A Estrada na Rede

 A partida orzamentaria desta primeira convocatoria aínda non está
esgotada e o Concello anima ás persoas que cumpran os requisitos a
solicitar a achega municipal.

O Concello da Estrada pechará este xoves, 30 de xullo,
o prazo para a solicitude das novas subvencións municipais, en réxime de concorrencia
non competitiva, destinadas á instalación ou renovación de sistemas de saneamento no
amplo rural do municipio. Esta primeira convocatoria conta cun crédito de 100.000 euros
e permitirá conceder axudas de ata 1.000 euros por vivenda, sen que a subvención poida
superar o custo da actuación. As solicitudes tramitaranse por orde de entrada ata o
esgotamento dos fondos dispoñibles.
Dende o Concello animouse hoxe aos cidadáns interesados a presentar a súa solicitude,
tendo en conta que as peticións rexistradas ata o momento aínda non esgotarían o crédito
dispoñible para esta primeira convocatoria.
O alcalde da Estrada, Gonzalo Louzao, destacou que o obxectivo do Concello é que esta
nova liña de axudas chegue ao maior número posible de fogares do rural. “Gustaríanos
que os 100.000 euros previstos puidesen aproveitarse ao máximo, porque iso significará
que máis vivendas contan con sistemas de saneamento adecuados e que seguimos
avanzando cara a un rural máis saneado, máis sostible e mellor protexido desde o punto
de vista ambiental”, sinalou o mandatario.
Dende o goberno tamén se puxo o acento en que os interesados teñen que afrontar
unha tramitación sinxela. En esencia, terían que presentar no Concello un orzamento da
obra ou instalación e serían acompañados no resto do proceso de presentación polo
persoal dos departamentos de Rural o Subvencións.
Os solicitantes deben cumprir os requisitos que figuran nas bases desta convocatoria:
estar empadroados no Concello da Estrada na vivenda para a que se solicita a
subvención; que a vivenda non dispoña de servizo municipal de saneamento activo e
que o inmoble constitúa unha edificación destinada ao uso residencial.

Cómpre lembrar que son actuacións subvencionables a instalación de novos sistemas
individuais de depuración; a substitución de fosas sépticas deterioradas; a mellora ou
renovación de instalacións de evacuación ou tratamento de aguas residuais domésticas
e obra auxiliares directamente vencelladas á instalación do sistema.

O Concello da Estrada publicará mañá martes na páxina
web da administración municipal a listaxe de admitidos na presente edición do
Campamento do Mar, despois de que o departamento de Servizos Sociais pechara o
pasado venres o prazo de inscrición. A iniciativa, que volveu espertar moito interese
entre a veciñanza estradense, desenvolverase este ano no Campamento Xuvenil Illa de
Ons do 21 ao 28 de agosto.
As solicitudes presentadas superaron amplamente as 52 prazas ofertadas para rapaces
e rapazas de entre 8 e 16 anos. Aínda que a relación de admitidos será publicada mañá,
dende o citado departamento municipal xa se estivo chamando hoxe ás familias que
obtiveron praza para os seus fillos, coa intención de que aporten a documentación
precisa. No caso de que algunha das prazas non se cubra, o Concello tirará, por orde, da
lista de espera xerada na inscrición.
O Concello mantén un sistema de prezos bonificados para facilitar a participación das
familias empadroadas no municipio. A inscrición xeral terá un custo de 120 euros,
mentres que as familias numerosas e monoparentais poderán beneficiarse dunha tarifa
reducida de 84 euros. No caso de varios irmáns participantes, o segundo terá tamén
unha cota bonificada de 84 euros e, no caso das familias numerosas, o terceiro irmán
poderá participar de xeito gratuíto se acoden os tres.
Para as familias non empadroadas, que unicamente poderían acudir se houbese prazas
libres, o custo sería de 240 euros, sen posibilidade de bonificación.
Como parte do proceso organizativo, o Concello celebrará unha reunión informativa
coas familias o vindeiro martes 12 de agosto ás 20.30 horas no Salón de Plenos, na que
se dará a coñecer a empresa encargada do desenvolvemento do campamento e se
facilitará información práctica sobre horarios, normas e funcionamento da actividade.

 O consumo actual no casco urbano sitúase en 3.300 metros cúbicos,
fronte aos picos de 5.400 rexistrados a estas alturas do verán o pasado
ano.
 En Codeseda pasouse de rondar nestas datas os 70 metros cúbicos aos
45 que indica o último dato dispoñible despois da recente actuación.
 Nesta parroquia a sectorización permitiu xa detectar un par de
incidencias que supuxeron a perda de 45.000 litros de auga en catro
días.

Despois do corte programado no subministro días atrás,
o Concello da Estrada ten xa completada unha nova fase no programa de sectorización
da rede de abastecemento de auga, concretamente a que afecta á parroquia de
Codeseda. A actuación non tardou en deixar que se aprecie o seu efecto sobre o control
no consumo de agua, algo especialmente importante nun verán tan seco como o actual.
O Concello puxo en marcha esta iniciativa en setembro de 2025, buscando que esta
sectorización permitise ter un maior coñecemento e capacidade de control sobre a
intricada condución que distribúe agua á capitalidade estradense e á súa zona periférica.
Chamada a garantir a eficiencia na traída, a medida supón a instalación de contadores
para rexistrar en todo momento a agua que se está servindo a cada zona e a que se
consume, algo que resulta fundamental para poder detectar e atallar posibles fugas.
Logo de que ao arranque da tempada de baño se puidese comprobar a importancia de teren
unha rede de abastecemento sectorizada a raíz dunha rotura na zona das piscinas
municipais, o Concello continuou con este programa en Codeseda, parroquia que conta
cunha traída municipal que durante moitos anos foi unha zona especialmente sensible para
o abastecemento no municipio durante os meses secos do verán.
O concelleiro de Servizos Municipais, Óscar Durán, aportou esta mañá os últimos datos de
consumo. Na rede de abastecemento ao casco urbano o consumo actual sitúase en 3.300
metros cúbicos diarios, unha cifra moi boa se se compara cos niveis máximos de consumo
acadados nalgúns días do pasado verán, con picos de 5.400 metros cúbicos por xornada.
No caso de Codeseda, o concelleiro explicou que o ano pasado por estas datas os consumos
rondaban os 70 metros cúbicos diarios, mentres que o último dato apunta un consumo de
45 metros cúbicos/día. O edil amosouse convencido de que a sectorización aplicada nestas
últimas semanas xa está demostrando o seu efecto nesta zona. De feito, explicou que o
sistema permitiu detectar un par de incidencias que supuxeron a perda de 45.000 litros de
auga en catro días. Vencellou Durán estes episodios a descoidos no fogar, unha cuestión
que levou a que dende o Concello se recomende á veciñanza deixar a auga pechada cando
se ausenten do domicilio durante varios días.
Sectores
“A sectorización está permitindo ter esa capacidade de reacción que buscabamos: ser máis
rápidos á hora de detectar onde se pode estar producindo unha fuga de auga”, apuntou
Óscar Durán.
Na rede municipal de abastecemento son xa varios os sectores creados para ter un
coñecemento máis profundo da distribución da auga, atendendo a que a normativa actual
esixe ter o control sobre o 75% da distribuída.
Nestes momentos está sectorizado xa o polígono de Toedo, a zona na que se asenta a central
de Emerxencias A Estrada, a traída de Codeseda e a Zona Deportiva. Nesta última hai, á vez,
varios subsectores: piscinas, Academia Galega de Seguridade Pública (Agasp), pavillóns e
institutos.
Ao completar a sectorización en Codeseda, o concelleiro de Servizos Municipais considerou
que os puntos más conflitivos están xa sectorizados, se ben indicou que a idea agora é
continuar co programa polo incremento do control nos diferentes edificios municipais.
Finalmente, dende o Concello volveu a solicitarse á cidadanía que realice un consumo
responsable de auga.

A Policía Local da Estrada detivo na tarde do luns a un varón como presunto autor dun delito de violencia de xénero. Os axentes municipais recibiron, minutos despois das 17.00 horas, unha chamada do 062 solicitando a súa colaboración no operativo vencellado a un presunto delito de violencia de xénero no casco urbano estradense.

Personados no punto, a Policía Local atopou á Garda Civil atendendo á presunta vítima, pasando o corpo municipal a asumir as tarefas para o rastrexo e localización do presunto agresor, un traballo que se concentrou polas inmediacións da vivenda.

Arredor das 19.45 horas os axentes localizaron, nun solar próximo ao domicilio, a un varón de 55 anos que, logo da correspondente lectura dos seus dereitos, foi posto a disposición da Garda Civil no acuartelamento da Estrada.
De igual xeito, no interior do domicilio localizáronse dúas escopetas de caza e munición, que foron incautadas e postas tamén baixo a custudia da Garda Civil.

 A intervención foi xestionada polo Concello da Estrada e será
financiada na súa totalidade pola Consellería de Cultura.
 Realizada polo célebre escultor no ano 1956, constitúe un referente da
paisaxe urbana da vila.
 A actuación prevista responde á necesidade de corrixir o deterioro
provocado pola exposición continuada aos axentes atmosféricos e á
contaminación ambiental.
 O estudo previo detectou acumulación de sucidade, colonización
biolóxica, manchas derivadas dos fumes de combustión, erosión
superficial e pequenas fisuras.

Os traballos de rehabilitación da estatua da Inmaculada
Concepción, obra do célebre escultor Francisco Asorey, arrancan na Estrada coa
instalación dos andamios necesarios para acometer unha intervención integral de
conservación e restauración desta prezada obra. A chegada da estrutura auxiliar está
prevista para esta mesma mañá. En todo caso, marcará o comezo dunha actuación moi
demandada para garantir a preservación dunha destacada peza artística do patrimonio
local.
A intervención foi xestionada polo Concello da Estrada e será financiada na súa
totalidade pola Consellería de Cultura, Lingua e Xuventude da Xunta de Galicia, dentro
do compromiso compartido coa conservación do patrimonio cultural galego. A empresa
encargada de executar as obras será Artegal Restauraciones S.L.
A escultura da Inmaculada, realizada por Francisco Asorey en 1956, constitúe un
referente da paisaxe urbana da vila. Executada en mármore de Alicante e situada sobre
un pedestal de granito na Praza da Inmaculada duns seis metros de alto,a carón da igrexa
parroquial de San Paio, a peza conta con protección patrimonial e figura catalogada no
PXOM da Estrada.
A peza foi encargada no ano 1954 e inaugurouse o 22 de marzo de 1956, pouco despois
de que se conmemorara o centenario da proclamación do Dogma da Inmaculada
Concepción (no 1954). Foi encargada polo párroco Nicolás Mato Varela e tivo un custe

de 30.000 das antigas pesetas, reunidas grazas a donativos veciñais, cun papel clave da
Asociación Fillas de María. Inicialmente foi colocada no centro da praza, cuxa
remodelación posterior fixo que se trasladara a peza ao lado sur da igrexa parroquial.
A intervención
A actuación prevista responde á necesidade de corrixir o deterioro provocado pola
exposición continuada aos axentes atmosféricos e á contaminación ambiental. O estudo
previo detectou acumulación de sucidade, colonización biolóxica, manchas derivadas
dos fumes de combustión, erosión superficial e pequenas fisuras, aínda que sen apreciar
danos estruturais de relevancia na escultura nin no pedestal.
Os traballos desenvolveranse seguindo os criterios internacionais de conservación e
restauración do patrimonio, baixo a premisa do máximo respecto á obra orixinal e coa
mínima intervención necesaria. O proceso comezará cun exame detallado da peza e
continuará cunha limpeza superficial en seco e en húmido, a eliminación da colonización
biolóxica mediante tratamentos específicos, a reparación de pequenas fisuras, a
substitución de morteiros deteriorados por materiais compatibles e a documentación
completa de toda a intervención.
A restauración executarase in situ, cun prazo estimado de dous meses, por persoal
especializado en conservación e restauración de bens culturais. Ao remate elaborarase
unha memoria técnica que recollerá todos os tratamentos realizados e incluirá
recomendacións para garantir a correcta conservación futura deste importante
monumento.
Con esta actuación, a Xunta de Galicia e o Concello da Estrada contribúen á conservación
dunha representativa creación de Francisco Asorey e á posta en valor dun elemento
patrimonial que forma parte da identidade histórica e cultural do municipio.

 As comprobacións realizadas tras a reparación confirmaron que a fuga
estaba localizada exclusivamente nunha condución soterrada.
 A piscina recuperará a normalidade tan pronto como a auga acade os
parámetros sanitarios requiridos para o baño.
 A inspección realizada verificou o perfecto estado do vaso, que non
presenta fisuras nin danos estruturais.
 Óscar Durán destaca que a recente sectorización da rede permitiu
detectar a incidencia de maneira inmediata e evitar unha perda
prolongada dun recurso especialmente valioso.

O Concello da Estrada iniciou esta mañá o enchido do
vaso grande das piscinas municipais, despois de teren comprobando que a reparación
realizada onte permitiu solucionar a fuga de auga que foi detectada este martes na Zona
Deportiva, concretamente no perímetro das piscinas municipais.
Unha vez substituída, xa na tarde do martes, a tubaxe danada, os servizos municipais
efectuaron hoxe as comprobacións necesarias para verificar o correcto funcionamento
da instalación, descartando a existencia de novos puntos de fuga. Así mesmo, puido
volver a confirmarse que o vaso da piscina non presenta fisuras nin ningún tipo de dano
estrutural, localizándose a incidencia exclusivamente na condución afectada.
Confirmado o resultado satisfactorio destas probas, procedeuse a iniciar o enchido da
piscina. Tan pronto como se teña completado este proceso, previsiblemente a última
hora de hoxe, aplicarase o tratamento correspondente da auga e realizaranse as
analíticas e controis establecidos pola normativa sanitaria.
Cando a auga reúna todos os parámetros esixidos para garantir un baño seguro, o vaso
grande volverá abrir ao público e o complexo recuperará o seu funcionamento habitual.
Ata entón, as piscinas municipais conservarán o acceso gratuíto que se acordou ofrecer
aos usuarios que desexaran empregar as piscinas mediana e pequena, que operan con
completa normalidade.
De feito, o Concello emprendeu o reintegro das cantidades vencelladas a algúns abonos
de acceso a consecuencia destes días de inusual funacionamento, recomendando aos

seus titulares que os retiren cando o complexo recupere a normalidade no seu
funcionamento.
O concelleiro de Servizos Municipais, Óscar Durán, quixo agradecer a comprensión
amosada polas persoas usuarias durante estes días e puxo en valor a rapidez coa que se
puido actuar para resolver a incidencia.
«As instalacións e as redes de abastecemento, como calquera outra infraestrutura,
poden sufrir incidencias puntuais ao longo da súa vida útil. O importante é contar cos
medios necesarios para detectalas con rapidez, localizar a súa orixe e reparalas no
menor tempo posible. Iso foi precisamente o que aconteceu neste caso», sinalou o edil.
Nesta liña, Durán destacou que a recente sectorización da rede municipal de
abastecemento resultou determinante para reducir ao mínimo os tempos de resposta.
«Hai pouco tempo que se fixo a sectorización da Zona Deportiva e esta incidencia
permitiu comprobar xa na práctica a utilidade dese traballo. O sistema detectou desde
primeira hora un consumo anómalo de auga, o que nos posibilitou iniciar
inmediatamente a localización da fuga e evitar que a perda se prolongase durante máis
tempo”, sinalou o concelleiro.
Nun contexto de elevadas temperaturas e de crecente preocupación pola xestión
responsable da auga (con concellos que xa están activando situacións de prealerta pola
seca) “contar con ferramentas que permitan actuar con esta rapidez supón un
importante avance para a eficiencia da rede municipal», concluíu Óscar Durán.

 O goberno incorporou este ano nos orzamentos unha partida de 100.000
euros para subvencionar a instalación ou renovación de fosas sépticas.
 As bases detallaranse nunha xornada informativa fixada para as 19.00
horas do venres, no MOME.
 As axudas tramitaranse por orde de entrada e chegan aos 1.000 euros
por vivenda.

O Concello da Estrada convoca a todas as persoas
interesadas a asistir este venres, ás 19.00 horas e no MOME, a unha xornada informativa
na que se detallarán as bases que regulan as novas axudas para fosas sépticas e sistemas
individuais de saneamento, unha convocatoria que se incluíu nas contas municipais
deste 2026 e que busca favorecer os saneamentos no amplo termo rural estradense.
Son axudas destinas as titulares de vivendas no rural que carecen de rede de
saneamento municipal. Estas achegas buscan promover os microsaneamentos nas
parroquias, é dicir, a instalación ou renovación das fosas sépticas. O Concello reserva a
este fin unha partida de 100.000 euros, podendo chegar a axuda por vivenda aos 1.000
euros.
A idea é que a partires da semana que vén xa se poidan solicitar estas subvencións, que
se irán distribuíndo en función do orde de rexistro das solicitudes. Por iso, coa intención
de dar a coñecer todos os datos e prazos, o Concello anima a asistir a este encontro para
resolver todas as dúbidas que poidan xurdir. As axudas concederanse ata esgotar o
crédito dispoñible.
No momento de apostar por esta nova liña de subvencións, dende o goberno local
seguiuse o criterio técnico que estima que estas fosas homologadas pola Xunta de
Galicia constitúe a mellor fórmula para depuración das augas sucias. Deste xeito,
depuraríase en cada parcela a totalidade dos residuos de vivenda e, ao non haber
concentración, reduciríanse os riscos de contaminación.
A partida de 100.000 euros habilitada para esta primeira convocatoria permitirá xerar
unha cantidade importante de subvencións directas para cubrir unha significativa parte
da instalación destas fosas sépticas homologadas. Ademais, estas subvencións

municipais serán compatibles con outras axudas, públicas ou privadas, para o mesmo
fin, sempre e cando o importe total non supere o custo da actuación.