A Estrada na Rede

 O espazo, antes pertencente ao Arcebispado, pasou a ser propiedade do
Concello da Estrada despois do proceso de concentración parcelaria.
 Constrúen unha vía que mellore o acceso ás vivendas que dan cara a
carballeira e permita ordenar o tránsito rodado neste espazo de valor
natural e patrimonial.
 Nunha segunda etapa será o Obradoiro de Emprego o que se centre na
parte natural do recinto.

O alcalde da Estrada, Gonzalo Louzao Dono,
desprazouse ata a parroquia de Codeseda para comprobar, xunto co arquitecto técnico
do Concello e responsables da empresa adxudicataria, a primeira fase das obras de
mellora na contorna da Carballeira da Sagrada.
O rexedor lembrou que este recinto era antes propiedade do Arcebispado de Santiago
de Compostela e agora, en resposta á petición veciñal e despois dos trámites realizados
no marco do proceso de concentración parcelaria, quedou como propiedade do
Concello da Estrada.
Sinalou Louzao que se estes días arrancou a primeira de dúas actuacións importantes
para a posta en valor desta carballeira. “Agora estase facendo unha parte de obra dura
no que corresponde ao acceso ás vivendas situadas fronte á carballeira”, resumiu o
mandatario. Con cargo a unhas baixas de 2024, a empresa COVSA iniciou xa a
construción dunha vía que cumprirá un dobre obxectivo: facilitar o acceso a estes
inmobles e ordenar o tránsito rodado na zona.
O acceso a estas vivendas viña practicándose a través de vías de zahorra que, con
meteoroloxía adversa, complicaba o tránsito. Estes días iniciouse a construción dunha
vía de formigón que, en consideración coa contorna natural e patrimonial, terá unhas
características determinadas ao servizo da súa integración. Será un formigón lavado en
tons ocres, cunha anchura de tres metros e pegado á fachada das vivendas. Será un
acceso necesario para estas vivendas que teñen fronte cara este espazo natural e tamén
permitirá ordenar o tráfico pola contorna, de xeito que os vehículos non pasen pola
carballeira e prexudiquen a conservación e valor da zona verde.
Ademais, o alcalde visitou outro punto da actuación, xa que a empresa realizará unha
mellora do firme tamén nunha vía moi próxima ao recinto e que atravesa o Camiño da
Geira e dos Arrieiros.
Co Obradoiro de Emprego
Os traballos de mellora da contorna da Carballeira da Sagrada continuarán, despois,
cunha segunda fase de intervención a través do Obradoiro de Emprego. Ademais da
realización de podas e de plantar árbores que foron secando co paso do tempo,
actuarase na mellora da parte verde máis degradada (precisamente polo paso dos
vehículos). Botarase nova terra e sementarase nova herba.
“A combinación destas dúas intervencións farán que teñamos unha Carballeira da
Sagrada máis coidada e ordenada, tamén cun mellor acceso ás vivendas para os
veciños”, sinalou o alcalde.

 O certame que leva o nome da Cantora da Ulla chega á súa trixésima
edición.
 Cunha dotación económica de 2.000 euros e a publicación do poemario
en Edicións Fervenza, o premio entregarase o vindeiro 26 de novembro
no marco da Festa da Poesía.

O xurado encargado de fallar o Premio de Poesía
Avelina Valladares escolleu hoxe a obra presentada por María Montserrat Varela
Vázquez como gañadora da trixésima edición dun certame que leva o nome de Cantora
da Ulla. O poemario, elixido entre as 25 obras que competiron polo premio, presentouse
baixo o lema “Fendas na brétema”. Aberta a plica, o título da peza gañadora resultou
ser “Consciencia da impermanencia”.
O xurado citouse na Sala de Xuntas do consistorio estradense ás 10.00 horas. Estivo
integrado por Xoán Carlos García Porral, Constantino Regueira Paz, María Begoña Porto
Brea, Esteban Folgar Brea e Dolores Araújo Arias, esta última exercendo como
secretaria.
Destacou da obra a estruturación do poemario así como “a harmonía do día dende o
amencer ao solpor pasando polo atardecer e transitando por paisaxes claras nas que o
saber, o buscar e o querer enchen unha vida asentada na esencia que nos define e que,
deste xeito, transcenderá”.
M.ª Montserrat é natural de Santiago de Compostela pero está domiciliada en Arzúa.
Exerce coma traballadora social e xa ten acadado o Premio Vicente Risco de Ciencias
Sociais no ano 2025 por un ensaio presentado baixo o lema “Trazos da escolma da
cultura”.
Aberta a plica, a concelleira de Cultura, Lucía Seoane, comunicou o fallo do xurado á
autora, que recibiu a boa nova durante o proceso de documentación para unha nova
obra e que se declarou moi emocionada por seren este o primeiro poemario que
publicará.

O Premio Avelina Valladares será entregado o vindeiro 26 de novembro, coma sempre
no marco dunha nova edición da Festa da Poesía. Será nun acto aberto no Teatro
Principal.
Este premio literario impulsado polo Concello da Estrada na honra e lembraza de Avelina
Valladares ten unha dotación económica de 2.000 euros, xunto coa publicación do
poemario en Edicións Fervenza.

 O concelleiro de Deportes, Ismael Pena, presenta unha nova edición dun
programa polo que pasaron no último ano máis de 800 persoas.
 O Concello contempla bonificacións (non acumulables) do 25% sobre a
cota trimestral para familias numerosas, monoparentais ou para a
segunda actividade do mesmo alumno/a.

O concelleiro estradense de Deportes, Ismael Pena,
presentou este mediodía o programa completo para as Escolas Deportivas Municipais
no curso 2026-2027, unha oferta que desta volta ofrecerá aos estradenses un total de
14 escolas, dirixidas tanto ao alumnado infantil como a adultos.
Pena concretou que o obxectivo deste programa municipal non é outro que promover a
actividade deportiva estre a veciñanza, favorecendo o acceso e mellora no
desenvolvemento deportivo nas disciplinas ofertadas. O concelleiro sinalou que na
última convocatoria foron máis de 800 as persoas participantes, de xeito que estas
escolas se converten nunha actividade fundamental para o tecido deportivo local.
Con respecto ao curso pasado, son baixa nesta oferta as escolas de balonmán e fútbol
sala. As inscricións nas 14 restantes quedan abertas hoxe mesmo e ata o vindeiro venres
25 de setembro. A matrícula terá que facerse a través dos contactos de cada unha das
escolas. Cómpre lembrar que o número mínimo de participantes para que se poña en
marcha a actividade será de 10 alumnos.
Así, durante a primeira semana de outubro está previsto que arranquen as sesión
correspondentes ás escolas deportivas de Ciclismo, Natación, Ximnasia, Pádel, Judo,
Kárate, Patinaxe e Hóckey, Xadrez, Tenis, Bádminton, Baloncesto, Hípica, Taekwondo e
Esgrima.
En canto aos prezos, a cota xeral será de 36 euros por trimestre para alumnos de 4 a 14
anos, sendo a dos adultos (a partires de 15) de 60 euros trimestrais. O Concello
contempla bonificacións (non acumulables) do 25% sobre esta cota para familias
numerosas, monoparentais ou para segunda actividade do mesmo alumno/a.
A información específica de cada escola pode consultarse na páxina web municipal ou
na cartelaría que se adxunta.

A Xunta modificará as frecuencias dos centros de Arca, Ouzande e Ponte Ulla; os veciños non
teñen que facer nada se continúan recibindo todas as canles con normalidade
O Concello da Estrada informa aos veciños dun cambio nas frecuencias utilizadas para a emisión da
Televisión Dixital Terrestre (TDT) que afectará a determinadas zonas do municipio.
A Xunta de Galicia realizará o martes 1 de setembro actuacións nos centros de extensión de cobertura de Arca e
Ouzande, mentres que o mércores 2 de setembro está prevista a intervención no centro de Ponte Ulla, situado
no Concello de Vedra, pero que tamén proporciona sinal a determinadas zonas da Estrada.
Estas actuacións forman parte do proceso de evolución tecnolóxica da TDT que está a levar a cabo a Xunta de
Galicia e que implica a modificación das frecuencias polas que se distribúen as diferentes canles de televisión. A
nova distribución está prevista para entrar en funcionamento o 5 de novembro.
«Non é que o televisor ou a antena estean fallando, simplemente cambiaron as frecuencias»
O concelleiro de Novas Tecnoloxías, Manuel Magariños, quere trasladar unha mensaxe de tranquilidade aos
veciños das zonas afectadas.
«Se despois do cambio algunha canle deixa de aparecer no televisor, non debemos pensar que se
estragou a televisión ou que a antena deixou de funcionar. Simplemente cambiaron as frecuencias polas
que se reciben esas canles», explica.
Nese caso, sinala, «o que hai que facer é moi sinxelo: entrar no menú do televisor e realizar unha busca
automática de canles».
Magariños advirte, ademais, de que existe outra pequena consecuencia que os usuarios deben ter en conta: «Ao
facer a nova sintonización, as canles poden aparecer ordenadas de maneira diferente á que tiñamos ata
agora. Polo tanto, unha vez rematada a busca, probablemente teremos que volver ordenalas e poñelas nas
posicións habituais».
O concelleiro insiste en que a primeira actuación ante unha posible desaparición dunha canle debe ser comprobar
a sintonización: «Non significa que o televisor ou a antena estean fallando. O que cambiou son as
frecuencias de emisión e, por iso, o televisor ten que volver localizar as canles».
Non é necesario facer nada se a televisión funciona con normalidade
O Concello quere aclarar que os veciños non teñen que realizar ningunha actuación por adiantado.
A recomendación é sinxela: se, unha vez realizado o cambio, o televisor continúa recibindo todas as canles con
normalidade, non será necesario facer nada.
Pola contra, se algunha canle deixa de aparecer, será o momento de realizar a busca automática de canles.
Ademais, a relación de entidades de poboación facilitada pola Xunta non debe interpretarse como unha lista
pechada de vivendas afectadas. Trátase das zonas que, segundo os cálculos de cobertura, teñen estes centros
como mellor servidor, pero o sinal pode chegar tamén a outras localizacións.
«Pode haber vivendas que non estean nesta relación e que tamén reciban o sinal dalgún destes centros.
Por iso, máis que fixarnos unicamente na lista, o importante é comprobar como funciona a nosa televisión
cando se produza o cambio», explica Magariños.
A que zonas pode afectar?
Segundo os cálculos de cobertura facilitados pola Xunta, o centro de Arca ten como mellor servidor diferentes
entidades das parroquias de Arca, Codeseda, Nigoi, Souto e Tabeirós.

Entre elas figuran A Abeleira, A Amarelle, A Goleta, A Penela, Arcapedriña, O Carballal, Nodar, O Cruceiro,
Outeiriño e Xustín; así como diversas entidades de Codeseda, Nigoi, Souto e Tabeirós.
No caso do centro de Ouzande, as zonas identificadas corresponden a determinadas entidades de Guimarei,
Lagartóns e Ouzande: A Costa, A Devesa, O Monte e O Redondo.
Pola súa banda, o centro de Ponte Ulla, situado en Vedra, pode prestar servizo ás entidades estradenses de A
Calzada, A Veiga, O Regueiro e Os Bieites, na parroquia de Arnois.
Estas zonas son as identificadas pola Xunta segundo os seus estudos de cobertura como aquelas nas que cada
centro ofrece a mellor opción de recepción. Non obstante, outras vivendas situadas fóra destas entidades
tamén poderían recibir o sinal destes emisores e verse afectadas polo cambio.
Que canles se seguirán recibindo?
O cambio non supón a eliminación das canles de televisión, senón unha modificación das frecuencias polas
que se distribúe o sinal.
Nas novas frecuencias continuarán emitíndose as principais canles que actualmente reciben os fogares, entre elas
TVE1, TVE2, Clan, 24 Horas, Teledeporte, Telecinco, Cuatro, Antena 3, La Sexta, TVG, G2, TVG UHD, FDF,
Divinity, Neox, Nova, BeMad, DMAX, Energy, Mega, Boing e Trece, entre outras.
�� A mensaxe para os veciños é moi sinxela
Se continúas vendo todas as canles → non tes que facer nada.
Se desaparece algunha canle → realiza unha busca automática no televisor.
Se as canles aparecen desordenadas → volve colocalas nas posicións habituais.
Se despois da nova sintonización continúa algún problema → pode ser necesario revisar a instalación da
antena, especialmente no caso das comunidades de veciños.
«Queremos que os veciños teñan esta información antes de que se produza o cambio e que saiban
perfectamente como actuar. Se unha canle desaparece, primeiro hai que facer unha busca automática; se
despois segue sen verse, daquela xa comprobaremos se existe algún problema na instalación», conclúe
Magariños.
Ante calquera dúbida sobre a cobertura da TDT ou sobre o centro emisor que presta servizo nunha determinada
zona, os veciños poden contactar co teléfono 881 866 388 ou consultar a páxina web tdtgalicia.gal.

GALERÍA DE IMAXES REQUÍAN 2026

O Concello da Estrada mantén contacto directo e continuo con UFD, a distribuidora de electricidad de Naturgy, para coñecer de primeira man a evolución dos traballos destinados a localizar e solucionar a orixe dos microcortes que están afectando a diferentes zonas do municipio. O edil de Novas Tecnoloxías, Manuel Magariños, vén realizando este seguimento cos responsables da compañía xa dende mediados de xullo, momento no que o Concello comezou a ter constancia da situación a través dos avisos veciñais. Segundo a información facilitada por UFD, as incidencias están localizadas na liña aérea de media tensión PAI 806, que conecta a subestación de Paizás con Rubín, cunha liña principal de aproximadamente 12 quilómetros, ademais das súas correspondentes derivacións. A distribuidora explica que os microcortes, que afectan ás zonas de Curro-Cira, San Miguel de Castro, Oca, Loimil, Muimenta, Reigada, Tiguillois, Riamonde e Arnois, prodúcense de maneira puntual e sinala que os sistemas automáticos de protección da rede están permitindo restablecer o subministro de forma rápida. Ademais, fontes da compañía explican que este tipo de incidencias poden vir provocadas por “distintos axentes externos”, como restos ou cascas de eucalipto desprazados polo vento, aves ou outros elementos que poden entrar en contacto directo coa liña. Delimitada xa a unha fase Segundo subliñan, UFD xa realizou con anterioridade unha inspección da liña para tentar determinar a orixe destes microcortes e, ante a persistencia das incidencias, volveu percorrer a instalación a pasada fin de semana sen detectar ningunha anomalía visible. En todo caso, os traballos de diagnóstico continúan. Dende a compañía sinalan que, para facilitar a localización da incidencia, UFD mantén aberta a liña principal e realiza manobras que permiten ir acoutando progresivamente a zona na que se produce o problema. Neste momento, a distribuidora xa conseguiu delimitar a incidencia a unha única fase: entre o cruce coa vía do tren e Oca, aínda que polo momento non se puido identificar o elemento que a provoca. “Somos conscientes da preocupación dos veciños e entendemos perfectamente o seu malestar, especialmente tendo en conta o número de incidencias que se están producindo nalgunhas zonas”, sinalou Manuel Magariños. O concelleiro explicou que “desde o primeiro momento estamos en contacto con UFD para coñecer de primeira man os traballos que se están realizando e para tentar trasladar aos veciños a información dispoñible”. Magariños incidiu en que, aínda que boa parte das incidencias corresponden a microcortes de curta duración, tamén asumiu que se teñen producido interrupcións máis longas, caso da rexistrada o pasado sábado nalgunhas zonas e cunha duración de varias horas. “Sabemos que localizar unha incidencia destas características pode resultar complexo, pero o importante agora é localizar a causa e adoptar o máis axiña posible as medidas necesarias para que non volva producirse”, apuntou o edil. Centro de saúde de Oca Por outra banda, o Concello da Estrada abriu unha segunda vía de traballo co Servizo Galego de Saúde (Sergas) para tratar de minimizar as consecuencias que os microcortes están provocando no centro de saúde de Oca, onde as interrupcións no subministro poden provocar o reinicio dos equipos informáticos e retardar a atención aos usuarios. Neste sentido, Manuel Magariños trasladou hoxe esta situación ao Sergas e consultou a posibilidade de dotar o centro de saúde de algún sistema que permita garantir a continuidade da alimentación eléctrica dos equipos durante estas interrupcións, como Sistemas de Alimentación Ininterrompida (SAI) ou valorar a instalación dun xerador. Desde o Sergas informaron ao Concello de que estudarán esta posibilidade e comprobarán se o centro de saúde de Oca está incluído entre os equipamentos que serán dotados con xeradores, antes de determinar as medidas que se poidan adoptar. “Ademais de traballar para que a incidencia na rede quede solucionada definitivamente, estamos buscando medidas que permitan reducir as molestias que estes cortes están provocando mentres non se atopa a causa”, explicou Magariños. “No caso do centro de saúde de Oca, consideramos especialmente importante evitar que os equipos teñan que reiniciarse continuamente e que isto poida afectar á atención dos veciños”, engadiu. Desde o Concello da Estrada manterase o contacto tanto con UFD como co Sergas para coñecer a evolución dos traballos e das xestións realizadas e trasladaranse á veciñanza as novidades que se vaian producindo.