A Estrada na Rede

– CERVEXERÍA EUREKA

O Concello da Estrada, por medio da Concellaría de Deportes, Novas
Tecnoloxías e Participación Cidadá, informa que se suspende a IV Gala do Deporte
do Concello da Estrada, que debera celebrarse este vindeiro mes de decembro, polo
que non haberá festa do deporte estradense este ano 2020.
A nivel deportivo, coa suspensión das actividades deportivas e das distintas
competicións, a tempada 2020 non se puido completar, motivando un paro mínimo
seis meses en todas as modalidades, tanto en deportes colectivos coma individuais,

que obrigou a cancelar a maioría das actividades.
Debido a isto, a organización da IV Gala do Deporte Concello da Estrada,
considera que, nesta situación e baixo estas circunstancias, non se pode realizar unha
valoración obxectiva cos mesmos criterios dos obxectivos acadados por deportistas e
clubs, xa que os condicionantes de cada un para realizar á actividade, alteraron o seu
normal desenvolvemento, por múltiples factores. Isto impediu que o xurado desta gala
puidese realizar as súas propostas de forma equitativa e razoable.
A maiores, na situación actual, as restricións impostas polas autoridades
sanitarias aos espazos culturais, non nos permiten habilitar o Teatro Principal para a
realización desta gala. Así pois, comunicamos a súa supresión, e emprazamos os
estradenses á edición 2021.

A Xunta, a través de Augas de Galicia, vai proceder á restauración e ao desenvolvemento de accións de conservación do bosque de ribeira do río Umia ao seu paso polo Concello da Estrada nun treito de 18,62 quilómetros cun investimento de 219.700€.

Dita actuación ambiental foi presentada esta mañá pola delegada territorial da Xunta en Pontevedra, Luisa Piñeiro, e o alcalde da Estrada, José López, no refuxio de pescadores de Abragán, na parroquia de Codeseda, que será, xunto a Arca, o emprazamento deste proxecto. “Presentamos hoxe unha fase máis da mellora do Umia, semellante a outras xa realizadas neste río, e que pretende preservar unha zona da Estrada dun altísimo valor ecolóxico, natural e paisaxístico e instaurar condicións nóptimas este importante cauce para beneficiar os sistemas de abastecemento ao seu paso e, principalmente, o de Caldas de Reis”, detallou a representante autonómica.

Segundo os datos técnicos que se deron a coñecer na presentación, este proxecto, que afecta a 1.808 parcelas catastradas situadas nas zonas de dominio público hidráulico e de servidume, está a afrontar os derradeiros trámites administrativos co obxectivo de comezar coa actuación no inicio de 2021 e afrontar o seu desenvolvemento durante doce meses.

A superficie beneficiaria ascende a case 20 hectáreas localizadas en ambas marxes do río Umia na Estrada e na mesma executaranse repoboacións nuns 36.000 m2 con labores de restablecemento e rexeneración artificial do bosque de ribeira en zonas onde non se produza de xeito natural.

Outras actuacións centraranse na conservación do bosque de ribeira existente nas zonas arbóreas, principalmente de especies ripícolas, con tarefas de eliminación e retirada de vexetación morta que non afecte negativamente á estabilidade dos noiros. Tamén se procederá á recuperación de zonas degradadas con labores de poda, supresión de restos vexetais e de especies que non formen parte do bosque de ribeira, rozas puntuais e selectivas, limpeza de residuos, accións selvícolas e implantación de medidas correctoras que favorezan a recuperación desta vexetación propia do cauce.

Susana Camba: “Consideramos importante a implicación do concello para chegar ao maior número de persoas posíbeis”

A concelleira do BNG, Susana Camba, insta ao goberno municipal do PP “a elaborar unha lista con todos os restaurantes e bares que elaboran menús para levar para compartila a través das redes sociais, do Whatsapp do concello e mesmo da páxina web oficial.“

“Esta iniciativa xa está circulando a través de Facebook”, indica, “mais consideramos importante a implicación do concello para chegar ao maior número de persoas posíbeis”. “A hostalaría local está a atravesar momentos moi complicados”, afirma Susana Camba, “e é o momento de que o concello se implique, non só con declaracións e anuncios, senón con iniciativas concretas”.

O PSOE estradense amósase “decepcionado” polo papelón
do goberno municipal na comisión de Facenda celebrada o venres. Na orde
do día unicamente estaban os orzamentos municipais para 2021. O martes,
os socialistas fixeran chegar as súas propostas, que centraban esforzos na
promoción económica (suba de 150.000 euros e bonificacións fiscais) e no
medio rural (suba de 100.000 euros nos investimentos), cuestións chave
que se deberían atender en 2021.
Os socialistas realizaron un estudo detido do orzamento e atoparon unha
diferenza de 762.000 euros entre os gastos que prevé o goberno e os que
finalmente se terán que atender. “Son partidas de gasto corrente que están
sobredimensionadas, nunca se gastan por completo”. Aínda así, para
poñerllo sinxelo ao goberno, López Bueno propuxo axustes por valor de
381.000 euros “detallando cada céntimo”, e que serían máis que suficientes
para atender as súas propostas.
O líder socialista explica que reorganizando o gasto non sería necesario
acudir a fórmulas e aumento dos ingresos, nin se incorrería en máis
endebedamento por parte do concello. Ademais, co axuste proposto
manteríanse abertas todas as partidas axustadas “que se poderían
complementar se tiveran gasto por riba do normal”.
En contra de toda a lóxica, o PP non atendeu as emendas da bancada
socialista. Para López Bueno este feito demostra que “o PP é o goberno
máis hipócrita da historia deste Concello”. O xoves puidemos velos na
manifestación da hostalaría, comprometéronse no pleno a tomar medidas
económicas de apoio a comerciantes e restauración, pero á hora da verdade
levantan a man para votar en contra das medidas de apoio.
López Bueno recoñece que “non esperaba outra cousa” e parécenlle
“lamentables” os intentos de xustificación do goberno, que intentou
parapetarse en “recomendacións” do departamento de intervención sen
esgrimir “ningún informe asinado”. O líder socialista sentencia que “non
presentan un informe porque non poden, trátase dunha decisión do goberno
e punto”.
O voceiro lamenta que o PP lle dea as costas a comerciantes, hostaleiros e
parroquias “cando se lles deu todo feito” e considera “retratados” aos
Concelleiros do PP. Considera como unha “moi mala nova” que edís
populares que teñen negocios e comercios “voten da man dos seus cargos
políticos” uns orzamentos que non prevén ningunha medida de apoio ao

tecido económico da Estrada. López Bueno opina que “é normal que os
concelleiros con dedicación estean moi tranquilos, ao final eles viven de
salarios pagados por todos os estradenses” pero non comprende a actitude
do resto de concelleiros. “Tal e como nós non entendemos o seu voto, os
veciños e veciñas tampouco o van a entender”.

Susana Camba pide ao alcalde maior dilixencia á hora de mellorar a xestión do punto limpo e ínstao a tomar medidas inmediatas para solucionar o problema da recollida dos voluminosos

A recollida de voluminosos que, en teoría, é un servizo que presta o concello desde hai anos, está suscitando numerosas críticas nas parroquias e lugares.

Segundo explicou a concelleira do BNG, Susana Camba, “veciños e veciñas comunicáronnos que nos últimos meses o concello non pasa a recoller os voluminosos para trasladalos ao punto limpo”. “De feito”, engade, “desde a oficina da alcaldía, que é a onde hai que chamar para prestación deste servizo, recoméndalle aos veciños e veciñas, que leven pola súa conta os voluminosos ao punto limpo, porque desde o goberno municipal non saben cando se vai prestar ese servizo”.

“O curioso”, explica a concelleira nacionalista, “é que na web do concello non figura información algunha de que se deixara de prestar o servizo, ao contrario, no apartado do punto limpo explican o procedemento a seguir polos veciños e veciñas, xerando confusión e frustración”.

“De todos os xeitos”, afirma a concelleira do BNG, “xa temos denunciado en numerosas ocasións o desleixo do goberno do PP co medio ambiente, así como a nefasta xestión do punto limpo, e o da recollida dos voluminosos xa é pinga que desborda o vaso”.