A Estrada na Rede

O Departamento de Servizos Sociais, abre mañá, día 13, o prazo para anotarse na actividade de piscina da primeira quenda de 2018 dirixida a persoas maiores de 50 anos, así como para as actividades de prevención da dependencia. Os interesados en inscribirse poderán facelo desde mañá no departamento de Servizos Sociais, sito na planta baixa do Consistorio, en horario de luns a venres de 09.00 a 14.00 horas.

En ambos os casos, os demandantes deberán cubrir un formulario e aportar unha fotocopia do Documento Nacional de Identidade (DNI) mais o Certificado de Discapacidade, se fose o caso. A actividade de piscina levarase a cabo entre o 2 de xaneiro e o 30 de marzo, ambos os dous incluídos, e terá un custe de 20 euros. O prazo para inscribirse rematará o día 22 de decembro. Os admitidos asistirán á actividade unha vez por semana e cada sesión terá unha duración de 45 minutos. Serán os luns, mércores e venres de 09.45 a 10.30 horas, os mércores de 20.00 a 20.45 horas ou os venres de 09.00 a 09.45 horas.

Por outra banda, nas Actividades de Prevención da Dependencia 2018, tanto no rural coma no casco urbano, para maiores de 50 ofértanse: xerontoximnasia, aeróbic de mantemento, taller de memoria e pilates. Para levar a cabo cada unha delas será preciso a existencia dun grupo de mínimo de dez persoas,e incluso, no caso de formación de grupos cando a asistencia ás actividades sexa inferior a dez participantes, procederase a suspensión das mesmas. O prazo de inscrición rematará o 9 de xaneiro.

Na Estrada, ás 16:26 horas do once de decembro de dous mil dezasete, na Sala de Xuntas da Casa do Concello da Estrada, reúnense os membros do xurado  para escoller o texto gañador da VI edición do Premio de Dramaturxia «Manuel Daniel Varela Buxán», cos compoñentes que de seguido se relacionan:

• Dona Ana Carreira Varela
• Santiago Cortegoso Calvar
• Eduardo Alonso Rodríguez

         Unha vez lidos os orixinais presentados, e de analizalos conxuntamente, o xurado acordou, por unanimidade, conceder o VI Premio de Textos Teatrais  Manuel Daniel Varela Buxán á obra presentada baixo o lema “Óptimo Máximo”. Unha vez aberta a plica, o lema correspóndese coa obra “Pallaso” da autoría de D. Fernando Castro Paredes.

         O xurado destacou deste texto a súa construción dramatúrxica rigorosa e coherente, e a súa viabilidade escénica.

Asemade; a aposta por un humor negro e absurdo cargado de dramatismo e ironía que debulla a realidade social.

         E non sendo outro o obxecto desta reunión, dáse por finalizada sendo as dezasete e cinco minutos cos membros, lugar e data arriba indicados. Asinan comigo, todos os asistentes ao pé da presente acta, da que eu como secretario dou fe.

o  A carpa na que os técnicos de Glassdrive revisarán os turismos instalarase o xoves 14 pola mañá en Bandeira e o sábado 16, tamén pola mañá, en Lestedo

o  Aos coches que se acheguen aplicaráselle un produto repelente da choiva que garante alomenos 20.000 quilómetros con mellor visibilidade

A corredoría de seguros Sanmartín Gestión, en colaboración coa firma Glassdrive, especializada na reparación e substitución de lunas de vehículos, retomará esta semana en Bandeira e Lestedo a súa campaña de revisión gratuíta de lunas e de substitución das escobiñas dos limpaparabrisas. Concretamente, a carpa na que os técnicos de Glassdrive atenderán a todos os turismos que que queiran achegarse -previa solicitude de cita- instalarase en Bandeira o xoves 14, na rúa Camilo José Cela nº 2, entre as 9.00 e as 14.00 horas. En canto a Lestedo, instalarase o sábado 16, de 9.30 a 14.00 horas, fronte á Cafetería O´26. Tendo en conta que a mala visibilidade é unha das principais causas de accidentes de coche cando chove, no marco desta campaña realizarase unha revisión gratuíta dos parabrisas e aplicaráselles unha imprimación dun produto repelente da choiva, a neve e a auganeve que garante alomenos 20.000 quilómetros con mellor visibilidade. Ademais, regalaráselle aos asistentes un novo xogo de escobiñas para o limpaparabrisas e sortearanse tiques canxeables por lavados integrais para o coche. Como en anteriores ocasións, esta campaña está aberta a todos os condutores e condutoras, con independencia de se son clientes de Sanmartín Gestión ou non. O único necesario para beneficiarse da mesma é chamar ao teléfono 986 180 388 (preguntar por Chus Iglesias) para reservar turno en Bandeira e ao teléfono 981 502 212 (preguntar por Marga Sanín) para reservar turno en Lestedo.

                                                              Competirán 150 participantes

A praia fluvial de Liñares acollerá este venres, día 8, a partir das 10.00 horas o Mushing Tierra A Estrada, que é puntuable para a Copa de España. Incluirá CaniCross, BikeJoring, Patín e Carros. O evento está organizado pola Federación Galega de Deportes de Inverno (FGDI), en colaboración coa Asociación de Cans Deportistas (Acade) e polo Concello da Estrada. O circuíto da carreira terá unha distancia de 5,7 quilómetros. Ao finalización da proba celebrarase unha proba de Relevos e un Canicross Popular que se rexerá polas mesmas normas. O circuíto infantil, o de relevos e o de CaniCross Popular terán todos unha distancia de tres quilómetros. A competición foi presentada esta mañá polo concelleiro de Deportes, Ismael Pena, e por Roberto Salvado, director da proba deportiva e participante.

Esta proba está rexida polos regulamentos da Federación Española de Deportes de Invierno (RFEDI) e poden consultarse nas páxina webs www.rfedi.es e en www.fgdi.es

A competición está aberta aos deportistas con licenza RFEDI. O CaniCross popular está aberto exclusivamente a deportistas sen licenza RFEDI e a organización contratará un seguro deportivo de accidentes para todos os participantes de dita proba. O circuíto para todas as disciplinas Mushing discorrerá por camiños de herba e de terra sendo un recorrido rápido aínda que teña algunha subida con pouca pendente. Ten punto técnicos de condución con varias curvas de 90 grados que poñerán a proba a pericia e manexo de cans.

Ademais, os cans dos deportistas do CaniCross Popular deberán ter un seguro de responsabilidade civil que cubra especificamente durante a práctica deportiva os danos que poidan ocasionar os animais. Ningún can poderá competir en dúas modalidades ou categorías, agás que a segunda sexa relevos e unha vez que comece a proba non se poderá cambiar ningún animal. Haberá diversas categorías e circuítos.

No CaniCross Infantil o participante irá acompañado dun adulto federado con equipación regulamentaria e liña de tiro ao can máis longa que a do neno. A función do adulto é garantir a seguridade do rapaz e só pode intervir en caso de problemas de control do can. O adulto só pode axudar ao neno a controlar ao can, pero non pode estimulalo nin a el nin ao animal. Será necesario que haxa cinco participantes para poder abrir a modalidade ou categoría. En caso contrario, agrupáranse segundo o regulamento, e abrirase a Categoría Nórdicos en calquera modalidade sempre que se cumpra o anterior e os interesados avisen en prazo de inscrición.

“Os relevos son as primeira vez que se van facer aquí na Estrada e nunha proba de copa e fórmanos equipos de tres participantes, un vai en canicross, outro en patín e o outro en relevos”, apunta Salvado. O número de participantes bateu o récord con relación aos outros anos chegando case aos 150 participantes entre as distintas modalidades: en canicross sobre 60, en  bikeJoring sobre 40, en patín 20, tiro de catros cans 3, na popular 11 e en relevos cinco equipos, polo tanto 15 participantes. Competirán deportistas de renome, moitos deles campións e subcampións do Campionato de España de Valladolid, que se acaba de celebrar a pasada fin de semana.

O xoves de 18.00 a 20.00 horas haberá xa un control veterinario e o venres continuará de 08.00 a 09.00 horas. O recorrido será o mesmo que o ano pasado pero realizarase de maneira inversa. Outra das novidades é que ademais de poder ver a competición en directo por streaming vai haber a maiores unha pantalla xigante na explanada da praia para que tanto os corredores coma o público poidan seguir a proba.

A entrega de trofeos está prevista para as 13.30 horas. Os premios consistirán en un trofeo e penso para os tres primeiros de cada categoría constituída, pero todos os participantes inscritos recibirán de agasallo unha bolsa de corredor.

A Estrada celebrará o día 21 a I Gala do Deporte. A cita será a partir das 20.00 horas no Teatro Principal e nela farase entrega dos premios nas categorías establecidas e que serán concedidas polo xurado. O día 1 rematou o prazo para recibir as propostas dos/as 54 entidades, colectivos, asociacións, clubs e escolas deportivas municipais. O xurado, composto por membros de todas as forzas políticas locais e presidido por concelleiro de Deportes, Ismael Pena, contabilizará as propostas, saíndo dous finalistas nominados en cada categoría que se farán públicos e os cales se lle notificará tal decisión, desvelándose e galardoando no mesmo día da gala, despois da deliberación do xurado. “O luns 11 ás 21.00 horas reunirémonos o xurado para ver todas as propostas que presentaron os clubs para elixir aos finalistas, pero non se dirá o gañador ata o día da gala”, indicou Pena esta mañá durante a presentación do evento.

A gala estará presentada polo xornalista da Compañía de Radio e Televisión de Galicia (CRTVG), Terio Carrera, que presentará aos finalistas e enunciará o nome do galardón en cada categoría. O premio constará dun recoñecemento simbólico mediante a entrega dun agasallo conmemorativo os premiados en cada unha das oito categorías, que son as seguintes:

1. Mellor deportista da Estrada 2017 (masculina e feminina).
2. Mellor deportista de base 2017 (masculina e feminina, ata 18 anos. Nado do 2000 en adiante).
3. Mellor club, asociación, entidade deportiva 2017.
4. Mellor club, asociación, entidade deportiva de traballo coa base 2017.
5. Mellor entidade patrocinadora e de apoio deportivo a clubs, asociacións, entidades deportivas e deportistas federados da Estrada 2017.
6. Mención especial do xurado.

O acceso para todos aqueles que queiran presenciar a Gala do Deporte é gratuíto, pero deben de retirar previamente a súa invitación no departamento de Deportes do Concello, sito no cuarto andar da Casa Consistorial, ou en Alcaldía, segundo andar, ata esgotar aforo. As invitacións estarán dispoñibles desde o luns día 11. Ademais, todas entidades, colectivos, asociacións, clubs e escolas terán unha serie de entradas a súa disposición.

                                             A retirada de dorsais será a partir das 16 horas

Unha vez  máis, co remate do ano, chega a Milla San Silvestre estradense, que xa vai pola súa sétima edición e que está organizada polo Concello da Estrada. Será o 31 de decembro a partir das 16.00 horas  coa retirada de dorsais na Praza da Constitución (Praza do Concello). Os interesados en participar xa se poden inscribir ata o 29 de decembro e deberán cumprimentar un formulario, no que conste nome, apelidos e data de nacemento, na páxina web www.emesports.es A inscrición é gratuíta, aínda que na retirada de dorsais os participantes deberán entregar a cambio un quilo de comida non perecedoira que se destinará a Cáritas Parroquial, dentro da Operación Quilo de Nadal.

Haberá diversas categorías e percorridos con distancias adaptados a cada unha delas, e tamén distintos horarios. Ás 17.00 horas arrancarán os Pitufos, nados no 2012 e posteriores, que recorrerán 100 metros. Ás 17.15 horas será a quenda das categorías Prebenxamín ata a Infantil, que son os nados entre os anos 2011 e 2004. Correrán 800 metros. E por último, de Cadetes ata Veteranos (nados nos anos 2003 e anteriores) comenzarán a carreira dunha milla (1.609 metros) ás 17.30 horas.

A carreira dos de categoría Pitufos discorrerá polas inmediacións da Praza do Concello e polos xardíns anexos a mesma, será o circuíto verde. A carreira da categoría Prebenxamín ata Infantil discorrerá por un circuíto urbano pechado ao tráfico de aproximadamente 800 metros de lonxitude (circuíto vermello) o que haberá que dar unha volta para completar a distancia. A saída e a meta situaranse na Praza do Concello. Mentres, a carreira da categoría Cadetes ata Veteráns discorrerá por un circuíto pechado ao tráfico de aproximadamente 800 metros de lonxitudes (circuíto vermello) no que haberá que dar dúas voltas, contando cunha distancia total de 1.600 metros para completar toda esta. A saída e a meta será tamén a Praza do Concello.

O termo de todas as carreiras todos os participantes serán obsequiados ca degustación de chocolate quente e produtos de repostería. Para participar nos sorteos dos agasallos que se farán durante a chocolatada é obrigatorio levar o dorsal ben visible. 

A compañía Yllana volve aos escenarios galegos e fará este domingo, día 10, unha parada na Estrada. A cita será ás 19.00 horas no Teatro Principal e o público poderá gozar dun espectáculo moi especial, o que estreara nunha dobre celebración, a do seu 25 aniversario e tamén na mesma efeméride do Festival Internacional Outono de Teatro de Carballo o ano pasado. Lo mejor de Yllana é un espectáculo, de dúas horas de duración, onde fan un repaso deste cuarto de século sobre o escenario cos seus mellores sketches e os gags máis divertidos. Foi presentado esta mañá por parte de Juan Constenla, concelleiro de Cultura, e por Fran Rei, como representante de Culturactiva, a empresa encargada da xira de Yllana en Galicia.

A compañía Yllana intégrana Marcos Ottone, Juan Ramos, Joe O’Curneen, Fidel Fernández e David Ottone. Nesta ocasión, os intérpretes son Fidel Fernández, Juan Ramos, Luís Cao, Juanfran Dorado e Jony Elías. Lo mejor de Yllana é a suma do traballo de moitas mentes creativas que, desde os comenzos, foron facendo as súas contribucións aos espectáculos da compañía. “Non é a primeira vez nin a segunda vez que Yllana actuará na nosa vila, pero quizais si a máis especial, posto que con este espectáculo a compañía celebra as súas vodas de prata poñendo en escena os mellores sketches como Muu!, Star Trip, Brokers, 666, The Gagfather… será unha oportunidade única de pasar dúas horas rindo a rebentar”, apunta Constenla.

As entradas, que quedan ao redor dunhas 80, poden mercarse no departamento de Cultura do Concello, sito no segundo andar, onde tamén hai aínda entradas para o monólogo de Enrique San Francisco deste venres. Ambas teñen un prezo de 10 euros. O Concello da Estrada intenta que todos os espectáculos non superen este prezo para que todos os que o desexen poidan asistir aos espectáculos por un custe o máis popular posible.

“Quero lembrar a historia de amor entre A Estrada e Yllana. Nós distribuímos esta compañía desde o 2001, cando estaba cumprindo o seu décimo aniversario, e daquela actuaran só en Carballo e o primeiro Concello que decidiu apostar por Yllana nunha programación regular foi o Concello da Estrada”, apunta Fran Rei ao que engade “os actores sempre van falar da Estrada con moito cariño e anos máis tarde David Otonne, o seu director, estivo traballando cunha compañía da Estrada e dirixiu un espectáculo no que interviron actores estradenses e o seu director artístico era de aquí, así que a súa relación con este municipio é moi importante”. Tal e como apunta Rei este espectáculo está pensado para todo o público. “Si hai un perfil por espectáculo, pero neste caso como recompilan o mellor de todo, hai sketches para todos os públicos, porque é precisamente iso, unha celebración para de 0 a 99 anos, como dicían antigamente os xogos”, sinala Rei.

A compañía

Creada en 1991 como compañía de teatro de humor xestual, na actualidade diversificou a súa actividade no mundo das artes escénicas e audiovisuais. A súa aposta céntrase na maioría dos casos nun humor sen palabras, irónico e interactivo buscando no público a máis libre das gargalladas. Trátase dun humor universal que soubo chegar a multitude de escenarios por todo o mundo. Desde o seu encontro coa escena, Yllana produciu 25 espectáculos entre os que destacan: Muu!, Glub Glub, Star Trip, Los Mejores Sketches de Monty Python, Pagagnini, Brokers e Zoo, que se representaron en 44 países e foron vistos por preto de dous millóns de espectadores. No 2016 celebraron as súas vodas de prata co público. Pola súa traxectoria, recibiu galardóns como o Outsanding Unique Theatrical Event por 666 no Fringe Festival de Nova York ou o premio ao Mellor Spectacle Étranger en 1993 do Festival Printemps des Courges de Toulouse (Francia). Dende 1996 xestiona o Teatro Alfil de Madrid.