AVANZAN AS OBRAS NA EP-7001, ENTRE A ESTRADA E FORCAREI

 O alcalde acompaña á deputada Belén Cachafeiro nunha visita técnica
aos traballos, que emprenden o aglomerado en quente no acceso ao
casco urbano estradense.
 Estas obras, que se realizarán en todo o tramo municipal da vía, dan
continuidade á aplicación de pavimento con ‘slurry’ en puntos onde o
firme presentaba gretas.

O alcalde da Estrada, Gonzalo Louzao Dono,
acompañou hoxe á deputada de Infraestruturas da Deputación de Pontevedra, Belén
Cachafeiro, nunha visita técnica para supervisar as obras de pavimentación que arrancaron
na estrada provincial que une A Estrada co veciño Concello de Forcarei, a EP-7001.
Os traballos, que teñen parello un investimento superior ao millón de euros, suporán unha
reforma integral na totalidade do treito que discorre polo termo municipal estradense. As
obras, que se estaban realizando esta mañá nas inmediacións do acceso a casco urbano
dende o sur, terán aínda continuidade nos vindeiros días.
Aproveitando as favorables condicións meteorolóxicas, a execución arrancou días atrás coa
aplicación dun aglomerado de slurry para zonas nas que era preciso selar gretas. Agora
continúan con aglomerado en quente nos tramos nos que o firme presenta un peor estado.
O alcalde quixo agradecer o mantemento de estradas por parte da Deputación e sinalou que
son estradas que teñen unha grande importancia para a mobilidade municipal. “Esta
PO-7001, concretamente, conecta toda a zona sur e comunícanos con Forcarei”, apuntou.
Lembrou que nesta vía está programada a realización dunha importante obra de
urbanización no acceso desta estrada provincial no casco urbano a través da Rúa Pérez
Viondi.
Pola súa parte, Belén Cachafeiro, sinalou que estas obras de conservación e mantemento
son “fundamentais” para mellorar a mobilidade na provincia. Apuntou que nestas obras
combínase a aplicación de novo firme en quente con slurry e un novo pintado.“Agardemos
que con esta actuación a estrada estea en condicións de seguridade para pasar as vindeiras
tempadas de inverno”, dixo a deputada.

Publicado en Portada | Deja un comentario

A Deputación continúa este sábado na Estrada a novaedición do programa +Convivir, que chegará a máis de 30concellos entre 2026 e 2027

Javier Tourís presentou a xornada, que terá lugar no pavillón polideportivo Manuel Coto
Ferreiro e incluirá actividades formativas e lúdicas para toda a veciñanza
+Convivir é un programa destinado ao movemento asociativo e veciñal da provincia en
agradecemento “a todo o que está a facer a favor da cidadanía”

O deputado provincial Javier Tourís presentou este martes na
Casa do Concello da Estrada, acompañado polo alcalde Gonzalo Louzao, a nova xornada de convivencia
+Convivir que organiza este sábado 7 de novembro a Deputación de Pontevedra. A cita terá lugar a partir
das 17:00 horas no pavillón polideportivo Manuel Coto Ferreiro, ata onde se desprazarán centos de persoas
procedentes do movemento asociativo e veciñal da vila.
Javier Tourís lembrou que “+Convivir é un programa co que queremos agradecer o tecido asociativo da
provincia por todo o que está a facer a favor da cidadanía”. Deste xeito, as xornadas concíbense como
“unha oportunidade para seguir fomentando unha vida en comunidade, para xuntarnos, tecer lazos e crear
espazos de encontro onde podemos presumir do avance desta provincia extraordinaria na que vivimos”.
Ao longo da tarde do sábado terá lugar “unha morea de actividades para pasar unha xornada do máis
entretida, pero tamén con espazo para a aprendizaxe”. Concretamente, o programa da xornada +Convivir
na Estrada contará cun obradoiro sobre alzhéimer a cargo de AFASAL, unha sesión de risoterapia da man de
Mónica Novas, bailes de salón a cargo de BTroula, inchables e obradoiros para a rapazada e, para rematar,
unha merenda dinamizada cunha actuación musical. “Ao igual que a nosa oferta cultural e de lecer,
+Convivir tamén é unha oportunidade para amosar a pegada da Deputación no territorio para dinamizar a
vida das nosas vilas e parroquias”, sinalou o deputado provincial.
Entre este ano e o próximo +Convivir chegará a arredor dunha trintena de concellos. Ademais da Estrada,
Ponteareas, Agolada, Marín, As Neves, Cangas de Morrazo e Poio, está previsto que este ano o programa
chegue tamén a Meaño, Vilaboa, Salvaterra de Miño e Valga. Esta é a terceira edición de +Convivir, que
reuniu nas dúas anteriores máis de 10.000 veciñas e veciños da provincia.

Publicado en Portada | Deja un comentario

O CONCELLO ARRANXARÁ E REPORÁ ESTA MESMA SEMANA A LETRAQUE PERDEU O ‘PHOTOCALL’ DA PRAZA DA CONSTITUCIÓN

As brigadas do Concello da Estrada traballan xa
para reparar a letra “T” que nas últimas horas se botou en falta no photocall co nome
do municipio que luce na Praza da Constitución.
A ausencia deste elemento chamou hoxe a atención de moitos cidadáns. Ao parecer,
este elemento foi derrubado a última hora da tarde do luns, aínda que se volveu colocar
no seu sitio. Ao observar o seu carácter inestable, unha veciña deu aviso á Policía Local.
Os electricistas do Concello recolleron o elemento (que se ilumina en horario nocturno)
e procederon a illar os cables para evitar calquera incidencia por contacto.
As previsións que se barallan é que o “T” volva esta mesma semana ao seu sitio, xa
reparado. Mentres, deste conxunto de letras só manterán a luz nocturna catro, estando
as demais afectadas pola falta do devandito elemento.

Publicado en Portada | Deja un comentario

A ESTRADA RENOVA O COCHE ELÉCTRICO COMPARTIDO, O CUARTODENDE QUE SE IMPLANTOU O MODELO MUNICIPAL DE ‘CARSHARING’

 O programa Vive de Hyundai conta actualmente con 125 usuarios do
municipio estradense rexistrados, que teñen esta alternativa de
mobilidade e que “a están empregando de xeito moi intenso”.

O Concello da Estrada renovou hoxe, da man de
Hyundai o seu coche eléctrico compartido, o cuarto dende que se apostou pola implantación
dun modelo municipal de carsharing rural, en febreiro de 2023. No acto participaron o
alcalde, Gonzalo Louzao, o xerente de Hyupersa, Sergi Sánchez, e o axente de Hyundai na
Estrada, Víctor Louzao.
O rexedor sinalou que a renovación frecuente dos vehículos vén afianzar a aposta do
Concello por favorecer a mobilidade nun municipio eminentemente rural. Sinalou que este
turismo eléctrico emprégase durante unhas horas da mañá para os desprazamentos da
unidade de Servizos Sociais, estando o resto da xornada a completa disposición dos veciños
que teñan descargada a aplicación do Plan Vive de Hyundai.
Louzao Dono remarcou tamén a importancia de que esta alternativa de mobilidade sexa a
través dun vehículo eléctrico, con cero emisións e que tamén brinda a oportunidade para
que os cidadáns coñezan o funcionamento deste tipo de turismos.
Pola súa banda, Sergi Sánchez sinalou que Hyupersa continúa confiando na Estrada para
seguir aproximando á poboación rural “unha alternativa de mobilidade con cero emisións”.
Sinalou que o programa conta actualmente con 125 usuarios do municipio estradense
rexistrados, “que teñen este servizo e que o están empregando de xeito moi intenso”.
“Estamos cumprindo o obxectivo de dar un servizo na nosa zona de responsabilidade e
traballo, achegando solucións que realmente sexan prácticas no día a día”, apuntou.
O tempo medio de reserva do vehículo varía en función do tipo de usuario, dende cidadáns
que solicitan acceder ao coche para empregalo unha ou dúas horas ata outros que fan uso
del durante toda a xornada.
O novo vehículo recibido hoxe mantén o modelo do anterior, cambiando a cor polo negro.
É un Hyundai Inster 100% eléctrico, con 350 quilómetros de autonomía en estrada e uns 400
circulando por casco urbano. Para empregalo é preciso darse de alta na aplicación Vive
Hyundai, cumprimentando o cuestionario e aportando a documentación que se require. En
canto á tarifa por uso, é de 5 euros por hora, cun prezo máximo de 20 euros no caso de que
o usuario o alugue para todo o día.

Publicado en Portada | Deja un comentario

O CONCELLO ANIMA A INCREMENTAR O USO DO CONTEDOR MARRÓNPARA REDUCIR OS CUSTOS DE TRATAMENTO DOS RESIDUOS

 Desenvolve estes días unha campaña entre os grandes produtores.
 Impulsada no marco dunha subvención da Consellería de Medio
Ambiente, a campaña incide en que a correcta separación da materia
orgánica permite diminuír a cantidade de lixo que acaba no colector de
resto, unha fracción cuxo tratamento se encareceu un 67%.
 O dato económico que reforza a argumentación: o tratamento da
fracción orgánica custa 58 euros por tonelada, fronte aos 122€ da
fracción resto.

O Concello da Estrada desenvolve estes días unha
campaña de sensibilización para fomentar a correcta separación dos residuos e,
especialmente, animar a veciñanza a utilizar o contedor marrón para depositar a materia
orgánica. Actualmente esta proposta de sensibilización, promovida no marco dunha
subvención da Consellería de Medio Ambiente, estase centrando nos grandes produtores
deste tipo de residuos.
A iniciativa busca concienciar sobre a importancia de separar os residuos en orixe, tanto
polo seu impacto positivo no medio ambiente como polo aforro económico que pode
representar para as arcas municipais.
Neste sentido, os datos recollidos no material informativo distribuído polo Concello poñen
de manifesto a importancia dunha correcta clasificación do lixo. O custo de tratamento da
fracción resto, é dicir, aquela que non se pode reciclar nin aproveitar mediante outros
sistemas, incrementouse considerablemente nos últimos anos. Segundo as cifras recollidas
no folleto, pasou dos 73 euros por tonelada en 2023 aos 122 euros, o que representa unha
suba do 67 %.
Pola contra, o tratamento da materia orgánica a través da compostaxe doméstica figura cun
custo de cero euros por tonelada, mentres que o tratamento dos residuos orgánicos
depositados no contedor marrón ten un custo de 58 euros por tonelada, fronte aos 122
euros da fracción resto. Estas cantidades corresponden aos custos de tratamento
anunciados, sen incluír os gastos de recollida.
Por este motivo, o Concello lembra que separar correctamente os residuos non é só unha
cuestión de responsabilidade ambiental, senón tamén unha maneira directa de contribuír á
sustentabilidade económica do servizo municipal de recollida e tratamento do lixo.
Lémbrase, ademais, a importancia de utilizar correctamente o resto dos colectores: o azul
para papel e cartón; o amarelo para envases lixeiros; o verde para vidro; e os colectores
específicos para aceite usado, téxtiles e outros residuos

Publicado en Portada | Deja un comentario

PLENO NA ESTRADA PARA O SORTEO QUE ELIXE AOS INTEGRANTESDAS 39 MESAS ELECTORAIS DO MUNICIPIO NOS COMICIOS DO DÍA 29

Coa aplicación do INE noméanse 9 integrantes por cada mesa: un
presidente e dous vogais máis dous suplentes para cada un destes postos.

O salón de plenos do Concello da Estrada acolleu
hoxe, ás 13.00 horas, un pleno de carácter extraordinario destinado á realización do sorteo
das mesas electorais de cara aos comicios xerais que se celebrarán o vindeiro 29 de
novembro.
A sesión desenvolveuse de xeito áxil, empregando para a designación dos integrantes destas
mesas o transparente sistema de sorteo que posibilita o soporte do Instituto Nacional de
Estatística (INE). Unha pantalla de televisión permitiu aos integrantes de todos os grupos e
persoas presentes na sesión ir seguindo o funcionamento da aplicación.
O sistema selecciona nove persoas por cada unha das 39 mesas electorais que haberá no
Concello da Estrada. Noméase a un presidente e a dous vogais, xunto con dous suplentes
para cada unha destas persoas. As notificacións chegarán nos vindeiros días

Publicado en Portada | Deja un comentario

Circo no Camiño: unha xira de espectáculos de circo galego encherá de maxia e humor o outono en Verín, Lalín, A Estrada e Santiago de Compostela

O outono chega cargado de talento galego coa posta en marcha de Circo no Camiño, un novo proxecto cultural que reunirá algunhas das propostas máis divertidas e sorprendentes das artes escénicas galegas. Da man de Troula, Mago Teto, Culturactiva e Educateatro, esta iniciativa percorrerá Verín, Lalín, A Estrada e Santiago de Compostela cunha programación pensada para todos os públicos con diferentes formatos de rúa e baixo unha auténtica carpa de circo.

 

Dende o 12 de novembro e ata o 6 de decembro, Circo no Camiño ofrecerá unha ampla variedade de espectáculos nos que o circo, a maxia, o clown, a música e o humor serán os grandes protagonistas. Esta proposta para toda a familia permitirá ao público descubrir a riqueza e a diversidade do circo galego, achegando a cultura durante varias datas en cada localidade e facendo da tempada de outono-inverno unha oportunidade para vivir as artes escénicas de preto.

 

A programación contará con nomes e propostas recoñecidas que xirarán ao redor da gran Gala de Circo do Camiño, unha gala exclusiva que contará coa participación de algunhas  das mellores compañías de circo galegas e internacionais do momento. Conducida polo gran pallaso Fifo, contará cos aéreos e acrobacias da Frick Company, con Sue Moreno no trapecio, co humor de Javi Javichy, cos malabares de Noel, os equilibrios dos Forzu2 e o clown de Jano Sen Medidas.

 

Un dos artistas destacados será tamén o popular Mago Teto, que combinará ilusión, música e humor no seu espectáculo Galerock & Magic. Troula encherá as rúas de animación e personaxes sorprendentes, e Culturactiva Producións porá o humor gastronómico co espectáculo Máis Saaabor. A xira incluirá tamén outras propostas como Tavole, da compañía Zirko Txosko, ou a música de Uxía Lambona e a Banda Molona.

 

Circo no Camiño nace coa vontade de sumar esforzos entre compañías e produtoras galegas para ofrecer unha programación diversa, accesible e de calidade, capaz de conectar con públicos de todas as idades. Unha iniciativa que reivindica o valor das artes escénicas como espazo de convivencia e que aposta polo talento galego para encher de cultura os meses máis fríos do ano.

 

As actuacións desenvolveranse en Verín, do 12 ao 15 de novembro; Lalín, do 20 ao 22 de novembro; A Estrada, do 27 ao 29 de novembro; e Santiago de Compostela, do 3 ao 6 de decembro.

 

Os abonos para os espectáculos, e a programación completa, están dispoñibles na web circonocamiño.gal  

 

Este proxecto conta co patrocinio da Xunta de Galicia, a través da Axencia Turismo de Galicia.

Publicado en Portada | Deja un comentario