A Estrada na Rede

O IES Nº 1, ao longo desta semana, estanse a desenvolver unha serie de actividades encamiñadas a concienciar o noso alumnado da gravidade da violencia de xénero, que conclúe o 25 de novembro cunha concentración  na que participamos os tres IES da Estrada.

O noso Centro deseñou unha pegatina, que se reparte entre toda a comunidade educativa, como sinal identificativo da nosa protesta contra esa lacra.

Por outra banda, recóllense as noticias que, nos últimos meses, deixan patente o incremento deste grave problema social, e que se expoñen  nun panel situado na entrada do centro.

Ademais, co lema “Nin unha morta máis, nin unha muller menos”, montamos unha exposición de zapatos vermellos que denuncian todas as mortas que van no 2015.

Así mesmo, rendemos unha homenaxe a cada muller asasinada neste ano, deixando constancia do nome, idade, data e lugar en que se cometeu o crime.

Na Biblioteca armouse unha mesa con todo o material do que se dispón arredor deste tema. Por outra parte, o alumnado esta a realizar traballos diversos, tales como carteis, relatos..que  se colgan no blog do do centro.

IES Nº1

A agrupación estradense Tequexetéldere está a realizar clases de baile nos institutos locais, IES Antón Losada, IES García Barros e IES Nº1, para achegar aos xóvenes o baile tradicional galego.

Esta iniciativa que naceu hai xa catro anos ampliouse tamén durante o mes de outubro aos centros públicos da vila, Figueroa e Pérez Viondi.

Na imaxe alumnos do Antón Losada no comezo das clases co monitor Eduardo Rial.

Este mes os alumnos do cuarto obradoiro de emprego consecutivo que consegue A Estrada comezaron os traballos para converter o edificio do multiusos na Casa da Música.

As obras comezaron pola primeira planta do edificio onde estaba aloxada a antiga biblioteca. Esta reforma poderá garantir a continuidade do conservatorio ao dotalo de novos espazos demandados pola Inspección da Consellería.

Ademais das reformas do edificio tamén se realizará polo propio obradoiro de emprego unha praza exterior unha vez se traslade o equipo de Emerxencias as súas novas instalacións en Toedo. Así no lo explicaba o alcalde, José López, tras a supervisión dos traballos acompañado do Primeiro Tenente de alcalde, Juan Constenla, e o director do obradoiro, Ignacio Taboada.

Este obradoiro de albanelería trátase do primeiro dirixido para menores de 25. Os 15 alumnos formaranse grazas aos 131.000€ aportados polo Plan de Garantía Xuvenil durante 6 meses.