A Estrada na Rede

As obras na Praza da Constitución obrigan a modificar o trazado do desfile da Santa Compaña do Festival Panic. A comitiva sairá da Praza do Campo da Feira e terá como novo destino a Praza do Mercado.

As persoas interesadas en formar parte da comparsa poderán acudir a partir das 17:00 horas ao punto de saída para seren maquilladas ata que ás 19:30 horas se produza o comezo do desfile, que estará amenizado tamén por cabezudos e zancudos.

Ao final do mesmo, alumnos da escola de baile e do ximnasio Absolut Centro Wellness escenificarán dúas coreografías, que cada grupo está a preparar estes días, durante a actuación do grupo Broken Peach.

O alcalde da Estrada, José López Campos, amosouse optimista na cerimonia de presentación do novo Programa Integrado de Emprego A Estrada Activa IV e afirmou que esta é unha ferramenta moi potente de cara á inserción laboral dos participantes, tal como se demostrou nas pasadas edicións.

Este ano reforzarase o compromiso do Concello coa conciliación; unha cuestión que preocupa enormemente á administración local, de xeito que se fará todo o que estea ao seu alcance para garantir a asistencia dos alumnos ás actividades formativas. Para acadar este obxectivo asinouse un convenio con diversas empresas polo cal se encargarían dos cativos durante o tempo adicado á formación. No caso de conciliación para o coidado de persoas maiores, o rexedor local recomendou a esas persoas que trasladen a cuestión ao Concello, onde se buscará algunha solución.

O primeiro ano que se puxo en marcha o programa acadouse unha taxa de inserción do 73 por cento, do 85 por cento o segundo ano e do 71 por cento o terceiro, tendo en conta o considerable incremento no número de alumnos.

Esta edición será a máis numerosa, con 100 alumnos adscritos ao programa fronte os 60 das dúas primeiras e os 85 participantes da terceira. “A experiencia dos últimos anos avala esta iniciativa. Sabemos que funciona”, expuxo López, que pediu aos asistentes ao acto que non se rendan e lle dean a oportunidade ao programa.

Nun principio pode resultar duro porque os cursos son moi xenéricos, como explicou o subdirector da Fundación Cultural, Carlos Andújar, pero irase programando formación máis específica a medida que o persoal técnico vaia coñecendo os perfís dos alumnos.

Os cursos realizados e que se porán en marcha ao longo deste mes son o de prevención de riscos, informática, inglés (que comezará mañá), o curso de carretilleiro e un curso administrativo aos que se engadirá o curso de manipulador de alimentos, que estará dispoñible para o martes 22 de xaneiro.

Este programa Integrado de Emprego é unha aposta clara do Concello para dotar aos veciños de competencias clave que lles permitan e faciliten o acceso ao mercado laboral; unha aposta que tamén supón un risco para a administración local que, de non acadar unha taxa de inserción do 35 por cento dos alumnos, tería que facer fronte aos máis de 200.000 euros que custa o programa.

O Concello da Estrada comezará a partir do luns a construción dun parque canino de 800 metros cadrados nas inmediacións da Baiuca, segundo informou hoxe o alcalde, José López Campos.

O Concello conta nesa zona cun espazo destinado a zonas verdes de 800 metros cadrados que se destinarán á construción dun parque canino nun entorno próximo ao casco urbano, con aparcamento suficiente e lonxe de zonas residenciais. Un espazo amplo pero pechado para garantir a seguridade dos cans e a tranquilidade dos seus donos, que os poderán soltar sen perigo dentro do recinto.

O Concello coordinarase co obradoiro de emprego para introducir elementos de xardinaría e levar a cabo a obra. Xuntos comezarán a traballar no proxecto a partir da vindeira semana, cando se comezará a levantar o peche perimetral do parque. Ademais, incluiranse elementos de axilidade e recreo para as mascotas, auga para que os can poidan beber, luz e mobiliario urbano, como bancos e papeleiras.

López fixo fincapé na idea de que este espazo non será un espazo ao que levar ás mascotas a facer as súas necesidades, senón un lugar que manter limpo onde os cans poidan desfrutar de estar soltos gracias a unha actuación que suporá un investimento aproximado de 20.000 euros.

O Concello da Estrada, a Asociación Comarcal de Empresarios (ACE) e a Asociación de Comerciantes (ACOE) aprobaron hoxe por unanimidade a entrada dunha nova empresa ao Viveiro. A aceptación produciuse despois de avaliar os diferentes criterios empregados para valorar a entrada de novas incorporacións.

A nova empresa do Viveiro, Instaclima G.M, adícase á instalación de condutos de aire e, segundo se  explicou trala valoración, posúe a intención de contratar a arredor de 30 traballadores orientados a ese perfil de montador de condutos de aire acondicionado. Un perfil que lles está custando atopar, pero que está a xerar postos de traballo.

Ademais, tamén se explicou que esta nova incorporación posúe contratos cunha gran empresa téxtil, e que os traballadores que se unan a ela terán que estar dispostos a desprazarse como montadores ás localizacións onde esa compañía vaia a realizar novas aperturas das súas tendas.

Paralelamente á resolución, o concelleiro de Emprego, Óscar Durán, informou de que a partir da vindeira semana abrirase un novo prazo de convocatoria para optar a ocupar os tres espazos do Viveiro de Empresas que están vacantes a día de hoxe. As condicións de acceso serán as mesmas que para os que xa ocupan as instalacións, que teñen servizos de reprografía, luz, calefacción, teléfono, Internet e limpeza por unha tarifa de 50 euros mensuais, a máis competitiva da contorna.

Estas tres prazas quedaron vacantes ao esgotarse o tempo de estadía máximo de dous anos de dúas das empresas e a saída voluntaria de outra, que se viu o suficientemente afianzada como para establecerse por si mesma.

As empresas que ocupan actualmente o Viveiro de Empresas son moRentals, En 2 Detalles, Coaching Co-Razón, Ibuprofeno Teatro, Actualizados Comunicación, Central Científica Galega e a avogada Andrea Arias Mato.

No caso de que existan máis solicitantes que prazas dispoñibles entrarán a formar parte do Viveiro aquelas que acaden as mellores puntuacións de acordo aos criterios de avaliación establecidos.

O Concello da Estrada firmou hoxe un convenio de colaboración coa Asociación Comarcal de Empresarios (ACE) e a Fundación Cultural polo que se comprometen a unir esforzos en favor do emprego. Os tres entes traballarán conxuntamente para prover de formación aos demandantes de emprego e deste modo subministrar traballadores cualificados ás empresas que precisan man de obra.

A Estrada conta con varias alternativas postas en marcha dende a administración local orientadas a tales efectos, como relatou o alcalde, José López Campos, quen enumerou proxectos como o Programa Integral de Emprego, que nesta cuarta edición está formando a un cento de persoas desempregadas; os cursos AFD, dos que hai cinco en funcionamento; o plan de incentivos a emprendedores; o plan de emprego municipal, que conta cun presuposto de 600.000 euros anuais e permiten contratar a gran cantidade de xente e o obradoiro de emprego, que vai xa pola sexta edición.

Estas iniciativas forman ás persoas desempregadas ofrecéndolles unha oportunidade de atopar un traballo alonxado da precariedade instaurada nos últimos anos tralo paso da crise económica. A Estrada está a tomar un camiño polo que crear traballadores orientados a aquelas funcións que van desempeñar nas empresas, un camiño que, mediante estas políticas de emprego, xa sitúa á localidade cunha cifra de desempregados por debaixo da rexistrada ao peche do ano por un concello cunha poboación similar, como Lalín, cando en anos anteriores rexistrabamos entre 200 e 300 por enriba.

Non se poden escatimar esforzos en materia de emprego, aseverou López, quen afirmou que iso é o que significa a firma do convenio; unha colaboración directa entre os tres entes para que por medio do traballo de forma conxunta non quede ninguén que, querendo traballar, non sexa capaz de atopar un emprego.

O presidente da ACE, Fernando Martínez, sinalou que a firma deste convenio ten moita importancia á hora de ofrecer formación ás persoas desempregadas, porque existe demanda de emprego na Estrada, pero non a man de obra axeitada para os postos que se precisa cubrir. Deste xeito, mediante a ensinanza, conseguirase formar xente para esas empresas demandantes.

O concelleiro de Emprego, Óscar Durán, lembrou a existencia do portal de emprego do Concello, un sitio web que atende as recomendacións e consultas da veciñanza e no que se trata de recoller as inquietudes profesionais da veciñanza para ofertar e conferirlles despois esas aptitudes mediante a oferta de cursos de formación.

O punto máis importante é que a formación de calquera tipo estea dirixida á oferta de traballo existente na Estrada, que se dirixa aos distintos sectores do concello e da comarca, matizou o subdirector da Fundación Cultural, Carlos Andújar.

Un exemplo de postos que non se están cubrindo facilmente son os de carniceiro, persoal de coidado de persoas dependentes, albaneis, carpinteiros e soldadores, para os que existen ofertas, pero non man de obra axeitada.

Consolidase na Estrada a primeira asociación provincial de bonsáis de Pontevedra. O Club Bonsái Pontevedra consta de 25 membros e programa dúas actividades mensuais actualmente, segundo explicou hoxe Óscar Expósito, unha das persoas ao cargo da mesma.

As actividades programadas para xaneiro comprenden o desenvolvemento dun taller nas instalacións do club, no Local Social de Baloira, que se celebrará o vindeiro sábado, 12 de xaneiro en horario de 10:00 a 14:00 e de 16:00 a 20:00 horas, e unha excursión a Kingii.es, un paraíso do bonsái, segundo palabras de Expósito, situado no Val do Dubra, en Bembibre, planificada para o 26 de xaneiro.

O Concello da Estrada reuniuse hoxe con membros da consultora Idom con vistas a desenvolver un plan director de saneamento rural, segundo informou hoxe o alcalde, José López Campos. Tratarase de realizar un estudo que precise a forma de actuación máis axeitada para as condicións do rural estradense.

Todas as medidas levadas a cabo no rural polo de agora son actuacións illadas, polo que se pretende encargar un estudo integral á compañía que detecte cales son as necesidades de cada parroquia e territorio, atendendo principalmente ás cargas contaminantes nos cursos fluviais e determine a mellor forma de actuar ao respecto.

A idea é realizar un estudo sobre o que traballar nun futuro. Un estudo que aporte a valoración, custo aproximado das actuacións e a planificación axeitada para afrontar cada escenario acadando os mellores resultados. Se sabemos que tipo de depuracións están funcionando mellor para núcleos reducidos, ou especificamente para cada unha das nosas situacións, poderemos tomar a mellor das decisións, explicou López.

Trátase de planificar primeiro para despois actuar. Coa previsión da chegada de recursos europeos é axeitado ir preparando o terreo para a futura introdución de depuradoras ben dimensionadas, cun mantemento axeitado e uns proxectos adecuados ás condicións do terreo, rematou o rexedor local.