A Estrada na Rede

Volve o concurso escolar de campo a través con 700 inscritos na Estrada

A Secretaría Xeral para o Deporte recuperará esta semana o programa escolar Xogade. Despois de ano e medio de parón pola pandemia, mañá xoves regresará á Estrada a competición escolar zonal de campo a través. Máis de 700 alumnos dos colexios Figueiroa, Lourdes, O Foxo, Pérez Viondi, Oca, Cabada Vázquez, Villar Paramá, CPI Aurelio Marcelino de Cuntis e IES García Barros participarán nas probas, que nesta ocasión terán lugar na zona deportiva entre 10:00h e 13:00h. O formato cambiou para acomodar a post-pandemia. Os alumnos correrán con aqueles da súa propia burbulla escolar. O resultado de cada aula será o tempo rexistrado pola oitava persoa que acade o obxectivo. Os máis pequenos correrán 500 metros, os alevíns 1.000, os infantís 1.500 e os cadetes 2.000.

Os Premios san Martiño de Normalización Lingüística, que entrega o Concello da Estrada, a aquelas persoas ou colectivos significados na promoción da lingua galega,  entregaranse, mañá xoves, no Teatro Principal, nun acto que comezará ás 20.30 h.

No apartado A Estrada-Comarca de Tabeirós-Terra, o premio entregaráselle a José Manuel Bértolo Ballesteros, catedrático de grego e investigador de temas de xenealoxía e heráldica. O premio Galicia enteira recollerao o colectivo poético Rompente, representado por Alberto Avendaño, Manolo Román e Antón Reixa. Pola súa banda, o premio Toda unha vida  irá parar a mans do programa radiofónico Sempre en Galicia, o programa en lingua galega máis lonxevo, creado en Montevideo (Uruguai) no ano 1950 por emigrantes galegos.

O broche de ouro a este acto de entrega, poñerao a artista Guadi Galego, interpretando algúns dos temas máis coñecidos do seu repertorio. A entrada ao acto será de balde até completar as localidades dispoñibles na sala.

Xunta de Galicia e a colaboración da Editorial Galaxia, todas as obras ilustradas de tema libre, inéditas en calquera medio ou soporte, dirixidas ao público infantil.

As obras da Praza da Feira estradense, que comezaron hai pouco máis dunha semana, así como a peatonalización das rúas Justo Martínez e Carlo Sotelo, avanzan a bo ritmo e espérase que antes do verán de 2022 estean rematadas, xusto antes da celebración das festas de San Paio. A empresa encargada de realizar as actuacións da reforma integral desta praza é a firma Covsa.

Pola súa banda, as obras de humanización da rúa Ulla e da súa contorna comezarán despois do Nadal a petición da Asociación de Comerciantes de A Estrada (Acoe), que pedía que estes traballos non interferisen no desenvolvemento da campaña de compras navideña.

Para levar a cabo as obras na Praza da Feira foi preciso trasladar o mercadiño dos mércores a outro emprazamento, que será provisional, ata o mes de xuño do próximo ano aproximadamente. O lugar escollido foi o novo aparcamento público habilitado recentemente na confluencia entre as rúas Iryda e Varela Buxán e se extende ata a rúa Ponteareas para dar cabida a un maior número de postos e crear unha conexión da feira co centro neurálxico de A Estrada.

Hoxe celebrouse no recinto municipal de Guimarei da Estrada a entrega de diplomas dun curso
de carretilla elevadora. Este curso foi organizado pola Asociación Amicos e nel colaborou
tamén o Concello da Estrada.
Un total de 8 persoas con discapacidade beneficiáronse desta formación para obter a
habilitación no manexo da carretilla elevadora con normativa UNE e así incrementar as súas
posibilidades de inserción no mercados laboral. O curso, dun total de 10 horas, realizouse
entre mércores e xoves en horario de mañá.
Ata o acto de peche e entrega de diplomas desplazáronse en representación de Amicos:
Miguel Beiro (responsable da área emprego/empresas), Rosa Agrelo (Técnica de emprego) e
Pablo Penide (Técnico de desenvolvemento de persoas/empresas e persoa de referencia da
Asociación na zona). E por parte do Concello da Estrada: Óscar Durán (Concelleiro de
promoción económica, comercio e emprego).
Con este tipo de iniciativas, Amicos pretende dar apoio directo a persoas con discapacidade
que teñan máis dificultades para acceder ao mercado laboral. Un mercado laboral que cada día
se mostra máis complexo e esixente.
Dende a Asociacion Amicos queremos facer un chamamento para que o tecido empresarial da
zona que necesite incorporar persoas e enriquecer as suas plantillas se involucren con nós
neste proxecto. Poden porse en contacto a través do teléfonos 981 865 716 ou 674 073 048.
Tamén enviando un correo electrónico a pablo.penide@amicos.org.

O Son dos Arrieiros celebra a súa primeira edición cun cartel 100% galego formado por artistas de gran nivel como Bala, Agoraphobia, Terbutalina, Señora DJ, Novedades Carminha, que presenta o seu último concerto en Galicia do ano e Heredeiros da Crus, que ofrecerá o seu único concerto en formato eléctrico do 2021.

O recinto, ubicado no Pavillón 5 da Fundación de Exposicións e Congresos da Estrada, conta con roupeiro e servizo de barra e restauración. Ademáis, será acondicionado acústicamente para convertilo nun gran salón de concertos no que o público, por primeira vez despois da pandemia, poderá gozar dunha experiencia única sen cadeiras.

Aínda quedan entradas, polo que a xente que desexe asistir poderá mercalas a través da plataforma ataquilla.com.

O Concello da Estrada, en colaboración coa Secretaría Xeral de Política Lingüística e coa participación da Asociación de Hostaleiros da Estrada e o Lagar Peroja, organizou actividades paralelas ao festival para involucrar a todos os sectores posibles e beneficiarse desta iniciativa inédita en Galicia. Así, baixo o título de ‘O Camiño dos Arrieiros’, celebrarase mañá unha sesión vermú na carballeira da Feira, entre as 13.00 e as 18.00 horas, que contará coas actuacións de Los Rastreadores, Troula Animación, Plan Siberia e Igloo. Serán cinco horas de música aderezada con empanada, bolos preñados e sidra e taberna estradense. A asistencia será completamente gratuíta até completar a cabida da carpa habilitada.

A Xunta de Galicia vén de fixar uns investimentos iniciais de 34.695.383 euros para as bisbarras de Deza e Tabeirós-Terra de Montes no proxecto de Orzamentos 2022, segundo informou hoxe o delegado territorial, Luis López, que sostén que “este gran esforzo vai ser clave para outorgar un forte impulso de desenvolvemento e progreso e un salto cualitativo dos servizos públicos a toda esta contorna interior do norte da provincia”.

“O punto de partida para Deza e Tabeirós por parte da Xunta xurde do noso compromiso con estas bisbarras e está fixado en case 35 millóns de euros, unha contía que vaise ampliar con total seguridade a través dos plans, convenios, ordes de axudas ou novos proxectos que xurden ao longo do ano”, manifestou o representante autonómico.

Luis López recalcou que a Xunta “é a institución que máis inviste, de longo, nestas comarcas, cunha media de case 550 euros por habitante, o que non resiste comparación ningunha coas demais administracións, e ademais as actuacións deseñadas abranguen todos os ámbitos de importancia para a cidadanía, apostando polas infraestruturas viarias, a sanidade, a educación, as políticas sociais, a empresa e o emprego, o agro e os servizos públicos”.

O delegado territorial salientou que as principais actuacións orzamentadas para a zona, todas ellas por riba do millón de euros, son o remate do Centro Integral de Saúde (CIS) e a ampliación do parque empresarial Lalín 2000, na capital dezá, e o comezo da autovía AG-59, os talleres de madeira no IES Losada Diéguez e os novos xulgados da Estrada.

“Os principais investimentos, por contía ou singularidade, roldan os 25 millóns de euros, pero as contas da Xunta tamén contemplan para Deza e Tabeirós outros investimentos en instalacións deportivas, novas tecnoloxías, silvicultura, limpeza de montes e desbroces, obras educativas, como a renovación das luminarias en ata seis centros, entre outras, mellora e sinalización do Camiño de Santiago, transporte ou dixitalización no ensino ata alcanzar os citados 35 millóns”, significou o delegado, que salientou que os investimentos iniciais que aparecen recollidos nos Orzamentos 2022 “son aqueles que están máis maduros e avanzados administrativamente, pero seguimos traballando polas comarcas con outros proxectos, como a mellora da PO-201 entre Silleda e Laro, o saneamento e o albergue de Rodeiro, os mosteiros de Camanzo, en Cruces, e San Pedro de Vilanova, en Dozón ou unha nova e ampla quenda de melloras nos centros educativos públicos, entre outras”.