A Estrada na Rede

Mañá presentarase no Museo do Moble e da Madeira (MOME) ás 20:00 horas a vixésimo primeira edición da Miscelánea histórica e cultural da Estrada. Unha publicación que conta con achegas de distintos colaboradores co fin de axudar a recuperar e preservar a memoria e identidade da vila.

O director do Museo Manuel Reimóndez Portela, Juan Andrés Fernández será a persoa encargada de dirixir o acto de presentación dunha miscelánea que nesta edición xunta traballos de 15 autores que pretenden difundir o coñecemento, a cultura histórica e a conciencia social e identitaria estradense.

“O goberno do PP non quere facilitarlle aos veciños e veciñas da Estrada a reciclaxe do lixo”, afirmou o concelleiro do BNG, Xosé Magariños, “nestes días vemos como os contenedores amarelos de plásticos están cheos, desbordan de bolsas con lixo, obrigando ás persoas a botar o lixo na contenedor verde”.

“Parece que o goberno do PP está máis interesado en enviar todo o lixo a SOGAMA para que o queimen”, indicou o concelleiro nacionalista, “incrementando a conta de resultados desta empresa da Xunta, que representa un modelo caduco, antiecolóxico e ineficaz, xa que esta empresa só recicla o 11% do lixo que recibe, o resto vai para coxeneración eléctrica”.

Xosé Magariños volveu a recordar que o BNG si aposta pola reciclaxe e a compostaxe, “de feito, presentamos iniciativas para que o concello se adherise ao Plan Revitaliza da Deputación, mais foi rexeitado polo PP, prefiren carrexar lixo a SOGAMA para amorealo e queimalo”, explicou o concelleiro nacionalista.

A concelleira de Asuntos Sociais do Concello da Estrada, Amalia Goldar, acudiu onte ao Festival de Nadal organizado por Agadea para as persoas que padecen alzhéimer. Un encontro no que monitores, usuarios e familiares conmemoraron o Nadal, celebrado nas instalacións do Novo Mercado que o Concello cedeu á organización.

Os usuarios das aulas de estimulación cognitiva desfrutaron dunha xornada festiva amenizada con diversas actuacións de baile coordinadas polos monitores do Ximnasio Absolut, sorteos e outras actividades, segundo informou hoxe a responsable de Servizos Sociais.

O Concello está satisfeito coa posta en marcha de iniciativas como esta, mediante a que se habilita un espazo onde as persoas maiores podan desfrutar dun servizo de atención das súas necesidades e coidados especiais á vez que se lles dá un respiro aos seus familiares.

Xa se atopan á venda as entradas para a Gala de Nadal do Teleclub da comedia, que se celebrará o vindeiro xoves 27 de decembro ás 21:00 horas no Teatro Principal. Poderán adquirirse a un prezo de 5 euros no Departamento de Cultura do Concello, no Café-Bar Boliche e na billeteira do teatro momentos antes do comezo do espectáculo.

A gala reunirá as actuacións dos artistas estradenses Chelo do Rejo, Manolo do Atlético, o mago Toño, Nono, Merjerita, Miguel Guido, o Padre Xiao e Pablo Chichas, que asumirá o papel de presentador do evento, segundo informou hoxe o concelleiro de Cultura, Juan Constenla. Ademais contará coa actuación musical do trío conformado por Carlos Barruso, Héctor Martínez e Manuel Brey, que amenizarán os espazos entre actuacións.

O concelleiro finalmente animou á veciñanza a arroupar esta “festa do humor con sabor estradense” e compartir o éxito deste circuíto de actuacións que usualmente se levan a cabo nas zonas rurais mediante as actuacións dos artistas nas diferentes parroquias.

Chelo do Rejo engadiu a continuación que a posta en marcha da primeira gala o ano pasado supuxo un comezo fantástico tanto para o público, que a acolleu con agrado, como para os propios artistas, nunha función dinámica e con enerxía na que os monólogos curtos, de arredor de sete minutos, se suceden con fluidez, non dando tempo aos asistentes a cansarse dunha mesma intervención.

Pablo Chichas, pola súa parte, reivindicou o papel social do Teleclub, que cualificou como a “iniciativa cultural máis importante da Estrada”, xa que supón un medio que achega o teatro e a cultura á porta da casa da xente. Unha xente que nalgún caso apenas tivo oportunidade de presenciar obras teatrais e que a través deste medio se achegaron por primeira vez ao mundo das artes escénicas.

O artista rematou afirmando que esta gala é o vehículo para agradecerlle á xente da Estrada o esforzo e traballo que fai durante todo o ano e sinalou que todos os textos da gala son inéditos, de nova creación e non pasaron polo circuíto do Teleclub, co que animou á veciñanza a acudir ao espectáculo.