A Estrada na Rede

 A cita terá lugar na piscina climatizada a partir das 20.00 horas con
entrada de balde para o público.

A piscina climatizada da Estrada acollerá o
domingo 18 de xuño unha exhibición de natación artística por conta do club
Sincro Burbullas.
A xornada desenvolverase desde as 20.00 horas e será de portas abertas para
toda a xente que desexe achegarse a gozar da mesma.
O club Sincro Burbullas leva 17 anos traballando esta disciplina e na
actualidade conta con preto de 40 fichas federadas repartidas en catro
categorías; alevíns, benxamíns; junior e un equipo máster integrado por 10
membros que son as actuais campioas galegas de natación sincronizada.
Na xornada programada para o 18, o público estradense poderá gozar da
exhibición e recoñecer o mérito dun club referente a nivel autonómico no eido
desta modalidade.

Desde hai días o Ulla baixa coas augas moi turbias, unha cor que non presaxia nada bo para a fauna da ribeira do río. No cremo que a situación alarmante do río débese aos grandes movementos de terra que se están a realizar nas marxes do río, vinculadas ás grandes plantación vitivinícolas, mais non só, que coas tormentas primaverais están arrastrando lodo para os ríos e regatos, chegando ao Ulla. Isto non é bo para a fauna da ribeira.

Desde o BNG instamos ao goberno municipal en funcións a moverse e a denunciar estes feitos ante as autoridades competentes para posteriormente tomar medidas para evitar que se dean estes graves feitos que afectan a todos os ríos, pero especialmente ao Ulla, o que afectará tamén aos bancos marisqueiros da desembocadura na ría de Arousa.

A Festa da Sidra da Estrada congregou hoxe
na praza do Concello a centos de persoas para gozar dun dos produtos máis
populares da gastronomía estradense.
Nesta décima edición contouse por vez primeira con representantes de todas
as comunidades autónomas con produción desta bebida, ademais da presenza
de produtores de países europeos como Francia ou Portugal.
A organización estima que ao longo da xornada foron despachadas sobre
5.000 botellas de sidra nos 21 postos que integraron a presente edición do
evento. Ademais, na carpa dispúxose tamén dunha zona de bebidas sen
alcohol feitas a partir de mazá subministradas todas elas a cargo de produtores
estradenses.
Outro dos grandes atractivos foi a zona de petiscos habilitada que contou con
24 propostas culinarias por conta de 7 restaurantes locais. Nesta mesma área
tamén se dispuxo de dous postos de coctelería que incluíron degustacións de
combinados como xenebra e outras bebidas espirituosas infusionadas con
mazá.
A maiores, a música de Galifunk e Xurxo Fernandes foi a responsable de
amenizar unha xornada na que tamén se puido gozar dun mercado de
artesanía.
Desde o goberno local sinalan a súa satisfacción “por poder colaborar en
xornadas como a X Festa da Sidra para que A Estrada se consolide como o
punto neurálxico da produción sidreira en Galicia” e fan fincapé “na importancia
de seguir promovendo iniciativas para ofrecerlle ao tecido produtivo local un
escaparate no que promocionar a sidra estradense”.

GALERÍA:

O Concello da Estrada celebrará o vindeiro
martes, día 6 de xuño, a décima edición da Festa das Palabras, nun acto que
encherá o Teatro Principal de literatura.
A presentación do evento tivo lugar hoxe no Concello da Estrada, coa
presencia do edil de Cultura, Juan Constenla, e os representantes de
Dinamizastrada, os Equipos de Dinamización da Lingua Galega dos centros de
ensino estradenses.
“A Festa das Palabras alcanza a súa décima edición e iso só pode ser un
motivo de orgullo. Orgullo por levar unha década apostando por unha iniciativa
necesaria non só para fomentar a creatividade literaria da mocidade, senón
tamén para xerar nela as rutinas para que non perder a fala do galego”,
apuntou Constela.
“Non é unha iniciativa moi usual porque implica á sociedade no seu conxunto:
aos centros de ensino unidos nesta causa, ás familias e ás institucións. É unha
celebración integrada na vida dos centros educativos, pero que non queda
neles e sae fóra”, explicaron os representantes de Dinamizastrada.
A xornada, promovida polo Concello e Dinamizastrada, é a coroación ao
concurso literario desenvolvido ao longo de varios meses para favorecer o uso
do galego. No evento do teatro, levarase a cabo a entrega de premios aos 62
gañadores e gañadoras do X Concurso de Micropoemas e Microrrelatos. Os
autores tiveron que crear relatos coa palabra ‘camiño’ e poemas coa palabra
‘espello’. Ambos os dous termos aparecen nos títulos de obras de Francisco
Fernández del Riego, autor homenaxeado nas Letras Galegas deste 2023.
Tras a participación de todo a alumnado de Educación Primaria e Secundaria,
no segundo trimestre deste curso académico escolléronse 62 gañadores, que
verán como os seus textos aparecen nun libro que lles será entregado o día da
X Festa das Palabras. Os premiados recibirán cadanseu exemplar, que inclúe
os 62 escritos, pero tamén 14 ilustración feitas por nenos e nenas de

Educación Infantil, unha portada deseñada por Rosa de Cabanas e un prólogo
da escritora Charo Golmar, madriña de esta edición.
Charo Golmar, lalinense e mestra, achegou a poesía aos máis cativos grazas
ás obras Nobelo de luz (2020) e No bico do vento (2020). Ademais da súa
presenza, o acto tamén contará coa actuación musical de Proxecto Valladares,
un trío formado en 2022 que xorde co obxectivo de estudar e difundir a música
a música dos irmán Valladares, que elaboraron o primeiro Cancioneiro Galego,
entre outras cuestións.

A Escola Municipal de Artes Escénicas celebrará esta vindeira fin de
semana o seu XX aniversario cunha exhibición conxunta de todos os seus
grupos (adultos, xuvenil, infantil e Teatro Danza), subindo a preto de
70 persoas ao escenario.
A peza, que leva por título A CABEZA DA DRAGONA é unha adaptación
distópica a partir da farsa de Valle Inclán La cabeza del dragón.Os
pases do espectáculo terán lugar o sábado ás 21.00h e o domingo ás
18.00h. A parte teatral está dirixida por Anabell Gago.
Da coreografía e movemento encargáronse os profesores Paula Quintas
Arturo Cobas e a parte musical está composta e dirixida por Jorge
Ortal e Iria Caamaño.Colabora coa montaxe o Taller de Teatro Clámide
de Vilagarcía e varios profesores do Conservatorio de Música de
Vilagarcía e do Obradoiro de Música Moderna Carlos Barruso.
Durante o acto, a escola realizará unha lembranza de homenaxe á súa ex
alumna Lola Puente.As entradas, que teñen un custo de 3,00€, poderán
retirarse no despacho de billetes do Teatro Principal, media hora
antes da función.

 Hoxe tivo lugar a presentación dunha competición que congregará
a preto de 700 deportistas no pavillón Coto Ferreiro e nas
instalacións deportivas o CEIP Figueroa.
 Na décima edición do torneo participarán un total de 44 conxuntos
procedentes de toda a comunidade galega.

O Concello da Estrada consolídase como un
dos epicentros do deporte galego acollendo esta vindeira fin de semana as
finais autonómicas de minibasket e preminibasket.
O salón de plenos do Concello acolleu esta mañá a presentación da
competición, nun acto no que interviron o alcalde, José López, o presidente da
Federación Galega de Baloncesto, Julio Bernárdez, xunto con Susana
Fernández, secretaria xeral, e o presidente do EDM Baloncesto A Estrada,
Alfonso Sanmartín.
A competición desenvolverase desde as 09:30 horas do sábado nas pistas do
pavillón Manuel Coto Ferreiro e nas instalacións do CEIP Figueroa, e nela
daranse cita preto de 700 deportistas de ata 44 clubs procedentes de toda a
comunidade autónoma.
O alcalde José López, celebrou durante a súa intervención que “A Estrada siga
consolidándose como un dos epicentros do deporte galego coa recepción de
eventos deste calibre” e sinalou a importancia que competicións desta índole
teñen “non só para situarnos como referente deportivo, senón tamén para
potenciar o comercio e a hostalaría local durante os días que dure a
competición”.
Pola súa parte, o presidente da FEGABA, Julio Bernárdez, agradeceu “a boa
predisposición que se atopou, de novo, por parte do Concello da Estrada para
albergar un proba de referencia no baloncesto base galego”.

• Hoxe tivo lugar a presentación do Campionato Galego de Ximnasia de Trampolín que participaron o edil de deportes, Ismael Pena, o presidente da Federación Galega de Ximnasia, José Manuel Estévez Feijoo, e Sofía Mosteiro, do Club de Ximnasia da Estrada.

• Preto de 200 deportistas das categorías base e élite daranse cita no pavillón Coto Ferreiro.

O pavillón Coto Ferreiro da Estrada será escenario o vindeiro sábado, 27 de maio do Campionato Galego de Ximnasia de Trampolín.

Esta mañá tivo lugar a presentación da competición nun evento no que participou o edil de Deportes, Ismael Pena, o presidente da Federación Galega de Ximnasia, José Manuel Estévez Feijóo, e Sofía Mosteiro en representación do Club de Ximnasia da Estrada.

Ao redor de 200 deportistas daranse cita no evento que dará comezo ás 09:00 horas coas competicións base e elite de tumbling e dobre minitramp.

Pola tarde, a partir das 16.00 horas, desputaranse as probas de trampolín, tamén en categorías elite e base, nas  modalidades individual e sincro.

O concelleiro de deportes, Ismael Pena, animou á xente a “ir ao pavillón para gozar deste deporte ao seu nivel máis alto e deste xeito darlle visibilidade a unha disciplina na que Galicia destaca notablemente”.

Pola súa parte, o presidente da Federación Galega de Ximnasia, José Manuel Estévez Feijóo, puxo en valor  “a fantástica predisposición que novamente nos demostrou o Concello da Estrada para acoller este tipo de eventos”.

Sofía Mosteiro, na mesma liña que o concelleiro de Deportes, destacou “o altísimo nivel da ximnasia de trampolín autonómica, facendo deste evento unha oportunidade única para gozar dunha das modalidades máis espectaculares da ximnasia”.