Así o acaba de anunciar o presidente do Goberno galego nunha rolda de prensa para dar conta das medidas acordadas onte polo Comité Clínico, que pola noite xa avanzara que mantiña o peche perimetral e a limitación de reunirse só coa xente coa que se convive.
As novas restricións entrarán en vigor ás 15:00 horas do venres e manteranse en principio durante un mes.
Segundo explicou Alberto Núñez Feijóo, o peche da hostalería e a realización de actividades só esenciais (o comercio continuará aberto) afecta A Estrada xunto a outros 59 concellos, entre eles as grandes cidades galegas e municipios veciños como Silleda e Lalín.
De momento avanzou que non haberá limitacións para ir ao traballo, colexios, atención a persoas dependentes ou por motivos de saúde, así como para realizar compras. Si se poderá practicar deporte, aínda que só de forma individual.