A Estrada na Rede

 Os traballos acompasaranse coa recta final da intervención para
restaurar a escultura de Asorey que bautiza este espazo urbano.
 A actuación estenderase por espazo aproximado dunha semana.

O Concello da Estrada porá en marcha a vindeira
semana a limpeza integral á que será sometida a Praza da Inmaculada, un espazo público
que se abre aos pés da igrexa parroquial de San Paio e no que se enclava a escultura de
Francisco Asorey que lle dá nome.
Esta intervención, que se realizará con máquinas hidrolavadoras e que se prolongará
por espazo aproximado dunha semana, acompasarase coa fase final dos traballos de
limpeza e restauración da estatua realizada polo célebre escultor para este enclave
estradense no ano 1956.
O concelleiro de servizos municipais, Óscar Durán, explicou que a previsión é empezar a
traballar nesta praza a comezos de semana, sinalando que esta superficie de pedra será
limpada a fondo.
De igual xeito, a medida acompañarase proximamente do pintado da nova illa de
contedores de lixo que foi instalada na parte posterior de este espazo, un traslado que
foi moi ben acollido por moitos usuarios e que require agora da correspondente
delimitación con sinalización horizontal.
Consolidante
No tocante á restauración da escultura da Inmaculada Concepción, situada no extremo
dereito desta praza, dende Artegal Restauraciones explicouse hoxe que, despois de
realizar a limpeza en seco e húmido e de aplicar un biocida para eliminar a colonización
biolóxica, os traballos concentraranse agora en eliminar todas as xuntas de cemento que
presenta a obra. Serán substituídas por morteiro tradicional, toda vez que se repararán
as fisuras e fendas que presenta a peza, culminando o proceso coa aplicación dun
consolidante en toda a figura.

Os traballos suporán, como mínimo, outra semana máis de obras, que serían
compatibles cos traballos de limpeza da praza. A actuación que se está realizando
respondeu á necesidade de corrixir o deterioro provocado pola exposición continuada da
escultura realizada por Asorey aos axentes atmosféricos e á contaminación ambiental. O
estudo previo a esta restauración profesional detectou acumulación de sucidade,
colonización biolóxica, manchas derivadas dos fumes de combustión, erosión superficial e
pequenas fisuras, aínda que sen apreciar danos estruturais de relevancia na escultura nin
no pedestal.
Coa intervención, sufragada pola Consellería de Cultura da Xunta de Galicia, contribúese
á conservación desta representativa peza da obra escultórica de Asorey, poñendo en
valor un elemento patrimonial que forma parte da identidade histórica e cultural da
Estrada. O Concello correrá cos gastos derivados da limpeza da Praza da Inmaculada,
facendo coincidir estas dúas actuacións de mellora.
A Praza da Inmaculada e a súa contorna melloraron hai un ano a súa iluminación, unha
intervención que supuxo a renovación dos deteriorados puntos de luz que existían neste
enclave urbano para gañar intensidade lumínica.

O alcalde da Estrada, Gonzalo Louzao, acompañou hoxe aos veciños da comisión organizadora da Romería da Virxe do Milagres de Requián e ao seu párroco no acto de presentación do programa deste ano.

Os veciños María Rosa Iglesias, Laura Bodaño e Miguel Mototo, xunto co novo párroco de Requián, Martín Ananí Kouassi Kouman, puxeron o acento en que esta celebración remóntase entre fins do século XVII e comezos do XVIII.

Con varias novidades, o programa deste ano é o seguinte:

 Do 19 ao 27 de agosto | Novena
 Misas todos os días ás 8:30, 19:00, 20:00 e 21:00 h
 Rosario ás 19:30 e 21:30 h
 Procesión de velas.

 SÁBADO , 22 de agosto
 18:00 h – Misa do Neno.

 XOVES, 27 de agosto

 21:30 h – Procesión dos Cirios.
 A continuación, verbena coa Charanga BB+.

 VENRES, 28 de agosto – Día da Virxe dos Milagres

 Misas desde as 8:00 h (a das 11:00 h será en galego).
 13:00 h – Misa Solemne.
 Gran Foguetada.
 Procesión e vermú coa Banda de Música Cultural da Estrada.
 Tardeo: concerto de Cantos da Terra.
 Misas ás 19:00, 20:00 e 21:00 h.
 Gran verbena coa orquestra Escaparate e Will Discómovil.

 SÁBADO , 29 de agosto – Día da Nosa Señora da Piedade

 12:00 h – Misa Solemne.
 A continuación, vermú coa Fanfarria Furruxa.
 Inchables gratis para os máis cativos.
 22:30 h – Verbena co grupo M.5 Galicia.

 Os traballos, adxudicados este luns, terán un prazo de execución de dous
meses.
 Con este proxecto engadiranse 60 metros cadrados ao recinto actual, de
xeito que a área destinada ao ocio infantil se achegue aos 180 metros.
 Instalaranse novas lousas homologadas na totalidade da superficie que
se empregará para colocación dos elementos de xogo.

O goberno da Estrada deu luz verde este luns á
adxudicación da obra de ampliación e mellora do parque infantil de Figueiroa, no tramo
final da Avenida de Santiago. O proxecto será executado pola firma Oziona Soluciones
de Entretenimiento S.L, por importe de 42.360 euros. Dende o arranque da obra, a
empresa terá un prazo de dous meses para completar os traballos.
Trátase dunha dotación encadrada nunha zona que gañou moita poboación nos últimos
anos e que ten un carácter estratéxico para o ocio dos máis pequenos, na medida en
que é un espazo situado a carón do CEIP Figueiroa e moi próximo á Escola Infantil
Municipal.
A infraestrutura existente foise quedando pequena co paso dos anos e o goberno local
aposta pola súa ampliación, sempre dentro das posibilidades que ofrece o solar no que
se encadra. A iniciativa será sufragada a través dunha baixa do plan +Provincia da
Deputación de Pontevedra.
O parque de Figueiroa ten actualmente unha superficie de xogo de 116 metros
cadrados. Con este proxecto, engadiranse outros 60 metros, de xeito que a área
destinada ao ocio infantil se achegue aos 180 metros cadrados.
A execución desta mellora contempla a ampliación da soleira actual, así como a
instalación de novas lousas homologadas na totalidade da superficie que se empregará
para a colocación de elementos de xogo. Ademais, incorporaranse novos elementos de
xogo para a diversión dos usuarios deste parque.

A pérgola existente na zona verde manterase para garantir a existencia de zonas de
esparexemento á sombra neste enclave, conservándose tamén o espazo reservado ao
xardín, para goce dos usuarios de maior idade destas instalacións.

 A capital estradense recibe a unidade móbil este xoves e acolle o venres
a campaña “Un alento de vida”, que busca incrementar as doazóns
nestes meses de verán.
 A taxa de doazón do municipio é de 62,8 por cada 1.000 habitantes, moi
por encima da media galega e a longa distancia da media estatal.
 Esta campaña especial porá o acento en que o verán adoita ser a época
do ano de maior dificultade para acadar as máis de 400 doazóns de
sangue diarias que precisan os hospitais.

O sangue non se pode fabricar e só é posible obtelo coa
doazón de persoas solidarias que axudan a outras a recuperar a saúde. Nestes meses de
verán, nos que toca desfrutar das vacacións, miles de enfermos continúan precisando
esta solidariedade. Por iso, o Concello da Estrada sumarase á campaña especial que
realiza a Axencia Galega de Sangue, Órganos e Tecidos (ADOS) para sensibilizar á
veciñanza sobre a importancia de continuar realizando doazóns de sangue nesta
tempada estival, un período no que hai dificultades engadidas para acadar as máis de
400 doazóns de sangue diarias que precisas os hospitais.
O dato da Estrada, aportado pola ADOS, permite ser optimista con respecto á reposta
cidadá. Segundo os datos que manexa a axencia, ao longo de 2025 (o último exercicio
de referencia) dende o Concello da Estrada aportáronse 1.264 doazóns, o que sitúa a
taxa de doazón do municipio nun 62,8 por cada mil habitantes, nos primeiros postos de
ranking provincial, por encima da media galega (38,82) e a longa distancia da media
estatal (33,96 por cada 1.000).
Tres días de visita
A unidade móbil deseñada para facilitar estas doazóns achegarase o xoves á Praza da
Constitución, a carón do consistorio. Estará operativa de 16.00 a 21.00 horas,
regresando o venres 31 de xullo (en horario de 10.00 a 14.00 e de 16.00 a 21.00) e
manténdose ao longo da mañá do sábado, 1 de agosto (de 10.00 a 15.00).

Ademais, A Estrada acollerá o venres un street marketing que busca concienciar sobre a
importancia das doazóns nestes meses de verán, baixo o lema “Un alento de vida”. O
obxectivo desta campaña é informar á veciñanza, poñendo o acento en que o verán
adoita ser a época do ano de maior dificultade para acadar as doazóns de sangue que
precisan os hospitais galegos para atender a milleiros de doentes.
A Axencia Galega de Sangue, Órganos e Tecidos, dependente da Consellería de
Sanidade, envía compoñentes sanguíneos as 24 horas do día a todos os hospitais de
Galicia para atender a actividade asistencial e facer fronte ás urxencias. Os centros
hospitalarios precisan 400 doazóns de sangue cada día.
Antes, durante e despois
En xeral, poden doar sangue persoas maiores de 18 anos (e ata os 70) con máis de 50
quilos de peso e que non padezan nin teña padecido enfermidades transmisibles polo
sangue. Se é pola mañá, non deben acudir sen almorzar e, despois de xantar teñen que
deixar pasar dúas horas.
Antes da doazón un médico realiza unha entrevista e un exame médico básico para
preservar a saúde do doador e protexer ao futuro receptor. Mídese o pulso, a tensión
sanguínea e o nivel de hemoglobina para desbotar unha anemia.
A doazón dura de 5 a 7 minutos e, ao rematar, hai un proceso de recuperación no que o
doador toma auga o refrescos para recuperar de inmediato o volume de líquido
extraído. Aos poucos días recibirá na casa os resultados das análises realizadas para
coñecer o seu estado de saúde.

 Farían a antesala da fin de semana e dos dous días grandes das
celebracións patronais.
 Logo de pasar pola Mesa Local de Comercio e o Consello Económico e
Social, a proposta vai o xoves a comisión e despois a pleno.

Os integrantes da comisión informativa de
Organización, Persoal e Asuntos Xerais abordarán este xoves, nunha sesión convocada
para as 20.00 horas, a proposta de festivos locais para o ano 2027. Chega á comisión
logo de pasar pola Mesa Local de Comercio e o Consello Económico e Social, coa
previsión de elevarse ao pleno ordinario correspondente ao mes de agosto.
Polo tanto, o Concello fixo xa a consulta aos dous órganos indicados, onde se atopan
representados os entes empresariais e económicos do municipio. O alcalde, Gonzalo
Louzao, explicou hoxe que a Asociación de Comerciantes da Estrada (ACOE) realizou
mesmo unha enquisa entre os seus asociados para valorar cales crían que serían os
mellores festivos locais para o vindeiro ano.
A proposta que agora mesmo está sobre da mesa concrétase en reforzar a celebración
das festas patronais de San Paio. Tendo en conta que os días 26 e 27 de xuño (os días
grandes das celebracións estradenses) coinciden en 2027 en sábado e domingo,
proponse marcar como festivos locais neste municipio o xoves 24 e venres 25 de xuño.

 O paso do tempo e a acción da auga sobre a madeira deterioraran as
estruturas instaladas hai unha década por un Obradoiro de Emprego.
 O Concello atende a petición veciñal e asume a renovación con fondos
propios, buscando mellorar o estado deste importante recurso turístico
do municipio.
 As sendas constrúen unha ruta curta, salpicada de muíños, pasarelas e
un salto de agua de case 10 metros de altura.

A paisaxe que conforman os distintos ríos e regatos que
bañan as terras da Estrada constitúe un importante referente para a promoción turística
deste municipio de Tabeirós-Terra de Montes. Dentro desta estampa, fervenzas como a
da parroquia de Callobre son un reclamo importante para os visitantes e unha paraxe
idónea para o esparexemento da veciñanza. En consecuencia, o Concello da Estrada vén
de realizar unha importante actualización e mellora na contorna da Fervenza de
Callobre, na que hai unha década se creou unha senda fluvial salpicada de pontes.
O alcalde da Estrada, Gonzalo Louzao Dono, informou hoxe que que o Concello renovou,
con fondos propios, todas as instalacións que había ao longo dunha senda potenciada,
en 2015, a través do plan de obra dun Obradoiro de Emprego. “Necesitaba unha mellora
importante e, para iso, dende o Concello renovamos todas as instalacións que había”,
resumiu o rexedor local. Indicou que había pontes que estaban en mal estado,
deterioradas polo paso do tempo e tamén pola acción da auga na madeira.
O alcalde explicou que os veciños deron traslado da petición de renovación destes
elementos, garantindo que a ruta se volva moito máis accesible. Louzao aproveitou a
ocasión para facer un chamamento para que estradenses e visitantes percorran esta
fermosa paraxe natural pintada polo río Curantes, completamente actualizada xa e
coroada polo importante salto de auga que bautiza a contorna como Fervenza de
Callobre.
O paseo arranca nesta parroquia da Estrada nas proximidades do castro de Callobre,
antigo poboado castrexo da Idade de Ferro rodeado por una gran cantidade de carballos

e situado a 250 metros de altitude. É un percorrido pequeno, que se pode facer cara a
parte alta da fervenza ou chegando ao pé da mesma. O salto aproxímase aos 10 metros
de altura e o paseo propón camiñar entre carballos e piñeiros, con diversos muíños e a
través de pasarelas de madeira que facilitan o percorrido ata o miradoiro da fervenza.

 A partida orzamentaria desta primeira convocatoria aínda non está
esgotada e o Concello anima ás persoas que cumpran os requisitos a
solicitar a achega municipal.

O Concello da Estrada pechará este xoves, 30 de xullo,
o prazo para a solicitude das novas subvencións municipais, en réxime de concorrencia
non competitiva, destinadas á instalación ou renovación de sistemas de saneamento no
amplo rural do municipio. Esta primeira convocatoria conta cun crédito de 100.000 euros
e permitirá conceder axudas de ata 1.000 euros por vivenda, sen que a subvención poida
superar o custo da actuación. As solicitudes tramitaranse por orde de entrada ata o
esgotamento dos fondos dispoñibles.
Dende o Concello animouse hoxe aos cidadáns interesados a presentar a súa solicitude,
tendo en conta que as peticións rexistradas ata o momento aínda non esgotarían o crédito
dispoñible para esta primeira convocatoria.
O alcalde da Estrada, Gonzalo Louzao, destacou que o obxectivo do Concello é que esta
nova liña de axudas chegue ao maior número posible de fogares do rural. “Gustaríanos
que os 100.000 euros previstos puidesen aproveitarse ao máximo, porque iso significará
que máis vivendas contan con sistemas de saneamento adecuados e que seguimos
avanzando cara a un rural máis saneado, máis sostible e mellor protexido desde o punto
de vista ambiental”, sinalou o mandatario.
Dende o goberno tamén se puxo o acento en que os interesados teñen que afrontar
unha tramitación sinxela. En esencia, terían que presentar no Concello un orzamento da
obra ou instalación e serían acompañados no resto do proceso de presentación polo
persoal dos departamentos de Rural o Subvencións.
Os solicitantes deben cumprir os requisitos que figuran nas bases desta convocatoria:
estar empadroados no Concello da Estrada na vivenda para a que se solicita a
subvención; que a vivenda non dispoña de servizo municipal de saneamento activo e
que o inmoble constitúa unha edificación destinada ao uso residencial.

Cómpre lembrar que son actuacións subvencionables a instalación de novos sistemas
individuais de depuración; a substitución de fosas sépticas deterioradas; a mellora ou
renovación de instalacións de evacuación ou tratamento de aguas residuais domésticas
e obra auxiliares directamente vencelladas á instalación do sistema.