OS TÉCNICOS DO CONCELLO EMITEN UN INFORME DESFAVORABLE AOASENTAMENTO DUNHA GASOLINEIRA NA ÁREA DA BAIUCA

 A resolución apóiase fundamentalmente en dous eixos: que o PXOM
prohíbe especificamente este uso neste solo e na consideración de que
neste caso non se entende acreditado que sexa aplicable o Real Decreto
6/2020.

O Concello da Estrada remitiu hoxe o informe
solicitado pola Consellería de Medio Ambiente sobre a compatibilidade urbanística do
proxecto que contempla a implantación dunha gasolineira na zona da Baiuca, en
cumprimento co trámite medioambiental no que está inmersa esta iniciativa
empresarial. Os técnicos emitiron un informe desfavorable á implantación do uso
proxectado nesta parcela.
A xeito de contexto, no marco do Plan Xeral de Ordenación Municipal (PXOM) da
Estrada, a proposta en cuestión pretende asentarse nunha parcela do Solo Urbano
Consolidado (SUC) na que resultaría de aplicación a ordenanza número 2, de edificacións
en bloque aberto. Neste ámbito os usos permitidos, segundo o artigo 42 da normativa
do plan estradense, son os residenciais (aplicacións segunda, terceira e sexta) ou o uso
comercial (na cuarta), neste caso en exclusivo. As estacións de servizo estarían reguladas
na categoría quinta, que se atoparía entre os usos non permitidos dentro da ordenanza
2. Polo tanto, o PXOM da Estrada recollería unha prohibición expresa ante este
asentamento, porque as estacións de servizo non estarían dentro da ordenanza de
aplicación neste solo.
Porén, o que acontece é que existe un Real Decreto do Estado (6/2020 do 23 de xuño)
que recolle que aos establecementos comerciais, se existen como base, pódeselle
integrar unha estación de servizo como equipamento. Se este Real Decreto fora de
aplicación neste caso específico, podería facer viable o asentamento con independencia
do recollido no planeamento urbanístico municipal.
Partindo deste contexto, o Concello ten hoxe sobre da mesa o informe desfavorable dos
técnicos de Urbanismo para a instalación desta gasolineira na Baiuca. A resolución
apóiase fundamentalmente en dous eixos: por un lado, a prohibición recollida no PXOM
e, por outro, a consideración de que neste caso non se entende acreditado que sexa
aplicable o Real Decreto 6/2020.
Interprétase que para isto último debería quedar acreditado que a estación de servizo
se proxecta na mesma parcela (ou agrupación de parcelas) na que se asenta o
establecemento comercial que pretende servir de base para poder acollerse ao artigo
terceiro do Real Decreto e atestiguar que a gasolineira se integra como equipamento de
dito local comercial.
Numerosas alegacións
Tendo en conta que o prazo de exposición pública remata mañá, 22 de outubro, o
Rexistro Xeral do Concello da Estrada estivo ao longo de toda esta mañá recibindo
numerosas alegacións relativas ao proxecto desta gasolineira.
O alcalde estradense, Gonzalo Louzao, asume a sensibilidade e preocupación que esta
iniciativa espertou entre moitos cidadáns pola proximidade da parcela en cuestión á
escola infantil da rede autonómica da Galiña Azul e tamén a toda a zona residencial e de
servizos públicos da Baiuca, con edificacións como o centro de saúde ou os xulgados.
Con todo, o mandatario recoñeceu que o papel do Concello neste asunto foi o de
informar e deixar que fosen os técnicos os que se pronunciasen. Incidiu en que a
cuestión se analizou con todo o rigor e o respecto que deben acompañar ao
procedemento urbanístico.
Dende a administración local deuse hoxe traslado, en tempo en forma, ao informe
requirido por Medio Ambiente.

Publicado en Portada | Deja un comentario

COTO MANGUELO, LEILÍA E EFERRO, PREMIOS SAN MARTIÑO DENORMALIZACIÓN LINGÜÍSTICA NO CONCELLO DA ESTRADA

 Os galardóns, que dende hai décadas recoñecen o traballo a prol da
lingua galega, entregaranse o vindeiro 12 de novembro no Teatro
Principal.

Os integrantes do Padroado dos Premios San
Martiño de Normalización Lingüística, impulsados polo Concello da Estrada, veñen de
reunirse para emitir o fallo da convocatoria deste ano. Hoxe mesmo deuse a coñecer a súa
decisión de galardoar neste 2026 a Asociación Cultural Coto Manguelo, Leilía e a empresa
Eferro. A entrega realizarase o vindeiro 12 de novembro, ás 20.30 horas, no Teatro Principal.
Estes premios estradenses galardoan dende hai décadas o traballo a prol da lingua galega
en tres ámbitos: na comarca de Tabeirós-Terra de Montes, no ámbito galego e no contexto
de toda unha vida. O xurado estivo conformado por Lucía Seoane Rosende, Iván Sanmartín
Eirín, José Parada Caramés, Henrique Vázquez Pernas, Xosé Lueiro Lemos e María Sanmartín
Ruzo, esta última exercendo como secretaria.
• PREMIO SAN MARTIÑO COMARCA TABEIRÓS-TERRA DE MONTES: Asociación
Cultural Coto Manguelo.
Fundada a comezos do ano 2000, foi durante dúas longas décadas unha das
entidades sen ánimo de lucro máis activas do rural estradense. Co obxectivo de
dinamizar a vida veciñal e promover a cultura e a lingua no ámbito rural, e
impulsada por unha nova directiva de mozos e mozas despois de varios anos de
inactividade, a asociación volveu a convocar proxectos coma o festival Manguelo
Folk, a Mostra de Teatro Afeccionado de Orazo da que se cumpren 18 edicións,
andainas micolóxicas e distintos obradoiros relacionados co folclore e a cultura
tradicional.
• PREMIO SAN MARTIÑO GALICIA ENTEIRA: Leilía
Fai dous anos que o histórico grupo de pandereteiras Leilía decidía poñer o
broche final a unha traxectoria de tres décadas e media sobre os escenarios que
comezou no ano 1989. Unha agrupación pioneira da música tradicional e folk de
Galicia que percorreu as aldeas recompilando pezas tradicionais que formaron
parte dos seus concertos e de discos como I é verdade i é mentira,
Consentimento, Son de Leilía, ou Vidas cantadas. Con este galardón, as persoas
que integran o xurado destes premios veñen saldar unha débeda contraída con
un dos proxectos musicais máis importantes da historia da música galega.
• PREMIO SAN MARTIÑO TODA UNHA VIDA: Eferro.
A firma de artesanía crucense Eferro, hoxe liderada pola artesá Elena Ferro
Lamela, destaca polo seu traballo cun produto moi representativo da tradición
rural: os zocos de madeira. Esta empresa familiar leva en vigor tres xeracións
dende que a fundara seu avó no ano 1915, converténdose nunha ferramenta
indispensable contra a despoboación e infravaloración do medio rural e na
defensa da cultura popular. Elena Ferro soubo recoller o legado familiar e, con
innovacións constantes, adaptarse ás necesidades e tendencias do mercado
comercializando os seus produtos en países como Alemaña, Estados Unidos ou
Nova Zelanda. Foi recoñecida co Premio Nacional de Artesanía no ano 2019.

Publicado en Portada | Deja un comentario

Sinatura do acto de irmanamento entre os concellos da Estrada e Rianxo.

Celebrouse na Praza de Galicia, a carón da escultura que representa a familia Castelao-Pereira, nun 19 de outubro no que se cumpren 114 anos do casamento, nesta mesma contorna, da estradense Virxinia Pereira Renda e o rianxeiro Alfonso Daniel Rodríguez Castelao.

Publicado en Portada | Deja un comentario

A XUNTA DE GOBERNO APROBA A DISTRIBUCIÓN DE AXUDAS POR104.100 EUROS A 26 CLUBS E 8 DEPORTISTAS FEDERADOS

 A liña de subvencións a eventos e actividades deportivas, dotada con
outros 100.000 euros, permite respaldar 14 convocatorias desenvolvidas
no municipio.
 O Concello trasladará nos vindeiros días a resolución aos interesados,
que terán 10 días hábiles de prazo dende esta recepción para presentar
a correspondente documentación.

A Xunta de Goberno Local da Estrada aprobou na
súa sesión de hoxe a distribución das dúas liñas de subvencións deportivas, as
correspondentes a agrupacións e clubs deportivos sen ánimo de lucro e deportistas
federados e as destinadas a apoiar a realización de competicións e eventos deportivos.
Para estas dúas liñas reserváronse 204.100 euros.
No tocante á resolución das axudas a clubs e deportistas federados, dotadas cunha
partida de 104.000 euros, obtiveron achega un total de 26 entidades. Entre elas
distribuíronse 100.000 euros.
Atendendo ás bases reguladoras e aplicando os criterios de valoración establecidos nas
meses, obtiveron subvención Figueroa Estrada Pádel, ACD Veteranos Berres, Atletismo
A Estrada, Estrada Futsal, Sport Team Estrada, CD Estradense, Carracedo Competición,
CBD Sondodance, Asociación Sincroburbullas, Vea CF, Club Bádminton A Estrada, Escola
Estrada Fútbol Base, Estrada Fúbol Sala Feminino, Peña Ciclista Bikestrada, Club RC A
Estrada, Escudería San Paio, A Estrada Basket, Club Ximnasia Estrada, CAI A Estrada, CNS
A Estrada, A Cambadela Loita, Club Clicista Estradense, Club de Tenis RC, Club Tenis de
Mesa RC, Club Budoyama Karate e Judo Club Base.
A maiores, aprobouse a distribución de outros 4.100 euros entre oito deportistas
individuais.
No tocante ás subvencións a agrupacións e clubs deportivos sen ánimo de lucro para
competicións ou eventos deportivos realizados neste ano, resolveuse a concesión de
axudas para 14 eventos: AE League, Open Pesca Mosca, Raid Hípico do Salmón, VII
Torneo de Verán, Carreira da Sidra, Torneo Benxamín, Torneo Alevín, Campionato RC
1/8, Campionato Galego de Bádminton, Open Bandeiras Socorrismo, Triangular Concello
da Estrada, Torneo de Nadal de baloncesto, Gala Kyus (Judo Base) e Torneo de Pádel.
Acadado o acordo na sesión da Xunta de Goberno de hoxe, o Concello dará traslado da
resolución nos vindeiros días aos solicitantes. Nesta comunicación establecerase que
deberán presentar, para o abono da subvención, toda a documentación pertinente no
prazo de 10 días hábiles a contar dende a recepción deste traslado.
Axudas comedor
Noutra orde de cousas, a Xunta de Goberno Local aprobou tamén un decreto relativo ás
axudas de apoio á escolarización, en concreto vencelladas ao servizo de comedor
escolar. En virtude del, pagarase o cuarto e último prazo do curso 2025-2026 a 48
familias.

Publicado en Portada | Deja un comentario

UN ACTO DE IRMANDADE COA FESTA DO SALMÓN, NO PROGRAMA DOFESTIVAL PASABODEGHAS DE SARANDÓN PARA ESTE SÁBADO

 A iniciativa porá en valor a tradición gastronómica e vitivinícola de
ambas as dúas beiras do Ulla e servirá para promocionar a festa
estradense no marco dunha cita dedicada á música tradicional e á
cultura galega.
 Ademais de ambientación propia da festa, con máis de medio século de
historia, distribuiranse 4.000 pinchos para degustar o prato estrela da
gastronomía estradense.

O Concello da Estrada promocionará esta fin de
semana a súa Festa do Salmón no veciño municipio de Vedra, no marco dunha nova
edición do festival de música tradicional e cultural galega Pasabodeghas, que se celebra
en San Miguel de Sarandón. A iniciativa incorpora este ano un acto de irmandade coa
Festa do Salmón, proposta coa que se busca estreitar lazos entre dous territorios unidos
pola proximidade xeográfica, polo río Ulla e por unha tradición gastronómica e cultural
que forma parte da súa identidade.
O Pasabodeghas naceu coa vontade de recuperar espazos tradicionais para o encontro
e a convivencia, aproveitando os recursos que ofrece a contorna, desde as eiras e os
camiños ata as adegas. Nesta edición, na que as festas de interese turístico terán un
protagonismo especial, o festival abre as súas portas á celebración estradense cunha
proposta que combina promoción turística, cultura e gastronomía.
O acto de irmandade terá lugar na Adega de Daviña, ás 18.00 horas. Para a ocasión, o
espazo contará con elementos visuais que contribuirán a recrear a ambientación propia
da Festa do Salmón.
“Será un irmanamento co salmón da Estrada e o viño da Ulla”, explicou o alcalde,
Gonzalo Louzao, quen puxo o foco no carácter simbólico deste encontro entre dúas
tradicións vinculadas a territorios veciños. Por unha banda, a pesca do salmón, que
historicamente se potenciou na Estrada e que converteu o chamado rei do río nun dos
produtos máis representativos da gastronomía local; pola outra, o cultivo da vide nas
terras da Ulla, incluídas na subzona vitivinícola Ribeira da Ulla da Denominación de Orixe
Rías Baixas.
Ademais, no marco desta simbólica Festa do Salmón, en Vedra poderá degustarse este
sábado unha das expresións máis recoñecibles da cociña estradense, coa distribución de
4.000 pinchos do prato protagonista dunha celebración que conta con máis de medio
século de historia.
Deste xeito, esta irmandade entre o Pasabodeghas e a Festa do Salmón brindará a
ocasión de destacar os vínculos entre ambas as dúas beiras do río e reivindicar o valor
dos produtos locais como elementos de identidade e recursos para a promoción
turística.
A través desta colaboración, a Festa do Salmón terá presenza nun festival que aposta
pola recuperación das tradicións, pola posta en valor do patrimonio cultural e polo
aproveitamento dos espazos tradicionais como lugares de encontro.

Publicado en Portada | Deja un comentario

O CONCELLO ANALIZA O PROXECTO DUNHA GASOLINEIRA NA BAIUCAE PON OS SERVIZOS TÉCNICOS A AVALIAR POSIBLES ALEGACIÓNS

 O alcalde sinala que o expediente foi asignado hoxe aos técnicos
municipais para estudar a afección ás infraestruturas públicas da
contorna, amosando especial preocupación pola Escola Infantil.
 O goberno anima a veciñanza a participar no trámite de información
pública aberto pola Consellería de Medio Ambiente ata o 22 de outubro.

O Concello da Estrada atópase seguindo moi de
preto o proxecto presentado pola empresa Urban Strada SL para a instalación dun novo
servizo de subministro de combustible na zona da Baiuca, cuxa documentación
permanece actualmente en exposición pública e pode consultarse a través do portal da
Consellería de Medio Ambiente.
Coñecida a intención da empresa promotora e tras atender ao longo do día de hoxe
numerosos veciños e veciñas da contorna que manifestaron a súa inquedanza, o
Concello asignou esta mesma mañá o expediente aos servizos técnicos municipais. O
obxectivo é realizar un exame detallado do proxecto e determinar a posibilidade de
presentar alegacións municipais que protexan os servizos públicos e o interese xeral.
En palabras do alcalde da Estrada, o Goberno local está «moi pendente de informarse e
de informar á cidadanía sobre todos os detalles deste proxecto». «Comprendemos
perfectamente a preocupación veciñal, especialmente pola proximidade de
equipamentos tan sensibles como a Escola Infantil. Por iso, os nosos técnicos xa están
analizando a documentación ao detalle para valorar a formulación de alegacións»,
sinalou o rexedor.
Así mesmo, dende o Concello lémbrase que o trámite de avaliación ambiental
autonómico permanece aberto ata o vindeiro 22 de outubro. O alcalde animou á
poboación e aos colectivos afectados a participar activamente neste proceso. «É o
momento de que a cidadanía presente as alegacións que considere convenientes. É
fundamental para que o trámite aberto poida recoller todas as consideracións e teña en
conta todos os enfoques e sensibilidades antes de tomar unha decisión», dixo.
Así mesmo, dende o Concello sinalouse que a tramitación deste tipo de instalacións vén
determinada por un marco normativo estrito no que a marxe de actuación
administrativa está vinculada ao cumprimento da legalidade. Nese sentido, subliñouse
que a prioridade do Concello é ser máximo esixente no control técnico para garantir que
calquera actuación respecte de xeito escrupuloso a normativa vixente e o benestar na
contorna.

Publicado en Portada | Deja un comentario

MÁIS DO 50% DAS AXUDAS MUNICIPAIS PARA RESPALDAR A CREACIÓNDE NOVAS EMPRESAS VENCÉLLANSE A MULLERES E AO ÁMBITORURAL

Resolta a convocatoria deste ano, o Concello distribuíu máis de 21.000
euros entre os 19 proxectos empresariais solicitantes.
 A media da achega situouse nesta convocatoria nos 1.000 euros.
 Estas subvencións creáronse en 2011 para favorecer o emprendemento
no ámbito estradense e xa respaldaron máis de 300 iniciativas
empresariais no municipio.

O Concello da Estrada vén de resolver a convocatoria
deste ano das axudas municipais para a creación de empresas. Segundo os datos
aportados polo departamento de Emprego, máis do 50% das achegadas concedidas
correspóndense con mulleres e máis da metade vencéllanse a empresas do ámbito rural.
Cómpre lembrar que poden acollerse a estas achegas os empresarios individuais e as
pequenas e medianas empresas (Pemes), con independencia da súa forma xurídica, que
iniciasen a súa actividade empresarial entre o 1 de xaneiro e o 31 de decembro de 2026
(enténdese por inicio da actividade a alta no imposto de actividades económicas, o IAE).
Entre os requisitos establecidos na convocatoria figurou a esixencia de que a empresa
teña o seu domicilio fiscal e social na Estrada; que a empresa sexa viable técnica,
económica e financeiramente ou que sexa unha empresa de nova creación dentro dos
tres sectores produtivos. Considéranse incluídos neste concepto os traspasos de
negocios que non teñan vinculación familiar.
Nesta convocatoria resolvéronse favorablemente un total de 19 solicitudes, entre as que
o Concello distribuíu máis de 21.000 euros. Ademais, segundo os datos que baralla o
departamento, a medida da axuda concedida situouse nesta convocatoria arredor dos
1.000 euros por solicitante.
Creadas no 2011, estas achegas para favorecer o emprendemento no ámbito estradense
axudaron xa a máis de 300 proxectos empresariais. Estas axudas son a fondo perdido e
a súa finalidade é subvencionar parte dos gastos da posta en marcha e do
funcionamento da empresa.

Publicado en Portada | Deja un comentario