A Estrada na Rede

 “Foi realmente impresionante”, sinala Óscar Durán, que hoxe puido
pulsar o retorno da celebración entre os hostaleiros.
 “Houbo moita xente pola rúa, dende a mañá ás 12 da noite. Nenos,
maiores, familias enteiras…parecían as festas patronais”, sinala.
 “A edición 50+1 saíu como se pretendía: cun salto de calidade e unha
organización que permitiu que A Estrada estivese chea dende o venres”

“A edición 50+1 saíu como se pretendía: cun salto de
calidade e unha organización que permitiu que A Estrada estivese chea dende o venres”.
Así resumiu hoxe o concelleiro de Promoción Económica, Óscar Durán, a marcha da LI
Festa do Salmón, que este domingo se converteu nunha das máis concorridas que se
recordan.
“Foi realmente impresionante”, incidiu Durán, que hoxe tivo ocasión de pulsar a
satisfacción entre os hostaleiros e que xa o domingo foi recollendo as boas críticas que
despertaron os cambios practicados no formato da principal celebración gastronómica
do Concello da Estrada. “Veu moita xente de fóra e moitos transmitiron a súa sorpresa
polo ambientazo que toparon”, sinalou o edil que se puxo ao fronte da organización.
“A hostalería estivo á altura”, continuou Durán, sumando á elevada afluencia a alta
calidade da degustación popular. “O público aplaudiu a variedade e cantidade de tapas”,
sinalou. As conversas mantidas na mañá de hoxe co sector permitiron ao concelleiro de
Promoción Económica asegurar o elevado retorno que beneficiou a esta actividade, de
xeito especial no día grande da festa e ao longo de toda a xornada.
“O tardeo funcionou moi ben”, sinalan tamén dende o Concello, remarcando a presenza
nas rúas ao longo de todo o día de “nenos, maiores e familias enteiras”. “Había moita
xente pola rúa; parecían as festas patronais”, comparou Óscar Durán, que non perdeu
ocasión de sinalar que a Praza da Constitución quedou pequena para acoller a elevada
afluencia, distribuída tamén polas prazas e viais da alameda municipal, aproveitando a
disposición de mesas e puntos para degustar as diferentes variedades culinarias. “Dende

as primeiras horas da mañá, para almorzar, ata medianoite houbo xente na rúa. Hai que
recoñecer que contar coa París de Noia foi todo un acerto”, sinalou. “Foi moi boa a imaxe
transmitida. Podemos sacar peito como pobo e como hostalería”, engadiu
Asumindo a importancia que tivo tamén o tempo na boa marcha da festa, o balance
positivo que realiza o goberno local tamén se fai extensivo á carpa de gran formato
instalada na Praza da Constitución e aos beneficios que continúan amosando as obras de
humanización, tanto deste mesmo enclave como das próximas Serafín Pazo e Calvo
Sotelo.

 A iniciativa da Deputación de Pontevedra contempla estancias con
pernocta de seis días e cinco noites, en réxime de pensión completa.

A Deputación de Pontevedra, en colaboración co
Concello da Estrada, abre o prezo de presentación de solicitudes para o programa
DeporTermal 2025. Os interesados poden achegar dende hoxe as súas solicitudes, coa
previsión de que o prazo se peche o vindeiro 6 de xuño.
O programa consiste nunha estancia con pernocta de seis días e cinco noites, con
entrada os domingos pola tarde e saída o venres despois de xantar, nun hotel con
balneario, talaso, spa ou instalacións de características similares da provincia de
Pontevedra. Será en réxime de pensión completa e con actividades de animación
sociocultural.
Os establecementos incluídos no programa son o Gran Talaso Hotel Sanxenxo 4*, Hotel
Carlos I Silgar (Sanxenxo), Hotel Spa Norat Torre do Deza (Lalín), Hotel Spa Galeta
(Portonovo, Sanxenxo), Hotel Novo Astur&Spa (Vilalonga, Sanxenxo), Balneario de
Mondariz (Mondariz-Balneario), e Talaso Hotel Louxo La Toja (A Toxa, O Grove). Os
prezos por persoa, unha vez descontada a subvención da Deputación de Pontevedra
sitúase entre os 233 e os 325 por estancia.
Entre os requisitos para participar no programa figura estar empadroado no Concello da
Estrada, ter 55 ou máis anos; non sufrir ningunha enfermidade ou patoloxía
incompatible co programa, así non padecer alteracións de comportamento que poidan
perturbar a normal convivencia, nin enfermidades con risco de contaxio. Tamén se
require ter autonomía para as actividades elementais da vida diaria. Para participar
sendo menor de 55anos, é preciso ter recoñecido un grao de discapacidade igual ou
superior ao 65%; posuír a condición de pensionista ou ter acreditado un respiro familiar.
As solicitudes cursaranse dende o departamento de Servizos Sociais na sede electrónica
da Deputación. Para a tramitación do procedemento, o solicitante terá que autorizar a
consulta automática de datos incluídos nos seguintes documentos: NIF das persoas
solicitantes; certificado de residencia; certificado de renda do último exercicio; consulta
de prestacións do Rexistro de Prestacións Sociais Públicas para acreditar a condición de
pensionista e certificado de recoñecemento do grado de discapacidade.

No caso de solicitantes que deban xustificar que precisan dun respiro familiar, deberán
presentar o informe do traballador/a social, nun prazo de 10 días contados a partir da
finalización do prazo de presentación de solicitudes.
Os interesados poden ampliar a información no departamento de Servizos Sociais, na
planta baixa do Concello.

 O Concello abrirá o prazo de inscrición o vindeiro luns, 26 de maio,
pechándoo o 8 de xuño.
 A actividade ofértase en catro quendas para nenos de entre 5 e 15 anos.
 A inscrición farase pola sede electrónica do Concello da Estrada e o
prezo será de 40 euros por participante e quincena, con bonificacións
para familias numerosas e monoparentais.

O edil estradense de Deportes, Ismael Pena, presentou
este mediodía unha nova edición do Campus Deportivo de Verán, unha das iniciativas de
conciliación da vida familiar e laboral máis apreciadas cada ano polas familias da Estrada
durante a tempada estival. O Concello abre o luns 26 de maio o prazo de inscrición, que
rematará o domingo 8 de xuño.
A actividade está dirixida para nenos e nenas dende os 5 anos ata os 15 anos (nos dous
casos cumpridos a día 1 de xullo de 2025). Coma cada ano, desenvolverase nas
diferentes instalacións da Zona Deportiva municipal, en horario de 08.30 a 14.30 horas.
Pena lembrou que todas as actividades deseñadas para o Campus Deportivo están
especialmente dirixidas ás idades e desenvolvemento psíquico-físico dos participantes e
todas elas desenvolven tamén, de xeito transversal, valores de disciplina, esforzo,
perspectiva de xénero, integración, hixiene e respecto ás normas en base ás idades e
características individuais dos inscritos.
O programa desenvolverase nos meses de xullo e agosto. O prezo da inscrición neste XVI
Campus Deportivo de Verán será de 40 euros por participante e quincena. Os asistentes
poderán solicitar as quendas ou quincenas que consideren oportunas, ata un máximo de
catro. Poderán entrar nas quendas non preferenciais sempre e cando existan prazas
vacantes. Ademais, existen bonificacións para as familias numerosas e as
monoparentais, nos dous casos cun desconto do 20% sobre o prezo xeral (serán 32
euros).

Os horarios e a programación das actividades de cada quenda faranse en función das
idades dos nenos, polo que non todos os participantes do Campus Deportivo farán as
mesmas actividades. Entre as que se ofertan para este verán están fútbol, baloncesto,
atletismo, bádminton, actividades acuáticas, tenis, atletismo e xogos predeportivos de
iniciación para os máis pequenos. A maiores realizarase unha excursión en cada mes, ao
parque acuático de Cerceda, en data a determinar.
No tocante ás quendas, a primeira será do martes 1 de xullo ao martes 15 (11 días). A
segunda irá do mércores 16 de xullo ao xoves 31 (11 días), sendo a terceira dende o
venres 1 de agosto ao xoves 10 (10 días). A cuarta vai do 18 de agosto ao venres 29 (10
días). Cómpre sinalar que aquela quenda que marque como primeira será na que poderá
entrar de xeito preferente. Nas quendas marcadas como, segundas, terceiras e/ou
cuartas opcións, so entrará no caso de que haxa prazas libres.
Inscrición
Por outra parte, dentro do prazo de inscrición previamente indicado, as solicitudes
teñen que presentarse obrigatoriamente a través da sede electrónica do Concello da
Estrada (https://aestrada.sedeelectronica.gal). Aqueles que non teñan posibilidade de
facelo poderán acudir ao Rexistro Xeral do Concello da Estrada, en horario de 09.00 a
14.00 horas, de luns a venres.
No tocante á documentación que é preciso presentar, dende o departamento de
Deportes sinálase a necesidade de acompañar a ficha de inscrición cumprimentada co
DNI do participante; DNI da nai, pai ou titor; tarxeta sanitaria do menor; libro de familia
ou documento que acredite oficialmente a situación de familia numerosa ou
monoparental e certificado médico no caso de enfermidades crónicas ou outras
afeccións.
Unha vez confirmada pola organización a participación no Campus Deportivo de Verán,
será preciso realizar o pagamento e achegar ou enviar o xustificante de pago ao
departamento de Deportes, situado na 4º andar do Concello, ou ben entregarllo o
primeiro día da actividade ao monitor. O número de conta no que facer o pago é o
seguinte: ES78 0081 2208 230001012603 (BANCO SABADELL).

 Incorporados os impostos, o montante polo alugueiro chega aos 17.908
euros, investimento que o rexedor estima eficiente ao no ter que
contratar a montaxe dunha nova carpa para a Feira da Sidra.
 Coida que o PSOE buscou “enlamar” a antesala da festa.

– “A min o único que me interesa é que os cidadáns gocen
da Festa do Salmón, da programación que temos deseñada, e que sexa unha fin de
semana por todo o alto na que a hostalería vexa repercutido o seu bo facer nesta cita
importante”, comenzou o alcalde da Estrada, Gonzalo Louzao Dono. Foi despois cando o
mandatario recoñeceu a súa “sorpresa” perante as críticas vertidas polo PSOE
estradense, “enlamando a aposta importante que fai o Concello por unha das bandeiras
locais como é a Festa do Salmón con afirmacións tan irrisorias como que a carpa que se
instalou na Praza da Constitución costa 100.000 euros, cando está publicado o contrato
e son 14.800 euros, máis o IVE correspondente, para un mes de programación cultural”.
A carpa quedará instalada na Praza da Constitución ata despois da Feira da Sidra,
programada para o 7 de xuño. O rexedor incidiu no carácter eficiente do investimento,
que evita a contratación dunha nova montaxe de carpa para o evento sidreiro.
A horas xa de que arranque a festa gastronómica por excelencia da Estrada, o rexedor
sinalou que non ten intención de empanar nin causar prexuízo a un certame pensado
para que a cidadanía o desfrute, limitándose unicamente a aportar o dato que figura na
contratación da carpa e a sinalar que o goberno que encabeza se decantou por buscar
contido cultural para facer desta carpa “un investimento, non un gasto”, converténdoa
en catalizador cultural entre a Festa do Salmón e a Feira da Sidra.
“Despois de instalala, facemos dela un espazo para sacar a programación cultural á rúa,
pensando no público de todas as idades. Moita programación na que nos apoian moitas
administracións e que agardamos que teña resultados favorables”, sinalou o alcalde,
para seguidamente engadir: “é unha carpa que tiñamos que montar para as diferentes
festas, tendo en conta a nosa climatoloxía, e deste xeito aínda aforramos recursos”.
“Parece que o que lle interesa a este partido é que lle vaia mal á Estrada. Criticando a
festa non está criticando ao alcalde, senón prexudicando a imaxe da Estrada. Nós o que
queremos dende o Concello é que sexa un éxito para que a gastronomía, a sociedade a
cultura estradense sexa un referente”, concluíu.

O ciclo de concertos Orballo Cultural vén de presentar a
súa edición 2025, que se celebrará entre os meses de maio a setembro. O director de
Turismo de Galicia, Xosé Merelles, participou esta mañá na presentación desta proposta
cultural enmarcada nos Concertos do Xacobeo, un acto ao que tamén asistiu o alcalde da
Estrada, Gonzalo Louzao. Este ciclo propón levar ata distintas localidades da xeografía
galega a artistas da escena musical galega. Entre os nomes xa confirmados están Xabier
Díaz & Adufeiras de Salitre e Su Garrido Pombo, que actuarán na Praza da Constitución
da Estrada o vindeiro 31 de maio. O concerto está programado baixo a carpa instalada
neste espazo urbano e terá entrada gratuíta.
Deste xeito, A Estrada súmase a nómina de concellos do programa, xunto aos de
Tomiño, O Porriño, Ribadavia, Muxía, Noia, Ferrol e Sanxenxo.
Durante a súa intervención, o director de Turismo de Galicia lembrou como o ciclo “é
unha mostra máis da aposta estratéxica da Xunta pola programación de eventos
musicais singulares que poñen en valor o territorio, a paisaxe, o patrimonio, a música e a
cultura galegas”.
Salientou o feito de que a iniciativa estea aberta a públicos de todas as idades, coa parte
que ten de poñer en valor a cultura galega. “Máis ca un festival, é un encontro cultural
deseñado para conectar os asistentes coas tradicións galegas a través da música en
directo, a gastronomía autóctona e a artesanía local, filosofía que se engloba á
perfección na liña de actuación dos Concertos do Xacobeo”. Merelles tamén incidiu no
potencial da proposta como “motor de dinamización cultural para os concellos de toda
Galicia”.
O ciclo Orballo Cultural busca unir a variada oferta musical de Galicia co patrimonio
cultural e natural de distintas localidades, de tal modo que se pon en valor a rica
variedade de opcións turísticas da comunidade. Ademais, integra a gastronomía e a
artesanía como valores engadidos, nunha proposta que quere apostar pola sostibilidade
e a igualdade, en liña co traballo da Axencia. Todos os eventos terán carácter gratuíto.
No caso do concerto programado na Estrada, está programado o inicio do espectáculo
para as 20.00 horas.

160 persoas percorrerán o próximo sábado 24 de maio as plantacións de Pardemarín,
Agar, San Miguel de Castro e Moreira e as sidrerías Rabiosa, Peroja, Camino e a Quinta
das Maceiras nunha actividade que impulsa o turismo no interior da provincia

A Deputación de Pontevedra esgotou en cuestión de horas as 160
prazas dispoñibles para participar nas Rutas das Maceiras en Flor que terán lugar o próximo sábado 24 de
maio na Estrada. Tras abrir onte mércores o prazo de solicitude, durante a mañá completáronse os catro
percorridos que discorrerán polas plantacións de Pardemarín, Agar, San Miguel de Castro e Moreira e as
sidrerías Rabiosa, Peroja, Camino e a Quinta das Maceiras, que ademais contan con lista de agarda ao
superar o número de solicitudes ao de persoas interesadas. Cada unha delas terá 40 participantes, que
poderán desprazarse desde a capela de San Roque en Pontevedra a través dun servizo de autocar.
As Rutas das Maceiras en Flor englóbanse no marco da campaña Cando volves?, lanzada pola Deputación
para promocionar a provincia neste 2025 facendo fincapé no seu interior, e permitirán achegarse á Estrada
e coñecer a vila no momento da floración das maceiras. A institución busca deste xeito contribuír a
fortalecer a imaxe do destino Rías Baixas, diversificar a oferta e garantir un desenvolvemento equilibrado e
sostible do turismo como piar para protexer e dar valor á provincia de Pontevedra.
Os percorridos distribuiranse ao longo de todo o día, con dous pola mañá (a Ruta Rabiosa, cara á plantación
de Pardemarín e a Sidrería Rabiosa, e a Ruta Peroja, que se encamiñará á plantación de Agar e a Sidrería
Peroja), de 10:00 a 14:45 horas, e outros dous en horario de tarde (a Ruta Quinta das Maceiras, na
plantación de San Miguel de Castro e a Quinta das Maceiras, e a Ruta Camino, na plantación de Moreira e á
Sidrería Camino) con horario de 16:00 ás 20:45 horas. Todas elas inclúen unha cata degustación.

 Vén detectando depósitos continuados de entullo e mobles preto da
instalación medioambiental, no espazo do antigo matadoiro, que estima
vencellados coa actividade empresarial.
 O Concello ponse a disposición dos interesados para explicar o
funcionamento do punto limpo e facilitar a autónomos e pequenos
empresarios contactos para a xestión dos seus residuos, que non poden
depositarse en Penerada.
 Lembra que estes vertidos son ilegais e que poden levar parellas sancións
de ata 30.000 euros.

O edil estradense de Servizos Municipais, Óscar Durán,
trasladou esta mañá a preocupación do goberno local despois de teren detectado que se
veñen producindo de xeito reiterado vertidos incontrolados nas inmediacións do punto
limpo de Penerada, unha situación que o concelleiro datou despois dos cambios
introducidos -en aplicación da normativa vixente- no funcionamento da propia
instalación medioambiental. Cómpre lembrar que dende a súa reapertura, tras obras de
mellora e cambio na xestión, estase limitando rigorosamente o uso destas dependencias
a residuos xerados no ámbito domiciliario, tal e como establece a lei, sen recoller os
xerados na actividade industrial.
Durán apuntou que se veñen producindo nos últimos días vertidos ilegais preto do punto
limpo, nas inmediacións de antigo matadoiro comarcal, principalmente consistentes en
entullos e restos de mobiliario, que se sospeitan vencellados ao seu depósito por parte
de pequenos empresarios que agora non atopan no punto limpo a recollida á que antes
se acollían.
Ante esta situación, o Concello da Estrada lembra a obrigatoriedade de autónomos e
pequenos empresarios de xestionar pola súa conta os residuos que xera a súa
actividade. A administración local,e concretamente o referido concelleiro, ponse ao
servizo dos interesados para explicarlles o funcionamento da instalación de Penerada e

para facilitar contactos empresariais para a correcta evacuación deste material, tal e
como se fixo hai uns días coa Asociación de Fabricantes e Comerciantes de Mobles da
Estrada para a retirada de colchóns usados.
Neste contexto, Óscar Durán puxo o acento en que xerar puntos de vertido é algo que
non se pode consentir e que, ademais, pode derivar en sancións económicas que chegan
aos 30.000 euros.
O Concello ten previsto contactar co Servizo de Protección á Natureza (Seprona) da
Garda Civil para pedir que reforcen a vixilancia neste entorno, algo que tamén se fará
coas patrullas da Policía Local. Advertiu o concelleiro que, se se abre algún expediente
por este tipo de infraccións, será tramitado directamente con Medio Ambiente para que
adopte as medidas oportunas.