A Estrada na Rede

 Habitantes destas dúas parroquias están convocados para formalizar os
compromisos de conexión á nova rede de abastecemento.
 En Tabeirós están citados para os días 5 e 6 de xuño (xoves e venres) e en
Nigoi, para o luns 10.
 Os veciños pagarán a mesma contía polo enganche, asumindo as obras
no interior das súas propiedades. O Concello executará os traballos no
dominio público.

O primeiro desdobre da traída de agua do río Umia, a
rede de abastecemento ao casco urbano da A Estrada, abre unha nova fase. A rede
troncal está rematada e chega o momento de executar as acometidas. Para iso, o
Concello da Estrada cita a os veciños das parroquias de Tabeirós e Nigoi, as mesmas que
se beneficiarán do primeiro ramal desta rede no ámbito rural, a xornadas informativas
que arrancarán esta mesma semana.
As primeiras convocatorias serán la casa escola de Tabeirós, os días 5 e 6 xe xuño (xoves
e venres), en horario de 09.00 a 14.00. En Nigoi, os veciños están convocados para o luns
día 9, tamén na casa escola. A estas reunións están chamados os veciños que fixeron no
seu momento a correspondente solicitude de enganche a esta traída, de maneira que se
poida corroborar se formalizarán esta conexión á nova rede de abastecemento, sobre a
que se lle facilitarán todos os detalles.
Aínda que o Concello da Estrada pediu, nun primeiro momento, un listado dos
particulares interesados en servirse desta traída, o que se busca coas reunións que agora
se programan é efectuar un rexistro definitivo dos enganches, formalizando o
compromiso de conexión.
“É o primeiro paso para elaborar o proxecto definitivo e realizar as obras aproveitando
os meses de verán”, sinalou o alcalde, Gonzalo Louzao. Indicou que será o Concello o que
execute as obras necesarias para a fase das acometidas no dominio público. Neste
senso, o orzamento municipal para este 2025 reservou fondos necesarios para blindar a

execución destes traballos. Despois das reunións programadas nestas dúas parroquias
coñecerase o número exacto de acometidas que é preciso realizar, dato que arroxará a
valoración definitiva da obra.
Dende o goberno explícase que a taxa da conexión será exactamente igual para todos os
usuarios, con independencia dos metros de obra que sexa preciso realizar para levar a
traída ata as súas propiedades. Outra cousa serán as obras que os veciños teñan que
efectuar xa no interior da súa propiedade, que correrán pola súa conta.
Esta traída toma a auga dende o río Umia para servila aos fogares estradenses dende o
ano 2011. Tabeirós e Nigoi serán as dúas primeiras parroquias en beneficiarse desta rede
que atravesa a canalización. Foron meses de obras e máis de 800.000 euros de
investimento para practicar a ramificación dende a rede principal. Agora ábrese unha
nova etapa coas acometidas, despois da que chegará a revisión da rede viaria e o seu
arranxo nos lugares que tiveron e teñen que convivir coas obras.

A sala de xuntas do Concello da Estrada acolleu este
mediodía unha reunión da Mesa Local contra a Violencia de Xénero, que retoma a súas
reunións presenciais para coñecer persoalmente aos novos membros e para analizar os
datos que se manexan neste momento en relación ás situacións de violencia de xénero
no municipio estradense. Os datos aportados polos distintos compoñentes da mesa
permiten observar un incremento significativo das consultas e das denuncias neste
concello, un aumento que hai que entender ligado tamén a unha suba significativa do
coñecemento e do acceso aos recursos.
Na reunión de hoxe estiveron presentes a concelleira de Servizos Sociais, Amalia Goldar;
a xefa da Unidad de Violencia contra la Mujer, María José Rodríguez Pérez (en
representación da Subdelegación do Goberno); o Director Xeral de Loita contra a
Violencia de Xénero da Consellería de Política Social e Igualdade da Xunta de Galicia,
Roberto Barba Alvedro; unha unidade especializada de VIOGEN da Garda Civil; o xuíz do
Xulgado Número 1 da Estrada, Ricardo López; a traballadora social do Centro de Saúde
da Estrada, Milagros Núñez; as psicóloga e avogada do Centro de Información á Muller
(CIM) da Estrada; representantes do departamento de Servizos Sociais do Concello e
integrantes dos grupos da oposición municipal.
“Dende o CIM da Estrada temos claro que, en temos xerais, fomos incrementando o
número de consultas e tamén aumentou, ao longo dos anos, o número de mulleres
vítimas atendidas, pero non porque a violencia en si se vira incrementada senón porque
se incrementa a denuncia e o acceso aos recursos. As mulleres saben que teñen recursos
especializados os que acudir”, sinalou a directora do Centro de Información á Muller da
Estrada, Margarita de la Calle.

O dato aportado polo CIM estradense permite ver unha clara evolución na atención: se
en 2017 se atendeu dende este servizo a 98 mulleres, no último ano de referencia (2024)
foron un total de 179.
Dende a Subdelegación do Goberno aportouse outro dato relevante: neste intre existen
na Estrada 42 casos activos, aos que se lle fai o correspondente seguimento, en materia
de violencia de xénero.
A idea da Mesa Local contra a Violencia de Xénero é traballar conxuntamente, e sempre
coordinados a través do protocolo activo, para que as mulleres estean sempre ben
atendidas e se optimicen os recursos existentes

A Estrada está preparada para vivir unha fin de semana
marcadamente musical e con propostas pensadas para todos os públicos. Sen ir máis
lonxe, o domingo o municipio estreará o primeiro festival pop-rock infantil de Galicia,
bautizado como Festival dos Arreiriños. A carpa de gran formato da Praza da
Constitución engalanouse xa hoxe con bandeirolas de cores para conferir ao espazo
unha maior ambientación. Ademais, dende o departamento de Cultura do Concello da
Estrada anunciáronse novidades para o evento, caso da incorporación do Mago Teto e
dunha zona de merendas para goce do público asistente.
O festival arrancará o domingo ás 17.45, co Mago Teto exercendo como mestre de
cerimonias. Despois da súa primeira actuación, dará paso a Pakolas (18.00) para o
primeiro concerto da tarde. Tras el chegará Uxía Lambona (19.00) e, finalmente, Broken
Peach (20.00). O mago terá intervencións entre os concertos programados.
O recinto do Festival dos Arrieiriños, que celebra a súa primeira edición pero nace con
vocación de continuidade, terá zona de merenda, na que quedarán instalados, entre
outro, un posto de filloas (Capitán Filloa), un xeadeiro e unha rosquilleira.
• Pakolas (18,00). É un dos compositores e cantantes infantís que máis entrada ten
nos centros escolares de Galicia. Os seus libros CD utilízanse como material
didáctico no ensino. Paco Cerdeira, músico, compositor e produtor que está
detrás de Pakolas, leva dedicándose ao público infantil dende fai máis de 20
anos.
• Uxía Lambona (19.00). Esta banda de música infantil recolle os clásicos
populares galegos dándollo o seu toque particular, dende A Carolina en versión
rap ata O Jato rockeiro, pasando por outros temas tradicións cheos de
dinamismo. Baile, xogos e coreografías para os nenos, todo combinando con
moitas sorpresas.

• Broken Peach (20.00). O seu estilo vai dende o soul ata o rock, pasando polo
funky, o pop e ata o gospel. Se os nenos van gozar da súa actuación, nais e pais
non quererán perdela. Os seus vídeos son todo un fenómeno nas redes sociais e
as versións dos grandes éxitos da música que fan acumulan millóns de
reproducións.
Antes de estrear este festival, A Estrada vivirá o sábado un Orballo Cultural, unha aposta
incluída no programa de concertos do Xacobeo que trae á Praza da Constitución, dende
as 20.00 horas, a Su Garrido Pombo e o concerto de Xabier Díaz & Adufeiras de Salitre.

 O 40% dos asistentes apostaron por continuar coa súa formación.

A concelleira estradense de Emprego, Lucía Seoane, fixo
entrega hoxe de diplomas aos participantes en varias actividades formativas dentro da
Escola de Emprego impulsada no marco do acordo de colaboración do Concello da
Estrada e Acción Contra a Fame. Esta escola está dirixida a menores de 30 anos inscritos
no programa de garantía xuvenil. Neste primeiro semestre estiveron recibindo
formación en soldadura e traballos de almacén.
Segundo os datos aportados pola organización no momento de entregar os diplomas aos
participantes nestes cursos, nesta Escola de Emprego participan un total de 38 alumnos,
dos que un 80% remataron formación. A inserción no mercado laboral está xa no 20%
dos participantes. Ademais, sinalan que o 40% dos asistentes apostaron por continuar
formándose, a través de iniciativas como os certificados de profesionalidade, de xeito
que un importante número dos asistentes foron derivados aos correspondentes
servizos.
Os asistentes a este programa acudirán o vindeiro 4 de xuño a unha feira de emprego
específica de Acción Contra a Fame, de xeito que poidan continuar establecendo
contactos empresariais que axuden a incrementar a porcentaxe da inserción laboral.

 O remate do curso na Escola Municipal de Artes Escénicas (EMAE)
muda o formato, apostando por pasar das funcións a montaxes
completas e do traballo docente ao de dirección de escena.
 O grupo Picariños estrea o venres a obra “Do Revés”, continuando o
cartel o sábado con “Cronoestrada S.L.U”, roteiros teatralizados pola
vila e a historia da Estrada.
 Sairán da Praza da Feira en seis remesas e requiren retirada previa de
convite no departamento de Cultura.
 “Grease. O musical” chegará o sábado ás 20.00 e, o domingo, o Grupo
de Danza + estrea “As horas invisibles”.

Como broche para cada ano académico, a Escola
Municipal de Artes Escénicas (EMAE) da Estrada acostuma a programar, na recta final do
curso, unha serie de funcións que permitan ao alumnado experimentar o contacto co
público. Porén, este ano o centro formativo que dirixe Xosé Lueiro quixo dar un paso
máis, un no que se combine o feito de dar visibilidade ao traballo que se realiza na escola
cunha aposta por pasar da función á montaxe completa, do traballo docente ao de
dirección de escena.
A I Mostra de Artes Escénicas da Estrada, presentada esta mañá polo director da EMAE,
chega esta fin de semana e extrae do traballo académico diferentes montaxes que se
medirán co gran público. Para a primeira delas o pano do Teatro Principal subirá xa este
venres, ás 20.00 horas, co grupo de teatro Picariños. A súa será unha obra de teatrodanza que leva por título “Do revés”.
O sábado a convocatoria é dobre, case tripla. E é que o grupo de teatro EMAE ofrecerá
pola mañá o espectáculo “Cronoestrada S.L.U”, no que os actores e actrices brindan un
roteiro teatralizado por distintos espazos da vila e historia estradense. O punto de
encontro para os espectadores, case convertidos en grupos turísticos, será a Praza da
Feira. Avanzarán polo percorrido (Porta do Sol, Rúa Ulla, Rúa Calvo Sotelo e Praza de

Galicia) en hasta seis quendas de 15 persoas cada unha. As seis remesas sairán cunha
diferenza de 6 minutos, tres delas dende as 11.00 horas e outras tantas dende as 12.00.
Cada ruta terá media hora de duración.
Convites e puntualidade
Para participar nestes roteiros teatralizados é preciso retirar previamente convite no
departamento municipal de Cultura, escollendo entre a quenda das 11.00 e a das 12.00.
A maiores, pídese ao público que se presente con 10 minutos de antelación, rogando
total puntualidade, xa que a saída de cada un deles non pode demorarse para non
entorpecer as posteriores saídas programadas.
A Mostra de Artes Escénicas continúa ás 20.00 horas do sábado coa a estrea de “Grease.
O Musical”, do grupo de teatro Xuvenil da EMAE. Será unha aposta na que as
coreografías terán un peso especial para achegar ao público unha versión deste
coñecido título.
Xa o domingo, 1 de xuño, será o Grupo de Danza+ o encargado de baixar o pano da
mostra. Ás 19.00 horas, novamente no Teatro Principal, porá en escena “As horas
invisibles”.
Xosé Lueiro explicou hoxe que nalgunhas destas montaxes os propios directores se
converten en personaxes e interactúan co elenco. Ademais, sinalou que todos os
alumnos da EMAE serán público para as montaxes dos demais grupos. “É parte da aposta
por amosar o talento xurdido da escola. Foi unha elección formal, pero
conceptualmente vai ser moi interesante”, estimou o director da escola. “A figura do
profesor é substituída por un director ou directora de escena e aplícase todo o proceso
de montaxe, tanto dende o punto de vista técnico como da propia posta en escena. O
resultado é moito máis que unha exhibición”, sinalou.
Con 23 anos de rodaxe, a Escola Municipal de Artes Escénicas da Estrada está
conformada actualmente por uns 80 alumnos, entre os seus 4 grupos e a unidade de
produción. O centro leva un ano somerxido en apostas de gran calado. Foi o caso de
“Celtas con filtro”, “Os seráns en Vilancosta” ou unha zarzuela que chegará despois do
verán, en colaboración coa Coral Polifónica Estradense.

 A intención do executivo é aplicar “as máximas penalidades que permite
a lei”.
 Notificarase a decisión á concesionaria deste servizo para cumprir coa
quenda de alegacións

O executivo estradense resolveu hoxe en Xunta de
Goberno Local a imposición de penalidades á empresa que serviu a Festa do Maior o
pasado mes de marzo por “cumprimento defectuoso” do contrato de servizo. Ao remate
da sesión, o alcalde, Gonzalo Louzao Dono, sinalou que o acordo non vén máis que a
confirmar a intención anunciada xa no mesmo momento en que se produciron
incidencias no transcurso do referido almorzo. Nese intre, os departamentos municipais
de Secretaría e Intervención iniciaron estudos tendentes a repercutir o incumprimento
por parte das firma que gañara o concurso público, logo de que o menú non fora
suficiente para atender a preto de 50 das persoas congregadas e fose preciso buscar
comida a outro establecemento.
Gonzalo Louzao indicou que se aplicarán “as máximas penalidades que permite a lei”.
Sinalou que se lle notificará a decisión á empresa e, seguidamente, se abrirá un prazo
para a presentación das alegacións que estime convenientes.
No seu momento, dende o goberno local recoñeceuse que o da Festa do Maior foi un
“contrato suculento” que atraeu a máis empresas das habituais no proceso de licitación.
Asumiuse que a firma que resultou adxudicataria non incorreu en baixa temeraria e
gañou o concurso cunha diferenza de só 50 céntimos por menú con respecto á seguinte
licitante, que resultou ser unha empresa estradense.
“Non cumpriu e xa o dixemos dende o primeiro momento que tomaríamos medidas”,
manifestou o rexedor. “Os contratos están para cumprilos e, senón, existe un réxime
sancionar”, concluíu o alcalde.