A Estrada na Rede

López Bueno considera “impresentable” o estado dos
aparcamentos. Insta a PP a mellorar os parkings en vez de “tirar os
cartos en pantallas innecesarias”.

O PSOE da Estrada esixirá que no orzamento do Concello
para o ano 2022 se contemplen partidas suficientes para dar unha solución
definitiva ao estado “impresentable” da superficie dos aparcamentos do
casco urbano.
Luis López Bueno apunta a que o PP debería “negociar de verdade” cos
propietarios para atopar unha solución duradeira aos problemas cos buratos
que aparecen con frecuencia en varios aparcamentos disuasorios da vila.
Considera que os esforzos do grupo de goberno deben ir nese sentido, e
indica que “con traballo de verdade seguro que se chega a entendemento”.
O líder socialista non ve lóxico que o PP decida “tirar cartos públicos” en
pantallas que indiquen a ocupación dos aparcamentos. Afirma que as
pantallas que pretende instalar o goberno municipal son “absolutamente
innecesarias” e que ademais chocan coa liña urbanística de eliminar
elementos que dificulten o paso das persoas. A este respecto indica que “en
todas as vilas e cidades se están eliminando ese tipo de sinais, pero na
Estrada remamos en sentido contrario ao que se fai en toda Europa”.
De feito, considera que as pantallas poden constituír unha distracción para
os condutores e que poderían xerar moitos problemas nese sentido. A
situación sería especialmente grave no aparcamento da Casa das Letras,
Iryda e Novo Mercado, onde hai pasos de peóns xusto en fronte das
entradas.
Ademais referiuse á falta de traballo dos concelleiros do goberno, que
aínda non foron capaces de presentar o orzamento municipal para o
ano 2022.
López Bueno entende que “xa debería estar aprobado polo pleno
ordinario de decembro”, e culpa ao PP de ser incapaz de sacar
adiante en tempo e forma as cuestións ordinarias do Concello.
Considera “especialmente grave” que un goberno con maioría
absoluta non poida atender a obriga legal como de ter aprobado o
orzamento a día 1 de xaneiro. Para o socialista é un fiel reflexo de
que “a maioría dos concelleiros do PP só se dedican a cobrar as
dedicacións ou as dietas, pero non a traballar polos veciños e
veciñas”.

O Teatro Principal da Estrada acolle o xoves 16 de decembro, ás 20:00 h, a presentación do libro infantil “Nobelo de luz” publicado por Edicións Fervenza, e da autoría de Charo Golmar.

En dito acto, a autora estará acompañada polo normalizador lingüístico do Concello da Estrada, Xosé Lueiro; o profesor e escritor Xosé Luna; o tamén profesor e escritor Carlos Loureiro; a ilustradora da obra, Amalia López Brea “Luchi”; o secretario xeral de Política Lingüística da Xunta de Galicia, Valentín García; e o alcalde do Concello da Estrada, José López Campos.

Na presentación contaremos con acompañamento musical a cargo de Manoele de Felisa e tamén un recitado poético.

A obra

Nobelo de luz é un emotivo poemario que se nutre da experiencia persoal da escritora como docente.  Un relato versificado en primeira persoa de alguén que, dotado de capacidades diferentes e con dificultades para expresarse, soña con poder ser comprendido.

Nobelo de luz quere ser esperanza, abrir os ollos e concienciar á  sociedade de que outro mundo mais comprensivo debe ser posible.

Nobelo de luz segundo palabras de Xosé Luna, autor do limiar, “é unha lección de vida para comprender que todos somos diferente(mente) iguais”.

Colaboracións

Esta publicación, editada por Edicións Fervenza, contou coa colaboración do Restaurante Enxebre Porta do Sol de Lamela e da secretaría xeral de Política Lingüística da Xunta de Galicia.

A ilustradora

Amalia López Brea, “Luchi” (Lamela, Silleda, 1968). Licenciada en Bioloxía e diplomada en Maxisterio é unha apaixonada da pintura. A súa obra abarca óleos, acuarelas, pasteis graxos, carboncillo e lapis de cor.

Participou con ilustracións en distintas publicacións tanto no campo musical como infantil e de adultos: no disco-libro Cantos para nenos e nenas de María do Ceo; Cartafol poético da Porta do Sol de Lamela; no poemario infantil Versos e bolboretas de Mónica Varela Gestoso (Edicións Fervenza); no disco-libro A Estrada da vida de Xosé Luna e Manoele de Felisa; no poemario Zapatos máxicos de Fernando González Graña (Edicións Fervenza); no poemario Un mundo quentiño de Mónica Varela Gestoso (Edicións Fervenza); e no libro O Naranxo no Trasmundo de Inma Vilariño (Edicións Fervenza), ademais da obra que se presenta, o libro infantil Un nobelo de luz de Charo Golmar (Edicións Fervenza).

A autora

Mª del Rosario Golmar Saavedra nace no lugar de Vila, na parroquia de Santiso (Lalín). É filla de  María Saavedra Saavedra e de Xesús Golmar Rodríguez. Seguindo os pasos do pai, mestre e escritor galeguista, estuda Maxisterio en Santiago e dende 1983 traballa en distintos lugares da nosa xeografía. Actualmente é mestra en Lalín, no colexio que leva o nome de seu pai, o CEIP Xesús Golmar.

Dende sempre estivo vinculada ao mundo da literatura e da cultura, pois colaborou en obras colectivas e participou en actos de recoñecemento a persoas relacionadas con estes ámbitos. A día de hoxe é membro do Padroado da Fundación Xosé Neira Vilas.

Dende cativa escribiu na intimidade e son poucas as veces nas que se decide a facer públicos os seus escritos. Non obstante, en 1979 gaña o 1º premio nun concurso de poesía convocado polo IES Ramón Mª Aller Ulloa e no 2005 escribe o prólogo da biografía que sobre o seu pai Xesús Golmar escribe Manuel Igrexas.

Nos últimos anos participou en diversas obras colectivas como Libro dos Reis Magos (2012), Homenaxe a Manuel María (2015-2017), Homenaxe a  Olimpio Arca Caldas (2016) e Pico Sacro ferido polo lóstrego e a lenda (2017).

Será o 2019 o ano do cambio ao ser elixida membro do Padroado da Fundación Xosé Neira Vilas, exercer como pregoeira das Letras Galegas no Concello da Estrada e quedar finalista no VII Certame de relato curto que organiza a FANPA de Pontevedra.

O poemario infantil Nobelo de luz é a súa primeira publicación.

Seguridade covid

Polas circunstancias covid, o acto estará condicionado polas medidas necesarias para que se fagan respectar as distancias de seguridade, sendo obrigatorio o uso de máscara. Por iso, prégase ao público que se achegue 30 minutos antes do comezo para evitar aglomeracións, pois a entrada é libre ata completar o aforo.

O Concello estradense acolleu onte a entrega do Premio de

Novela Manuel García Barros ao escritor Alberto Lema, que se converteu

co premio pola súa obra ‘Pazo de inverno’. No acto participaron

o tenente de alcalde estradense, Juan Constenla, e o director do

Editorial Galaxia, Francisco Castro

• O recinto feiral estradense, abrirá as súas portas ao público
con preto de cen firmas expositoras.
• Do total do espazo expositivo ocupado, 60% corresponde ao
Salón Motor Classic, seguido do 32% da Feira de
Antigüidades e un 8% da mostra de artesanía.
• O 35% dos expositores de venda directa proceden da
provincia de Pontevedra, seguidos por un 16% de A Coruña,
10% do resto de España e 6% de Lugo, 14% de Ourense. O
19% restante son firmas procedentes de Portugal.
• O 64% dos vehículos expostos, son automóviles e o restante
36% son motocicletas e bicicletas.
Os vindeiros días 11 e 12 de decembro, o recinto feiral estradense, abrirá as
súas portas ao público co último dos certames co que pecha o calendario feiral
2021: 8º Salón Motor Classic e a 61ª Feira de Antigüidades e Artesanía. O
recinto feiral permanecerá aberto en horario ininterrumpido de once a veinte
horas e a entrada custa un euro e será válida para ambos días, permitindo
entrar no sorteo de duas ceas para dúas persoas, por xentileza do restaurador
local o Asador de Leo.
A meirande parte do espazo expositivo, ocuparao o Salón motor Classic, cun
60% dos 7.400 m2 de espazo expositivo total. Esta mostra engloba un
mercadillo de pezas, recambios e complementos do motor. Pola súa banda, a
exposición de vehículos clásicos, á data conta con cun centenar de vehículos
inscritos dos cales, o 64% son automóviles e o restante 36% son motocicletas
e bicicletas. Para todos os visitantes que se acheguen nos seus vehículos
clásicos (automóviles, motocicletas ou bicicletas), habilitaráse un parking
específico, dentro do propio recinto feiral.
As antigüidades e artesanía, con trinta e cinco firmas expositoras,
complementan a mostra expositiva. Catro pavillóns cumplindo co
protocolo anti Covid19 de distanciamento e aforo.
As provincias de Pontevedra e A Coruña, son as que meirande porcentaxe de
firmas expositoras aportan á mostra, cun 35% e 16% respectivamente,
seguidas de lonxe por Lugo e Ourense e un 29% de firmas procedentes do
resto do estado español e Portugal.
Numerosos particulares, colaboran coa mostra expositiva, aportando os seus
vehículos. Éstos estarán complementados por diversos clubes, asociacións,
talleres, empresas privadas, etc…, dentro dos mais salientables: Club Audi
Sport -Ibérica, Escudería Clásicos O Toxo, Club A.V.A., Autocares Cuiña,
AGAMAC, etc…

Este vindeiro sábado ás 20.30 h, o Teatro Principal da Estrada recibirá a unha das
mellores narradoras orais galegas, nun evento que chega da man do Xacobeo 2021.
Facer memoria é un espectáculo-encontro entre Paula Carballeira e o público
estradense no que se esvae os límites entre o escenario e o patio de butacas, dándolle
voz ás lembranzas dos espectadores.
En Galicia contamos cunha tradición oral excepcionalmente viva. A través dela
desenvólvense contos, lendas, sucedidos, lances reais de vidas reais que ao contalos
se volven ficcións. Nesa tradición inmaterial, gardada na memoria dos nosos maiores,
atopamos o que somos. Este espectáculo trata de visibilizar ese legado que nos
deixan.
Este encontro de Paula virá precedido por dúas contadas previas que terán lugar en
Ouzande (Fervenza de Ouzande / 19.00 h) e Couso (Casa Escola de Couso / 21.30 h)
o venres día 10.
Trátase dun evento gratuíto, con retirada previa de invitación no departamento de
Cultura a partir do xoves día 9. Só haberá 50 entradas dispoñibles.