A Estrada na Rede

O venres 23 de outubro ás 21.00 h, a unidade de produción da Escola Municipal de Artes
Escénicas da Estrada estreará a peza de Antón Chéjov Sobre o mal que fai o tabaco, unha
peza de acto único e en forma de monólogo, na que un personaxe comeza a dar unha
conferencia sobre o dano que causa o tabaco e que remata nunha confesión da súa triste vida
conxugal. Unha historia realista que se desenvolve entre o absurdo e a traxedia de quen ve
frustrada a súa esperanza de felicidade.

Adaptada e dirixida por Santiago Cortegoso e interpretada polo actor Gonzalo Valcárcel, na
peza participan tamén tres compoñentes do Obradoiro de Música Moderna Carlos Barruso,
como son Juan Núñez, Pablo Bernárdez e Manuel Castedo.O proxecto está enmarcado
dentro da serie das colaboracións didácticas que o alumnado da Escola está a facer con
dramaturgos e directores de prestixio da escena galega; un proxecto que terá continuidade
nos vindeiros anos e que trata de complementar a formación dos actores, formados no seo
da escola estradense, medíndoo primeiramente con profesionais de prestixio e,
posteriormente, co público.

Os convites poderán recollerse a partir do luns no departamento de Cultura do Concello. A
capacidade da sala verase reducida por mor das restricións sanitarias.

Comprácenos comunicarvos que o novo curso da Escola Municipal de Artes Escénicas dos cursos infantil e xuvenís botará a andar mañá sábado 17 de outubro entre unha xeira de medidas de seguridade. Entre elas, o traballo en grupos reducidos, con máscara, saída escalonada, limpeza de mans  á entrada e á saída e distanciamento de 2 m. Paula Quintas, Marta Alonso, Arturo Cobas e Xosé Lueiro serán os profesores encargados de impartir as distintas disciplinas do curso que van desde o teatro danza, á improvisación, o mimo e o musical.

Entre as 10.30 h e as 14.15 h, os 51 alumnos dos grupos infantil e xuvenís da Escola erguerán o pano dun exercicio lectivo que se verá referendado no mes de xuño coas respectivas exhibicións de fin de curso.

Pola súa banda, o Grupo de Adultos oferta 4 prazas a todas aquelas persoas maiores de 18 anos que estean interesadas en iniciarse no mundo da interpretación e das artes escénicas. Os interesados poden poñerse en contacto co Departamento de Cultura do Concello da Estrada.

O goberno municipal do PP vai colocar uns “baños intelixentes” na Alameda da Estrada, case ano e medio despois da súa posta en marcha, a pesar da súa evidente necesidade nun espazo público.

Está por ver se son realmente “intelixentes” como di o goberno do PP, mais o que si está claro é de que, por moi listos que sexan, van necesitar mantemento e este ten un custe. Se botamos a vista atrás e recordamos todos os aparellos, tamén intelixentes, que se compraron cos cartos de A Estrada Dixital veremos que de todo aquilo non queda nada que funcione, agás a wifi. Aínda se poden ver nalgunha das rúas da vila as cabinas desde as que nos poderiamos conectar a internet, mais ningunha funciona e unha das razóns, á marxe da súa utilidade, é o custe do seu mantemento. Comprar trebellos con cartos que caen do ceo como os do EDUSI é o doado, mais manter todo iso vai a conta dos veciños e veciñas da Estrada.

Os baños na Alameda son necesarios, que sexan intelixentes xa non o é tanto. Con isto queremos instar ao goberno a que antes de colocar estes “baños intelixentes” de 70.000 euros valore os custes de mantemento que teñen estes artefactos. Os baños públicos, aínda que non sexan intelixentes, son necesarios; non vaia ser que cando finalice a garantía do produtos teñamos na Alameda uns trastos que nin son intelixentes e non serven para a función que foron adquiridos.

O PSOE da Estrada valora negativamente a Conta Xeral
que levará a Comisión Informativa de Facenda o Goberno Local. A análise
dos números é moi clara, “o resultado neto do exercicio 2019 trouxo perdas
por valor de 680.000 euros” garante Luis López Bueno.
O líder socialista explica que os datos que ofrece o goberno local “están
apoiados en meros axustes contables” que salvan un exercicio “terrible”
para as arcas municipais. Ademais, volve a criticar o traballo do Concelleiro
de Facenda, que un ano máis elaborou un orzamento que non se parece en
nada ao que rematou executándose.
Para os socialistas a conta xeral é a confirmación da mala xestión
económica do goberno do PP, que foi incapaz de manterse dentro da
legalidade, (incumpriu a Lei de Estabilidade Orzamentaria). Ademais, eses
incumprimentos producíronse sen que os veciños e veciñas viran
aumentados os servizos que gozan nin deixaran arranxado o problema de
infraestruturas no rural.
O grao de execución do orzamento no 2019 foi do 78,10 % (17,8 millóns de
euros), un 10 % máis ca no exercicio 2018. O líder socialista criticara o
escaso grao de execución das contas pasadas, recibindo resposta por parte
de Alberto Blanco: era imposible executar máis porque existían proxectos
plurianuais. “Pois as milagres existen, en ano electoral a execución
dispárase e os investimentos reais suben 2 millóns de euros. Incrible”
valora con sorna López Bueno.
De feito, critica que o PP xogue cos cartos dos veciños e veciñas. Advirte ao
goberno local de que “non vale todo” porque os fondos que xestionan son
de todos os estradenses, e vendo as actuacións que fixo o goberno no
2019, “parece que eses cartos son só de uns poucos agraciados” que gozan
do favor do equipo de goberno.
Para o líder socialista as contas deixan clara a principal crítica que o PSOE
lle fai ao Goberno municipal: só traballan o ano antes das eleccións. Os
orzamentos pasados son raquíticos en comparación con este, e todo se
debe á vagancia dun goberno municipal que se ri dos veciños e veciñas.
Sobre os remanentes, López Bueno explica que “son cartos que o goberno
foi incapaz de gastar”, e valora que “xerar millóns de euros en remanentes
fala moi mal da capacidade de xestión dun goberno”. O voceiro considera
que “eses cartos estarían mellor empregados en investimentos que dentro
de contas bancarias”.

A ese propósito, o socialista celebra a iniciativa do Goberno central de
permitir o uso dos remanentes dos Concellos e suspender o cumprimento
de diversas regras fiscais, “vai na liña que defendín dende o principio”,
comenta. Considera que no 2021 se deben utilizar eses cartos que ata
agora eran improdutivos en acometer investimentos importantes para os
veciños e veciñas, como os patios cubertos que o PSOE proporá para todos
os centros de primaria.
Para rematar, López Bueno cre que a situación “podería ser peor” se o
goberno depurara os créditos de dubidoso e imposible cobro, que
representan o 7% dos orzamentos que aproba o goberno local. Nas contas
hai un millón de euros que o Concello non cobrará nunca e que continúan
falseando as contas locais, e que Intervención pide “depurar” ano tras ano.

• A secretaria xeral da Igualdade, Susana López Abella, participou hoxe na Estrada no I Foro Construíndo en Feminino organizado pola asociación Mulleres Rurais Avelina Valladares
• Sinalou a aposta da Administración autonómica por dar á muller rural un recoñecemento social, económico e institucional
• Considerou fundamental incentivar a incorporación das mulleres aos órganos de decisión do sector agroalimentario e de desenvolvemento rural
• A Administración autonómica traballa para dar máis visibilidade ao labor da muller rural a través do VII Plan estratéxico de Galicia para a igualdade de oportunidades entre mulleres e homes 2017-2020

A secretaria xeral de Igualdade, Susana López Abella, destacou hoxe na Estrada a importancia de dar á muller rural un recoñecemento social, económico e institucional e afirmou que a Xunta está a traballar para promover o protagonismo feminino na toma de decisións no medio rural.

López Abella sinalou no I Foro Construíndo en Feminino, organizado pola asociación Mulleres Rurais Avelina Valladares, que “Galicia non se entende sen o rural, nin as súas mulleres” e, por iso, apuntou que a Administración autonómica está a desenvolver medidas para dar máis visibilidade ao labor da muller rural, a través do VII Plan estratéxico de Galicia para a igualdade de oportunidades entre mulleres e homes 2017-2020. A iniciativa inclúe, entre outras, actuacións encamiñadas ao desenvolvemento profesional das mulleres rurais como motor de dinamización demográfica e crecemento económico e ao fortalecemento do movemento asociativo feminino.

A secretaria xeral da Igualdade explicou que o Plan tamén avoga por reducir a fenda dixital de xénero e por apoiar o empoderamento das mulleres rurais e a súa incorporación ás estruturas de decisión dos sectores económicos agrario, gandeiro e pesqueiro. Neste senso, considerou fundamental incentivar a incorporación das mulleres aos órganos de decisión do sector agroalimentario e de desenvolvemento rural. “As organizacións agrarias, as cooperativas e os grupos de desenvolvemento rural deben contar cunha presenza feminina en órganos directivos acordes coa realidade das mulleres rurais”, engadiu.

López Abella, para rematar, afirmou que para mellorar a situación das mulleres rurais é importante entender o seu valor, fomentar a súa visibilidade e impulsar unha igualdade real de oportunidades en materia de acceso e condicións de emprego. Asegurou que é necesario seguir desenvolvendo medidas para impulsar a súa capacidade para emprender e promover a conciliación da vida persoal, familiar e laboral, así como para fomentar o uso das TIC.

O I Foro Construíndo en Feminino celébrase con motivo do Día Internacional da Muller Rural co que se pretende visibilizar a importancia que merece a achega económica, social e cultural que desenvolven as mulleres nas zonas rurais de todo o mundo.

O venres 23 de outubro ás 21.00 h, a unidade de produción da Escola Municipal de Artes Escénicas da Estrada estreará a peza de Antón Chéjov Sobre o mal que fai o tabaco, unha peza de acto único e en forma de monólogo, na que un personaxe comeza a dar unha conferencia sobre o dano que causa o tabaco e que remata nunha confesión da súa triste vida conxugal. Unha historia realista que se desenvolve entre o absurdo e a traxedia de quen ve frustrada a súa esperanza de felicidade.

Adaptada e dirixida por Santiago Cortegoso e interpretada polo actor Gonzalo Valcárcel, na peza participan tamén tres compoñentes do Obradoiro de Música Moderna Carlos Barruso, como son Juan Núñez, Pablo Bernárdez e Manuel Castedo.O proxecto está enmarcado dentro da serie das colaboracións didácticas que o alumnado da Escola está a facer con dramaturgos e directores de prestixio da escena galega; un proxecto que terá continuidade nos vindeiros anos e que trata de complementar a formación dos actores, formados no seo da escola estradense, medíndoo primeiramente con profesionais de prestixio e, posteriormente, co público.

Os convites poderán recollerse a partir do luns no departamento de Cultura do Concello. A capacidade da sala verase reducida por mor das restricións sanitarias.

O PSOE estradense considera “unha frivolidade” a
instalación de baños intelixentes no entorno dos xardíns municipais. O líder
socialista, Luis López Bueno cualifica este proxecto de “un despilfarro sen
precedentes que obedece á ansia de protagonismo do alcalde”. Tamén
asegura que non é momento de excentricidades, “estamos na segunda onda
dunha pandemia, penso que hai asuntos máis prioritarios aos que destinar
os cartos”.
Para o voceiro socialista “é evidente que se precisan baños”. Apunta a que
deberían estar contemplados no proxecto inicial, pero pensa que o custo
duns baños como os que se propoñen é esaxeradísimo. Segundo a
definición que se dá, os baños terán funcións absolutamente prescindibles –
como o wifi e o contador de usos -, que non teñen unha utilidade real, e
que traerán dores de cabeza cando precisen mantemento.
O líder socialista ve moito máis acaído que se instalen uns baños “normais”
e que estean “ben atendidos”, porque por moi intelixentes que sexan os
baños “o mantemento que requiren é semellante ao duns baños
tradicionais”. Insta ao goberno municipal a que se centre nas necesidades
dos veciños e das veciñas en vez de “preocuparse tanto pola foto”. O
socialista considera “superfluo” que os baños teñan wifi, e dubida de que o
sistema de desinfección sexa operativo “porque os baños serán moi
intelixentes, pero non desinfectan superficies, nin repoñen o papel, nin
pasan a fregona”.
O voceiro apunta a que este goberno sumará 84.000 euros tirados ao lixo
en “cuestións inútiles na alameda”, como os puntos de recarga de teléfonos
“que non utiliza ninguén” pero que “serviron para alimentar a empresas
alleas ao Concello da Estrada e próximas ao goberno”.
López Bueno considera que este asunto sería un tema menor se non fora
polo seu custo “desorbitado”, e cre que o feito de “dilapidar” 70.000 euros
dos estradenses retrata a un goberno “superado pola pandemia da Covid19”. Admite que modera o seu tono “por responsabilidade” e para evitar a
crispación política nun momento coma este, pero non pode permitir que o
goberno local “faga e desfaga” mentres os veciños e veciñas sofren as
consecuencias da pandemia: “É paradóxico que uns baños custen máis que
as políticas de axuda a comerciantes e hostaleiros” sentencia o socialista.
Dende o PSOE consideran que o goberno local debería empregar eses
70.000 euros na “reorganización” que o PP prometera dos fondos EDUSI, e
da que aínda non se sabe nada. López Bueno considera que tiña razón ao

criticar a contratación dun estudo sobre as medidas para a recuperación
económica, “López Campos entregoulle 14.000 euros a uns amigos para
non ter que tomar decisións, e o informe que debería ofrecer resultados en
xullo aínda non está entregado”, á vez que afirma que “as cousas non se
fan así”.
Ademais, en caso de que o goberno pretenda seguir adiante con este
disparate, instan a solicitar información da rede de cidades intelixentes para
que ofreza outros instrumentos de financiamento. Dese xeito liberaríanse
70.000 euros para atender “necesidades reais” dos veciños e veciñas.