Imaxes da visita guiada polas escavacións arqueolóxicas do Castro de Barbude, concorrida a pesares de que o tempo non acompañou.
Tal e como se anunciou dende o comezo das obras, este céntrico enclave
quedará aberto para non entorpecer a campaña comercial de Nadal nin
a celebración de eventos clave no transcurso destas festas.
As celebracións suporán tamén un paro temporal nos traballos polo
período vacacional dos operarios.
A reforma retomarase o luns 12 de xaneiro e, segundo avance, irá
ocasionando novos cambios na circulación, dos que se informará
puntualmente.
Tal e como anunciou dende o minuto un o goberno
local, as obras na Praza de Galicia e a súa contorna despexarán dende hoxe mesmo esta
céntrica zona do casco urbano para a celebración das festas de Nadal. Deste xeito, a Rúa 56 e
a Rúa San Paio quedarán esta tarde abertas novamente ao tráfico, cos sentidos circulatorios
habituais en ámbalas dúas vías.
Dende o inicio do traballos, o pasado mes de outubro, o goberno que encabeza Gonzalo
Louzao sempre puxo o acento no desexo de deixar para despois das festas a actuación na
Praza de Galicia propiamente dita, ao obxecto de non entorpecer a principal campaña
comercial do ano e de garantir que as obras non supoñan un atranco para o
desenvolvemento de eventos tan significativos para o conxunto da cidadanía como as
tradicionais cabalgatas de Papá Noel (24 de decembro) e Reis (5 de xaneiro), para as que
o paso por esta praza resulta estratéxico.
Sen querer entrar en ningún momento nas informacións e valoracións erradas e
tendenciosas que se verteron nos últimos días, o executivo limitouse hoxe a realizar o
anuncio de reapertura da circulación, logo de cumprirse o prazo aproximado de dúas
semanas de peche anunciado para a Rúa 56, a última en veren interrompida o tránsito
rodado.
Dende esta tarde, a nova situación manterase durante todas as festas, momento no que
as obras quedarán tamén momentaneamente paradas polo descanso vacacional dos
operarios. A previsión é que os traballos se retomen o 12 de xaneiro. A partires desa
data, o avance na execución irá motivando cambios circulatorios dos que se irá
informando puntualmente.
Dende a Xefatura da Policía Local da Estrada confirmouse esta mañá que o
restablecemento do tráfico nas Rúas 56 e San Paio acomodarase ao sentido circulatorio
habitual nestas rúas, podendo subir pola Rúa 56 cara a Praza de Galicia e tamén acceder
á Rúa San Paio para continuar cara Figueiroa. Tamén se poderá circular cara a Rúa do
Cruceiro dende a Praza de Galicia.
De igual xeito, dende a Avenida Benito Vigo volverá ser posible enlazar coa Praza de
Galicia a través da Rúa Pérez Viondi, continuando cara San Paio ou Rúa Peregrina.
Continúa o corte en Marqués de la Vega de Armijo
A que continuará cortada é a Rúa Marqués de la Vega de Armijo, permitíndose o acceso
aos garaxes desta vía dende a Praza da Inmaculada (e sentido contrario ao permitido
habitualmente).
Evidentemente, polo primeiro tramo da Rúa Don Nicolás non se poderá circular, unha
cuestión que se manterá no tempo, tendo en conta que esta vía pasará a ser peonil.
Na confluencia entre as rúas 56 e San Paio quedará unha zona de acopio do material de
obra, xusto no illote no que antes estaba instalada a escultura dedicada á Rapa das
Bestas.
Transporte público
Por outra banda, a apertura ao tráfico desta zona tamén comporta novos cambios para o
transporte público dende esta mesma tarde. Deste xeito, a parada de taxis volverá ao
seu lugar habitual na Praza de Galicia (a carón do Hostal A Bombilla) e o servizo de
autobús volverá subir pola Rúa 56 para a parada de viaxeiros na praza que os
estradenses bautizan oficiosamente como A Farola.
O Concello da Estrada presentou esta mañá a carta para que llos envíes a Melchor, Gaspar e Baltasar, deseñada pola ilustradora estradense Rosa de Cabanas.
O segredo de que medio de transporte elixirán os Magos para chegar, simbolicamente, á Estrada neste Nadal desvelouse: chegarán en carro tirado por bois.
As cartas, un total de 2.500, saíron esta mesma mañá para os colexios do municipio. Tamén poden atoparse no consistorio e nas librerías da Estrada.
Da man desta ilustradora os tres Magos e os seus camelos viaxaron xa en patinete, furgoneta ao estilo camper, globo aerostático, bicicleta, coche antigo, con máscara pola pandemia en 2020, en Seat 600 ou en Vespa. Despois do tractor do ano pasado, este ano chegan en carro.
Trátase do Concello de Negreira, o Concello de Santa Comba, cunha
parroquia que leva este nome, e o concello estradense, que conta co
lugar de A Negreira, en San Miguel de Barcala
O Concello da Estrada será este ano o organizador
do encontro de irmandade entre os tres municipios de Galicia que comparten o
topónimo Negreira. Trátase do Concello de Negreira, o Concello de Santa Comba (pola
súa parroquia de Negreira) e A Estrada, onde figura un lugar con nome de A Negreira na
parroquia de San Miguel de Barcala.
Baixo o nome de “As tres Negreira de Galicia”, o acto celebrarse o sábado, 20 de
decembro, no lugar de Negreira, ás 12.00 horas. Nel participarán o alcalde estradense,
Gonzalo Louzao, e os rexedores de Negreira, Manuel Ángel Leis Míguez, e de Santa
Comba, Alberto Romar Landeira. Xunto a eles estará o secretario xeral da Lingua,
Valentín García, o historiador Xosé Amancio Liñares Giraut e Fernando Cabeza Quiles,
experto en toponimia.
É esta unha iniciativa que xurdiu do escritor e historiador Liñares Giraut, quen propuxo
ao Concello de Negreira levar a cabo un primeiro encontro no mes de setembro de 2024
no que tamén participou o referido filólogo e no que A Estrada estivo representada pola
edil Amalia Goldar Cora.
Cabeza Quiles aludiu entón ao falso xentilicio “nicrariense”, pois lembrou que no ano
1005 un monxe recreou a traslatio dende Dugium, a actual Fisterra, dos restos do
apóstolo Santiago, que terían pasado por unha localidade identificada como Portus
Nicrariae, pero non Nicraria.
Co acto na Estrada pecharase o ciclo, despois de teren organizado un evento de
irmandade similar nos outros dous municipios galegos nos que existe este topónimo.
No caso de que o tempo non acompañe, o evento trasladarase ao local social.
O alcalde estradense abordou este proxecto coa conselleira de Medio
Ambiente, Ángeles Vázquez.
Crearase una illa por parroquia e instalarase nun punto de referencia en
cada zona.
Estarán rodeadas por unha estrutura de madeira, buscando que “sexan
funcionais pero tamén respectuosas co medio no que se van situar”.
Os contedores marróns chegan mañá ás rúas, con 10 puntos orientados
a grandes produtores.
A recollida destes residuos será os martes e xoves.
O alcalde da Estrada, Gonzalo Louzao, profundou
hoxe noutro dos proxectos que estiveron sobre a mesa na reunión mantida coa
conselleira de Medio Ambiente e Cambio Climático, Ángeles Vázquez. Como se
comunicou ao remate dese encontro, o rexedor abordou coa titular deste departamento
diversos aspectos vencellados á recollida de lixo no municipio. En concreto, o
mandatario local pediu a colaboración da consellería para un proxecto que suporá a
creación de 50 illas no ámbito rural, dotadas con todos os contedores, para favorecer a
reciclaxe en cada parroquia.
“No casco urbano estamos incorporando illas nas que teñamos a posibilidade de reciclar
de xeito global todo tipo de residuos, con colectores de vidro, cartón, amarelos para
envases lixeiros ou de residuos orgánicos, o obxecto de facilitar a reciclaxe selectiva.
Queremos facer iso en todas as parroquias, nas 50 parroquias rurais que compoñen o
concello”, sinalou o xefe do executivo local. “Así llo trasladei á conselleira Ángeles
Vázquez, que nos deu o seu apoio para a creación destas 50 illas, unha por parroquia,
para que teñamos ese punto de referencia”, engadiu.
“Somos o concello de España con máis núcleos de poboación. Todos teñen o seu
colector verde e moitos tamén o amarelo para plásticos e envases”, continuou o alcalde.
“O que queremos é que teñan todos os colectores reunidos nunha illa situada nun punto
de referencia en cada zona”, explicou.
Louzao Dono tamén detallou que o que se buscará será configurar illas respectuosas co
entorno no que se asenten. Para iso, os colectores destinados a cada tipo de residuo será
colocado nun punto rodeado por unha estrutura de madeira, procurando que estas illas
“sexan funcionais pero tamén respectuosas co medio no que se van situar”.
“Buscamos un servizo de proximidade e de calidade, ademais de favorecer a reciclaxe,
en cada unha das parroquias”, sinalou o alcalde estradense, que agarda que estas illas
cheguen ao rural en 2026 e que se sumen a iniciativas como a da distribución de
composteiros domésticos.
Compostaxe e contedor marrón
En relación a estes últimos falou hoxe o concelleiro de Servizos Municipais, Óscar Durán.
Explicou que a campaña realizada nas últimas semanas permitiu asignar as 500 unidades
que o Concello da Estrada adquiriu ao abrigo dunha subvención para a introdución do
quinto contedor. Durán recoñeceu que algúns cidadáns quedaron en lista de agarda e
que se está valorando unha segunda remesa de composteiros de cara ao ano que vén.
Noutra orde de cousas, o concelleiro sinalou que mañá xoves comezarán a instalarse nas
rúas do casco urbano os contedores marróns, destinados de xeito exclusivo a residuos
orgánicos. A incorporación destes elementos ás illas de colectores farase de xeito
gradual, comezando esta semana polos grandes produtores, nomeadamente
establecementos de venda de alimentación e restaurantes.
Neste senso, xa se seleccionaron 10 puntos de emprazamento:
• Avenida de Pontevedra (no entorno do supermercado Familia).
• Avenida de Santiago (nas inmediacións dos establecementos Invictus e Inferno).
• Avenida de Benito Vigo (xunto Froitería Doi e Froiz).
• Avenida Benito Vigo (á altura do número 24, próximo ao restaurante Gran Vía e
Mesón da Estrada).
• Avenida de Vigo (parte posterior do supermercado Froiz).
• Rúa Iryda (fronte supermercado Familia).
• Praza de Abastos.
• Rúa Gradín (xunto Restaurante Samaná)
• Rúa Leicures (ao inicio, no entorno de restaurante Manxares e outros
establecementos da contorna).
• Rúa 56 (Hostal A Bombilla).
Todos estes contedores marróns poderán ser empregados tamén por particulares que
desexen irse incorporando voluntariamente a estes depósitos e que teñan retirada a
tarxeta que se precisa para apertura dos contedores.
En canto á frecuencia de recollida, Óscar Durán explicou que a primeira será o vindeiro
martes, 23 de decembro, pasando novamente a recoller o xoves 26. Quedará así
establecida: dúas veces por semana, martes e xoves, asumindo que o volume será
reducido nestas primeiras semanas. En todo caso, o responsable de Servizos Municipais
sinalou que esta frecuencia poderá modificarse en función de como evolucione o
depósito de residuos orgánicos.
Despois desta primeira fase para grandes produtores iranse incorporando ás rúas, de
xeito paulatino, a totalidade dos 60 contedores marróns adquiridos polo Concello da
Estrada para esta implantación obrigatoria.
A localización escollida explica o traslado do de Nadal, agora situado a
carón do palco da música.
As letras brancas que conforman o nome do municipio terán
incorporada unha iluminación que se pode programar para que luza na
tonalidade desexada.
O Concello da Estrada estrea photocall na Praza da
Constitución. A media mañá de hoxe comezou a instalación das letras que conforman o
nome do municipio, que quedou localizado aos pés da casa consistorial.
Aínda que inicialmente se pensara en situar este atractivo na alameda municipal,
concretamente na parte posterior do edificio do Concello, finalmente optouse pola Praza da
Constitución, ao obxecto de que as persoas que decidan tomar unha fotografía a carón
destas letras poidan conformar unha estampa co emblemático edificio consistorial de pano
de fondo, integrado no conxunto monumental no que tamén se inclúe o valorado palco da
música.
A instalación destas letras nestas datas do ano explica o motivo polo que o Concello decidiu
desprazar, días atrás, o photocall de Nadal ata deixalo situado a carón do palco. Deste xeito,
nestas festas veciños e visitantes poderán escoller dúas postais diferentes.
O nome da Estrada luce nesta composición coas letras en branco. Non obstante, en
horario nocturno incorporarase un toque de color a través da luz, xa que o conxunto
contará cunha iluminación que, como acontece co propio consistorio, pode irse
programando coa tonalidade desexada
