A ESTRADA ESCENA PRIMAVERA 2021
Presentación da programación cultural de
primavera, o ciclo de exhibición cultural que o Concello levará a cabo
entre os meses de marzo e maio. Como sabedes todos, este semestre a
actividade cultural volve estar marcada polos efectos da pandemia;
polo que calquera previsión que fagamos estará sempre supeditada a
que a situación sanitaria nos permita levala a cabo.
Seguiremos a implantar o protocolo de seguridade, que nos permita
abrir o Teatro Principal, minimizando ao máximo, o risco de contaxio.
Un protocolo que, polo de agora, e en opinión do público deu un gran
resultado. Partindo da base de que o risco cero non existe, o
departamento de Cultura porá en marcha unha serie de medidas e
recomendacións arbitradas polas autoridades sanitarias entre as que se
inclúen a limitación da capacidade da sala, o uso de máscara e
distintas medidas de hixiene e distanciamento social tendentes a
garantir a seguridade de todos. Tanto na web do Concello, coma na
propia cartelería e no reverso das entradas aos eventos, aparecerá esta
xeira de medidas que poderá lerse, física ou dixitalmente, a través dun
código QR.
Neste senso, e debido á pandemia, foi preciso tamén redefinir o
formato dos eventos a programar; xa que eventos escolares ou
espectáculos integrados por elencos numerosos tiveron que ser
desbotados ou modificados para poder adaptarse ás novas esixencias
sanitarias.
Tamén, por un tema de seguridade, reducirase tanto o número de
eventos programados como a capacidade da sala que se verá mermada
entre un 70% e 80% das butacas dispoñibles. Recoméndase mercar a
entrada por adiantado en dependencias do Concello e asistir aos
espectáculos con certa marxe de tempo para evitar aglomeracións no
hall do Teatro.
Dicir por último, que debido ao toque de queda das 10 da noite, os
espectáculos do venres adiantarán media hora o seu comezo ás 20.30
h, para que os espectadores poidan chegar a casa antes do toque de queda.
Se vos parece ben, iremos debullando a carteleira por disciplinas
artísticas:
MÚSICA / DANZA
Neste apartado destaca a celebración no mes de abril dun Festival de
Danza Contemporánea que incluirá, se as restricións o permiten, algún
evento na rúa. Unha aposta, a da danza, que como vedes, cada ano ten
maior presenza na programación e un grande respaldo por parte do
público.
Precisamente, no apartado de danza, o vindeiro venres 5 de marzo a
compañía Traspediante presentará unha versión moderna da Cincenta
titulado NINA NINETTE coa que abriremos a programación.
Pola súa banda, o sábado 10 de abril será a compañía mallorquina
Baal Dans a que poña en escena MIRAMIRÓ, un espectáculo de
vídeo mapping que xoga coa obra do pintor Joan Miró e que está a
xirar con grande éxito por toda a xeografía española.
Por último, no apartado musical contaremos, o 16 de maio, coa
presenza da Coral Polifónica Estradense e o seu tradicional concerto
do Salmón.
Dicir que o programa do Festival de Danza farase público a finais do
mes de marzo e irá acompañado por un par de obradoiros de iniciación
á danza xestionados pola Escola Municipal de Artes Escénicas.
TEATRO
No eido teatral, volvemos incidir na captación de público infantil e
familiar con espectáculos de gran formato e calidade. Temos, ademais
dos dous espectáculos de danza xa citados antes, a presenza da
compañía estradense Bandullo Azul co seu novo espectáculo:
MESTRE MA NON TROPPO, e un espectáculo de novo circo
titulado THE SHOW MOSCÓN da compañía Galitoon.
No apartado de teatro para adultos contamos cun programa de grande
calidade. O día 13 de marzo a compañía estremeña La Escalera de
Tijera traerá unha versión clown da CELESTINA que está a tiunfar
por todos os teatros españois e que ninguén debería perderse.
O 26 de marzo volveremos recibir a visita do cómico e imitador
oscense Rafa Maza, que nos achegará a segunda parte de FABIOLO
CONECTION, unha comedia moi divertida que xa visitou o Teatro
Principal fai dous anos.
En abril serán MANUEL MANQUIÑA e IBUPROFENO TEATRO,
a compañía de Santi Cortegoso a que nos acheguen os seus novos
espectáculos. E o 21 de maio recibiremos un dos mellores
espectáculos galegos do último ano: LIBERTO da compañía
Rebordelos.
Deixo para o final, o segundo pase do espectáculo da Escola
Municipal de Artes Escénicas OS MALES DO TABACO, unha peza
adaptada e dirixida por Santiago Cortegoso, que interpreta Gonzalo
Valcárcel e tres compoñentes do Obradoiro de Música Moderna
Carlos Barruso. Como xa sabedes, a estrea en outubro resultou un
grande éxito, polo que volveremos a reprogramala a petición popular.
Nada máis. Comentarvos, tras este pequeno resumo, que todas as
entradas poderán adquirirse anticipadamente no departamento de
Cultura e que todos os detalles de cada evento publicaranse a partir de
mañá na APP de Cultura. Loxicamente, as entradas dispoñibles
estarán condicionadas á capacidade que poidamos establecer na sala.
Neste senso, dicirvos que a partir do luns xa se poderán recoller no
departamento de Cultura os convites do espectáculo Nina Ninette do
próximo venres.
Seguiremos a facer un esforzo na promoción e comunicación aos
veciños, activando as canles de wattsapp e redes sociais e procurando
que todos coñezan, polo miúdo, os horarios e características de cada
actividade programada.
E xa remato dicindo, que mentres a situación sanitaria nolo permita, é
intención deste Concello seguir apostando forte pola Cultura, porque é
un dereito e unha esixencia da cidadanía; pero tamén o medio de vida
de miles de artistas e profesionais galegos.
