A Estrada na Rede

 Este tipo de elemento posibilitaría a contención da casca de pino e
evitaría a entrada de lixo nos espazos axardinados que salpican a praza.
 O Concello avanza no plan de mellora de distintos xardíns no casco
urbano, por importe superior aos 128.800 euros.

O plan de mellora das zonas axardinadas no casco
urbano está chegando estes días a distintos espazos verdes da capital estradense. No marco
desta actuación, o goberno local valora complementalo coa introdución dalgunha obra que
contribúa a mellorar espazos como as xardineiras superficiais da Praza da Feira. Máis polo
miúdo, o edil delegado de Servizos Municipais, Óscar Durán, apuntou que se está estudando
a incorporación dun bordo perimetral nestes espazos públicos para favorecer o
mantemento, asegurando unha maior limpeza da contorna ao evitar a dispersión de
materiais como a casca de pino.
Durán indicou que a este tipo de zonas axardinadas, completamente ao nivel do pavimento,
incorpórase unha malla que impide que medre a herba. Aínda así, é habitual que as plantas
se acompañen de elementos como a cortiza de piñeiro, que mellora a estética á vez que
axuda a conter a proliferación de herbas. A mellora proposta para este tipo de elementos
construiría un bordo de contención ao longo do todo o perímetro, “evitando que este
material se disperse e tamén que entre outro tipo de lixo nestas zonas axardinadas”, sinalou
Durán.
Sobre os parterres creados na última remodelación da Praza da Feira o plan de mellora que
está en marcha proxecta afondar na limpeza e reposición de plantas salpicando todo o
entorno, apostando por elementos de carácter arbustivo.
Agradecemento polo coidado cidadán
Noutra orde de cousas, Óscar Durán aproveitou a ocasión para ofrecer un agradecemento
público a veciños e comerciantes de diversas rúas do casco urbano que atenden e miman as
xardineiras máis próximas aos seus fogares e locais. “Non se pretende en ningún momento
que o mantemento o fagan os cidadáns, pero é bonito e digno de agradecemento o coidado
extra que algúns lle dispensan a este ben común”, sinalou o concelleiro. Precisou que se dan
exemplos en vías como a Rúa Serafín Pazo, Ulla e Praza de Galicia, uns coidados que supoñen

un agradable contrapunto a actos vandálicos dos que, lamentablemente, tamén teñen sido
obxecto as zonas verdes en episodios recentes.
O plan de mellora impulsado polo Concello, cun orzamento de 128.846 euros (IVE incluído),
suporá executar un acondicionamento profundo en sete áreas axardinadas do casco
urbano: a alameda municipal, parque de Figueiroa, Praza da Feira, zona axardinada da
Baiuca (diante do heliporto a carón do centro de saúde), illote de Toedo (próximo á estación
de servizo existente), rotonda de entronque da Avenida de Santiago coa Rúa da Cultura e
toda a mediana axardinada desta última.
A maiores, o executivo traballa xa para lanzar proximamente a licitación dun plan anual de
mantemento das zonas verdes no que se inclúen tamén podas de árbores, rozas e outras
intervencións.

 Despois de consultalo cos servizos xurídicos, traslada a proposta á
directiva da entidade, que a someterá agora ao criterio dos socios.
 Esta fórmula faría posible destinar fondos doutras administracións ao
recinto porque abriría un escenario temporal que permitiría a súa
amortización.
 En 2020 pactouse con Río Ulla unha cesión a 20 anos, que logo quedou
ampliada a 25.

O alcalde da Estrada, Gonzalo Louzao, aportou hoxe
novos detalles do proxecto de posta en valor e dinamización turística da praia fluvial de
Liñares que promove o goberno local e para o que o executivo local iniciou, xa no primeiro
encontro institucional do rexedor co presidente da Xunta, Alfonso Rueda, a busca de
financiamento. O punto de partida desta iniciativa hai que buscalo no escenario proposto á
Sociedade Deportiva Río Ulla para posibilitar o investimento neste recinto, agora de xestión
municipal. O Concello suxire á entidade ampliar a cesión da praia ata os 50 anos, no canto
dos 25 inicialmente pactados.
Louzao Dono explicou que, antes de emprender a procura de fondos para a reforma do
recinto, consultouse aos servizos xurídicos que fórmula faría viable o investimento público
nun espazo que é propiedade dos integrantes da referida sociedade estradense. Segundo se
explicou, a clave está no tempo de cesión, que tería que chegar a unha vixencia de 50 anos
para entender amortizado un gasto de fondos procedentes de administracións autonómicas
ou provinciais, por exemplo.
O alcalde indicou que xa se lle deu traslado desta proposta á directiva da Sociedade Río Ulla
e, aínda que se asegura que houbo boa receptividade, a cuestión será exposta
proximamente aos socios nunha reunión extraordinaria.
Cómpre lembrar que, inicialmente, o convenio entre esta entidade e o Concello da Estrada
se fixou en 2020 para 20 anos, que logo se elevaron a 25. Agora o que se propón é amplialo
ata chegar aos 50, de xeito que o acceso á praia fluvial en todo ese marco temporal sexa
público e amparado pola xestión municipal do recinto.

Mentres de define a cuestión, o Concello está explorando xa diferentes vías de
financiamento, paso previo á elaboración dun proxecto que afonde nas ideas que o goberno
local ten para este espazo e que permita definir en firme a cifra definitiva que se precisaría
para executalo.
Actuación ambiciosa
Gonzalo Louzao puxo o acento en que, se a praia fluvial de Porta Pousada ten, pola vía da
cesión, acceso público e xestión municipal, é importante poder procurarlle unhas condicións
e un mantemento axeitado. Como se avanzou este luns, o obxectivo sería executar unha
ambiciosa actuación na praia, na que convivan a aposta decidida polo valor medioambiental
do recinto e a importancia que as contornas fluviais teñen na Estrada xunto a unha acción
que incremente o seu peso como recurso de atracción turística neste concello do interior.
Deste xeito, ademais dunha mellora de toda a ampla zona verde e de valorización do marco
fluvial, o alcalde expresou que se procura unha intervención que atenda a varios puntos. Un
deles será a zona edificada, con vestiarios e área de hostalería. Sería preciso actuar tamén na
zona de estacionamentos, peche frontal, mellora da accesibilidade, paseos interiores e
espazo para eventos.

 O alcalde estradense mantén a súa primeira reunión institucional co
presidente da Xunta de Galicia.
 O dirixente galego compromete colaboración económica para o
desenvolvemento turístico da praia de Porta Pousada.
 A Xunta asumirá en 2026 melloras prioritarias na PO-213 e planificará
novas actuacións nesta infraestrutura.
 Rueda confirma o avance en prazo da AG-59 e sinala que o novo edificio
xudicial entra en fase de amoblamento para a súa próxima entrada en
funcionamento.

O alcalde da Estrada, Gonzalo Louzao Dono, vén de
manter a súa primeira reunión institucional co presidente da Xunta de Galicia, Alfonso
Rueda, un encontro no que tiveron ocasión de abordar algúns dos proxectos estratéxicos
para o futuro deste municipio e do que o rexedor estradense saíu coa satisfacción de novos
compromisos de respaldo autonómico. Un deles foi o apoio ao proxecto de reforma da praia
fluvial de Liñares, ao obxecto de converter este recinto natural próximo ao casco urbano nun
verdadeiro espazo referencial para esparexemento dos estradenses e tamén nun polo de
dinamización turística.
Ao termo da reunión, que se prolongou ata xa entrada a tarde, o alcalde informou de que
quixo comezar pola Xunta a procura do financiamento necesario para executar unha
ambiciosa actuación na praia fluvial, tamén coñecida como Porta Pousada e de xestión
municipal dende 2020. Gonzalo Louzao resumiu ao presidente da Xunta as liñas estratéxicas
do proxecto no que traballa o goberno local, buscando ofrecer unha transformación a un
recinto que o propio Rueda tivo ocasión de visitar anos atrás.
A iniciativa conservaría a aposta decidida polo valor medioambiental do recinto e a
importancia que as contornas fluviais teñen na Estrada, se ben se procuraría para el unha
acción que incremente o seu peso como recurso de atracción turística neste concello de
interior. Tras coñecer detalles do anteproxecto resumido polo alcalde, o presidente da
Xunta comprometeu colaboración económica para o desenvolvemento turístico desta praia
fluvial.

O presidente da Xunta, Alfonso Rueda, recibe ao alcalde da Estrada, Gonzalo Louzao. 22/09/25.

Outro dos asuntos que o alcalde abordou co presidente galego foi a mellora da estrada
autonómica PO-213 (A Estrada-Ponte Ulla). O rexedor puxo o acento nos problemas
trasladados por veciños e usuarios desta infraestrutura e o dirixente autonómico
comprometeuse a afrontar, no marco do exercicio 2026, as intervencións que resultan
prioritarias, pensando en seguir encaixando nos plans da Xunta novas actuacións de
mellora.
En materia de comunicacións non podía faltar nesta reunión institucional a prolongación da
autovía AG-59, chamada a unir A Estrada con Santiago. Alfonso Rueda confirmou ao alcalde
que se avanza segundo os prazos e compromisos adquiridos, de xeito que este ano se
estreará o tramo que chega a Pontevea para que poida arrancar xa o treito que achegará
esta vía de alta capacidade ata O Rollo, na parroquia estradense de Santa Cristina de Vea.
Edificio xudicial
No transcurso desta reunión tamén houbo tempo para avaliar a situación da obra do novo
edificio xudicial da Baiuca, que reunirá nun mesmo inmoble as dúas salas estradenses e que
vén reforzar o propio partido xudicial. O presidente sinalou que se está traballando no
amoblamento das novas instalacións para a súa próxima entrada en funcionamento..
Alfonso Rueda informou tamén ao mandatario local de que se atopa en fase de redacción o
proxecto das 28 novas vivendas de promoción pública que se construirán na Estrada, toda
vez que os dous dirixentes tiveron oportunidade de repasar o estado da ampliación pública
do polígono industrial de Toedo, recentemente exposto pola conselleira de Economía e
Industria, María Jesús Lorenzana, ao empresariado local.
Gonzalo Louzao non quixo deixar pasar a ocasión de recoñecer a evidencia de que o goberno
de Rueda Valenzuela “está nas cousas importantes para o futuro da Estrada”. Aínda que as
peticións e as novas propostas que precisan apoio institucional continúan aflorando, o
alcalde asumiu nesta reunión a transcendente papel que o actual executivo galego ten
nalgúns dos proxectos máis emblemáticos e transformadores do municipio estradense.

 A Xunta de Goberno Local aproba a adxudicación do proxecto á
empresa Taboada y Ramos S.L.U, que executará os traballos por
1.037.607 euros.
 A actuación comezará polas rúas Don Nicolás e Marqués de la Vega de
Armijo, continuando despois pola confluencia das rúas 56 e San Paio.
 Quedará para o inicio de 2026 a execución dos traballos no que é a
propia praza, de xeito que se garanta menos incidencia para os días de
Nadal e o paso das cabalgatas.
 A intervención non afectará ás actuais beirarrúas empedradas, tal e
como aconteceu cando se actuou sobre Calvo Sotelo e Ulla.

A Xunta de Goberno Local da Estrada deu este
mediodía luz verde definitiva á proposta de adxudicación do contrato da obra de
humanización da Praza de Galicia á firma Taboada y Ramos S.L.U. O executivo que encabeza
Gonzalo Louzao Dono agarda que as obras arranquen no mes de outubro e que se
desenvolvan axustándose a unha folla de ruta que buscará minimizar o impacto sobre a
campaña de Nadal, tanto para o comercio local como para o conxunto da cidadanía.
O alcalde adiantou hoxe a previsión de que os traballos comecen polas rúas Don Nicolás e
Marqués de la Vega de Armijo, continuando de seguido polas rúas San Paio e 56. Isto fará
posible que a execución do proxecto avance reservando para o final a actuación na Praza de
Galicia en si, humanizando previamente toda a súa contorna e deixando este céntrico
espazo para a entrada de 2026. Con isto, sinalou o rexedor estradense, o que se busca é que
a obra non entorpeza o desenvolvemento do Nadal na zona de maior concentración de
comercio e servizos da capital estradense, sendo tamén este un enclave obrigado e
neurálxico para os percorridos das cabalgatas de Papá Noel e Reis.
“A campaña de Nadal é a máis importante para o comercio local e queremos que se
desenvolva dentro do marco da maior normalidade posible, compatibilizándoa cunha obra
que virá poñer a guinda a todo ese proceso humanizador aplicado nesta arteria tan
importante para a capital municipal”, apuntou o alcalde. Se seguido, sinalou que a obra que
executará Taboada y Ramos non afectará ás actuais beirarrúas empedradas, tal e como

aconteceu cando se actuou sobre Calvo Sotelo e Ulla, nas que se aproveitaron os anchos
pasos peonís preexistentes.
En maio
“A obra grande será na superficie asfaltada”, remarcou Louzao Dono. Isto contribuirá tamén
a minimizar a afección sobre a actividade comercial e residencial nesta céntrica zona do
casco urbano, tanto na campaña de Nadal coma o día a día, coa previsión de que os traballos
se prolonguen ata o vindeiro mes de maio.
A empresa adxudicataria ten un prazo de seis meses para completar a execución do
proxecto e comprometeuse a facelo por un importe de 1.037.607,80 euros. As obras serán
financiadas no marco do convenio asinado entre o Concello da Estrada e a Deputación
Provincial de Pontevedra, ente que aportará 807.000 euros a esta actuación a través do Plan
Provincia Extradordinaria-Plan Extra.
Enclave emblemático
A humanización da Praza de Galicia afronta a peonalización dun dos enclaves máis
emblemáticos da Estrada, alí onde se cruzan os camiños que no seu día foron xénese para o
desenvolvemento urbanístico da vila. O goberno de Gonzalo Louzao someteu a consulta
cidadá o emprazamento do farol ornamental que bautiza, de xeito oficioso, esta praza.
Recollendo o sentir dos estradenses, o proxecto executarase conservando o elemento,
aínda que aproximándoo ao punto onde arrancará todo un longo paseo peonil que, xa coa
Praza de Galicia pechada ao tráfico, continuará por Calvo Sotelo e Ulla ata chegar á Porta do
Sol.
A obra suporá gañar para o peón unha céntrica superficie urbana duns 4.000 metros
cadrados. Coma se vén perfilando meses atrás, a actuación non queda só na Praza de Galicia,
senón que se expande cara os entronques coa malla urbana na que se asenta, chegando así
á praza onde conflúen as rúas 56 e San Paio -onde agora se localiza a escultura da Rapa das
Bestas-, á Rúa Marqués de la Vega de Armijo, Pérez Viondi e Don Nicolás.

• Os militantes que cumpran os requisitos estatutarios e de antigüidade disporán dun prazo de dez días, ata o luns 29, para formalizar a súa candidatura coa presentación dun mínimo de 60 avais
• O Comité Organizador do Congreso estará presidido por Juan Constenla e do mesmo formarán parte Alberto Blanco e Rocío Blanco

.-

A Xunta Local do PP a Estrada mantivo onte á noite un encontro, encabezado polo conselleiro José López como presidente da agrupación, no que decidiu a convocatoria do 11º Congreso Local do partido, que se celebrará o próximo domingo 19 de outubro no anexo do polideportivo municipal Coto Ferreiro baixo o lema “A Estrada das oportunidades”.

Neste encontro interno, o ex alcalde e responsable autonómico cesou na súa responsabilidade orgánica municipal e deixou a dirección do PP local, de xeito provisional e durante este mes ata a celebración deste cónclave, no Comité Organizador do Congreso (COC), que estará presidido polo secretario xeral local e ex tenente de alcalde, Juan Constenla, e do que tamén formarán parte o concelleiro Alberto Blanco como secretario e Rocío Blanco como vogal.

Ademais, tamén se aprobou o cronograma da convocatoria, que comeza hoxe mesmo coa apertura dun prazo de dez días, ata o luns 29 de setembro, para a recollida de avais por parte das persoas interesadas en formalizar a súa candidatura. Poderán optar á presidencia do PP da Estrada todos os militantes que cumpran os requisitos estatutarios e de antigüidade e que reúnan alomenos 60 apoios válidos.

A proclamación de candidaturas formalizarase, por parte do COC, entre o 30 de setembro e o 1 de outubro e posteriormente abrirase outro prazo de dez días para a realización dunha campaña electoral interna entre a militancia. Finalmente, habilitouse o 13 de outubro como data límite para que os candidatos proclamados presenten a súa proposta de xunta local, que estará conformada por un máximo de 20 vogais e que quedarán validadas, por parte do COC e se cumpren os requisitos, ao día seguinte.

Deste xeito, o PP da Estrada volverá a celebrar un proceso congresual tras o realizado o 12 de xuño de 2010 baixo o lema “Unión, proxecto e xestión” e no que saíu elixido como presidente local José López Campos, que menos dun ano despois recuperaba a Alcaldía para os populares locais tras obter a maioría absoluta nos comicios de 2011 e que dirixíu o partido nos últimos quince anos.

 A firma Martínez e Neira traballa xa nesta actualización do recinto para
poder abrir novamente á visita o tamén chamado Museo do Pobo
Estradense.
 Estiman que a obra poida quedar rematada no prazo aproximado dun
mes.
 A empresa aproveita o bo tempo para axilizar os traballos no exterior,
tanto nas fachadas coma no patio do inmoble.
 Unha vez rematadas estas actuacións, arrancará a construción do
discurso expositivo.

O alcalde da Estrada, Gonzalo Louzao, desprazouse a
primeira hora desta mañá ata o Museo do Pobo Estradense, que leva o nome de Manuel
Reimóndez Portela, onde hoxe deron comezo as obras de reforma anunciadas polo Concello
para avanzar cara a reapertura destas instalacións ao público, logo de máis dunha década de
peche continuado.
O rexedor departiu cos traballadores da firma Martínez e Neira, que aproveitarán o bo
tempo para apurar as obras na zona exterior do museo, emprazado no edificio histórico
do antigo Matadoiro Municipal. Deste xeito, os operarios estiveron hoxe no patio do
inmoble e tamén facendo limpeza das fachadas.
Esta actuación, que será sufragada polo Concello da Estrada cun investimento de 50.000
euros, supón unha actualización e posta a punto do recinto tras tanto tempo pechado,
se ben é certo que desta volta se aposta por que o acondicionamento chegue tamén ao
patio exterior para que, cando se produza a pronta reapertura que se espera, este pase a
integrarse ao percorrido expositivo.
Como xa se ten avanzado, no exterior o proxecto contempla a restauración das
carpintarías de madeira mediante un decapado do verniz existente en mal estado, con
posterior lixado, novo vernizado e selado. Pintaranse as reixas situadas tanto nas
carpintarías como no peche da parcela e limparanse os muros de pedra do edificio e do

peche da propiedade. Aproveitarase a obra para a retirada de sedimentos da zona
empedrada a sementarase herba na área axardinada.
A intención de empresa é aproveitar as condicións meteorolóxicas favorables para
traballar fóra, deixando contra o final as obras do interior. Estas pasan pola substitución
do cadro eléctrico; lixado e empastado de paramentos interiores deteriorados pola
humidade; aplicación de pintura plástica satinada e a formación dun falso teito de cartón
xeso no despacho situado na planta alta.
O alcalde calculou, tras visitar os traballos, que a actuación podería quedar completada
no prazo aproximado dun mes.
Unha vez rematadas estas obras, arrancará a construción do discurso expositivo, que
estará centrado na historia da Estrada, nas tradicións estradenses e na Estrada dos
séculos XIX e XX, segundo ten detallado o propio Louzao Dono.
O Museo do Pobo Estradense trasladouse ó edificio que ocupa actualmente no ano
1996. Nos últimos anos o inmoble foi obxecto dunha actuación de mellora estrutural e
de renovación da cuberta. Agora, ao obxecto de proceder á apertura do museo ao
público, xurde a necesidade de realización dalgunhas actuacións menores tanto no
interior como no exterior do inmoble para garantir o óptimo estado de conservación da
obra e que estas instalacións volvan a abrir as súas portas