A Estrada na Rede

O vindeiro luns 18, ás 20.30 horas, na escola unitaria de Santo André de Vea, organizaremos unha reunión informativa sobre o parque eólico de Xesteira, que afecta ás parroquias de Frades, Santa Mariña e Santo André de Vea. A esta reunión informativa asistirán a deputada Montse Prado e o deputado Luís Bará, que darán conta das iniciativas que presentaron para frear parques eólicos similares, como o de Castro Valente ou o do Campo das Rosas, entre outros.

Presentaremos alegacións

No BNG estamos a preparar un documento con alegacións contra este parque eólico, situado a pouco máis de catro quilómetros do parque de Castro Valente, xa autorizado pola Xunta. O documento de alegacións que daremos a coñecer ao longo desta semana, poñerémolo a disposición dos veciños ve veciñas das parroquias afectadas, así como do noso concello, para, entre todos e todas, frear esta nova agresión o noso medio rural.

 A saída, organizada por AGADEA Alzheimer, terá como punto de
partida e de chegada a praza do Novo Mercado.
 O prazo de inscrición manterase aberto ata o propio día do evento ás
18:30 horas.

O Concello da Estrada formará o vindeiro
venres, 15 de setembro, unha gran marea verde na VII andaina solidaria co
Alzhéimer, organizada pola Asociación Galega de Axuda ós Enfermos con
Alzhéimer (AGADEA).
A xornada foi presentada esta mañá na Sala de Xuntas do concello estradense.
No acto participaron a concelleira de Servizos Socias, Amalia Goldar, a
coordinadora do centro de día de persoas maiores municipal, Sonia Castro, e a
presidenta de AGADEA, Isabel Gey.
A saída constará dun itinerario circular de dificultade media-baixa que partirá ás
19:00 horas da praza do Novo Mercado para regresar ao mesmo lugar. A
chegada estará amenizada por un grupo de música e haberá un photocall no
que sacar as mellores imaxes dunha xornada que promete diversión e
solidariedade para todas as persoas asistentes.
Todas as persoas interesadas en participar poderán anotarse a través da
páxina web www.adadea.org ata o propio día do acto, o venres 15 de
setembro, media hora antes de que dea comezo.
Cada inscrición, que inclúe a entrega dunha camiseta, o seguro e o
avituallamento, terá un prezo de 5 euros para persoas adultas e será
completamente gratuíta para os nenos e nenas menores de 12 anos de idade.
O obxectivo da iniciativa, celebrada con motivo do Mes do Alzhéimer, é formar
unha gran marea verde con toda a veciñanza para concienciar sobre esta
doenza. Por iso, a edil de Servizos Sociais, Amalia Goldar, convidou a
“participar e gozar dunha xornada de gran importancia polo seu carácter
solidario e que promete diversión e desfrute para todos os asistentes”.

O Concello da Estrada erguerá o pano da
programación cultural de outono 2023 con dous dos artistas máis relevantes da
escena nacional e internacional. Dous artistas que reinvindican o riso coma
unha ferramenta de reflexión social e o acto teatral coma un acto de
catarse colectiva.
O venres 6 de outubro ás 21.00h, Leo Bassi volverá ao Teatro Principal da
vila co espectáculo 70+. Nel, o artista italiano celebrará co público o seu 70
aniversario, amosando máis enerxía ca nunca e mantendo presente o seu
desexo de provocar para emocionar o auditorio.
Pola súa banda, o venres 27 de outubro ás 21.00h, o actor e dramaturgo
español Rafael Álvarez “El Brujo” amosará, dende a comicidade, a
andamiaxe secreta que vertebra a súa traxectoria artística. Un espectáculo na
que o actor parte dunha premisa esencial: gozar e facer gozar ao público.
As entradas poderán mercarse a partir deste vindeiro luns 11 de setembro na
plataforma ataquilla.com ou de forma presencial no departamento de Cultura
do Concello da Estrada.

 O prazo de inscrición estará en vigor desde o día 11 ata o 22 de
setembro de 2023 a través da sede electrónica ou no departamento de
Servizos Sociais.

O Concello da Estrada abrirá o prazo de
inscrición para a terceira quenda da actividade de piscina para persoas
maiores, co propósito de que o maior número de veciños e veciñas poidan
beneficiarse desta iniciativa por un prezo de 20 euros.
Todas as persoas empadroadas no municipio que sexan maiores de 50 anos
ou teñan unha discapacidade igual ou superior ao 33% poderán presentar a
súa solicitude a través da sede electrónica do Concello da Estrada ou de xeito
presencial no departamento de Servizos Sociais, en horario de 9:00 a 14:00
horas.
Os horarios das sesión son os seguintes:
• Luns, de 9:15 a 10:00 horas.
• Luns, de 16:30 a 17:15 horas.
• Luns, de 19.30 a 20.15 horas.
• Mércores, de 09:15 a 10:00 horas.
• Venres, de 09:00 a 09:45 horas.
• Venres, de 09:45 a 10:30 horas.
Cada sesión contará cun mínimo de sete alumnos e alumnas, e para garantir o
correcto desenvolvemento da actividade e seguridade dos participantes,
limitarase o número máximo a doce persoas e un mínimo de sete.
Á hora de tramitar a solicitude, que estará publicada na propia páxina web do
Concello da Estrada, non se deberá acompañar ningunha documentación, coa
excepción do certificado de discapacidade, se fose o caso.

O Concello da Estrada amosa a súa total repulsa á guerra así como a súa solidariedade e apoio ao pobo ucraíno ante os duros momentos que están a sufrir.

A casa consistorial da Estrada acolleu hoxe o acto de presentación do
cartel do Campionato de España e Galego de Enduro, que se celebrará no
municipio estradense os días 15, 16 e 17 de setembro.

No acto participaron o edil de Deportes, Ismael Pena, xunto con José
Canda, presidente da Federación Galega de Motociclismo e os sidreiros
locais José Antonio López Pampín e José Peroja.

Na súa intervención, o responsable de Deportes «convidou á veciñanza a
acudir a un evento de gran relevancia no eido do motociclismo
autonómico e nacional que seguro servirá para promocionar A Estrada
como un dos núcleos do deporte en Galicia»

 As intervencións suporán o repintado de accesos, pasos de peón,
bordos de beiravías e zonas de estacionamento coa finalidade de
mellorar a seguridade do alumnado dos centros e dos peóns.
 Os traballos executaranse no CEIP de Figueroa, no Pérez Viondi, na
contorna dos institutos e no Colexio Plurilingüe N. S. De Lourdes.

O Concello da Estrada iniciou hoxe os
traballos de acondicionamento e mellora da seguridade viaria nas contornas
dos centros de ensino da localidade.
Esta mesma mañá deu comezo unha intervención que incluirá traballos de
repintado en elementos viarios como pasos de peóns, bordos de beiravías e
áreas de estacionamento de autobuses, coa finalidade de promover unha maior
seguridade tanto para os usuarios dos centros como para os viandantes e
condutores que circulen por estes espazos, os cales rexistran unha gran
afluencia de tránsito nas horas de entrada e saída do alumnado.
Os traballos estanse a realizar nos CEIP de Figueroa, no Pérez Viondi, na zona
dos institutos e no Colexio Plurilingüe Nosa Señora De Lourdes, e agardase
que ao longo da xornada de mañá poidan estar rematados, estando xa estas
zonas acondicionadas para o inicio do curso escolar.