A Estrada na Rede

 A iniciativa veciñal fixo confluír nestas obras a colaboración da
Consellería de Cultura, o Concello da Estrada e a Arquidiocese de
Santiago de Compostela.
 As obras, que superaron os 50.000 euros, foron executadas pola firma
Artegal Restauraciones.
 O acto de inauguración consistirá nunha misa cantada, ás 19.00 horas
do venres e coa presenza do arcebispo, o conselleiro e o alcalde, entre
outros.

Os veciños da parroquia estradense de San Tomé de
Ancorados poderán asistir este venres, 30 de xaneiro, á estrea das obras de restauración
do retablo maior da súa igrexa parroquial, unha peza que vén de seren recuperada en
virtude do convenio acadado entre o Concello da Estrada, a Consellería de Cultura e a
Arquidiocese de Santiago de Compostela.
O templo acollerá o venres unha misa cantada ás 19.00 horas, á que está prevista a
asistencia do arcebispo de Santiago,Francisco José Prieto Fernández, do conselleiro de
Cultura, José López Campos, e do alcalde da Estrada, Gonzalo Louzao Dono,entre outros.
As obras de restauración deste retablo comezaron o pasado mes de agosto e foron
desenvolvidas pola firma Artegal Restauraciones, cun orzamento que se situou por
encima dos 50.000 euros e que foi asumido principalmente pola Xunta de Galicia, cunha
achega por parte do Concello.
O alcalde de barrio de San Tomé de Ancorados, José Manuel Nogueira, explicou hoxe
que foi a comisión de festas a encargada de recoller, anos atrás, o sentir veciñal e de
promover a busca de apoios para poder afrontar a restauración desta importante peza
do patrimonio artístico estradense, que se atopaba nun estado de deterioro moi grave.
O retablo de San Tomé é de estilo Barroco e foi realizado arredor do ano 1750 polo
compostelán Luis Parcero, un escultor moi apreciado no seu tempo, que colaborou en
retablos tan famosos como o de San Martín Pinario de Santiago e que no municipio
estradense deixou pegada noutras igrexas, caso da de Berres. Esta obra está

documentada e referenciada por varias fontes e resulta especialmente singular por
presentar moito detalle nas súas decoracións.
O retablo está elaborado en madeira de castaño policromada e dourada. Como queda
avanzado, é unha peza de gran calidade estética, chea de motivos decorativos vexetais
realizados en dourado tradicional, que seguen a máxima barroca de non deixar espazos
baleiros de decoración. A talla é minuciosa e de calidade.
Térmite
Porén, o que topou o equipo de restauración foi un retablo en moi mal estado de
conservación, con perda de elementos decorativos e un ataque grave de térmite.
Ademais, partes da estrutura da peza estaban caídas, caso do lateral esquerdo do ático.
A responsable do equipo de restauración, Carlota López, resumiu hoxe que os traballos
realizados supuxeron unha recuperación completa do retablo, cunha limpeza das
policromías e a fixación de toda a estrutura, na que moitos elementos presentaban un
escamado da pintura e dos dourados. Quixo aclarar neste senso que o que poderán ver
agora os veciños é a recuperación da repolicromía que se efectuou sobre esta peza a
comezos do século XX, xa que a intervención evidenciou que da última capa orixinal non
quedaba practicamente rastro algún.
No tocante á caída de parte da estrutura, esta experta detallou que se fixo toda a
estrutura nova, en madeira de castaño, e que se empregaron resinas para facer volumes,
imitando os orixinais.
De igual xeito, nas obras de restauración, que se completaron no mes de decembro,
incluíuse a restauración de tres tallas orixinais: San Tomé, San José e San Roque.
A maiores, o pedáneo informou da intención de solicitar a colaboración dos veciños para
facer fronte á restauración doutras catro tallas que hai nesta igrexa parroquial, ao
obxecto de completar a restauración desta valiosa mostra do patrimonio artístico
relixioso no rural da Estrada.

 A alerta meteorolóxica adiou a reunión prevista para o 2 de febreiro, un
encontro no que se perfilarán xa os últimos detalles deste percorrido.
 O consistorio acolle unha reunión para o plan de seguridade que
acompañará a toda a programación estradense do Entroido.

O consistorio estradense acolleu a primeira hora
desta mañá unha reunión para continuar avanzando na organización de todas as
actividades que acompañarán á programación de Entroido deseñada polo Concello da
Estrada. O encontro desta mañá estivo centrado no plan de seguridade que respaldará
estas propostas, de xeito que a convocatoria foi secundada por representantes de
Emerxencias A Estrada, Policía Local, servizo de Obras, técnicos municipais e os
concelleiros de Cultura e Servizos Municipais, Lucía Seoane e Óscar Durán,
respectivamente.
A sesión desenvolveuse segundo o previsto, analizando pormenores de cada unha das
actividades. Ao remate da mesma, a concelleira de Cultura lembrou que a reunión
prevista para noite deste luns, cos representantes de distintos colectivos interesados en
participar no desfile tradicional do Martes de Entroido foi adiada a consecuencia da
alerta meteorolóxica por fortes choivas. Deste xeito, trasladouse para o vindeiro luns, 2
de febreiro, ás 20.30 horas. Celebrarase no salón de plenos e estará orientada a pechar
os últimos detalles da xornada na que a vertente máis tradicional do Entroido desfilará
polas rúas da capital estradense.
Neste contexto, Seoane confirmou hoxe que a asistencia ás actividades do Martes de
Entroido na Estrada baterá este ano todo un récord de participación. Arestora están
anotadas 19 entidades, que terán que achegar un mínimo de 10 participantes e asistir
con carroza e ambientación.
Máis polo miúdo, o Concello ten constancia da pretensión de que desfilen o martes 17
de febreiro, festivo local na Estrada, veciños de Couso, San Miguel de Castro, Fernando
Conde, Callobre, Riobó, Matalobos, Santeles, Ribela, Arnois, San Xurxo de Vea, Santo
André de Vea, Santa Cristina de Vea (esta parroquia tamén aportará este ano os seus

Xenerais) e as ANPAs de Figueiroa, Vea, O Foxo, Codeseda e Oca, xunto cos grupos de
Strandanza e Priscilla Zumba.
Na reunión de seguridade de hoxe detallouse o percorrido do desfile do Martes de
Entroido. A saída das comparsas será da Rúa Antón Losada Diéguez, continuando por
Avenida de Santiago, Avenida de América, Praza de Galicia, Calvo Sotelo, Irmáns José e
Severino Trigo e Praza da Feira. A entrada dos cabalos dos Xenerais farase pola Travesía
da Feira.
Ao longo do percorrido haberá tres paradas para que os Xenerais da Ulla poida botar os
seus “Vivas”, á altura da Praza do Mercado e outras dúas no percorrido pola zona peonil
(concretamente en Calvo Sotelo).

Asociacións de veciños, de mulleres rurais e comunidades de augas
están chamados ao encontro, que se celebrará o xoves, ás 19.30 horas,
no MOME.
 Informarase sobre o Plan Provincia Comunitaria, Plan +Aqua e Plan
+Novaqua.
 O Concello adianta a posta a disposición de asesoramento na
tramitación das axudas.

O Concello da Estrada e a Deputación de Pontevedra
teñen convocada para este xoves, 29 de xaneiro, unha reunión informativa con
colectivos e asociacións estradenses en relación ao Plan Provincia Comunitaria, Plan
+Aqua e Plan +Novaqua correspondentes ao exercicio 2026. O alcalde, Gonzalo Louzao,
explicou que o que se busca con este encontro e informar a asociacións de veciños,
asociacións de mulleres rurais e comunidades de usuarios de augas para que poidan
coñecer de primeira man as bases que rexen estas novas convocatorias.
O rexedor trasladou xa o compromiso do Concello de implicarse para axudar a estas
asociacións na tramitación necesaria para conseguir uns fondos que axudarán a estas
entidades a seguir mellorando locais sociais nas parroquias, así como a renovar ou
acometer novas traídas de auga.
A reunión informativa celebrarse no MOME, ás 19.30 horas. O alcalde explicou que no
Plan Provincia Comunitaria as asociacións estradenses aspiran a acceder a 500.000
euros en axudas para a mellora e equipamento dos seus locais. Anticipou o rexedor que,
pola súa parte, o Concello implicarase novamente na convocatoria de 2026. De feito, o
rexedor lembrou que o Concello da Estrada respaldou ás asociacións en todo o proceso
de tramitación das axudas de 2025 a través dos seus departamentos de Urbanismo e
Subvencións.
Ademais de orientalos e acompañalos no trámite de solicitude, dende a administración
municipal asumiuse a elaboración das memorias técnicas para que os colectivos non
tivesen que afrontar gastos. Deste xeito, o Plan de Acción Comunitaria supuxo o

investimento de 480.000 euros no rural estradense. A esta contía hai que engadir os
fondos procedentes da liña de axudas que, para esta mesa finalidade, ten a Xunta de
Galicia. Isto fai que estas infraestruturas das parroquias atraeran un investimento
próximo aos 700.000 euros.
O Plan +Aqua está dirixido a comunidades de usuarios de aguas para axudar a sufragar os
gastos de investimentos destinados a mellorar, en termos cualitativos e cuantitativos, a
calidade da auga e o estado das instalacións de captación, potabilización,
abastecemento e almacenamento de augas de consumo deste colectivos. O alcalde
puxo o acento en que, nestes casos, a axuda pode chegar aos 10.000 euros por entidade
solicitante.
No caso do Plan +Novaqua, a Deputación de Pontevedra axudará a comunidades de
usuarios de augas a facer fronte aos gastos destinados a legalizar novas concesións de
augas de consumo humano ou novación das existentes.

 O alcalde acode en Toedo a unha reunión de coordinación con estes
servizos, aos que se suman as brigadas de Obras, que están preparadas
con maquinaria pesada e bombeos para actuar ante posibles incidencias.
 “Temos máis medios pero pedimos tamén máis colaboración cidadá para
evitar riscos”, sinala Gonzalo Louzao.

O alcalde da Estrada, Gonzalo Louzao, desprazouse a
primeira hora desta mañá ata a sede do servizo Emerxencias A Estrada, emprazada en
Toedo, para asistir a unha reunión de coordinación entre esta unidade, os traballadores
de Obras a os axentes da Policía Local, con motivo da alerta meteorolóxica vermella por
fortes choivas no interior da provincia de Pontevedra que comprende o termo municipal
estradense.
A reunión serviu para avaliar a situación, comezando por recoñecer o carácter
extraordinario da mesma. “Actívase esta situación por primeira vez en máis de 20 anos”,
incidiu o alcalde. Foi o propio Gonzalo Louzao o encargado de sinalar que este nivel de
alerta meteorolóxica aconsellou ao Concello afrontala duplicando o servizo de
Emerxencias A Estrada e reforzando tamén o da Policía Local, facendo que o persoal das
brigadas de Obras estean dende primeira hora desta mañá tamén en alerta con
maquinaria pesada e servizos de bombeo para intervir ante as posibles incidencias que
poidan derivarse deste episodio de chuvias tan intensas.
O alcalde confirmou que en Emerxencias se duplicou o número de traballadores por
quenda, en principio, ata a medianoite de hoxe, de xeito que coincidirían seis na base. A
maiores, a Policía Local saíu esta mañá con sete efectivos á rúa. “Teño que agradecer que
houbo persoal que se ofreceu ao incorporarse de xeito inmediato ao servizo cando se
activou a alerta para hoxe”, apuntou o rexedor.
Gonzalo Louzao puxo o acento en que, aínda que ata este mediodía non se produciran
situacións graves a consecuencia da excepcional situación meteorolóxica, o escenario
podería verse complicado conforme avance a xornada, tendo en conta que as previsións
apuntan acumulacións que poderían superar os 140 litros por metro cadrado nas

próximas horas. “E chove sobre mollado”, incidiu o mandatario. Sinalou tamén que se
agarda que a forza do vento se incremente durante a tarde.
“Temos máis medios pero pedimos tamén máis colaboración cidadá para evitar riscos”,
apuntou o mandatario estradense, que percibiu que os avisos lanzados a última tarde do
domingo tiveron efecto nunha redución circulatoria.
Despois de lembrar que a instalacións deportivas municipais permanecerán pechadas
hoxe, ao igual que servizos como a Escola Infantil Municipal ou o Espazo Concilia, Louzao
Dono quixo aproveitar para lembrar aos estradenses a importancia de que eviten
desprazamentos innecesarios ou de que non se acheguen aos leitos fluviais nin zonas
inundables.

 Vehículos que estacionan pegados aos contedores imposibilitan a
mobilización destes puntos de depósito, como sucedeu estes días na
Avenida de Santiago.
 O Concello valora configurar as illas de colectores para que nos
extremos queden os de cartón e vidro, que se baleiran con grúa.

Apoiándose en imaxes que falan por si soas, o
concelleiro de Servizos Municipais, Óscar Durán, solicitou hoxe a colaboración cidadá
para evitar situacións que imposibilitan e interrompen o servizo de recollida de lixo en
distintas rúas do casco urbano. Estas mesmas imaxes permitiron ao edil ofrecer unha
incontestable explicación á presenza de contedores que non puideron ser baleirados nos
últimos días en puntos como a Avenida de Santiago.
As imaxes poñen en evidencia unha situación que imposibilita ou engade riscos de danos
materiais á manexabilidade dos contedores de lixo: vehículos que estacionan moi
pegados os contedores, ás veces mesmo quedando en contacto directo con estes
equipos. Esta situación fai que a empresa encargada de efectuar a recollida non poida
mobilizar determinados colectores co brazo de carga ou remate -ao facelo para poder
prestar o servizo de recollida do lixo- por expoñerse a ocasionar danos nos vehículos que
estacionan sen deixar distancia de seguridade.
Óscar Durán informou hoxe de que, ante situación, o servizo está valorando a
posibilidade de cambiar o deseño das illas de contedores, de maneira que nos seus
extremos queden colocados colectores para a recollida de cartón ou de vidro, xa que
nestes dous casos son unidades que se mobilizan facendo uso de grúa.
En todo caso, en consideración con que esta disposición non sempre é factible, o
responsable de Servizos Municipais fixo un chamamento aos veciños para que non
estacionen os seus vehículos de xeito que entorpezan o manexo dos contedores.
Lembrou Óscar Durán que os equipos verdes se recollen todos os días, baleirándose os
de plástico tres veces á semana. Sinalou que, no caso de que se impida esta recollida e

coincida a continuación un dos días sen servizo, o tempo de permanencia do lixo no
contedor se incrementa, reducíndose a súa capacidade para acoller novos depósitos.

A conselleira do Medio Rural, María José Gómez, acompañada polo director xeral de Gandaría, Agricultura e Industrias Agroalimentarias, José Balseiros, participou hoxe na xornada RuralMente, organizada polo Consello da Estrada co sector primario da zona, onde puxo en valor as políticas a prol da remuda xeracional impulsadas desde o seu departamento, e que se reforzará este ano.

Neste sentido, explicou o impulso ao Plan de remuda centrado sobre varias liñas de traballo. Entre elas, as achegas para a incorporacións de mozos ao agro e os plans de mellora de explotacións, coas que se apoia o desenvolvemento do seu plan empresarial. A conselleira salientou que grazas a estas subvención, máis de 5.000 mozos puideron incorporarse á actividade agrogandeira desde 2009. Unha liña de axudas que, tal e como manifestou, terá continuidade neste 2026.

A maiores, a titular de Medio Rural tamén fixo fincapé noutra iniciativa posta en marcha o pasado ano, o Banco de Explotacións. Detallou que esta ferramenta favorece o contacto entre titulares de explotacións que cesan ou van cesar a súa actividade e os interesados en asumir a súa xestión, mediante compra ou arrendamento. Ademais, resaltou que este proceso fomentarase cunha liña de axudas específica cunha achega de 2,1 millóns de euros ata 2029. Actualmente son sete explotacións as dispoñibles no Banco, unha das cales se corresponde cunha granxa avícola da Estrada.

O programa de titorización e o asesoramento é outra das liñas de traballo para favorecer a remuda e, neste ámbito, a conselleira explicou que desde a súa posta en marcha no ano 2024 beneficiou xa un total de 544 persoas que solicitaron as axudas de incorporación. Estes beneficiarios foron atendidos e acompañados por 48 titores, profesionais das oficinas rurais dependentes da Xunta. Gómez indicou que este programa terá continuidade ao longo deste 2026 cun incremento do seu orzamento, pasando de 400.000 euros a case 850.000.

Por último, a conselleira salientou a relevancia da formación para garantir a remuda xeracional. Neste sentido, explicou que a Consellería dispón de seis centros de formación e experimentación agraria nos que este curso se matricularon 566 alumnos, un 9 % máis con respecto ao anterior.

GALERÍA :

.