A Estrada na Rede

O Parlamento europeo e o Consello da Unión Europea acordaron denominar Ano Europeo do Patrimonio Cultural ao 2018, co obxectivo de promover na cidadanía os valores que subxacen no patrimonio cultural, e que o fan un instrumento fundamental do desenvolvemento da sociedade europea.

O seu obxectivo principal, segundo reza o seu artigo 1, é: fomentar o intercambio e a valoración do patrimonio cultural de Europa como recurso compartido, sensibilizar acerca da historia e os valores comúns e reforzar un sentimento de pertenza a un espazo europeo común.

Durante o Ano Europeo do Patrimonio Cultural realizaranse iniciativas e acontecementos a nivel europeo, nacional, rexional e local.

Vista a decisión do Parlamento Europeo, e considerando a importancia que ten o Patrimonio cultural en todos nós, é polo que se decidiu realizar un encontro bilateral  xuvenil para dar a coñecer aos nosos mozos o patrimonio cultural histórico artístico en Italia, e nunca mellor que a popular cidade de Venecia.

Manifestar que non é fácil realizar un encontro destas características nunha cidade tan coñecida internacionalmente e tan visitada como Venecia.   A necesidade dun interlocutor que estivese interesado en realizar un encontro bilateral deste tipo non é habitual, pois entre outras cuestións é sobradamente coñecido o elevado custo  que supón pernoitar nesta cidade polo turística que é durante todo o ano.

Realizando unha visita a Santiago de Compostela/Galicia os dirixentes dun centro educativo/profesional desta cidade, ofreceron a posibilidade de formar parte xunto con outros 2 municipios e 1 mancomunidade de municipios, o participar con mozos do noso Concello nun encontro na cidade de Venecia e, como contraprestación, acoller a outro grupo igualmente pola nosa banda.

Cursada unha invitación pola entidade que organiza o intercambio, “Il Polo Tecnico  professionale Dei Venecia I.I.S. Vendramin Corner”,  ao Alcalde, para o acompañamento do grupo xuvenil ao intercambio, e sendo esta unha función municipal máis de representación, é polo que se decidiu asistir e poder acordar novas participacións en proxectos europeos de diferentes temáticas.

O Concello de A Estrada participará do 2 ao 9 de setembro nun intercambio bilateral entre mozos da cidade de Venecia-Italia e mozos galegos con idades comprendidas entre os 18 e os 30 anos. O grupo de Galicia está formado por 40 mozas e mozas de 3 concellos e 1 mancomunidade de concellos  da comunidade, cuxas prazas foron asignadas por estrito orde de chegada.

Os participantes desenvolverán un programa de actividades baseado nunha metodoloxía de educación non formal  que permitirá fomentar a participación activa cidadá, mellorar competencias comunicativas, atopar sinerxías entre as dúas culturas ou vencer prexuízos existentes. Do mesmo xeito, os participantes terán a posibilidade de incrementar o seu nivel de independencia e responsabilidade, ampliar o coñecemento doutras culturas e costumes, así como fomentar a tolerancia da diversidade.

O programa de actividades inclúe dinámicas de grupos e interactuarán con mozos do Polo Técnico Profesional,  realizando percorridos culturais pola cidade de Venecia como: Basílica e Piazza San Marco cunha visita ó Palacio Ducal , Visita ás illas de Murano e Burano con visita asistencia á fabricación do vidro, Visita ao Gran Teatro La Fenice,Visita Museo Correr (o museo máis famoso de Venecia) , percorrido  cun  barco tradicional remando os participantes, visita ó museo de Historia Natural , Visita á Academia de Belas Artes.

O proxecto enmárcase dentro do fomento da mobilidade xuvenil.

No próximo mes de setembro/outubro recibirase en Galicia unha delegación de mozos e mozas Venecianas dentro do mesmo proxecto de intercambio.

A concelleira de Asuntos Sociais, Amalia Goldar, visitou hoxe as instalacións do Espazo Concilia, do que dixo que estaba en óptimas condicións de funcionamento. Tras analizar o labor e observar o desenvolvemento das actividades no centro durante as últimas edicións, a concelleira asegurou que está moi satisfeita co servizo.

Actualmente, e ata o vindeiro 28 de agosto, está aberto o período de matrícula correspondente ao próximo curso escolar para o espazo, que conta cun límite de 45 prazas en diferentes quendas, para as que teñen preferencia os alumnos previamente apuntados e que fixeron unha prematrícula entre os meses de maio e xuño.

Non obstante, a concelleira afirmou que aínda hai dispoñibles arredor de 30 prazas neste espazo, onde os nenos están “ben atendidos” e resaltou a implicación do Concello á hora de botar unha man ás familias da localidade á hora de conciliar a vida laboral e familiar mediante este tipo de iniciativas.

Na actualidade non están acudindo todos os nenos matriculados, posto que moitos dos rapaces inscritos están nestas datas nos campamentos de verán ou de vacacións coa familia, e precisamente porque non é habitual que todos os nenos matriculados estean á vez nas instalacións, a concelleira lembrou a existencia de bonos, que se poden empregar en función da capacidade e que os pais de rapaces non inscritos poden adquirir para ocasións puntuais.

Deste xeito, se precisan deixar aos cativos no centro para atender calquera cuestión, poderían facer uso dun destes bonos, un día ao prezo de 6 euros ou cinco días a 25 euros, e que se poden adquirir no departamento de Servizos Sociais da Casa do Concello. Os bonos non caducan ata que remata o curso escolar.

O Espazo Concilia, sito na Rúa Padrón, no primeiro andar do Novo Mercado, ten un horario de apertura das 15:30 ás 20:30 horas, de luns a venres nos períodos lectivos; das 8:30 ás 13:30 os sábados e das 9:00 ás 14:00 horas, durante os períodos non lectivos.

Actualmente está aberto en horario de verán, de 9:00 a 14:00 horas ata o día 11 de setembro, e a partires do 12 de setembro, día no que comeza o novo curso escolar, adoptará o horario especificado para o período lectivo.

Para terminar, a responsable de Servizos Sociais lembrou que para realizar a matrícula é requisito indispensable que un dos pais estea traballando e que a orde das listas establécese en función da renda dos proxenitores.

O concelleiro de Facenda, Alberto Manuel Blanco, aclarou hoxe as actuacións que se están a levar a cabo dende o Concello da Estrada para acabar cos reparos e sobre a execución do presuposto sobre as que os partidos da oposición plantexaron dúbidas ante os medios.

Respecto ás acusacións do Grupo Móvete, nas que afirmaban nos medios que dende o Concello non se estaba facendo nada para acabar cos reparos, Blanco explicou hoxe que grazas ao acordo marco coa FEMP, acadouse o “primeiro acordo administrativo da historia do concello da Estrada”, a través do cal se conseguiu baixar o importe da factura eléctrica e englobar todos os cargos eléctricos nunha factura única, afirmou.

Esta última medida, a da implantación da factura eléctrica única acaba coa problemática dos reparos no departamento de Intervención do Concello, xa que a maioría deles van desaparecer unha vez solucionado isto; polo que queda claro que se tomaron as medidas axeitadas para atallar a incidencia dende a Casa Consistorial.

O concelleiro advertiu de que non só se trata de dar os porcentaxes correctos, senón que o PSOE omitiu que no último período se pasou a un total de 6.730.000 euros, multiplicándose por once a capacidade inversora do Concello dende 2017.

Executáronse actualmente 2.259.000 euros, e o restante queda ligado, fundamentalmente á Edusi, aclarou o concelleiro, que insistiu en que os datos económicos do Concello son positivos, con remanentes de crédito de máis de cinco millóns e de tesouraría de máis de tres.

Para rematar, o responsable de Facenda lembrou que as contas do Concello aparecerán publicadas no Boletín Oficial da Provincia de Pontevedra, no que todas as persoas interesadas poderán estudalas e presentar alegacións, de darse o caso.

A Estrada pecha o mes de xullo con trinta e dúas persoas menos en situación de desemprego na localidade. Esta baixada deixa no concello un cómputo total de 1.184 persoas desempregadas na actualidade.

Dentro deste total de persoas desempregadas, 1.129 están integradas na categoría de maiores de 25 anos, sendo este conxunto o que presenta maior dificultade para inserirse no mercado laboral, mentres que, atendendo ao xénero, son as mulleres as que acusan unha maior taxa de desemprego, con 694 delas paradas, o que representa o 58,6 por cento do total, fronte ao 41,4 por cento de homes en paro, que constitúe un conxunto de 490 individuos.

Clasificados os datos por sectores, é o sector servizos, que engloba a 759 parados, o máis castigado polo desemprego; seguido pola construción e a industria, con 156 e 133, respectivamente. É o sector primario, de agricultura e pesca o que rexistra unha cifra menor de parados, con 40 individuos, seguido das 96 persoas que se entregan por vez primeira á busca de emprego.

En 2017 o goberno local deixou sen executar dous tercios dos orzamentos de inversións.

“A conta xeral 2017 do Concello da Estrada recolle un aforro neto e superávit positivo, sen embargo agocha tras de si que o goberno municipal non é quen de executar o que publicitan ante os vecinos.” En 2017, no capítulo de investimentos reais o goberno encabezado por José López deixou sen executar un 66,44 %. Esto é, dos 6.732.073,93 € que se recollen neste capítulo da conta xeral só figuran como executados en 2017 2.259.312,50 (un 33,56 %)

A conta de 2017, que se rende fóra de prazo, reflexa 20.600.903,49 € de créditos definitivos a favor do Concello, pero o goberno municipal só foi quen de executar o 73 % (grado de execución sobre o orzamentos), sendo incluso inferior ao executado en 2016. Ademáis, a 31 de decembro o goberno local deixou pendente de ordenar o pago dun total de 105.334,51 € e como ordes de pago pendentes un total de 607.167,12 €.

 “Un ano máis, o gobernó do PP da Estrada presume de resultado contable obviando a realidade, as necesidades anuais dos veciños e veciñas están sen atender porque a execución do goberno local cada ano é peor que a do ano anterior. Os datos reflexan o que os socialistas levamos dúas lexislaturas denunciando, que José López e o PP local xogan cos vecinos e veciñas deixando de atender as necesidades dos estradenses e empregan os orzamentos municipais para tentar comprar votos en vésperas electorais, ata o propio alcalde o recoñece en sede plenaria: “un sprin antes das eleccións”. A conta xeral reflexa que os orzamentos achegados por outras administracións (Deputación, Xunta, Estado) para inversións se contabiliza pero se deixa a maior parte sen executar á espera da proximidade das eleccións municipapis”. 

Grupo Municipal Socialista

Despois do ocorrido o pasado sábado no PAC (Punto de Atención Continuada) da Estrada, o Concello solicitará e insistirá ante o Sergas na necesidade de ter cubertas as vagas de técnicos necesarios para atender as necesidades do concello e a súa área de influencia, que é moi extensa en materia de sanidade, como explicou hoxe o alcalde en funcións, Juan Constenla.

Dende o Concello da Estrada, e tras ter coñecemento da triste noticia do falecemento do paciente, quérese, ante todo, transmitir aos familiares todas as condolencias e o pesar pola súa perda, declarou Constenla.

Foi unha fatalidade o acontecido co paciente, na que o médico de garda tivese que facer un traslado urxente a Santiago, sinalou, para acto seguido exaltar a necesidade de que se manteña no PAC estradense o persoal habitual da época do inverno durante todo o ano; con dous médicos en urxencias destinados a cubrir as necesidades da poboación.

Como remate, o concelleiro sinalou que tamén hai que ter en conta o aumento de poboación que experimenta o municipio durante a época estival, polo que reclamou que se manteñan os servizos durante todo o ano así como un aumento de número de horas durante as fins de semana e, unha vez máis, instou ao Sergas a que estudie as necesidades reais do concello en materia de sanidade.

O Concello da Estrada sorteará entradas para o teatro a fin de fomentar a doazón de sangue durante a época estival. A campaña de doazón comezará coa primeira visita da unidade móbil á localidade, entre o 23 e o 25 de agosto, e rematará coa terceira, en outubro, trala cal, se realizará o sorteo.

O concelleiro de Cultura, Juan Constenla, confirmou que se sortearán un total de 43 entradas de palco (unha por doante) para a actuación elixida; o monólogo de Luis Piedrahita, Las amígdalas de mis amígdalas son mis amígdalas, que o humorista representará no Teatro Principal da Estrada o vindeiro 9 de novembro.

Trátase así, dende o Concello, de incentivar a doazón de sangue, que sempre decae na tempada estival e tratar de acadar entre as 40 e 60 doazóns por cada mil habitantes recomendada pola Organización Mundial da Saúde, explicou o concelleiro.

A primeira visita da unidade móbil do Sergas terá lugar entre o 23 e o 25 de agosto para levar a cabo esta nova campaña de doazón. O vehículo situarase na Praza do Concello en horario das 10 ás 14 horas e das 16 ás 21 horas o xoves 23 e o venres 24; mentres que o sábado 25 atenderá aos doantes das 10 ás 15 horas.

Constenla animou aos veciños a participar na campaña e lembrou unha serie de recomendacións á hora de doar sangue, como que ninguén acuda sen almorzar, que se agarden dúas horas despois do xantar antes da doazón e que se informe ao médico da toma de calquera medicamento. Ademais, recordou que todas as persoas que se acheguen á unidade móbil deben ir provistas do seu DNI e que para poder doar hai que ter entre 18 e 65 anos e pesar máis de 50 quilos.