A Estrada na Rede

O programa de Vacacións para Maiores do Imserso, co
que colabora o Concello da Estrada, manterá aberto dende o 27 de xuño ata o 19 de xullo
o prazo de inscrición para participar durante a tempada 2022/2023.
Aqueles/as estradenses que queiran acollerse ao Programa de Vacacións para Maiores
deberán reunir os seguintes requisitos: ser residente e estar empadroado/a no municipio,
ser maior de 65 anos, ter a condición de pensionista polos conceptos de xubilación, de
viuvez con idade igual ou superior a 55 anos, ou outras pensións cunha idade de 60 anos
como mínimo.
Unicamente poderá acompañar á persoa beneficiaria o/a cónxuxe, aínda que non acade
a idade, sempre e cando reúna os demais requisitos, e un fillo/a cun grao de
discapacidade igual ou superior ao 45%.
Para poder participar, os/as interesados/as poderán presentar a solicitude para darse de
alta no Imserso acompañada do impreso municipal para a reserva de praza de xeito
presencial, no Departamento de Servizos Sociais ou no rexistro xeral do Concello, ou a
través da sede electrónica do Concello da Estrada. Aquelas persoas que xa se beneficiaran
do programa de Vacacións para Maiores noutras tempadas xa figuran de alta no Imserso
e só deberán presentar a solicitude municipal de reserva de praza.
O primeiro día para inscribirse, o luns 27 de xuño, coincidirá na Estrada co festivo local
polas festas patronais do San Paio, polo que durante esa xornada só se poderá presentar
a solicitude a través da sede electrónica do Concello.
No caso de ter dificultades para a realización dos trámites, poderán achegarse ao
Departamento de Servizos Sociais de luns a venres en horario de 9.00 a 14.00 horas, ou
chamar ao teléfono 986 573 265. Durante a pasada tempada, o Concello da Estrada
rexistrou 274 solicitudes.

O Concello da Estrada rexistrou un novo récord ao recibir
170 solicitudes para a celebración de lumeiros durante a noite de San Xoán, dez máis ca
no ano 2021 e cifra que supera á centena de solicitudes recibidas de media cada ano
durante estas datas.
Do total de solicitudes, 156 están ubicadas no eido rural e 14 pertencen ao casco urbano
da vila. Este aumento vén ligado á recuperación da normalidade no San Xoán este 2022,
coa posibilidade de volver celebrar os lumeiros en espazos públicos por primeira vez
dende o comezo da pandemia. Durante a noite do 23 de xuño haberá, polo tanto,
lumeiros veciñais, parroquiais ou de barrios.
No ámbito rural recuperaranse este ano o San Xoán do Areal de Berres ou o do castro de
Callobre, aos que se sumará un ano máis o San Xoán de A Praíña de Pontevea, en Couso.
No centro da vila tamén volverán celebrar o San Xoán despois de dous anos de parón
pola pandemia barrios como o da Cañoteira, o de Figueiroa, a Avenida de Vigo ou a rúa
do Muíño.
Outro dos principais lumeiros que se recuperará este ano será o das festas patronais do
San Paio, que terá lugar no aparcadoiro do Teatro Principal durante a sardiñada popular
que se celebrará a partir das 22.00 horas. Contará con 500 quilos de sardiñas gratis
doadas polas pescaderías Chedas, Blanco, Pinche, Rafa Carbia e Fran, e haberá
acompañamento musical a cargo do grupo Regatos.
Este mércores 22 de xuño será o último día para obter o permiso a través da sede
electrónica ou da oficina de rexistro do Concello da Estrada.

O concelleiro de Eventos, Gonzalo Louzao, presentou esta
mañá no Concello os tres grandes espectáculos que reunirán sobre o escenario a 186
artistas estradenses durante a xornada do sábado 25 de xuño, dentro da programación
das festas patronais do San Paio: o Festival de Música Tradicional, a gala Tequexetéldere
30 Aniversario e o Start of Summer Festival.
Na súa intervención, o edil de Eventos destacou a “aposta pola cultura local” do Concello
da Estrada, ofrecendo durante a celebración das festas patronais do San Paio grandes
formatos para todos os públicos compostos por “ADN local”, cunha programación que
“reserva o espazo central para as agrupacións máissenlleiras da Estrada”. Louzao engadiu
que, ante a probabilidade de chuvia, os dous escenarios nos que se desenvolverán estos
eventos estarán cubertos.
En primeiro lugar celebrarase o Festival de Música Tradicional, ás 19.30 horas na Alameda
Municipal, que se retoma despois de dous anos de parón pola pandemia. Contará coa
participación de máis de 90 compoñentes da escola e da Banda de Gaitas de Barbude,
que estará acompañada da Asociación Cultural Malante de Malpica e da Orquestra de
Foles de Portugal. O presidente da Asociación Cultural Escola de Música Tradicional de
Barbude, José Ramón Brea, asegurou que “haberá sorpresas durante a actuación” e
engadiu que o obxectivo é darlle continuidade a este espectáculo durante os vindeiros
anos para “manter viva a música tradicional na Estrada”.
Ás 22.30 horas, a Praza do Concello acollerá o concerto especial polo 30 aniversario da
Agrupación Folclórica Estradense Tequexetéldere, que tivo que ser cancelado no 2020
por mor da pandemia. A intención da agrupación é repetir o formato empregado para
celebrar o seu 25 aniversario, hai sete anos no Teatro Principal, que contou cunha gran

acollida entre o público. Entre músicos e bailadores xuntaranse 85 persoas sobre o
escenario e os/as integrantes de Tequexetéldere contarán co acompañamento da Banda
de Música Municipal da Estrada, que interpretará nove pezas da agrupación de baile
tradicional adaptadas polo compositor estradense Simón Couceiro.
Ás 00.00 horas pechará a programación do sábado a terceira edición do Start of Summer
Festival na Alameda Municipal, no que acompañarán a Henry Méndez e a Groove Amigos
os DJ estradenses de todos os locais de ocio nocturno do municipio. Actuarán Carlos
López, Zana, Pedro Rivis, Álex Brea, Xabi Villar e Iván Campos ata o remate do festival,
arredor das 4.00 horas da madrugada.
O edil de Eventos tamén adiantou os avances na preparación dos festexos, que
comezarán coa sardiñada de San Xoán a noite do 23 de xuño. “As últimas atraccións de
feira chegarán ao longo do día”, asegurou o edil, e engadiu que se está a “ultimar a
instalación do alumeado” á espera de colocar os postos de rúa nos vindeiros días, que
estarán situados na rúa Iryda, na Praza do Concello e na rúa Calvo Sotelo.
Durante a presentación, o edil de Eventos estivo acompañado do presidente e a
secretaria da Asociación Cultural Escola de Música Tradicional de Barbude, José Ramón
Brea e Andrea Arias; do xerente da Agrupación Folclórica Estradense Tequexetéldere,
Kike Vázquez; do vicepresidente da Banda de Música Municipal da Estrada, Rubén
Calviño; e do DJ estradense Carlos López.

Sr. Alcalde do Concello da Estrada, José Lopéz Campos, Sr. Director Xeral de
Politica Linguista, Valentín García Gómez, Sr. Deputado Juan Constenla
Carbón, concelleiros, representantes da asociación de Terra de Montes e da
Irmandade de Padrón, compañeiros da directiva de Fillos e Amigos da Estrada,
señoras e señores: moi boas tardes.
Pouco a pouco, imos recuperando a normalidade sanitaria, grazas o cal é
posible que nos xuntemos nesta data, aquí, diante do monólito a Marcial
Valladares, para renderlle homenaxe as persoas que formaron parte da inmensa
familia de Fillos e Amigos da Estrada ao longo das máis de catro décadas de
existencia. Todos eles, dalgún xeito, son responsables do camiño percorrido,
dos éxitos e da pervivencia do espíritu dos seus fundadores.
En primeiro lugar, quero ter un agarimoso recordo para os compañeiros que nos
contemplan desde o Ceo, comezando por José Ramos Durán, “Cholín” para
moitos de nós, recentemente falecido, ilustre avogado, cofundador e membro
directivo da Asociación, na que participou moi activamente, redactando
inclusive os estatutos da mesma.
E para o fundador e “alma mater” da Asociación, Alfonso Varela Durán,
presidente exercente ata o último alento, cun entusiasmo sin límites, cunha
bonhomía agarimosa e un “estrandensismo” tan xeneroso, que era como un
enorme paraugas no que cabiamos todos os que tiñamos algo que ver con esta
terra.
Tamén para outros membros da Asociación que nos foron deixando ó longo dos
anos, pero que permanecen na memoria e nos nosos corazóns, tales como, José
Porto Matalobos, José Pérez Fráiz, Luís Muñiz Otero, Manuel Souto Ulla, Luis
Reimóndez Fernández, Silverio Chao Iglesias, ou o mestre Olimpio Arca
Caldas, que foi quen de facer as presentacións mais fermosas de moitos dos
nosos premiados.
Así mesmo quero saudar con agarimo a María Dolores Araujo Arias, “Noni
Araujo”, que tamén foi cofundadora e membro directivo da Asociación, o igual
que Pedro Leis Camba e Manuel Docampo Pego, na que aportaron moito
traballo e sentido común. Longa vida para todos eles e para nos.
Para rematar, solo me resta dicir que a ofrenda neste lugar quere simbolizar o
respecto e admiración que temos por aqueles estradenses que como Marcial

Valladares e a súa irmá Avelina, escribiron páxinas fermosas da nosa historia e
levaron o nome da Estrada con orgullo polo mundo.
O igual que aquelas persoas, estradenses de corazón, que sin ter nacido na
Estrada traballaron para ela, colaboraron nos seus proxectos, ou fixeron dela o
seu fogar.
Na nómina de mais de 200 premiados ao longo dos anos temos un reflexo fiel
do potencial que ten o nosa comarca nas mais diversas actividades: persoas con
un curriculum brillante, pequenas ou grandes empresas, asociacións,
comerciantes, etc. Todos tiveron cabida porque todos aportaron excelencia a
nosa sociedade, tal como relatou nun fermoso artigo titulado “ O ronsel de
Fillos e Amigos da Estrada”, Alfonso Varela Román, Alfonso Varela “fillo”,
que foi publicado nos diarios do pasado día a12.
E que para cando isto mellore, aquí estaremos, Dios mediante, co xantar
multitudinario habitual incluído, outra vez máis, para recoñecer os que a día de
hoxe seguen a esforzarse, a traballar e a darlle mais pulo a este concello, do que
nos sentimos honrados de ser fillos.

• Fotógrafos e produtoras de Corea do Sur, China, Estados Unidos, Reino Unido,
Alemaña, Portugal e de diferentes puntos de España xa están acreditados para
cubrir esta tradición declarada de Interese Turístico Internacional en 2007
• As entradas para presenciar no curro as “rapas” do sábado 2 de xullo (19.00 horas),
domingo 3 (12.00 horas) e luns 4 (12.00 horas) só poden comprarse a través da
páxina web www.rapadasbestas.gal
• O Festival RapaSons inclúe unha quincena de actuacións musicais, entre as que
figuran Treixadura, O caimán do río Tea, Combo Calada e Zënzar

O Museo Estrella Galicia (MEGA) acolleu hoxe a presentación
na Coruña da programación de actividades da Rapa das Bestas de Sabucedo 2022, que se
celebrará nesta parroquia estradense entre os vindeiros días 30 de xuño e 4 de xullo, e que xa
conta cunha trintena de profesionais da comunicación acreditados procedentes de sete países:
Corea do Sur, China, Estados Unidos, Reino Unido, Alemaña, Portugal e España.
A Rapa das Bestas de Sabucedo 2022 recupera a súa normalidade despois de dous anos
atípicos por mor da pandemia, xa que en 2020 non se puideron rapar as bestas no curro e en
2021 a data de celebración cambiouse da primeira fin de semana de xullo para finais do mes de
agosto. “A pandemia foi difícil e queremos volver con todo, con forza”, asegurou o presidente da
Asociación Rapa das Bestas de Sabucedo, Paulo Vicente Monteagudo, que cualificou esta
edición como “un rexurdir, un volver á vida, á esencia”.
“Somos unha aldea pequena e é difícil seguir con esta tradición, na que o cabalo galego de
monte é a esencia e o máis importante”, salientou antes de agradecer a colaboración de todas
as administracións públicas e de patrocinadores como Estrella Galicia: “Forma parte da esencia

O Concello da Estrada vén de admitir 182 solicitudes para
participar nos campamentos municipais de verán, que terán lugar dende o 1 de xullo ata
o 7 de setembro. Esta cifra supón un incremento de 12 nenos e nenas con respecto ao
2021.
A edil de Benestar Social, Amalia Goldar, valora positivamente este “aumento
significativo” do interese das familias polos campamentos de verán do Concello da
Estrada que se vén dando nos últimos anos, especialmente no eido rural, onde “cada ano
aumenta a participación” destacando o caso do CEIP Manuel Villar Paramá, en Vea, onde
se incrementou en 18 persoas o número de inscritos en xullo con respecto ao mesmo
período do ano anterior.
Concretamente, no CEIP de Oca inscribíronse 19 nenos/as e celebrarase o campamento
durante todo o mes de xullo; o CEIP do Foxo acollerá o campamento dende o 1 de xullo
ao 7 de setembro, no que participarán 44 menores; no CEIP Cabada Vázquez, con 28
inscritos, celebrarase todo o mes de xullo e mais o de agosto; e no CEIP Manuel Villar
Paramá, haberá 34 nenos/as no campamento que se celebrará todo o mes de xullo. O
CEIP Pérez Viondi concentrará este ano 61 menores do casco urbano dende o 1 de xullo
ata o 7 de setembro.
Aqueles/as menores anotados nas quendas nas que non se celebrará o campamento por
non acadar un mínimo de dez inscritos terán a oportunidade de reubicarse noutras
quincenas que dispoñan de prazas libres.
A partir de mañá, os pais, nais ou titores dos menores anotados poderán recoller no
Departamento de Servizos Sociais a carta de pago en horario de 9.00 a 14.00 horas. O
prazo para realizar o pagamento será dende o 20 ata o 29 de xuño.

O concelleiro de Cultura, Juan Constenla, presentou esta
mañá no Concello a iniciativa “DixitArte”, unha galería virtual creada en colaboración coa
Fundación Cultural da Estrada na que se difundirán os traballos de artistas gráficos
estradenses co obxectivo de promover a cultura local.
Na súa intervención, Juan Constenla destacou que “grazas aos recursos da Estrada
Dixital” foi posible materializar este proxecto, que permitirá “ofrecerlle aos creadores
estradenses unha canle de difusión para poñer en valor a súa obra” facilitando o acceso
aos seus traballos “dende calquera lugar” e “durante todos os días do ano”.
Xunto co edil de Cultura, na presentación do proxecto participaron o responsable técnico
da páxina web, Javier Ramos; e o pintor estradense Manuel Fragoso. Ramos explicou que
a páxina web, que xa está operativa baixo o dominio de www.dixitarte.aestrada.gal, “está
creada dunha maneira moi sinxela e visual” para facilitar o seu manexo por parte dos
usuarios “en calquera tipo de dispositivo”.
O autor elixido para inaugurar a galería virtual foi o pintor estradense Manuel Fragoso,
aproveitando a súa recente exposición “Soños Rotos” na Sala Abanca da Estrada.
Aqueles/as que entren na páxina web poderán atopar información biográfica sobre o
artista, unha selección da súa obra coas características técnicas de cada composición e
mais o seu enderezo electrónico para facilitar que os/as visitantes que desexen mercar
algún dos seus traballos contacten con él.
Todos/as os/as artistas estradenses que o desexen poderán formar parte deste
escaparate dixital. Para iso, deberán poñerse en contacto coa Fundación Cultural da
Estrada ou co Departamento de Cultura do Concello. Constenla sinalou que a idea é “que

ao longo do ano se poidan ir sumando máis artistas a esta iniciativa”. Nesta liña, na
presentación anunciaron que durante os vindeiros días incorporarase á galería virtual
unha selección de fotografías da artista estradense Marga Fraga.