A Estrada na Rede

O Concello da Estrada continúa coa mellora das
súas infraestruturas deportivas. Despois das obras realizadas nas piscinas municipais, no
campo de fútbol Manuel Regueiro e das que moi pronto arrancarán no Novo Municipal,
o alcalde estradense desvelou hoxe que os fondos da cuarta convocatoria do Plan de
Infraestruturas Deportivas da Deputación de Pontevedra serán destinados
integramente á remodelación das pistas de tenis.
O mandatario indicou que o proxecto está concibido en dúas fases. A primeira delas, con
máis de 200.000 euros de investimento, suporá unha mellora integral das tres pistas
existentes na Zona Deportiva, reservándose para unha segunda etapa cubrilas para
sacarlles un maior rendemento cando as condicións meteorolóxicas xogan en contra.
Deste xeito, o proxecto previsto agora contempla a retirada do céspede antigo e a súa
substitución por unha superficie de céspede artificial de última xeración, elaborado para
garantir o óptimo rendemento deportivo.
Os traballos para a colocación desta nova herba artificial incluirán a limpeza da
superficie, coa revisión de drenaxes e granulometría; estendido dos rolos, pegado das
xuntas, inserción das marcaxes, recheo con area de sílice, cepillado e redistribución da
area.
Con código
O proxecto tamén inclúe a substitución do peche perimetral destas instalacións
deportivas e a mellora e acondicionamento dos accesos. Neste último senso,
implementarase un control de acceso dixital, de xeito que os usuarios entren ás pistas
de tenis valéndose dun código que se lles proporcionará no momento de aboar a reserva
de uso das instalacións.
A día de hoxe, reservar unha pista de tenis no Concello da Estrada ten un prezo de 1,54
euros por hora sen luz e 2,26 euros por hora no caso de que se faga uso do sistema de
iluminación.
As pistas de tenis municipais son empregadas tres días á semana, entre os meses de
outubro e xuño, polos alumnos da correspondente Escola Deportiva Municipal. A
maiores, as instalacións son reservadas esporadicamente por clubs de tenis e están
abertas a usuarios de acceso libre, que representan unha media dunhas 20 persoas por
día ao longo de cada semana na que se pode considerar, por cuestións meteorolóxicas,
a tempada alta (de abril a outubro). A maiores, en xullo e agosto estas tres pistas acollen
cada día aos participantes no Campus Deportivo de Verán.
O alcalde estradense asegurou que a segunda fase desta reforma permitirá dar resposta
a unha antiga demanda dos usuarios destas pistas: cubrilas para que esta práctica
deportiva quede salvagardada nos meses de inverno, ampliando as posibilidades de
xogo e adestramento.
Novo Municipal
Por outra banda, o Plan de Infraestruturas Deportivas foi destinado, na súa terceira
convocatoria, á mellora do tapete e da iluminación do campo de fútbol Novo Municipal.
Os traballos supoñen un investimento de 390.000 euros e agárdase que queden
completados nos vindeiros meses.

 Serán o luns nos locais sociais de Cereixo (18.00 horas) e Loimil (20.30).
 A escolla das parroquias responde á súa situación intermedia, para
posibilitar a asistencia de veciños das 14 parroquias estradenses
afectadas por este proxecto.
 Técnicos de Tysgal acudirán a ámbolos dous encontros para informar
aos afectados e poñer ao seu dispor modelos de alegación.
 Concretan que os recursos poderán presentarse ata o 20 de outubro.
 Esta liña pasa por 58 aldeas do municipio.

O alcalde da Estrada, Gonzalo Louzao, confirmou
xa a convocatoria de dúas reunións cos veciños afectados polo trazado previsto no
proxecto da Liña de Alta Tensión (LAT) que Unión Fenosa Distribución promove entre as
subestacións de A Estrada e Paizás (Silleda). Netes encontros os representantes
municipais estarán acompañados por técnicos de Tysgal, a empresa especializada que
contratou o Concello para formular as alegacións que se estimen pertinentes.
Celebraranse o vindeiro luns, 21 de setembro, nos locais sociais de Cereixo e Loimil.
A escolla das parroquias responde á súa situación intermedia, para posibilitar a
asistencia de habitantes das 14 parroquias estradenses afectadas por este proxecto.
Tanto Cereixo como Loimil son, ademais, das zonas con máis aldeas polas que pasa o
tendido e nalgunhas delas coa maior proximidade ás vivendas. O primeiro encontro será
no local social de Cereixo, ás 18.00 horas. O segundo será no local do palco de Loimil, ás
20.30.
Os técnicos de Tysgal ofrecerán aos veciños toda a información dispoñible e resolverán
as dúbidas que poidan xurdir. Ademais, ofrecerase á cidadanía modelos de alegacións
para participar no procedemento que está aberto. Neste senso, dende a empresa
confirmouse que os particulares terán ata o 20 de outubro para formalizar os seus
posibles recursos.
Esta liña de alta tensión de 66 Kv tería a súa orixe na subestación eléctrica da Estrada e
o seu destino na de Paizás, no veciño municipio de Silleda. Transcorrería
maioritariamente en aéreo, con cadanseu tramo subterráneo para a conexión coas
subestacións e un tramo adicional para o cruce do Camiño do Santiago. Sería un total de
21.664 metros, contemplándose 87 apoios metálicos de celosía.
A liña transcorre por 16 parroquias, das cales 14 pertencen ao Concello da Estrada e
outras dúas ao de Silleda. No caso da Estrada discorrería polas parroquias de San Paio
da Estrada, A Somoza, Agar, Cereixo, Curantes, Guimarei, Lagartóns, Lamas, Loimil,
Orazo, Ouzande, Remesar, Rubín e Tabeirós. En Silleda, as afectadas serían Cira e
Dornelas.
A información publicada permite observar que o trazado desta LAT A Estrada-Paizás
pasaría por un total de 62 núcleos rurais, dos que 58 serían aldeas da Estrada.
• A Estrada: O Regueiro e A Estrada.
• A Somoza: A Carballeira e Os Sureiros.
• Agar: Pepe, A Pedreira, Penalobeira, Valiñas, O Outeiro.
• Cereixo: A Igrexa, Constenla, Os Piornos, Pernaviva, Mollarrabo.
• Curantes: Curantes Novo, A Rocha, Cortes.
• Guimarei: Soutiño, Campos, A Torrevella, Portacartas, Gudín, San Xiao, O
Cogoludo, Xerlís, A Cruz, A Mañenza, A Portela.
• Lagartóns: O Outeiro, O Sabugueiro, Trasdomuro, Os Tatos, O Monte, O
Mollarrabo.
• Lamas: O Carballal.
• Loimil: Pardellas, Loimil, A Sobreira, Penaporrín, Riomao, Chenlos, Loimil do
Carballo.
• Orazo: Vendexa e Barro.
• Ouzande: O Redondo, O Formigueiro, As Cachopas, Alemparte, Penerada.
• Remesar: O Rego.
• Rubín: A Igrexa, A Veiga da Braña, O Bede, Berbigueira, Os Balseiros, O Barro,
Pazos.
• Tabeirós: Sandán.
A liña subterránea estaría conformada por tres tramos. O primeiro parte da subestación
da Estrada, con 360 metros. O segundo tramo sería de 919 metros, para o cruce da
N-525 e a Vía da Prata. O terceiro tramo subterráneo tería unha lonxitude de 215
metros, chegando ata a posición da subestación de Paizás.
A liña aérea divídese, á súa vez, noutros dous tramos: un de 18.792 metros de lonxitude,
con 80 apoios; e un segundo de 1.381 metros, con outros sete apoios metálicos.
A documentacióng recolle que na contorna de 500 metros do proxecto viven un total de
1.240 persoas, máis a parte proporcional do núcleo urbano da Estrada, que se sitúa no
extremo oeste. Sinálase que o número de vivendas no radio de 500 metros do núcleo
da Estrada é moi reducido con respecto ao global. No que respecta ao ámbito máis
próximo ao proxecto existen 143 habitantes censados nas poboacións situadas nun
radio de 200 metros.

No acto de presentación, os representantes institucionais e empresariais destacaron o peso do sector
da madeira en Galicia, que xa supón o 1,7% do PIB galego, e salientaron a cita feiral pola súa labor de
promoción e e formación
O Recinto Feiral da Estrada acolleu durante a mañá do martes o acto de presentación da 38ª Feira do
Moble de Galicia que abrirá as súas portas o xoves 17 con medio centenar de firmas expositoras.
No encontro interviron Gabriel Alén Castro, director xeral de Comercio e Consumo da Xunta de Galicia;
a deputada provincial Belén Cachafeiro Anta, a representante da Cámara de Comercio de Pontevedra,
Vigo e Vilagarcía de Arousa Lucía Pedroso Suárez; o presidente da Asociación Comarcal de Empresarios
da Estrada, José Luís Terceiro Carracedo, e o alcalde do Concello da Estrada, Gonzalo Louzao Dono.
Todos concordaron na importancia da Feira do Moble como expositor dun dos sectores con maior
relevancia de Galicia.
José Luís Terceiro agradeceu a entidades públicas por seguir apostando e mantendo as instalacións do
Recinto Feiral estradense para que os empresarios poidan seguir mostrando os seus produtos e
negocios. Tampouco perdeu a oportunidade para agradecer aos expositores desta edición a súa
participación. Neste sentido, Lucía Pedroso puxo a ollada nas firmas do evento, asegurando que é “un
punto de encontro para profesionais, empresas e público arredor dun sector de enorme peso en
Galicia”.
Sobre a relevancia do sector forestal e da madeira, a deputada provincial Belén Cachafeiro salientou
que “o pasado ano tivo unha facturación de máis de 2.500 millóns de euros, conta con máis de 3.300
empresas implicadas e con 19.400 persoas afiliadas na Seguridade Social e xa representa o 1,7% do PIB
galego”. Ao que engadiu que se por algo salienta esta Feira do Moble é polo seu carácter innovador e
por introducir no seu programa cuestións de relevancia como as relativas ao cambio climático e á
protección do noso medio natural”.
Pola súa banda, o alcalde da Estrada, Gonzalo Louzao, aproveitou para rememorar as orixes da cita
feiral e situalas nos torneiros do rural estradense nun momento no que “a metade da poboación que
estaba vinculada co sector industrial, traballaba en algo relacionado co moble e coa madeira”. Ao
pasado, sumoulle o presente, e lembrou que fai un ano, a Consellería de Educación inaugurou unhas
instalacións, cunha inversión de preto de catro millóns de euros, que cualificou de “primeirísimo nivel”,
destinadas ao “ciclo do moble e da madeira que cada vez gaña máis adeptos”, e que cumpren coas
esixencias dun sector que está a demandar “a aplicación de novas técnicas”.
En relación á formación técnica do sector, o director xeral de Comercio e Consumo da Xunta de Galicia,
Gabriel Alén, salientou “a labor de difusión, de promoción, de formación e información que
desenvolven este tipo de feiras e eventos”. A isto engadiu que “o sector forestal galego, que é punteiro
a nivel de toda España, ten unha punta de lanza nesta feira”. Alén rematou poñendo en valor o
comercio local e, en definitiva, “as prazas de abastos, o artesán e os recintos feiras”.
Inauguración dunha feira con moito máis que mobles
O acto de inauguración da 38ª Feira do Moble terá lugar o xoves 17, ás 12.00 horas, a cargo do
delegado territorial da Xunta de Galicia Pablo Fernández López, que fará un percorrido oficial polo
recinto feiral e visitará aos expositores.
O Recinto Feiral abrirá as súas portas con horario ininterrompido de 11.00 a 20.00 horas, e coas dúas
primeiras xornadas da cita feiral con entrada de balde. Ademais, os asistentes poderán participar no
sorteo dunha viaxe mais de lotes de produtos.
Non só se poderán atopar as últimas novidades do mercado mobiliario doméstico, menaxe, descanso,
tapiceria, comercio, complementos ou antigüidades, senón que tamén haberá oco para xornadas
formativas dirixidas para a mocidade da vila. A primeira delas, a do xoves 17, contará co coloquio
“Tecnoloxía e procesado de madeira”, impartida polo docente da Escola de Enxeñaría Forestal da
Universidade de Vigo Óscar González, e a charla “Orientación académica e profesional”, por Luís
Torres, técnico de apoio á docencia e á investigación. Xa o venres 18, será a quenda de Bertín Parga,
xefe de servizo de Consellería de Educación, Ciencia, Universidade e Formación Profesional, con “A
formación profesional ábreche as portas do futuro”.
Así mesmo, os máis pequenos tamén terán diversión asegurada con dous espectáculos de maxia,
financiados pola Deputación de Pontevedra, a mans dos magos Costa, na tarde do sábado 19, e o
mago Pis, na derradeira xornada, a do domingo 20.

A tenente de alcalde e concelleira de Educación,
Amalia Goldar Cora, recibiu esta mañá na Praza da Constitución (ao pé do consistorio) a
antigas alumnas da xeración do 64 do antigo instituto Inmaculada Concepción, que por
aquel entón existía na Rúa Serafín Pazo. Este centro educativo transformaríase en
biblioteca municipal.
Este é o primeiro encontro de confraternidade destas alumnas, que despois desta
recepción se encamiñaban cara a Casa da Lagoeiro para continuar celebrando a súa
reunión.

 O concelleiro Alberto Blanco acude xa a un primeiro encontro en Loimil
acompañado polo técnico de Tysgal, a empresa especializada que
contratou o Concello.
 Nestes encontros ofreceranse aos veciños e asociacións o asesoramento
gratuíto e modelos de alegación.
 As parroquias estradenses polas que discorre a liña son A Estrada, A
Somoza, Agar, Cereixo, Curantes, Guimarei, Lagartóns, Lamas, Loimil,
Orazo, Ouzande, Remesar, Rubín e Tabeirós. En Silleda, as afectadas
serían Cira e Dornelas.

O tenente de alcalde Alberto Blanco Carracedo
trasladouse a última hora deste xoves ata a parroquia de Loimil para participar nunha
reunión motivada pola apertura do proceso de información pública ao que quedou
sometido o proxecto, promovido por Unión Fenosa Distribución (UFD), da Liña de Alta
Tensión (LAT) A Estrada-Paizás. O concelleiro acudiu acompañado por un técnico da
empresa Tysgal, firma especializada á que o Concello da Estrada contratou para recibir
asesoramento á hora de presentar as alegacións que se estimen convenientes. Os
veciños das 14 parroquias da Estrada que estarían afectadas por este proxecto serán
convocados a novas reunións nas que se lles brindará toda a información e se porá ao
seu dispor modelos de alegación.
O persoal técnico fixo exposición ante os asistentes da situación neste momento inicial,
logo de realizar os estudos correspondentes. “Quedouse nunha nova reunión con todas
as parroquias afectadas e, deste xeito, tratar de garantir a seguridade en todos os
sentidos: tanto para as persoas como para o medio ambiente”, sinalou Blanco. “Se lles
ofreceu a posibilidade de que os veciños fagan uso das alegacións que esta empresa
elaborará para presentar en nome do Concello e tamén para facilitar modelos aos
veciños e ás asociacións”, engadiu.
O Concello vén estudando a documentación publicada no marco deste proceso aberto
para consulta do estudo de impacto ambiental e a petición de autorización
administrativa para esta liña. Con todo, o goberno local decidiu ir da man neste proceso
de Tysgal, empresa especializada que xa prestou o seu asesoramento ao Concello no
trámite de alegacións ante diversos proxectos de parques eólicos.
Dende o executivo que encabeza Gonzalo Louzao faise fincapé en que a intención do
Concello é velar polo cumprimento de todas as garantías, tanto en materia
medioambiental como no tocante ao respecto ás condicións de vida e á propiedade da
veciñanza estradense.
Maioritariamente en aéreo
En base á información publicada, esta liña de alta tensión de 66 Kv tería a súa orixe na
subestación eléctrica da Estrada e o seu destino na de Paizás (Silleda). Transcorrería
maioritariamente en aéreo, con cadanseu tramo subterráneo para a conexión coas
subestacións e un tramo adicional para o cruce do Camiño do Santiago. Sería un total de
21.664 metros.
A liña transcorre por 16 parroquias, das cales 14 pertencen ao Concello da Estrada e
outras dúas ao veciño municipio de Silleda. No caso da Estrada discorrería polas
parroquias de San Paio da Estrada, A Somoza, Agar, Cereixo, Curantes, Guimarei,
Lagartóns, Lamas, Loimil, Orazo, Ouzande, Remesar, Rubín e Tabeirós. En Silleda, as
afectadas serían Cira e Dornelas.
No tocante á motivación do proxecto, a mesma documentación sinala que a subestación
eléctrica da Estrada se alimenta unicamente da liña de alta tensión Tibo A Estrada,
mentres que a de Paizás o fai da LAT 66 kV Portodemouros. “O que supón que ambas
están en posición de antena, isto é, unha situación precaria en caso de continxencias
que poidan afectar á subministración eléctrica da zona”. “·Co fin de mellorar a calidade
do servizo na comarca e de garantir a súa continuidade ante eventualidades,”
proxéctase a LAT entre as subestacións da Estrada e Paizás, “pechando así o anel de 66
kv”, recóllese.

 O interese turístico do Pazo de Oca avala o bo funcionamento do servizo
instalado nesta parroquia da Estrada.
 Máis do 12% dos visitantes foron estranxeiros.
 Francia, Reino Unido, Alemaña, Portugal e Países Baixos, os países que
máis visitantes proporcionaron.
 Agosto case duplica o número de visitas recibidas ao longo de xullo.

O Punto de Información Turística instalado no Pazo
de Oca vén de pechar as súas portas co remate da tempada alta do verán. Os datos de
afluencia evidencian, un ano máis, o peso que ten o alcumado como Versalles Galego
no catálogo de recursos turísticos do municipio estradense. Segundo os datos aportados
dende o departamento municipal de Turismo, área que coordina Óscar Rancaño, entre
xullo e agosto foron un total de 3.411 as persoas que se achegaron ata este servizo.
Deles, máis do 12% eran visitantes estranxeiros.
As estatísticas de visitantes amosan que agosto é o mes con máis afluencia turística no
Concello da Estrada. Tomando en consideración as visitas ao punto informativo
instalado nesta parroquia na última mensualidade pode observarse que case duplican
as contabilizadas en xullo. Deste xeito, no primeiro dous dous meses centrais foron
1.273 as persoas atendidas, das cales 153 proviñan do estranxeiro. No mes de agosto, a
cifra elévase ata acadar os 2.138 usuarios, dos que 310 eran procedentes doutros países
(o 13%).
Centrando a análise dos datos no turismo estranxeiro, os países que máis visitantes
aportaron a esta zona do rural estradense foron Francia, Reino Unido, Alemaña, Portugal
e Países Baixos.
No tocante ao turismo nacional, as comunidades que aportaron un maior número de
visitantes foron Madrid e Andalucía, seguidas por Cataluña.
Con respecto aos motivos da visita á Estrada, a meirande parte destes usuarios aluden
a unha motivación cultural e, nomeadamente, á relevancia do Pazo de Oca como recurso
turístico.
Os días de máis calor do verán, nos que se estableceu alerta vermella, foron os menos
concorridos neste punto de información turística.

 A administración municipal contrata á empresa especializada Tysgal
para que elabore un informe sobre a afección do proxecto e curse as
alegacións pertinentes.
 Fará extensiva, de xeito gratuíto, esta orientación aos veciños e
asociacións que desexen participar nun proceso que rematará o 10 de
outubro

Aberto o prazo de consulta do estudo de impacto
ambiental e a petición de autorización administrativa para a Liña de Alta Tensión (LAT)
promovida por Unión Fenosa Distribución entre A Estrada e Paizás (no veciño municipio
de Silleda), o alcalde da Estrada, Gonzalo Louzao, confirmou que o Concello ten
contratado xa unha empresa especializada que oriente á administración local nas
alegacións que ten previsto presentar e que tamén poida servir de axuda aos veciños
interesados para a canalización dos seus recursos.
Entendendo que as infraestruturas eléctricas son necesarias para garantir unha correcta
subministración, o rexedor defendeu que o Concello da Estrada busca neste trámite
velar para que “que se fagan as cousas da mellor maneira posible e cumprindo coas
garantías no que ten que ver co impacto ambiental e o respecto á propiedade e á vida
dos veciños”.
Adiantando xa que o Concello participará nesta fase de alegacións, o rexedor detallou
que a administración estradense contactou coa empresa Tysgal, firma coa que o
Concello ten xa unha importante experiencia derivada dos procesos de alegación a
proxectos de instalación de parques eólicos no municipio.
Louzao lembrou que o prazo para alegar remata o 10 de outubro, de xeito que hai aínda
marxe para que esta empresa especializada lle faga chegar ao Concello o informe
solicitado sobre as afeccións a o territorio estradense desta liña e sobre as posibles vías
de alegación. O alcalde sinalou tamén que a empresa proporcionará orientación e
modelos de alegación ás asociacións e veciños que queiran alegar, de xeito gratuíto.
O mandatario apuntou que, una vez que estean elaboradas as alegacións, o Concello
convocará reunións nas parroquias afectadas, ás que asistirán tamén os técnicos de
Tysgal. Nestes encontros, que previsiblemente serán na vindeira semana ou na seguinte,
ofrecerase á cidadanía toda a información dispoñible e a posibilidade de realizar
alegacións.
O proxecto non é novo, senón que vén de retomarse. Na documentación publicada ata
o de agora recóllese que a empresa busca mellorar a calidade de servizo na comarca e
garantir a calidade da subministración ante eventualidades, estimando a necesidade de
executar unha liña eléctrica de conexión entre a subestación da Estrada e a de Paizás.
O trazado tería tramos subterráneos e aéreos. A liña transcorrería por 14 parroquias,
das cales 12 pertencen ao municipio estradense e 2 ao de Silleda