A Estrada na Rede

 A oitava edición da celebración incluirá numerosas actividades
como unha andaina, obradoiros, charlas ou a tradicional procesión
da fin de semana.

A oitava edición do MUSA regresa a
Sabucedo o vindeiro 28 de outubro cunha programación repleta de propostas
para todas as idades.
O concelleiro de Cultura, Juan Constenla, acompañado por Manolo Cabada,
organizador do evento, presentaron os pormenores dunha xornada que
arrincará desde as 09:45 horas cunha andaina polos recunchos máis
sobranceiros de Sabucedo.
Ao redor das 12:00 horas inaugurarase un mercado de produtos de
proximidade, e tamén se fará un concurso infantil ‘Coñece o teu pobo’, e sobre
as 12:45 faranse obradoiros de pan e filloas.
Haberá charlas sobre a Terra de Montes e a súa música con Rubén Troitiño e
acto seguido haberá unha actuación musical por conta dos Airiños de Caldelas.
O xantar será a base de produtos típicos da zona, sendo os primeiros caldo ou
callos e os segundos churrasco de porco landrán ou tenreira, acompañado de
filloas, bicas e queixo con viño e café por un prezo de 20 euros. Recoméndase
facer reserva en caso de querer acudir.
Pola tarde haberá unha charla de microtoponímia de Sabucedo por conta da
mestra Clara Iglesias e proxectarase a curta ‘As Bestas’, da recentemente
galardoada coa Cuncha de Ouro, Jaione Camborda.
Tamén haberá un obradoiro de Samaín onde se prepararán os calacús, as
candeas e a maquillaxe. Ao longo da tarde daráselle continuación aos
obradoiros de pan e filloas e entregaranse os premios aos nenos e nenas
gañadores do certame ‘Coñece o teu pobo’.
Tamén se fará un showcooking e degustación ‘Do Muíño á mesa: os segredos
dunha boa masa’, coa presenza do panadeiro Dani Pampín, considerado o
mellor panadeiro artesanal de España no 2018. Farase tamén unha cata de
maridaxes de albariño feito con uvas estradenses, a cargo do enólogo Carlos
Blanco.

Ás 20:00 horas comezará a procesión da Santa Compaña, engalanándose o
pobo para que as persoas asistentes o transiten disfrazadas con sabas e
candís. Pola súa parte, no Curro vello leranse os responsos dedicados aos
mortos en vida e farase unha queimada e posterior magosto.
Finalmente Cándido Pazó realizará un monólogo titulado ‘Aqueles velorios’ e a
continuación haberá música por conta de Somozas Trío e demais agrupacións.

 O goberno local levará á xunta de goberno programada para o
vindeiro luns o comezo do proceso para a contratación da
redacción do proxecto.
 O orzamento base de licitación do contrato será de 36.300 euros e
terá unha duración de 3 meses desde a data de formalización do
mesmo.

O Concello da Estrada avanza na
redacción do proxecto da peonización da Praza da Farola. O goberno local
levará á xunta de goberno programada para o vindeiro luns o comezo do
proceso para a contratación da redacción do proxecto.
A actuación, enmarcada nas liñas de actuación incluídas na Axenda Urbana da
Estrada 2030, afectará á Praza de Galicia, polo que resolverá o entronque coas
rúas adxacentes; Rúa 56; Rúa San Paio ata Marqués de la Vega de Armijo,
Rúa Don Nicolás, Rúa Calvo Sotelo, Rúa Serafín Pazo, Rúa Pérez Viondi e
Rúa Peregrina, así como a conexión cos sectores de Solo Urbano Non
Consolidado SUNC-R01 (Av. América) e SUNCR02 (R. Forcarei), que se
atopan en vía de desenvolvemento ao abeiro do Plan Xeral de Ordenación
Municipal da Estrada.
A actuación consistirá na recuperación para o peón do espazo que neste
momento está adicado ao tráfico rodado, cunha solución que permita manter,
nesta fase, a circulación entre as Rúas Pérez Viondi, Peregrina, 56, San Paio e
Marqués de la Vega de Armijo.
O deseño prestará especial atención ó uso da praza e ás necesidades das
persoas con diversidade funcional ou sensorial, favorecendo a accesibilidade
universal, estando o deseño supeditado ao respecto das liñas de actuación
marcadas na Axenda Urbana A Estrada 2030.
O proxecto de peonización da Praza de Galicia enmárcase dentro dos
obxectivos específicos marcados na Axenda Urbana da Estrada 2030,
concretamente do punto de mellora da calidade e da accesibilidade universal
dos espazos públicos, e tamén se inclúe na proposta 3.6 do Programa de
Humanización do Plan de Mobilidade Urbana Sostible.

O orzamento base de licitación do contrato será de 36.300 euros e terá unha
duración de 3 meses desde a data de formalización do mesmo.

 O encontro de música folk terá lugar a partir das 18:00 horas do 12
de novembro e contará cun amplo número de agrupacións.
 As persoas que desexen acudir xa poden facerse coas súas
entradas por un prezo de 5 euros no departamento de Cultura do
Concello, no Mesón da Estrada ou na cafetería Eureka.

O Concello da Estrada presentou esta
mañá na sala de xuntas do consistorio a programación da XVI Encontro de Folk
‘Lume na Lareira’, que terá lugar no Teatro Principal o vindeiro 12 de novembro
a partir das 18:00 horas.
O concelleiro de Cultura, Juan Constenla, e Juan Ruibal, organizador do
evento, foron os responsables de presentar polo miúdo a programación dun
evento que porá en valor a música folk e tradicional.
O encargado de presentar o certame será Julio González, e entre o repertorio
de artistas atópanse agrupacións como Os Alegres de Pontevedra, con 85
anos de existencia ininterrompida, a luguesa Begoña López, campioa de
España de acordeón amateur, o Padre Xiao, Os do Fuelle de Maceda, A
Carballeira de Cercio, o búlgaro Christo Christini que repetirá no escenario do
Principal un ano máis, Antonio Barros e finalmente pechará o festival a
actuación de Lume da Lareira quenes prometen levar á xornada un tema
sorpresa.
As persoas que desexen acudir ao evento poderán facerse xa coas súas
entradas por un prezo de 5 euros no departamento de Cultura do Concello, no
Mesón da Estrada e na cafetería Eureka.
O edil de Cultura, Juan Constenla, defendeu “o apoio do Concello á promoción
da música tradicional e das agrupacións estradenses, as cales fan unha labor
imprescindible para o mantemento do legado cultural e da tradición oral”. Pola
súa parte, Ruibal, adiantou que este ano homenaxearase ao lutier Joaquín
Espiño, máis coñecido como García de Riobó, interpretando pezas con
instrumentos da súa autoría.

 As entradas pódense adquirir de forma anticipada por un prezo de
10 euros en ataquilla.com, de xeito presencial no concello ou no
Bar As Tres Portiñas.
 O monólogo terá lugar o venres 27 de outubro no Teatro Principal
da Estrada a partir das 21:00 horas.

O Concello da Estrada xa puxo a
disposición do público as entradas para o espectáculo Cómico de ‘El Brujo’, un
dos actos centrais da programación cultural de outono.
As persoas que desexen acudir o vindeiro 27 de outubro ao Teatro Principal
para gozar da actividade xa poden facerse coas súas entradas, previo pago de
un prezo de dez euros en ataquilla.com, acudindo presencialmente ao concello
ou no bar As Tres Portiñas.
Cómico é un monólogo aparentemente espontáneo no que o actor desvela
todos os detalles da súa vida e do seu oficio como actor e dramaturgo no que
destaca a variedade de recursos expresivos e a graza irónica e tenra do seu
humor.
Rafael Álvarez “El Brujo” consegue coa xenialidade da palabra soa esa
suspensión momentánea da realidade que só os grandes da escena son quen
de provocar no espectador. Sen axudarse de grandes exércitos de focos, sen
riquísimos vestuarios e sen abundancia de tramoia. Tan só facendo emprego
da maxia da súa voz.

 Na actualidade o Concello ingresa ao redor de 15 millóns de euros,
saldo insuficiente para afrontar os gastos de persoal, que se elevan
a 6.8 millóns, e o gasto corrente, 8.355.000 millóns.
 O Concello promove unha suba do 25% do IBI, o cal se traducirá
nun aumento de 40 euros na factura anual, fronte aos 90 euros que
se estima que suporía incrementar as taxas.
 A previsión do goberno local é que co paquete de medidas
adoptadas poida corrixirse e estabilizarse o déficit de cara ao curso
2024-2025.

O Concello da Estrada anunciou hoxe que
diporá dun orzamento que se situará en torno aos 17 millóns de euros. O
alcalde, José López, e o edil de Facenda, Organización e funcionamento e
Persoal, Alberto Blanco, presentaron esta mañá na sala de xuntas da casa
consistorial a situación económica do Concello.
O rexedor sinalou que desde o curso 2021 rexístrase a situación de que a
financiación dos Concellos se mantén en estándares similares no referente ao
volume de ingresos, pero pola contra, aumenta notablemente en termos de
gasto.
O primeiro edil defendeu que ante esta situación, o papel das administracións
locais debe ser actuar como “amortiguador social”, para evitar que esta
problemática repercuta directamente na cidadanía e nos servizos prestados
pola administración local..
O gasto corrente aumentou máis de 2 millóns de euros, elevándose ata os
8.355.000, prestando os mesmos servizos derivado da inflación coste de
servizos e materiais.
Algúns exemplos deste incremento producíronse no servizos de recollida de
lixo, o cal supón agora 500.000 euros máis, o que se traduce 1,8 millóns ao
ano, dos cales 1,4 millóns corresponden ás labores propias deste servizo e
400.000 de pago a SOGAMA polo tratamento de residuos, o que se traduce en
1.700 euros diarios só neste último servizo.

O Servizo de Axuda no Fogar tamén aumentou debido ás subidas salariais e ás
condicións particulares que presenta a dispersión da poboación no municipio
estradense. Froito disto, o prezo para licitalo a día de hoxe é de 1.400.000
euros para atender ás 100 familias que se benefician deste servizo. Estas cifras
supoñen un custo de 100.000 euros por mes, para un servizo que presta 5.000
horas mensuais, ou o que é o mesmo, un gasto de 22€/hora durante a semana
e 26€/hora na fin de semana.
Tamén o servizo da auga presenta déficit xa que presenta 1,2 millóns de custo
polo 700.000 euros de recadación.
No iluminado público, malia que a previsión logo das actuacións executadas
para reducir o consumo era pasar dun gasto de 900.000 a 450.000 euros, o
aumento do prezo da enerxía provocou que contía final se levase a máis de
750.000 euros. No referente á limpeza de edificios públicos, o gasto duplicouse
de 180.000 a 360.000 euros.
En materia de educación, a EIM rexistrou un coste anual de 435.000 euros, e
no caso da EIM Galiña Azul, malia estar consorciada pola Xunta, o Concello
paga unha aportación de 900 euros por alumno. Pola súa parte, o
conservatorio municipal tamén presentou un notorio déficit xa que o seu custo é
de 360.000 euros, ante os 40.000 euros que aportan as familias aportan.
No referente aos ingresos, a contía dos mesmos sitúase ao redor dos 15
millóns de euros dos cales o goberno central aporta 5 millóns, a Xunta de
Galicia 1,2 millóns, 2,5 millóns proceden de taxas e servizos públicos e por
impostos directos e indirectos recádanse 4,5 millóns netos. Tal e como reflexan
estas cifras, as aportacións doutras administracións non permiten tan sequera
cubrir os gastos de custos de persoal e os ingresos total tampouco
Ante esta situación, o Concello adopta un plan de continxencia e redución do
gasto corrente a través dunha serie de obxectivos estratéxicos entre os que se
inclúen a licitación de servizos que se prestan de forma indirecta, entre os que
se inclúen lixo, ou limpeza edificios públicos, entre outros.
Tamén se aforrarán 2,5 millóns dos 4,5 millóns de préstamos extraordinarios.
Isto situación é posible grazas ao aforro en investimentos como o millón de
euros reservado polo goberno local para a financiación do módulo cuberto,
procedente finalmente pola Xunta e a Deputación. Tamén se cancelarán
900.000 euros do 1.250.000 euros de fondos europeos e 340.000 euros da
Edusi. Ademais, desde o goberno local estase valorando incorporar os 700.000
euros procedentes dun préstamo.
Grazas aos fondos do Plan Concellos da Deputación de Pontevedra estímase
recibir 1,6 millóns dos cales 600.000 euros destinaranse a sufragar o gasto
corrente, malia que como sinalou o rexedor “non é a situación idónea, pero este
ano debemos de afrontala de forma excepcional”.

Non obstante, a aplicación destas medidas aínda non se superaría o déficit
entre a recadación e o gasto, polo que se actualizará o IBI ata o 0,5%, situado
na actualidade no 0,4%, o mínimo legal. Este incremento do 25% traducirase
nunha subirá en torno a 40 euros anuais por fogar, situándose en torno a 211
euros, aínda por debaixo da media galega por vivenda no pago anual. Esta
medida suporá que unha menor presión para os contribuíntes que se se fixera
un aumento de taxas, o cal implicaría un aumento de 90 euros cada ano por
fogar.
O alcalde sinalou que a través destas medidas “buscamos un cambio de
cultura de gasto, queremos seguir prestando servizos que son fundamentais,
pero que cada vez son máis difíciles de manter”. Tamén sinalou que “non
quixemos aplicar actualizacións nas taxas porque non estamos no contexto de
aumentar as taxas á nosa veciñanza. O aumento do 0,1% do IBI terá un
impacto moito menor e malia esta subida o Concello da Estrada seguiría por
debaixo da carga impositiva media de Galicia”. Con estas tres medidas prevese
que no 2024-25 poida corrixirse a situación de déficit.

O Concello da Estrada levará á sesión de
pleno extraordinaria convocada para o vindeiro xoves, 19 de outubro, a
aprobación do convenio coa Deputación de Pontevedra para a financiación do
novo módulo cuberto multideporte, coa cal aumentará a infraestrutura deportiva
municipal.
Deste xeito, o ente provincial aportará un millón de euros logo da modificación
das bases do plan Reacción Pontevedra Provincia (Reacpon), permitindo así que
dous entes supramunicipais, Xunta e Deputación, poidan colaborar
conxuntamente na financiación do proxecto.
Deste xeito, a colaboración provincial súmase á do goberno autonómico logo da
aprobación dun convenio o pasado mes de abril co que a Vicepresidencia
Segunda e Consellería de Presidencia, Xustiza e Deportes se comprometeu a
achegar 1.028.588,72 euros.
A nova instalación será edificada anexa á pista de atletismo, unha zona na que
o Concello da Estrada dispón de varias infraestruturas deportivas e que agora
sumará un novo espazo destinado a mellorar a xa ampla oferta deportiva
municipal.
A execución do novo centro deportivo contempla unha pista de 60 metros
cuberta, vestiarios, ximnasio municipal e tatamis para a práctica de artes

marciais, disciplinas que na actualidade superan os 200 deportistas federados e
son un referente en Galicia.
A previsión do goberno local é que o módulo multideportivo poida ser licitado ao
longo deste último trimestre de ano para que os traballos dean comezo nos
primeiros compases do seguinte ano.

O pazo de Xerlís do Concello da Estrada acolleu , sábado 14 de outubro, a terceira edición de Alma Rural, unha xornada organizada pola Xunta de Galicia na véspera do Día Internacional das Mulleres Rurais para poñer en valor a contribución do colectivo feminino ao desenvolvemento do agro galego. Ao acto asistiu o alcalde da Estrada, José López, e outros membros da corporación municipal.

Programa
O programa desta actividade inclúe relatorios e mesas redondas con participación de representantes da administración pública e da sociedade civil. Así, a xornada abriu cun relatorio sobre “mulleres que inspiran”, a cargo de Laura Vallejo. A continuación, tivo lugar unha mesa redonda co título “Desafíos das políticas integrais para a igualdade de xénero”, na que interviron Cristina Pichel, directora xeral de Xuventude; Raquel Touriño, presidenta da Federación Pola Igualdade da Provincia de Pontevedra (Femupo); Marina Magan, directora corporativa de administración e membro do consello de administración de Exlabesa e Kim Llobet, presidenta da Asociación Mulleres que poden.

A seguir, un novo relatorio de “mulleres que inspiran”, con Noelia Míguez, a sesión vermú e unha nova mesa redonda arredor de “a figura da muller no desenvolvemento rural”. Nela participaron Inés Santé, directora xeral de Desenvolvemento Rural; Milagros González, presidenta do Consello Regulador da Denominación de Orixe Protexida Pemento de Herbón; Raquel Vázquez, emprendedora da Fundación Roberto Rivas; Manuel Fernández, empresario en servizos de substitución gandeira e Ramiro Ruibal, xerente do Grupo de Desenvolvemento Rural Pontevedra Norte.

Posteriormente houbo un terceiro relatorio dentro do apartado “mulleres que inspiran”, esta vez coa presenza de Lucía Casal. Despois, tras o peche institucional, tivo lugar unha actuación musical e un petisco galego, coa degustación de produtos de calidade da nosa comunidade.