A Estrada na Rede

O conselleiro de Presidencia, Xustiza e Deportes, Diego Calvo, acompañado polo director xeral de Emerxencias e Interior, Santiago Villanueva, participou hoxe na inauguración do II Congreso de lexislación antinarcotráfico, impulsado pola Fundación Galega contra o Narcotráfico co apoio da Xunta e que se desenvolve na Academia Galega de Seguridade Pública (Agasp). Na súa intervención, o conselleiro reafirmou o compromiso do Goberno galego na loita contra unha “actividade delictiva que atenta contra a seguridade, o benestar social e a saúde pública”.

Neta liña, referiuse á colaboración coa Fundación Galega contra o Narcotráfico para implantar fórmulas que optimicen a xestión dos bens decomisados ao narcotráfico e delitos conexos, coa participación tamén do Colexio de Procuradores da Coruña e de profesionais xudiciais e dos corpos e forzas de seguridade.

Diego Calvo apuntou tamén ao apoio da Xunta a actividades formativas e divulgativas que contribúan á sensibilización social ante a problemática do narcotráfico, como o congreso inaugurado hoxe. Así, incidiu na importancia deste foro, que permite “abordar temas de máximo interese desde diferentes puntos de vista e de xeito multidisciplinar” así como adquirir coñecementos e “propoñer avances para que a lexislación evolucione e dea a mellor resposta a unha problemática globalizada”.

O conselleiro puxo en valor o labor realizado polos profesionais implicados na loita contra “unha lacra que esixe dedicación constante, valentía e non baixar nunca a garda”. Ademais, enxalzou a Academia Galega de Seguridade Pública como espazo para a formación e o intercambio de coñecementos e experiencias dos profesionais relacionados coa seguridade e as emerxencias, ao ser o centro de referencia en Galicia para a preparación destes efectivos.

Accións no ámbito autonómico

O congreso, que se prolonga ata mañá, conta con intervencións de expertos legais, profesionais do eido da Administración de Xustiza e membros dos corpos e forzas de seguridade, entre outros. O director xeral de Xustiza, José Tronchoni, intervén na xornada de hoxe par abordar a loita contra o narcotráfico desde o ámbito autonómico, na que exporá as distintas actuacións impulsadas polo Goberno galego, pese a non ter competencias especificas na materia. Entre elas sinala o reforzo do persoal en tribunais con macrocausas, a colaboración coa Fundación Galega contra o Narcotráfico e diversas medidas enmarcadas na aplicación da nova Lei de eficiencia do servizo de Xustiza, entre outras.

A directora xeral de FP, Eugenia Pérez, participa na presentación da Carreira Barreiros eMotionFP A Estrada Urban que se celebrará nesta vila o 13 de novembro

A directora xeral de FP, Eugenia Pérez, participou hoxe na presentación da Carreira Barreiros eMotionFP A Estrada Urban Race, unha iniciativa da Xunta de Galicia organizada polo Centro Galego da Innovación da Formación Profesional Eduardo Barreiros que ten como obxectivo promover a innovación, a mobilidade sostible e o talento técnico da FP galega.

A representante da Consellería de Educación, Ciencia, Universidades e FP sinalou que esta actividade se enmarca na estratexia do Goberno galego para conectar a FP galega coa realidade tecnolóxica e industrial. “O Centro Galego da Innovación da Formación Profesional Eduardo Barreiros está a dar pulo a esta colaboración a través do desenvolvemento de 14 proxectos de investigación e de innovación aplicada e metodolóxica”, detallou.

En concreto, a celebración desta carreira é unha das accións incluídas no proxecto de innovación metodolóxica EMOTION FP: Deseño de vehículos enerxeticamente eficientes, que busca desenvolver prototipos eléctricos capaces de competir en probas reais que permitan avaliar a súa eficiencia, promovendo así un modelo de aprendizaxe práctica centrado na sustentabilidade, o deseño intelixente e a innovación aplicada.

A carreira celebrarase o vindeiro xoves 13 de novembro na localidade pontevedresa da Estrada e reunirá equipos de alumnado de centros de FP de toda Galicia, que competirán nunha proba de resistencia dunha hora nun circuíto urbano na que gañará o equipo que logre completar o maior número de voltas cun vehículo eléctrico deseñado, fabricado e pilotado por eles mesmos.

Os prototipos, automóbiles monopraza de catro rodas con carrozarías lixeiras e aerodinámicas, son desenvolvidos desde cero por equipos multidisciplinares formados por alumnado da FP galega das especialidades de Automoción, Electricidade, Electrónica, Deseño, Administración ou Comunicación. Cada vehículo está propulsado por un motor eléctrico alimentado por unha batería estándar, elementos fixados pola organización para garantir a igualdade de condicións técnicas.

A iniciativa forma parte, ademais, do calendario internacional Greenpower, orientado a fomentar no alumnado da FP competencias vinculadas á enxeñaría, a eficiencia enerxética e a sustentabilidade.

 A consellería e a administración municipal financiarán ao 50% os
150.000 euros que supoñen as reformas nestas tres instalacións.
 A actuación de maior calado é a do pavillón do CEIP de Oca, que require
unha renovación integral da cuberta.
 Xunta e Concello asinarán o convenio en 2026 e executarán as obras no
mesmo exercicio.
 O alcalde e o conselleiro repasan as accións en execución, caso da
importante reforma no Pérez Viondi ou das obras no Foxo e no IES
Manuel García Barros.

O alcalde da Estrada, Gonzalo Louzao Dono,
mantivo esta mañá en Santiago unha reunión co conselleiro de Educación, Ciencia,
Universidades e Formación Profesional, Román Rodríguez. O encontro programouse
para o repaso de obras que este departamento autonómico ten en execución en centros
de ensino estradenses e para abordar actuacións que se desenvolverán ao longo de
2026. É o caso da reforma que precisan tres pavillóns polideportivos doutros tantos
centros educativos, instalacións que son de titularidade municipal pero nas que a
consellería comprometeu hoxe colaboración económica.
Louzao e Rodríguez comezaron analizando importantes actuacións que Educación ten
en marcha na Estrada. Centraron a revisións nas obras dos colexios Pérez Viondi e O
Foxo, xunto coas do IES Manuel García Barros.
No caso do Pérez Viondi, o conselleiro trasladou ao alcalde que a obra que se está
executando está próxima a quedar rematada. A rehabilitación integral do CEIP Pérez
Viondi supuxo o cambio de 2.500 m² da cuberta do edificio principal, así como a
aplicación de material illante nas cámaras de aire, a substitución de falsos teitos, a
colocación de novas luminarias led e a substitución de caldeira de gasóleo por outra de
biomasa. A maiores, acometéronse obras de mellora da accesibilidade, reformas no
ximnasio e outras pequenas reorganizacións de espazos interiores, en función das
demandas do centro. O orzamento foi superior o millón de euros.

No CEIP do Foxo, a Consellería de Educación investiu 280.000 euros nunha mellora da
iluminación, da instalación eléctrica e dos falsos teitos. A actuación está xa rematada. No
García Barros foron outros 172.000 euros os investidos para mellora da accesibilidade
coa instalación dun ascensor.
Entrando xa na programación de obras para 2026, o alcalde puxo sobre a mesa as
peticións de mellora de tres pavillóns de titularidade municipal existentes nos colexios
de Oca, Codeseda de Pérez Viondi. Son todas elas instalacións deportivas empregadas
polo alumnado pero das que tamén pode facer uso a cidadanía en xeral fóra do horario
lectivo.
Convenio
As obras que requiren estes pavillóns supoñen un investimento de 150.000 euros. Aínda
que o seu mantemento é competencia do Concello, Louzao trasladou que o conselleiro
asumiu hoxe o compromiso de que Educación colabore no financiamento destas obras
ao 50%. Deste xeito, a consellería subscribirá un convenio de colaboración coa
administración municipal. Será asinado en 2026 e as obras executaranse nese mesmo
ano, aportando cada unha das partes 75.000 euros.
A obra de maior envergadura é a do pavillón de Oca, que require un cambio integral da
cuberta e a instalación de caleiros exteriores. Estímase que estas actuacións suporán
investir arredor de 90.000 euros
No pavillón do CEIP Pérez Viondi xa se estiveron facendo melloras. Aínda así, é necesario
realizar obras de drenaxe e imprimación dos muros, que se atopan nunha cota de terreo
máis elevada, para evitar as filtracións á instalación polideportiva. Tamén no pavillón de
Codeseda será preciso realizar melloras nun muro e evitar as actuais filtracións e
humidades.

 Foron 113 os traballadores que percibiron no mes de outubro este
abono, cun montante superior aos 2,7 millóns de euros.
 “A RPT trouxo unha mellora xeral e queremos pechar este capítulo dos
pagos pendentes aos traballadores”, sinala o alcalde.
 O importante pago asumiuse con cargo aos remanentes.
 “É un esforzo moi importante, pero os recursos humanos do Concello
tamén o merecen e iso repercute na calidade dos servizos que se prestan
aos cidadáns”, manifesta o rexedor.

O Concello da Estrada ten xa completamente
saldada a débeda contraída con traballadores da administración municipal polos atrasos
vencellados á Relación de Postos de Traballo (RPT).
O goberno que encabeza Gonzalo Louzao cumpriu o compromiso anunciado o pasado
mes de xuño, de xeito que os traballadores recibiron no mes de outubro dous pagos: a
contía principal nunha nómina extraordinaria e os intereses correspondentes nun abono
que se realizou xunto coa última mensualidade salarial. O global sitúase nos 2.787.000
euros.
Deste xeito, no pago extraordinario que os empregados públicos recibiron antes de
cobrar o salario de outubro abonáronse 1.719.586,52 euros, quedando para finais de
mes os intereses xerados e as cotizacións á Seguridade Social.
Louzao Dono recoñeceu que este esforzo realizado polo Concello ten a pretensión de
“pechar un capítulo” que non estivo exento de certa conflitividade laboral ao longo dos
últimos anos. O rexedor puxo o acento en que a “RPT trouxo unha mellora xeral e
ofreceu unha radiografía moito máis axustada á realidade dos postos de traballo no
Concello da Estrada”. “O goberno cumpriu cos traballadores”, manifestou.
En total foron 113 os empregados da administración municipal que percibiron estes
abonos no mes de outubro, correspondentes a atrasos xerados entre 2016 e 2021, cos
seus correspondentes intereses. Para facer fronte a este desembolso de xeito íntegro, o
goberno quixo aproveitar a existencia de remanentes, que atribúe ao resultado dunha
axeitada xestión económica.
“Queriamos pasar páxina e saldar estes atrasos pendentes. A débeda estaba recoñecida
e seguir dilatando o pago non faría máis que incrementar os intereses que tería que
asumir o Concello”, sinalou o xefe de o executivo local. “Estamos moi contentos de
rematar con este capítulo e agora toca seguir traballando”, engadiu.
Na reunión que o alcalde mantivo cos traballadores para anunciar a decisión de saldar
esta débeda nun único pago, o mandatario recoñeceu que “hai moitas cuestións que
atender” ás que se podería teren destinado estes remanentes. Porén, sinalou que se
asumiu cos traballadores que solucionar este conflito era unha cuestión prioritaria e se
quixo liquidar a débeda pendente de golpe, sen programar pagos rateados en varios
prazos, como se podería ter feito. “É un esforzo moi importante, pero os recursos
humanos do Concello tamén o merecen e iso repercute na calidade dos servizos que se
prestan aos cidadáns”, rematou o alcalde.

 O alcalde xestionou coa Consellería de Sanidade que a administración
galega asuma o 50% do custe das obras, valoradas en 154.000 euros.
 Aínda que destinado á atención sanitaria, este edificio é patrimonio
municipal, como sucede cos centros periféricos de Codeseda e Vea.
 As instalacións precisarán tamén a renovación do sistema de
calefacción, que actualmente emprega caldeira de gasóleo.

O alcalde da Estrada, Gonzalo Louzao Dono,
avanzou hoxe que os orzamentos municipais de 2026, que nestes momentos se
encontran xa no departamento de Intervención coa previsión de que poidan elevarse a
pleno para aprobación no mes de decembro, incluirán no capítulo de investimento algo
máis de 77.000 euros para efectuar unha reposición integral da cuberta do centro de
saúde de Oca. Con esta partida o Concello cubriría o 50% do custe da actuación, que a
administración municipal tería que asumir no marco do convenio que o goberno prevé
asinar proximamente coa Consellería de Sanidade.
Louzao aclarou que o edificio do centro periférico existente na parroquia de Oca, como
sucede co de Vea ou o de Codeseda, é de titularidade municipal. Técnicos do Concello da
Estrada revisaron estas instalacións cos técnicos da consellería para estudar as súas
necesidades, que quedarían principalmente concentradas na cuberta e na necesidade
de renovar o sistema de calefacción, actualmente con caldeira de gasóleo.
O alcalde apuntou que o edificio ten unha claraboia de gran tamaño e non presenta
uralita antes da tella. A obra prevista suporá un recambio integral de toda a cuberta,
instalando unha membrana impermeabilizante antes de colocar o tellado. Asemade,
substituirase todo o falso teito, actualmente afectado polas humidades.
Gonzalo Louzao sinalou que o goberno que encabeza xestionou co Servizo Galego de
Saúde (Sergas) que a administración galega asuma a metade dos 154.000 euros
necesarios para executar estas melloras. De igual xeito, a parte que corresponde ao
Concello está tamén avanzada, coa incorporación de fondos nas contas do vindeiro
exercicio para facer fronte ao outro 50% das obras.

O alcalde sinalou que a elaboración do proxecto está xa en fase final e que
proximamente se asinará o correspondente convenio de colaboración coa Consellería
de Sanidade. Indicou tamén que as obras incorporarán unha mellora no sistema de
calefección, apostando por unha alternativa máis eficiente e ecolóxica que se sume á
mellora na cuberta para garantir condicións de maior confortabilidade tanto para os
usuarios como para os traballadores do centro.

A conselleira de Política Social e Igualdade, Fabiola García, visitou esta mañá a casa rural Torres de Moreda, na Estrada, e fíxolle entrega a súa propietaria do distintivo que acredita que este establecemento está adherido ao Carné +65, impulsado pola Xunta para fomentar o envellecemento activo entre os maiores e desfrutar de todas as posibilidades da Galicia Calidade.

A través do Carné +65 os usuarios poden beneficiarse de descontos e promocións en servizos de saúde e benestar, óptica, comercios de moda e outra variedade de servizos de ocio e lecer. Nestes momentos, a conselleira lembrou que xa son arredor de 900 os establecementos adheridos e nos que se pode facer uso desta tarxeta.

Neste sentido, lembrou que a Xunta envía automaticamente o Carné +65 aos maiores sen necesidade de que o soliciten, unha vez que o reciban no seu domicilio poden empregalo nos establecementos que se sumaron ao programa unicamente presentando este documento. Ademais, tamén está dispoñible a páxina web na que consultar toda a información.