupo de profesores procedentes de Mayotte (unha illa
francesa situada no Índico, preto de Madagascar) que visitan A Estrada no marco dun
intercambio do programa Erasmus co IES Antón Losada Diéguez.
Os rexedor departiu co profesorado, moi interesado nos recursos turísticos do municipio
e na industria da madeira. O centro de formación profesional no que eles traballan ten
tamén unha rama específica deste ámbito e tiveron ocasión de visitar industriais locais
como Martínez Otero ou Nudima, en Berres.
Tres profesores do Losada Diéguez viaxarán o 20 de maio ata Mayotte, onde
continuarán explorando as posibilidades de realizar intercambios de alumnado destes
dous centros.

 A entidade propón varios emprazamentos para unha escultura que
estaba situada no illote onde conflúen o arranque da Rúa San Paio e o
remate da Rúa 56.
 Suxire colocala no inicio da vía de acceso á aldea que pasa por diante
do teleclub; nas inmediacións do curro do Campo do Medio ou nas
proximidades do Curro Vello de Sabucedo.
 O goberno valora a petición para ofrecer unha pronta resposta á
asociación.

A Asociación Rapa das Bestas vén de formalizar a
presentación dunha instancia na que solicita ao Concello da Estrada que a estatua
homenaxe á tradición estradense que preserva este colectivo sexa reubicada na
parroquia de Sabucedo. A entidade propón varios emprazamentos para unha escultura
que, ata o inicio da reforma da Praza de Galicia e a súa contorna, estaba situada no illote
onde conflúen o arranque da Rúa San Paio e o remate da Rúa 56.
No escrito rexistrado por esta asociación, a mesma que impulsa a única Festa de Interese
Turístico Internacional que existe na Estrada, propóñense tres posibles emprazamentos
alternativos para a estatua que representa a dous garañóns de Sabucedo: o inicio da vía
de acceso á aldea que pasa por diante do teleclub; as inmediacións do curro do Campo
do Medio ou as proximidades do Curro Vello de Sabucedo.
Polo de agora, o goberno local non se pronunciou ao respecto desta petición. O alcalde,
Gonzalo Louzao, sinalou hoxe que o Concello tentará ofrecer unha resposta a este
pretendido traslado nestes días, tendo en conta a proximidade ao remate das obras na
contorna da Praza de Galicia.
O rexedor asumiu que Sabucedo sería tamén un lugar máis que oportuno e axeitado
para que luza a obra elaborada polo escultor estradense Manuel Campos Vilaverde,
tendo en conta todo o que a Rapa das Bestas representa para a que, sen xénero de
dúbidas, é a parroquia máis internacional e turística do Concello da Estrada.

O mandatario encadrou a petición da Rapa das Bestas no contexto de boa sintonía e
colaboración entre o Concello e esta asociación e sinalou que a proposta está a ser
estudada, recoñecendo que comprende a solicitude desta peza para a parroquia.
A obra en cuestión naceu no ano 2000 para converterse nun agasallo ao municipio
gaditano San Fernando, no marco dunhas xornadas tendentes a formalizar un proceso
de irmandade. Pero, finalmente, en 2001 decidiuse que a peza quedara na Estrada e foi
instalada preto da Praza de Galicia.
Nestes anos a escultura foi saltando de cando en vez á actualidade local por seren vítima
de diversos actos vandálicos, a miúdo centrados na cola dos cabalos e nas orellas. De
feito, en varias ocasións foi preciso pedir ao escultor obras de reparación.
Albergue e carballeira
Noutra orde de cousas, na parroquia de Sabucedo continúan as obras de mellora do
albergue turístico, unhas instalacións que o Concello resolveu arranxar con vistas a unha
cesión do uso e explotación á entidade que preside Paulo Vicente Monteagudo.
Agárdase que esta actuación poida quedar rematada xa para a próxima edición da Rapa.
Non é esta a única obra que se está executando nesta parroquia estradense, xa que nos
últimos meses se estivo traballando na revalorización e mellora do Campo do Medio.