A Estrada na Rede

 Da man de Fundación Amigos de Galicia e Política Social, estas sesións
están fixadas nos xoves 2 e 9 de outubro e nos venres 3 e 10.
 Entre os contidos estará como usar o caixeiro automático, unha
máquina de quendas nun centro de saúde, o teléfono móbil ou
aplicacións como a do Sergas.

O Concello da Estrada, en colaboración coa
Fundación Amigos de Galicia e a Consellería de Política Social, promove a posta en
marcha do programa “Mellor Acompañad@”, de promoción do emprego das
Tecnoloxías da Información e a Comunicación (TIC) entre as persoas maiores. Está
dirixido a persoas que viven en situación de soidade, proporcionándolles un apoio y
fomentando o envellecemento activo, da man tamén da sociabilización e a
dixitalización.
A actividade desenvolverase os xoves 2 e 9 de outubro e os venres 3 e 10 do mesmo mes,
en todas as xornadas en horario matutino, de 10.00 a 12.30. A formación realizarase nas
oficinas de Aestradadixital, situadas no número 94 da Avenida Benito Vigo.
As inscricións poden realizarse xa no departamento de Servizos Sociais do Concello da
Estrada, ata completar as prazas de matrícula. O Concello volve apostar por esta
convocatoria tras o éxito acadado por edicións anteriores.
Independencia dixital
E esta unha formación dirixida a fomentar a independencia dixital das persoas maiores,
buscando que poidan levar a cabo as súas tarefas de maneira autónomo. Deste xeito,
estes obradoiros contan cun simulador de caixeiro automático bancario e teléfono móbil
para que, de forma práctica, o alumnado poida experimentar unha aprendizaxe
significativa e interiorizar as actividades propostas. Son supostos tan habituais como o
de solicitar unha cita médica, agardar quenda no seu centro de saúde, sacar diñeiro no
caixeiro, actualizar a súa cartilla ou manexar un teléfono móbil.

Polo tanto, máquina de quendas, teléfono móbil, caixeiro automático, a aplicación do
Sergas, Chave 365 ou outros trámites figurarán como principais contidos destas sesións
para familiarizar aos maiores na Estrada co uso das TIC no seu día a día.

O concelleiro delegado de Servizos Municipais,
Óscar Durán, informou hoxe do corte no subministro de auga que experimentará o
vindeiro luns, 15 de setembro, o polígono industrial de Toedo. Esta interrupción no
abastecemento obedece aos traballos para a instalación dun contador de agua no
principal parque empresarial do municipio estradense. Será, ademais, a primeira
actuación do plan de sectorización que o Concello da Estrada comenza a executar na
rede pública de distribución de auga, en cumprimento dunha normativa europea
-replicada por mandato estatal e indicación autonómica- que busca garantir a eficiencia
nas traídas de auga.
Durán trasladou hoxe, para coñecemento de todos os empresarios asentados neste
polígono, que o corte do abastecemento arrancará ás 20.00 horas, estimando que o
servizo poida quedar restablecido arredor das 22.00. Dende o goberno escolleuse esta
franxa horaria coa intención de que o impacto da instalación deste contador sexa o
menor posible na actividade diaria do parque empresarial. Este dispositivo controlará o
funcionamento da rede en todo o polígono, rexistrando os consumos e servindo de
ferramenta de control ante posibles fugas.
O concelleiro de Servizos Municipais sinalou que a sectorización da rede continuará por
outros puntos do municipio, sendo a Zona Deportiva a seguinte na que se instalará un
destes dispositivos de control. “Iremos incrementando esta sectorización de xeito
progresivo, a través de novos contadores e de sistemas de apertura e corta de auga”,
apuntou Óscar Durán.

O edil detallou tamén que o obxectivo desta medida é chegar a un coñecemento máis
profundo da distribución da auga. “Se sabemos a auga que sae de estación de
tratamento temos que saber a auga que se consume”, explicou. Seguidamente, dixo que
a normativa esixe ter o control sobre o 75% da auga distribuída, de xeito que no se
supere o 25% de incontrolado.
No marco destas medidas, o Concello irá instalando, de xeito progresivo, contadores de
auga en todos os edificios municipais, nun intento por incrementar todo este control no
servizo en aras a acadar unha maior eficiencia da rede de abastecemento pola vía de ter
máis definidos os consumos e controladas as fugas.
Remarcou hoxe Óscar Durán que esta sectorización da traída estradense ten un carácter
obrigatorio. Sinalou que, no caso do polígono industrial de Toedo, as tarefas
programadas para o vindeiro luns teñen tamén como cometido realizar un control da
presión da agua. Isto último ponse ao servizo de intentar evitar as roturas por presión.

• Trátase dun programa que pretende fomentar e apoiar a creación artística entre a mocidade galega
• Dende a súa creación, o certame repartiu máis de 600 premios por valor de preto de un millón de euros

O delegado territorial da Xunta en Pontevedra, Agustín Reguera, informou esta mañá, xunto á directora xeral de Xuventude, Lara Meneses, sobre a nova edición do certame Xuventude Crea, que este ano celebra a súa 16º edición.

Trátase dunha iniciativa que ofrece á mocidade de entre 16 e 30 anos a oportunidade de mostrar o seu talento artístico en moi diversas disciplinas funcionando como un escaparate e canle de divulgación para dar a coñecer as súas propostas.

O certame pretende estimular e apoiar a imaxinación, a creatividade e a innovación, ademais de actuar como estímulo económico para a xuventude. O prazo de presentación de solicitudes, que se realizan preferiblemente a través  da sede electrónica da Xunta, remata o 29 de setembro.

O Xuventude Crea 2025 contará con 16 categorías, entre elas: artes plásticas (modalidades de pintura e escultura), arte urbana, banda deseñada, cociña, creación de contido, creación de videoxogos, danza moderna, deseño de xoias, DJ, fotografía, moda, música, novela curta, poesía, teatro e videocreación. Por cada categoría, os premios económicos serán de 2.000€ para o primeiro, 1.500€ para o segundo e 1.000€ para o terceiro. Ademais, haberá un premio especial de 1.000€ para a modalidade de música clásica na categoría de música e poderanse outorgar mencións de honra a aquelas obras que consigan chegar á fase final.

Ademais do premio económico, os gañadores terán a posibilidade de entrar na selección dun programa de formación e mentorizaxe para poñer en marcha o seu proxecto empresarial, ademais de participar en importantes eventos de referencia no sector artístico tanto de carácter autonómico, nacional e internacional onde poderán expoñer as súas obras e difundir o talento da mocidade galega.

O delegado territorial aproveitou a súa intervención para destacar o “compromiso da Xunta coa promoción e o fomento do talento dos mozos e mozas” e sinalou que a  explosión creativa que se está vivir nos últimos anos en Galicia “é resultado da cultura do esforzo que define aos galegos, pero tamén dunha aposta decidida da Xunta polo sector cultural”.

Pola súa banda, Meneses lembrou que, dende a súa creación, “participaron neste certame máis de 5.300 mozos e mozas con case 4000 obras e proxectos creativos e repartíronse 633 premios por importe de 966.050 euros e máis de 80 mencións de honra”.

 Actuará nos elementos singulares que se conservaron na reforma e
peonalización das rúas Ulla e Calvo Sotelo, aplicando unha
restauración e fixando as dúas partes para evitar que xiren.
 Na travesía que une Irmáns Valladares con Manuel García Barros
tamén se actuará incrementando a potencia dos puntos de luz.
 En Justo Martínez melloraranse os farois do tramo que desemboca na
Praza da Constitución.

O Concello da Estrada ten pechada unha
inminente mellora nos farois ornamentais de catro céntricas rúas do casco estradense,
unha iniciativa que o alcalde da Estrada, Gonzalo Louzao, centrou hoxe na aposta polo
mantemento do mobiliario urbano como liña de acción imprescindible para a
conservación do espazo urbano.
A intervención realizarase en todos os farois do paseo peonil que conforman as rúas Ulla
e Calvo Sotelo, unindo a Porta do Sol coa Praza de Galicia. O alcalde puxo o acento en
que estes elementos, cunha estética que singulariza e identifica o espazo no que se
enclavan, foron conservados durante as obras de reforma e peonalización destas dúas
rúas, que pronto se colmatará coa remodelación e peche ao tráfico do entorno ao que os
estradenses lle conceden o nome oficioso de Praza da Farola.
“Imos reformalas, a fixar os dous eixos, a parte superior e o pé do farol para que non se
produzan xiros dos distintos elementos”, detallou o rexedor, que engadiu que estes
traballos se acompañarán de obras de conservación, tanto de lixado como de pintado,
para facer unha restauración e posta a punto deste mobiliario.
As actuacións chegarán tamén á Rúa Justo Martínez, concretamente no treito
comprendido entre Calvo Sotelo e a Praza da Constitución. Neste tramo farase tamén un
traballo de restauración dos distintos elementos existentes.
Por outro lado, tomando como referencia o modelo de intervención aplicado cos farois
da Praza da Inmaculada, co que se restauraron os pés e se incorporaron novos báculos
ornamentais cunha maior potencia lumínica, contémplase a substitución da parte

superior dos seis puntos de luz existentes na travesía que conecta as rúas Irmáns
Valladares e Manuel García Barros, ademais da restauración dos propios pés.
Praza da Inmaculada
O pasado mes de xuño o Concello efectuou xa cambios na iluminación da Praza da
Inmaculada e o seu entorno, intervención consistente na renovación dos deteriorados
puntos de luz para atender as peticións da cidadanía de que a zona tivese unha maior
intensidade lumínica. A medida afectou a todas as luminarias da praza, continuando
polos puntos de luz ancorados na zona de vivendas máis próxima ao templo parroquial
de San Paio, así como nas dúas marxes da rúa que limita coa urbanización de vivendas
unifamiliares e que arranca no cruce coa Rúa Catro Camiños.
Neste caso buscáronse farois que armonizasen coa contorna e o patrimonio existente.
Instaláronse bombillas led para mellorar, asemade, a eficiencia enerxética

 O alcalde da Estrada recoñece que existe demanda no Concello e
preguntas na Consellería de Economía para a instalación industrial
neste municipio.
 Sinala o carácter estratéxico de planificar a expansión do polígono de
Toedo situando ao seu pé a chegada dunha autovía, libre de peaxe, que
conectará A Estrada de xeito moi áxil coa capital galega, un aeroporto, e
unha estación de tren.
 Pon en valor un investimento de 13 millóns de euros para impulsar este
“piar estratéxico na Estrada das oportunidades”.

No día despois de que o Consello da Xunta dese un
paso decisivo cara a ampliación pública do polígono industrial de Toedo, o alcalde da
Estrada, Gonzalo Louzao Dono, confirmou o interese que tanto dende o Concello da
Estrada como dende a Xunta de Galicia se está constatando para o asentamento nas
novas parcelas proxectadas no principal parque empresarial deste municipio. “Hai
demanda no Concello e hai tamén preguntas na Consellería de Economía, polo que é un
dos polígonos estratéxicos para o goberno galego”, apuntou o rexedor, aliñándose coas
declaracións nas que o propio presidente autonómico, Alfonso Rueda, recoñecía este
mesmo interese empresarial na Estrada.
“Esa demanda de solo no noso concello foi escoitada reforzando eixos fundamentais:
por un lado as comunicacións e, por outro, novas ofertas laborais a través da ampliación
pública da superficie industrial, dúas oportunidades para o asentamento de poboación
que invitan a traballar na creación de vivenda, por iniciativa pública e privada”,
continuou. “Para que haxa demanda de vivenda ten que haber oferta laboral”, sintetizou
Louzao Dono, que puxo o acento no carácter estratéxico de planificar a ampliación do
polígono de Toedo situando ao seu pé a chegada dunha autovía libre de peaxe que
conectará A Estrada de xeito moi áxil coa capital galega, un aeroporto e unha estación de
tren.
Tras sinalar que a ampliación promovida por la sociedade Xestión do Solo de Galicia
(Xestur) suporá que o polígono de Toedo medre en máis dun 80%, o xefe do executivo

local fixo fincapé en que este proxecto “é un piar estratéxico para esa A Estrada das
oportunidades da que falamos e temos que celebrar que a ampliación deste polígono
industrial vai dando os seus pasos”. “É a colmatación a un proceso de competitividade de
todos os concellos e é a forma de dotar ao municipio estradense das ferramentas para
que o crecemento da nosa capacidade industrial e laboral sexa o axeitado”, afirmou
Louzao.
O rexedor asumiu que son moitos os territorios e as demandas, polo que quixo poñer en
valor a aposta e a planificación que se está facendo na Estrada, contemplando un
orzamento de 13 millóns de euros para impulsar a expansión pública deste parque
empresarial. Con esta nova fase de 157.000 metros cadrados o polígono acadará unha
superficie total de 347.239.
Plan Estruturante
O Consello da Xunta tomou este luns razón da aprobación inicial do Plan Estruturante de
Ordenación de Solo Empresarial (PEOSE) para a segunda ampliación do parque
empresarial de Toedo. Coa iniciativa de expandir este polígono, o goberno galego
atende a demanda da comarca de Tabeirós-Terra de Montes de contar con máis solo
empresarial para impulsar a implantación de novas industrias na zona e para que as
empresas que xa están alí implantadas poidan aumentar as súas capacidades
produtivas.
Esta actuación enmárcase na estratexia da Xunta de Galicia de crear un tecido
empresarial forte e competitivo, dotándoo de máis solo empresarial e coa base nun
modelo de desenvolvemento industrial ordenado, eficiente e respectuoso co medio
ambiente, que atraia investimentos, favoreza a creación de emprego e garanta o
equilibrio territorial.

“Na semana do 15 de setembro será protagonista o
inicio das esperadas obras do Museo Reimóndez Portela para a sua pronta reapertura.
Falamos de obras que teñen que ver coa mellora das súas fachadas, dos paramentos
exteriores, tamén da conservación das paredes interiores, nova instalación eléctrica e
mellora das diferentes carpinterías”. O alcalde da Estrada, Gonzalo Louzao Dono,
anunciaba así esta fin de semana o inminente inicio dos traballos necesarios para
afrontar a reapertura dunha infraestrutura cultural que leva máis dunha década
pechada ao público.
“Son unhas obras que durarán varias semanas e que teñen asociado un importe de
50.000 euros”, continuou Louzao, que informou de que a actuación no tamén
denominado Museo do Pobo Estradense contará coa colaboración da Consellería de
Cultura. “É o impulso necesario para que moi pronto A Estrada volva ter este céntrico
espacio adicado á súa cultura e á súa historia, dous aspectos que centrarán o discurso
museístico”, dixo o rexedor.
Aínda que o arranque das obras demorouse levemente con respecto aos tempos
inicialmente previstos, a actuación ten xa, pois, un horizonte claramente definido e
chega despois de que nos últimos meses se estivera realizando nestas instalacións
municipais a retirada de diverso material que non era susceptible de someterse ao
proceso de catalogación e ordenamento de fondos que se realizará tras a execución das
reformas agora previstas.
Posta a punto
Os traballos supoñen unha actualización e posta a punto do recinto tras anos de peche
continuado, se ben é certo que desta volta se aposta por que o acondicionamento

chegue tamén ao patio exterior para que, cando se produza a pronta reapertura que se
espera, este pase a integrarse ao percorrido expositivo.
Máis polo miúdo, no exterior contémplase a restauración das carpintarías de madeira
mediante un decapado do verniz existente en mal estado, con posterior lixado, novo
vernizado e selado. Pintaranse as reixas situadas tanto nas carpintarías como no peche
da parcela e limparanse os muros de pedra do edificio e do peche da parcela.
Aproveitarase a obra para a retirada de sedimentos da zona empedrada a sementarase
herba na área axardinada.
Xa no interior, as obras contemplan a substitución do cadro eléctrico; lixado e
empastado de paramentos interiores deteriorados pola humidade; aplicación de pintura
plástica satinada e a formación dun falso teito de cartón xeso no despacho situado na
planta alta.
Neste edificio dende 1996
O Museo do Pobo Estradense trasladouse ó edificio que ocupa actualmente no ano
1996, na sede do antigo Matadoiro Municipal. Nos últimos anos o inmoble foi obxecto
de varias actuacións de mellora estrutural e de renovación da cuberta, creándose zonas
novas, como a galería perimetral da nave central.
Aínda que non se ten unha cifra exacta das pezas que integran os fondos do museo que
leva o nome do humanista Manuel Reimóndez Portela, a última estimación barallada
pola dirección apunta a que pode estar por encima das 2.000. Entre elas figuran moitas
etnográficas (algunhas vencelladas ao traballo do liño, á labranza ou á tornaría),
arqueolóxicas, pictóricas ou fotográficas.
Contan as instalacións con cadros de Laxeiro, Colmeiro, Castelao, Miguel Docampo,
Xesús Muras, Fragoso, Ángel Lemos de los Reyes, Morales, Ramiro Cimadevila, Jano
Sanmartín, Susana Pazo Maside, Santiago Tato, José María Barreiro ou Daniel Cifuentes.
No fondo fotográfico existen negativos de Ovidio Piso ou Celestino Fuentes, entre
outros. Súmanse ao legado que agora poderá exporse novamente maquetas a escala da
antiga e desaparecida igrexa ou o Cruceiro da Estrada.

O Concello da Estrada estivo esta tarde
representado en Vigo no acto de presentación da Copa 5×5 Balonmán na Rúa,
organizada pola Deputación Provincial de Pontevedra e a Federación Galega de
Balonmán. O evento terá catro sedes: Vigo, Redondela, A Estrada e A Cañiza.
O edil estradense de Deportes, Ismael Pena, asistiu ao evento, presidido pola
vicepresidenta da Deputación, Luisa Sánchez. O acto celebrouse no paseo das Avenidas,
fronte ao edificio do Tinglado do Porto de Vigo.
No caso da Estrada, a actividade está programada para os días 11 e 12 de outubro.
Ismael Pena incidiu no que supón para o municipio acoller unha proba do Circuito
Provincial 5×5 de Balonmán. “É unha gran oportunidade para darlle visibilidade ao
balonmán, sacando este deporte dos pavillóns, para achegalo a todos os públicos na rúa,
montando unha gran festa lúdica e deportiva”, dixo.
“Agardamos que este evento nos dea ese empuxón definitivo para asentar o balonmán
na comarca de Tabeirós-Terra de Montes e, para iso, que mellor escaparate que ubicalo
na Praza da Constitución, no centro da vila”, declarou Ismael Pena, que sinalou que o
Concello tenta implantar esta disciplina dentro da ampla oferta deportiva coa que conta,
traballando para iso da man da Federación Galega de Balonmán dentro do programa de
Escolas Deportivas Municipais e tamén poñendo á disposición desta entidade as
instalacións municipais para o traballo das súas seleccións.
O concelleiro de Deportes quixo tamén agradecer á Deputación de Pontevedra a súa
aposta por este tipo de eventos, que achegan aos Concellos disciplinas que dan moita
visibilidade ao deporte base e animan á participación cidadá.